itkeith's Profile

以前每個禮拜都會去幫襯，搬咗新鋪後，已經唔同以前。首先講服務，以前走小店風格，D侍應個個都ok有啲仲幾nice；新鋪已經唔覺有以前D人（除咗間唔中見過下以前舊鋪個日本仔外），好似已經換晒人。Fine，但D侍應個個木口木面，尤其男性侍應⋯⋯再講野食。依家細碗咗，叉燒得番數唔到係一定兩片仲要係薄薄咁，配菜加晒價。幫襯過幾次，感覺已經好唔同，而依家發覺新鋪亦冇以前咁多位人排，好多時去到即有位兼且唔full，自己亦漸漸改去另一間人氣拉麵店。…Read More

其實唔想做份工可以唔做，D客冇欠你。黑口黑面指指點點又冇禮貌，就算嘢食點好都補救唔到，何況一間普通茶餐廳。真係去一次冇下次，香港飲食業真係比呢啲鋪頭拖累晒！！！…Read More

以前想响荃灣打邊爐，第一時間就會諗起呢間牛之鍋，因為佢幾多嘢食，啲牛、豬質素幾好，甜品又多樣化，其他食物種類都多，CP值頗高，不過依啲都係幾年前嘅事。最近幾次幫襯，發覺質素下降咗好多，嘢食少款式少之餘，佢主打嘅牛質素亦都開始下降。上星期諗住俾多次機會佢，嚟多次試吓，點知亦都係最差嘅一次。先講食物種類，好明顯冇咗好多嘢，丸類得嗰一兩隻，連墨魚丸同其他火鍋類包心丸都冇；再講牛豬羊質素，以前係一大大碟，牛都係有晒脂肪紋，依家嚟嘅係普通肥牛咁，好失望！我哋張枱算好，因為冇乜點漏單，隔籬枱食最貴嗰個set，漏單漏到七彩，要嘈到去類似經理嘅店員先有得食。我想話，如果繼續咁嘅經營方法，遲早都流失好多客，而我亦都唔會再幫襯呢間店舖！唯一可惜嘅係荃灣區少咗一間好嘅火鍋店。…Read More

尋晚去到金百利附近，想食日本嘢，上OpenRice 搵到呢間嘢，不過睇評價，睇D內容同手法已經知咩事，anyway照入去。第一次幫襯，叫咗四樣嘢，雜錦魚生飯、三色燒牛肉卷、燒魷魚筒同芝士鰻魚卷，四樣都好一般。質素同一啲日本速食店差唔多，刺身飯D刺身預咗係普通貨色，但收你百幾蚊，其實係咪應該比返多少少D客？！三色燒牛肉卷最重要嘅係，以質素計呢個價錢其實好唔值。服務就ok。…Read More

今日突然想入西貢行吓，去到見到呢間嘢，好似幾多嘢食就入咗去。望下餐牌，見D嘢食同價錢都ok，最後同老婆叫咗兩個set lunch，餐牌話有例湯、主菜，飲品就再加$8。等咗陣，上咗杯飲品，跟住就已經主菜，咁食咗陣再問侍應個例湯仲未嚟啦。點知個侍應竟然話：「依家我哋無做例湯，因為之前比客，D客都唔飲，所以依家冇例湯哪⋯」嘩，我頂吖！如果冇例湯，咁你唔好寫响餐牌啦！你寫咗有但其實冇，咁即係點？！我即時O咗咀！況且你咁答，其實你哋D嘢係咪好唔得？！雖然只係一碗例湯，我哋都冇同佢理論，但你哋咁樣做生意，真係叫人點會番轉頭？又，咩叫set lunch 呢？！…Read More

以前每星期至少幫襯一至兩次，都叫做熟客，服務質素心中有素，但魚湯叫做純天然，ok。但冇幫襯一排，今晚再去真係有少少火都嚟！由於朋友遲咗到，所以入店坐住先（當時6:00左右）。坐唔夠一陣，亞姐問我另一個朋友幾時到，好似好不耐煩阻住個位咁，咁答佢話朋友已經行緊過嚟，大約幾分鐘之後到啦。過咗唔夠2分鐘，短髮戴眼鏡亞姐又過嚟問同一個問題，好明顯唔like，我忍唔住串咗佢：「依家呢個時間，你出邊都冇人排隊，又有空位⋯」跟住收咗聲。其實我諗，你知我兩個人又比我入嚟，呢個時間又未到peak hour，店入面又有空位，你催乜啫？！咁嘅服務態度真係熟客先忍得你！Btw，食物質素依舊，但咁嘅服務，我諗我身為熟客都唔會點樣再幫襯。…Read More

見新開張幫襯吓，新裝修靚咗，但價錢拍得住美心皇宮，諗住會有驚喜，點知點心嚟到，個賣相係好似high咗，但質素同平時稻香一模一樣，已經覺得中伏！再講番之前落單，又要跟其他食店咁嘟QR code，但電子menu入面又唔係齊晒咁多種食物。問侍應攞支筆劃點心紙又話無筆，老點番叫你落電子單，咁你哋叫啲客如果想食電子menu無嘅點心可以點做呀？目測隔離果枱因為落單程序太混亂，坐咗一陣即閃！咁嘅環境叫人點會去第二次吖！…Read More

已經唔係第一次幫襯，不過呢間嘢越做越衰，講嘅唔係食物質素，而係佢哋D服務態度⋯⋯今日去，上2樓見大把位，我兩個人，其實搭枱無問題，但啲waitress 迫你一定要搭D豬頭二人位，近行人通路，D亞姐推車又撞嚟撞去。同個waitress 講，可唔可以轉另一張枱啦，點不知仲換嚟凶神惡煞嘅回答，好似之前得罪過佢咁。喂大佬！你咁多位淨都要限住人一定要坐果一張枱，有無搞錯！其實呢個情況已經係第二次，第一次經歷一模一樣，以為係上次個waitress問題，點不知今次換來第二個waitress，態度都係一模一樣。呢間野永遠唔會再幫襯！…Read More