spaghettipoon's Profile

以前欽州街有間叫「圓圓」的台飲店，好好生意，唔知點解突然結業，真心可惜。但近日發現「圓圓」小姐回歸深水埗，當然去回味下。現於西九龍中心八樓美食廣場的圓圓小姐，同昔日的「圓圓」分別不大，舖位雖小，五臟俱全。我叫左「圓圓珍珠炭焙烏龍鮮奶茶」試下有無以前咁正，另外叫左杯「鮮奶三重奏」。圓圓珍珠炭焙烏龍鮮奶茶最回味係「圓圓」的黃金珍珠混黑糖珍珠，煙韌的咬口，珍珠的味道唔會太甜，加上鮮奶同烏龍的比例恰好，烏龍茶保持住茶香，讚。鮮奶三重奏（走甜）何為三重奏：鮮奶加上黑糖珍珠，芋薯圓及嫩仙草。呢杯野令我真心驚喜。本來我都唔係太喜歡鮮奶，但配上三重奏，啜落有滑滑的嫩仙草，芋薯圓軟淋，同黑糖珍珠的煙韌，三重口感又真心係我杯茶，重重點推介。…Read More

大仔上完堂，佢見到有間門面好似美食車的舖頭叫我行去睇下，原來係外賣海南雞店的可可豬，我懶懶地煮飯，於是就係度外賣返去做晚餐一大袋外賣攞住去坐巴士返屋企都好重手，重點係d湯好熱辣辣，用我大脾墊住，真係好熱。返到屋企，飲啖熱湯，當堂暖哂，大仔一飲就話碗雞湯好味😚青木瓜蝦沙律（$30）：材料都好豐富，有蝦，黃及紅車厘茄，青木瓜絲，紅蘿蔔絲同西芹絲。用料新鮮，蝦好爽口，菜絲類咬落去都好爽脆。再混埋盒底的汁，酸酸甜甜好好味🤤特色椰香海南雞飯（$38）：椰香飯有好香椰味，食落香而不膩，而海南雞都好嫩滑，點埋個似香草味而帶甜甜地的醬，大仔都話岩哂佢口味，整個飯大仔超鍾意😋首創竹絲海南雞飯（$52）：竹絲雞飯叫比自己，平時多數用竹絲雞黎煲湯，可可豬用竹絲雞黎做竹絲海南雞，好大膽創新。真心估唔到又真係做到d竹絲雞咁滑，值得一讚，可以安哥金羅漢果養生茶（+$12）：飲落有金羅漢果的甘甜味，仲有菊花的香味，眼見仲有杞子，同最後食左塊陳皮落肚，潤哂熱情豐盛（+$12）：大仔話佢酸酸甜甜，又食哂d熱情果籽，就知大仔有幾鍾意呢枝飲品😌大仔對呢餐外賣非常滿意😘…Read More

今日同家姐去土瓜灣睇樓，走個時有d肚餓，去隔離商場行下睇下有咩食，新商場裡，只有有一間連鎖食肆，而另一間係花火食堂，於是就試一試新野。豚骨湯和風野菜雜菌烏冬 - 家姐話下午茶，所以食得比較清淡d，材料有椰菜，海帶，木耳絲，鮮冬菇，半隻糖心蛋等；而烏冬好煙韌彈牙，配以豚骨湯底味濃厚，估唔到家姐食哂，湯都清埋👍鰹魚湯美國特級牛肩胛拉麵 - 我就當呢餐係晚餐咁食😅以牛肩胛做主，薄片上，份量算多，煮得剛好熟，口感淋，富牛味；拉麵新鮮煙韌彈牙，鰹魚湯清，我至 like名古屋雞翼 - 名古屋醬汁，似係甜甜地豉油醬，而雞翼係新鮮炸起，都幾好食，可以加d芝麻，會更加好。花火食堂主打快捷的日式便當，麵食為主，非常適合對面幾間小學，中學的學生作午餐。…Read More

每次同阿仔坐巴士經過阿里山，阿仔都話想食呢度的蛋糕，於是今日突燈走出黎買比佢，比個驚喜佢🤩阿里山呢度雖然麻雀雖少，但五臟俱全，而且係玻璃窗廚房，顧客可以睇哂師傅整蛋糕的過程，令顧客對呢度嘅品質信心會大d，而我岩岩就見到師傅打忌廉，好利害👍當我正想要原味蛋糕之時，撞正柚子味出爐，我又怕食唔哂，放落雪櫃無新鮮咁好食，店員就話可以半個半個買，實在太好喇，可以試到兩隻味道。阿里山原味道：蛋香濃厚，質地鬆軟，帶濕潤，又唔會太甜，好食。日本柚子蜂蜜：日本柚子加上台灣蜂蜜，的確食得出同原味多左一點蜂蜜味，真係好岩用黎做蛋糕，而柚子味香濃，只是略嫌柚子有少許烘燶，可以更好。呢度始終都係住宅多，主要做街坊生意，店員仲話晚上會做優惠，益街坊，等阿仔放學，多d黎睇下先。…Read More

今日早收，行左去蘇屋邨個邊行街市，見到有間舖頭有d街坊圍住，於是走埋去八卦下，原來係一間新開無耐的燒味舖，個名幾特別叫「燒味滷師」。周圍望到舖頭 d 易拉架，都係新店開張嘅優惠，單雙拼都只係$22，非常吸引。半隻雞都只係$30，全隻就$69；怪不得吸引左咁多街坊嘅好奇心，包括我。見咁抵食，我都忍唔住出手，買左鵝上庄，半斤燒腩仔，半斤叉燒同埋半邊豉油雞。舖頭話大唔大，話細又算不上，係買賣過程中，都已經係電腦化，仲可以用八達通付款。斬完d燒味，店員都會抹一抹盒d油，返到屋企成盒野真係無肥淋淋。坐巴士返屋企途中，可以聞到盒內燒味嘅香味，聞到已想食，正。燒鵝上庄：最讚係燒鵝汁另上，唔會令到上面同盒底d鵝唔同油度同咸度。其他舖頭，食到底個d就好油同咸左，唔夠均勻。而呢度另上鵝汁，係另有一番滋味。燒鵝皮脆，可見燒出黎之後，擺放時間唔係好耐，仲好新鮮。鵝肉夠厚，而且好嫩，一d都唔會老而鞋。燒腩仔：皮脆，肥瘦適中，味道均勻夠入味。大仔最鍾意最讚：呢度d燒腩仔靚喎。當然靚喇，你食哂喇！叉燒：我最鍾意呢個叉燒，夠淋夠滑夠蜜味，我最愛食叉燒頭，連叉燒頭都好淋滑。豉油雞：生熟岩岩好，雞肉嫩加滑，連雞胸位d肉都唔鞋，唔食雞胸嘅我，都肯食。店內仲有滷水鵝，滷水鴨，燻蹄，海蜇等等，下次早收再出手。…Read More

今日同阿仔去覆診，間場有一個空檔時間，所以走左去茶湯會，可以坐下，hea 下，飲下茶，食D野。呢度唔算大，但勝在夠簡潔，坐得舒服，而家好少台式飲品店有得坐喇。燕麥觀音拿鐵一向愛好珍珠奶茶的我，見到其他食評話有呢個新產品，又見天氣又凍凍地，所以加埋珍珠試一試。果然食評無介紹錯，我好欣賞呢杯茶，首先鐵觀音的茶味夠香夠濃，撞上牛奶燕麥又好夾，係估唔到咁好味，對我黎講係驚喜。新鮮水果茶叫比個仔飲當然係水果茶。水果茶主要有蘋果、橙、火龍果及百香果。百香果真係好香，味道最突出，但仍然可以嚐得到清香的茶味，整杯飲品酸酸甜甜，阿仔好鐘意，飲完仲食埋 D 水果，而果肉都好新鮮，蘋果又爽又甜。爆漿珍奶吐司我地仲叫左個爆漿珍奶吐司，係奶茶嘅「珍珠」加「煉奶」做成飛碟，飛碟新鮮出爐，夠脆口好好味。好鐘意食煉奶嘅我就好鐘意，阿仔就食珍珠。呢度仲有其他小食，下次都會係呢度坐下 hea 下。…Read More

太耐無出街，今日同阿仔出去旺角行下，旺角靜左好多，想行下女人街，點知d街檔直頭無開，以前只會望見行緊個邊的食肆，而家反而突顯左兩邊的食肆，見無野行，於是去左一間試業的新糖水店買外賣返屋企消夜。呢間舖頭個名幾特別~仁芝初=杏仁露、芝麻糊同搓湯丸🤔我係咁諗😆呢度舖仔細細，裝修簡潔，牆上以超人為主題作粉飾。而個甜品餐單簡單直接，設計上卻見心思，無論封面的插畫，至內頁以繪畫形式介紹糖水，真的不簡單，呢兩位創業的年輕人，我真心欣賞。最後，我由旺角坐巴士返慈雲山，三碗外賣糖水一漏不漏，熱的糖水仲係暖嘅，最欣賞係個蓋，令倒汗水不會滴返落碗糖水度。熱生磨芝麻糊~芝麻糊夠香，夠滑，無得彈。熱夠薑蕃薯糖水~夠薑，夠辣，係我至愛的蕃薯糖水口味。凍楊枝甘露~滿口的芒果香味，加上金柚，更突甘甜，阿仔至愛。香港的糖水市場都爭得好利害，以「仁芝初」小店經營，希望可以努力生存下去。…Read More

麗閣街市裝修完之後，變左個food court，每次行過都見到好多不同類別的小食檔，今日終於過黎試下。今日就試下呢個牛什粉麵先。隔個塊玻璃窗已經好吸引。周圍亦有濃濃的牛腩香味首先叫左一個：三寶撈粗配凍奶茶，三寶係牛腩、牛筋同牛肚。牛三寶覆蓋整碗麵，份量十足，還有菜心。牛腩肥瘦分明，牛味十足，肉質夠腍，亦唔會覺得肥膩；牛筋同牛肚炆得夠軟腍、夠入味。粗麵亦十分爽，無揀錯。食完成碗麵，亦唔會攝牙，讚。另一個係：崩沙腩併墨魚丸湯粗麵配凍檸檬茶，再叫多個腐魚通菜。崩沙腩的肉質比牛腩更鬆化，雖然牛味不及牛腩，但我更喜歡崩沙腩的口感；墨魚丸有兩粒，係彈牙嘅，但當然無牛腩製品咁突出。腐魚通菜，食肉不離也要食多D 菜，始終均衡係好重要。整體黎講，街坊小食檔，以呢個價錢同品質，真心係抵食，同大集團比較，又大件、又抵、又好食好多倍。…Read More

旺角雅蘭、朗豪坊一帶四周都好多野食，今日行經呢頭，搵一間入去試下，我地揀左炸雞K對面入口的「夫妻沸片」，好台式，以竹、木裝潢好吸睛。落到去地庫，雖然整體面積唔大，但裝修得真係好特色，呢度其實主打台式麻辣火鍋。但今日我地黎食普通午餐~我地兩個餐都係配乾拌麵走辣，有前菜及凍竹蔗茅根水~先說前菜，有滷水豆腐，入味好食；鴨血密度幼滑。而乾拌麵好掛汁，充滿台式風味，麵質好咬口，係好食嘅拌麵，還有溏心雞蛋拌吃。主角一個係美容養顏花膠雞濃湯~先說湯好多花膠，雞件剛好熟，好滑，雞味十足，還配搭少許娃娃菜，整個湯濃而不膩，飲哂。另一個係夫妻麻辣湯半牛肚半肥牛~麻辣湯麻而不算辣，牛肚細膩爽口滑，肥牛則較普通。每個餐再加左老油條同拍青瓜雪耳。老油條新鮮炸起，好脆口，好好食。拍青瓜雪耳反而最夠辣，青瓜清脆而充滿瓜味，雪耳係厚肉爽口，最正。…Read More

呢度的粥以煲仔上枱為特色，保持到粥的熱度之餘，呢度的粥我覺得無咁易稀。貴妃雞粥配豉油王炒麵及凍檸檬茶走甜（$58）~貴妃雞粥夠嫩滑，雞皮彈牙，果然係招牌雞粥。豉油王炒麵夠熱身，夠色夠味道。生滾豬潤粥配蘿蔔糕及凍檸檬茶（$45）~豬潤份量十足，豬潤味溶入粥底內，愛好者的我會覺得好好味。蘿蔔糕新鮮煎起，唔會成口粉，亦唔會太削，。酥炸魷魚鬚（$55）~好食，炸粉略似K字頭雞，呢度D魷魚鬚卜卜脆之餘，又唔會成口炒粉，新鮮炸起，特別好食，推介。…Read More

今日出旺角買文具準備開學，買完已經係午餐時間，所以食完午餐先歸家。行行下，無意中找到OCIO……午餐都已經好多選擇，但太肚餓喇，於是大家都各自叫左一個意粉，還有餐湯及餐飲。先黎粟米忌廉湯及凍檸檬茶走甜和 iced house coffee。照燒汁牛柳粒意粉（$58）~牛柳粒充滿牛肉香味，有肉汁，一d都唔鞋口。意粉軟硬度適中，味道均勻。黑松露卡邦尼意粉（$65）~黑松露香氣滿溢，蛋黃醬比例適中，意粉內的煙肉，磨菇都豐富。來個簡簡單單一個午餐，已夠享受。…Read More

星期六，等家姐放工食午餐，今次同家姐去726十七樓試吉列牛。吉列牛定食（$ 148）〜有前菜，麵豉湯，飯，同主打的吉列牛。吉列牛，放上熱石爐燒，可以根據自己想要的熟度處理。牛有牛味，外層脆口。八成熟，唔會韌，點芥末食，好味道。咖哩忌廉牛肉鳥冬（$ 78）〜咖哩鳥冬收埋左係白雪雪的忌廉下面，忌廉好滑，唔會太甜。烏冬好煙韌，咖哩就係日式甜咖哩，整個配搭又好夾。牛油蜜糖單骨雞翼（$ 65）〜最愛吃雞翼，出外食單骨最方便，蜜糖甜蜜蜜，加少少檸檬汁，好開胃又好食。…Read More

見朋友去麵麵食，食完個個都話好食，今晚我就去試下。一坐落，未點餐，已經奉上精緻兩杯仔花膠濃魚湯，魚湯係奶白色，味道鮮甜，好清，無乜油，又無魚腥味。安格斯牛肉漬定食配魚烏冬（$148）~呢個定食好豐富，我分為：前菜有秋葵椰菜配胡麻醬，好開胃，好fresh，最愛食秋葵；小食係卜卜魚脆，好脆口；湯就係花膠濃魚湯，飲大碗d係飲到有花膠味的；主菜當然係安格斯牛肉，牛肉薄切，配以洋蔥菇類炒，嫩夠牛味，洋蔥清甜易入口。配魚鳥冬食用，魚烏冬係有50%魚肉，比起平時食的烏冬，有咬口。最後我認定沙律上的哈蜜瓜係甜品，所以圓滿了這份定食。極上魚宴料理配魚麵（$95）~配餸有魚皮菜肉餃子，墨魚春卷，魚肉春卷，鮮蝦同魚蛋。魚皮菜肉餃子個皮好煙韌好好食，墨魚春卷都好彈牙，魚肉春卷夠脆口，鮮蝦爽口，魚蛋有魚味夠彈牙，每樣配材都好好味，至於個魚麵就係我最推介，魚麵有70%魚肉，麵條幼細，咬落去好爽口，好彈牙，配埋魚湯，真係無得頂👍跟餐飲品有凍檸檬茶走甜（$+3），同凍海鹽焦糖咖啡（$+13）都幾好飲。咁多朋友仔都黎麵麵食，都真係無介紹錯，下次可以試埋佢其他小食。…Read More

話說，曾幾何時第一次食自助餐係仕德福酒店內，於是心血來潮，去睇下有咩優惠，見佢7月份任點任食任飲有折，所以打去睇下有無位，我估佢都幾 full ，因為我 book 星期六已經無位，唯有 book 平日，但可惜都要去到第二輪先有位，咁都無所謂，就係今晚，我開動 buffet mode 喇。一出𨋢，就見到大堂中央位置放滿的食物有甜品、湯；法國羔蟹、松葉蟹腳、藍青口、熟蝦、雜錦刺身、自助沙律吧等。經侍應生帶到位後，就見到枱面放了點菜紙，主要係點餐前小食同熱食等。點菜紙上都算多選擇，我點左：蒜籽燒大蝦~蝦爽有蒜味。X.O.醬炒蜆~好食，好有味，蜆係新鮮嘅。香草牛油焗青口~香煎胡椒牛肋片~另類煮法，又幾好食。韓式煎豬腩~唔食豬腩嘅我，都覺得食落口唔算肥，可以一試。日式照燒鯖魚柳同法式田螺盅~呢兩個我麻麻地。金銀蒜粉絲蒸蠔~做法似蒜蓉蒸蝦，都ok。紫蘇煎羊扒~最好食，有 encore。全部都熱上枱的，唔錯。出去攞的食物：凍海鮮盤~ok嘅，我怕蟹麻煩要剪蝦，所以以我 encore 左蝦幾次。刺身~厚切，味ok，新鮮。金必多酥皮海鮮湯~夠熱，裡面有海鮮料，算唔錯。牛腩夠淋。烤紐西蘭肉眼~好食，唔柴。西湯，楊枝甘露，生滾蟹粥同中湯，都ok。Encore 蝦👍迷你冬菇雞飯，有諗頭，ok。自助甜品：食哂都唔會覺得漏喎。仲有雪糕。以$300的價錢黎講真心算唔錯😋…Read More

家姐就黎生日，想搵D 比較好，又坐得舒服D 嘅餐廳，當然我唔介意比貴少少喇。係Openrice見到Misu的食評唔錯，所以過黎試下。餐廳環境好舒適，門口就係一個大魚缸，養住d新鮮食材，另外坐位望向山，好舒服。我地叫左個精選套餐$288/位~時令野菜沙律~有沙律菜，青瓜絲，仲有蟹籽仔，撈埋日式胡麻醬，好開胃。新鮮南非磯煮鮑魚配鮑魚肝醬~鮑魚真係好似溏心鮑魚咁，而且好嚼口。如果再加埋鮑魚肝醬，更加突出鮑魚本身的鮮甜味。麵豉湯~麵豉湯裡面有兩隻蜆，蜆肉無沙，好新鮮好甜。刺身三款~三款都好新鮮，刺身係厚切，口感好豐富。壽司盛合六件~鯛魚、炙燒三文魚、甜蝦等，壽司上的魚生新鮮，壽司醋味同黏度剛好，令壽司完整不鬆散。寶雲酥羊架~有三件，唔洗太用力就可以切開，都已知羊架夠淋。切開後入面充滿肉汁，羊架肉質好嫩，外層脆脆，調味得宜，再配以沙律食用岩岩好，最推介呢個羊架。…Read More