大白豬老婆's Profile

特登入黎搵呢間餐廳食意粉。點知……可能我同隻豬太早食飯（晚上六點），間餐廳一個人都冇……入去點左蕃茄海鮮意粉，泡菜煙肉薄餅，咖哩煙肉飯。其實已經知道呢間餐廳食物少，以為自己有心理準備。點知一上菜，心諗：唔係咁少嘛……少唔係問題，最大問題係蕃茄海鮮意粉，海鮮都幾新鮮，但冇蕃茄味！友人點既泡菜煙肉薄餅反而有驚喜。雖然size小得可憐，但脆脆既餅皮，芝士味，泡菜辣味同煙肉夾得幾好。可惜好快食晒……至於個飯，有咩特別。如果同女仔黎食都還可以，不過男仔就真係貴夾唔飽喇！冇蕃茄味既意粉，令我好失望！…Read More

我同隻豬見未試過呢間迴轉壽司，膽粗粗試下，點知……我地拎飛時要求坐卡位，於是侍應話只有「卡位搭枱」。當我一邊應承，一邊思考緊咩野叫「卡位搭枱」時，我地被帶到卡位，不過……對面已經有兩個人坐響度！平時飲茶搭枱，起碼冇咁近兼有張枱布隔開下。今次咁近對住兩個陌生人食野，已經打左個好大既折扣！打開menu，發覺選擇唔多，最失敗既都係，除左個甜蝦刺身外，都冇邊樣覺得特別好味，又食得唔飽，結果……埋單食左接近三百蚊，換黎得六成飽，要走去sogo食雪糕！我老公平時食野已經係非常是但一類，但今次一出門口就話：「blcak list！」…Read More

趁老公豬放假，難得豬大人點名要食呢間，咪同佢食一次囉！原來隻豬為左碗冬蔭功而來。初時見到碗野紅得好緊要，我仲擔心會好辣……點知飲落口，酸酸地幾有曼谷風味，唔算辣。隻豬仲可以一個人飲晒碗冬蔭功！要講辣，反而係泰式鳳爪。辣椒唔多，但大量生蔥生洋蔥，夾埋D味辣到呢……不過算幾好食啦。至於午市套餐既海鮮炒飯，不過不失，飯有D濕。最後係侍應問題。我唔覺得侍應不足，但問題係服務太慢囉！冇人帶位，隔離張枱走左成十分鐘都冇人執碟執枱，好奇怪囉！…Read More

本人係生腸王，特登去試肥姐，睇下有幾好味。排隊既人唔多，好快買到生腸。平時食生腸，六蚊一串分分鐘仲硬過我條命，但呢串生腸都係賣五蚊，非常新鮮好味。係個汁太多芥辣啫！連我隻豬平時唔食呢d野，都話一試好味！…Read More

星期日同隻豬睇戲前醫豬，突然想起呢間野，於是六點鐘拿拿林走去等位。服務怪怪的係指，我地去到，侍應循例問要bar枱定order枱，因為bar枱要等。咁我地話等bar枱，但之後佢冇俾反應我，我地兩隻傻豬只好等佢反應。後來既人同樣遭遇，呢位人兄識反擊啦，佢話：咁你都俾張飛我先啦！佢地都要攪一輪先派飛……總知係咁就坐order枱啦，因為望出朗豪坊都幾好feel。食物方面都ok啦，特別推介：元貝食到鮮味，炸軟殼蟹個天婦羅漿唔會到食成口油，又唔硬，能夠封住蟹味，good！不過有d壽司飯有梅子味，sorry，我食唔慣，唔識欣賞。…Read More

兩隻豬放工搵地方食飯，突然想食大排檔，於是去瑞和街街市試下劉記。其實去呢類街市熟食中心，唔好期望衛生環境好好，我個人覺得呢度ok既！至於食，由於唔想食辣，試唔到師傅鑊氣，只試左以下三樣：蒜蓉豬扒──好多豬扒同好多洋蔥，但好少蒜蓉！白灼花螺──都食到花螺鮮味既，但係送個碟甜辣唔駛放咁多油喎！油鹽水煮蜆──蜆肉細但都好大碟，食到底先知原來有好多粉絲……但經時間同鹽水既薰陶，好鹹！總括黎講，冇咩要求下呢度都ok既。順帶一提，好多人帶埋狗仔去個度食飯，當晚坐左一個鐘就有兩枱有狗！…Read More

星期六同隻豬去觀塘麗東食自助午餐。其實收得呢個價錢都唔好有咁大期望，但估唔到都幾OK喎！冷盤：上面位人兄話魚生未解凍，但我個日食既都解凍晒，而且好新鮮。熱葷：唔知點解好多海鮮，冇豬頸肉冇牛肉……甜品：好正喎，賣相吸引，食落又唔錯。尤其是法式拼盤，口感軟綿綿好得意。聽侍應講甜品師傅響柏寧酒店過黎，水準有番咁上下。總括黎講，食物份量唔多，但都好食既，特別係星期六真係好少人，個日我由十二點坐到一點九，全場三十人唔夠！想靜靜地傾下計食自助餐，呢度係唔錯既選擇！不過平日工廠區既人會黎食lunch，反而會好多人。我亦好同意剛才人兄所講，侍應收碟真係好快，對客人亦都好nice。…Read More

尋晚同朋友一齊去板長，其中兩碟都幾好食：一碟係三文魚腩，一碟係貝柱，好鮮味！但我有一個迷：朋友叫左碗麵鼓湯，只見成碗湯好多油，滿佈海草，但飲落去完全冇麵鼓味之餘，兩個人都飲唔出係咩野味。呢個迷都唔知搵邊個同我解開！…Read More