KathLamps's Profile

Savvy 嘅晚市除咗 à la carte menu 之外，亦都有一個 All You Can Eat 嘅選擇，但如果你係想去酒店食一般自助餐嘅形式，即係有海鮮生蠔刺身壽司任食嘅話，”唔好嚟”！對熟食或者肉類唔係太多興趣嘅話，”唔好嚟”！呢度嘅 all you can eat 形式，其實係一set海鮮拼盤 (每個人每款食物各一件，而且只會嚟一次冇得再reorder)！現場就會有少少凍海鮮 (麵包蟹、凍蝦、青口，辣蜆)、沙律菜、湯、芝士、麵包係可以任食。另外大概有廿幾款熟食係自己scan QR code落單，飲品係每人包一杯，甜品都只係每人包一件！成人價錢每位 $668另加10%，小童每位 $188另加10%，而每位成人攜帶一個11歲或以下嘅小童就唔使收錢 (但唔包海鮮拼盤同甜品)！即係一位成人可以free一個小童。抵唔抵食就真係見仁見智，例如我鍾意食海鮮同任飲嘅，呢度就確實唔抵喇！不過去得多同集團嘅Three On Canton (有龍蝦長腳蟹生蠔等海鮮任食，飲品亦都任飲)，朋友想試呢間照嚟試吓啦！要讚嘅係餐廳裝修係幾舒服嘅，員工嘅態度好好👍🏻p.s. 我 join 咗 Marco Polo Elite 嘅會籍，嚟Savvy食嘢係有八折，折咗之後就每人$601…Read More

荔枝角有好多餐廳，但係亦都有好多人喺呢頭返工！不過，12點食 lunch 嘅話其實都有好多選擇，所似好少會去呢一間608，曾經試過一兩次堂食，粉面常餐嗰啲都冇咩唔妥嘅，不過地方比較迫，坐得麻麻地。今日同事們決定叫呢一間608嘅外賣，我見攰攰地，就唔出去食，join 大家一齊叫外賣啦。點知呢個決定真係錯到離晒譜！！！:(叫咗個午餐沙薑雞飯，配例湯同嘢飲，加埋外賣盒錢總共$51，但冇諗過咁差表面睇落去都冇乜嘢，份量唔算太多但都OK啦。但一夾開舊雞就出事啦，骨位血紅色咁，見到都唔想食！啲沙薑係糕狀咁，雞唔嫩滑、飯好硬成個餐最正常係碗例湯，同杯凍檸茶！可能堂食會好啲，不過我唔會再試。…Read More

每個人對自助餐嘅喜愛都唔同，有啲人特別注重甜品嘅種類，有啲人又會希望有多啲熟食; 而我，就對海鮮非常重視！最理想就係有齊即開生蠔、龍蝦、長腳蟹等等。已經有一段時間冇去過凱悅酒店咖啡廳食自助餐，可能都有一、兩年嘅事... 曾經我都幾欣賞佢哋，雖然冇生蠔，但係有新鮮即煮嘅龍蝦任食！係任食！ 普遍酒店自助餐嘅龍蝦都係急凍嘅，新鮮即煮真係好難得，亦都係好好味！近期staycation流行，本來我同朋友只係打算食自助餐，但每人加多三百幾蚊就可以住埋房，所以我哋都揀咗呢間酒店，諗住可以好好咁食龍蝦！但原來酒店已經改咗政策，每人只有一隻龍蝦，可以揀芝士焗、蒜蓉蒸或者燒。聽到之後簡直覺得晴天霹靂！好失望！海鮮方面，可以任食嘅只有長腳蟹、翡翠螺同青口。刺身方面只有幾款，中後段師傅先拎少少帶子刺身出嚟，整體來講都唔係好吸引。熟食嘅款式亦都唔算太多，全場可能係甜品方面比較吸引，可惜我唔太喜歡食甜品。飲品方面，現場有水蜜桃梳打，不過唔好飲。另外仲有椰子沙冰、乳酪沙冰。感覺有啲奇怪 每位包一杯餐茶，加$78 可以任飲果汁汽水，加 $98 就可以任飲紅白酒。睇其他食評有人話自助晚餐抵食，講真，凱悅酒店咖啡廳嘅自助餐並唔平喎！週末成人自助晚餐，每位$698，當你有八五折，都要$663！呢個價錢可以喺其他酒店食到更多嘅款式，無論係海鮮定係熟食。所以，個人嚟講真係絕對唔會推薦呢一間。…Read More

其實已經去過潮福好多次，因為住得近，不論係飲茶、晚飯小菜、任飲任食火鍋，以及蒸鍋都試過，質素真係唔錯嘅！今次唔特別講蒸鍋或者火鍋喇，因為都有好多其他評語，況且，蒸氣火鍋嘅食物其實來來去去都係嗰幾種點解會話意外驚喜呢？係近期有一個象拔蚌刺身優惠，$498 原條象拔蚌刺身！好多其他火鍋店嘅象拔蚌刺身都起碼成千蚊，仲可能只有一斤左右。但係呢度嘅象拔蚌刺身竟然係差不多有兩斤！！真係鮮甜，鍾意食嘅話真係覺得超級正！！…Read More

一月份食過一次，感覺唔錯，$48 有五餸一麵，仲包罐汽水，加$3可以轉即沖飲品。就咁聽可能覺得好貴，但其實份量都唔係少，都夠滿足講真，隔幾條街嘅文記，呢個價錢可能得一、兩款餸咋！對我嚟講，食嘢最好大堆頭五個餸就真係 very good 今次我揀咗水魷魚、滷水豬大腸、陳皮魚蛋、蒜香雞翼、牛丸，油麵配麻辣汁。本身好鍾意食水魷魚、豬腸、魚蛋，呢度嘅陳皮魚蛋真係正，陳皮好入味！魷魚同豬腸都唔錯，牛丸同炸雞翼就一般啦。麻辣汁都ok，夠辣朋友就揀咗糟鹵豬手、滷水豬大腸、手打魚肉、韭菜餃、牛柏葉，油麵加底 ($10)，配腩汁。朋友話豬手同豬腸都唔錯，其他就一般啦。飲品方面，汽水就唔使講啦，凍檸茶又沖得幾好喎！茶味夠濃啱晒我呢啲 “檸檬茶精” 會再幫襯！…Read More

Happy Friday night 食好少少！想食刺身+火鍋，但發覺油尖旺區得返好少選擇，好多都已經試過，又唔係咁想去旺角因為太多人坐得比較迫！一路係OpenRice度睇緊有邊間好食，突然見到呢一間 “響 Hibiki” 燒肉放題，睇咗其他人食評同埋相，都幾吸引！不過見價位較高，同埋原先冇打算食燒肉，所以略過。。。但係睇多幾間都係俾佢啲相吸引住，所以即管打去問下有冇位，七點幾打去，佢話8:45可以有枱，咁就一於去試吓啦:)去到見到地方唔算太大，但係都好企理，等左幾分鐘就有卡位俾我哋兩個人，坐得都OK！冷氣好強勁！一開始唔洗寫嘢食住，佢會先送一盤刺身，再上海鮮 (一次)，肉類之後唔夠就自己再寫！刺身都好新鮮，油甘魚同帶子:正！肉類方面，和牛真係無得輸！值回票價飲品選擇都有好多，鍾意飲酒嘅一定好開心因為有清酒，啤酒，紅酒，白酒都係任飲！另外仲有汽水，果汁，熱茶！雖然價錢比一般放題高，但享受係唔同層次嘅！下次要叫多幾個朋友一齊去食，開心啲！星期五晚收費 $488 加一，但做緊優惠有八折！最後埋單 $879 兩位！…Read More

原本諗住喺OpenRice睇下有咩火鍋好食，突然間彈咗個好似廣告嘅嘢出嚟，有得任飲紅白酒，任食龍蝦，仲有買一送一！好似好抵！所以click咗去睇吓，見到原來係限定優惠，只限今日4/21，雖然要過海去到西營盤，但其實都唔算太遠，一於訂座試吓啦！一去到見到環境唔算太差，地方唔大不過坐得都算舒服，唔迫！友人一枝箭咁去試紅白酒香檳，覺得白酒最好喎仲有蘋果汁，檸檬茶，咖啡可以自己沖，相當唔錯！即煎龍蝦件都幾吸引，香辣口味！但基本上全晚都要排隊等，因為一出就好快俾人夾晒，要等佢重新煮，每次都差唔多要等10分鐘:( 熟食方面唔算太多，我只係試咗桂花螃炒蜜豆，芝士海鮮意粉，普普通通啦。刺身有三文魚，八爪魚，吞拿魚係由酒店員工即時按你要求切，另外有甜蝦，虎蝦，北寄貝，鮑魚片係放出嚟自己夾，仲有幾款壽司，刺身都ok呀！除咗龍蝦，長腳蟹係意外驚喜！夠新鮮又鮮甜！我同友人起碼食咗20隻。。。6:30 食到 9:30，時間都好足夠！最後食埋 movenpick 雪糕！正呀星期六正價每人 $498 加一，用 OpenRice 優惠免一個正價收費，但都要比加一！最後兩個人係 $597.6！平均每人 $298.8，抵呀！…Read More

原先舖位係甜品店，但確實附近已經有太多唔同選擇，結果都要被淘汰。。。:(睇住佢裝修，都有估下會唔會又係甜品 結果竟然係西餐！都算有驚喜！！作為一個西餐愛好者，都好期待 Fifty Fifty 會有咩食！畢竟，附近冇咩嘅新派西餐廳！愛群嘅質素又每況愈下Fifty Fifty 開張好似第二日，我就決定去試下，舖頭唔算太大，但裝飾都唔錯 下午三點去到都差不多 full house，好在朋友早我幾步去到，已經有位不過始終剛開業，總有少少甩漏，執完枱唔記得放番餐具比剛到嘅客人，送咗餐湯上枱就急急走咗，冇留意我地冇餐具:( 而且我地叫咗兩份 set lunch 應該有兩碗湯，但只來了一個！隔咗一陣，終於叫到其中一個員工幫我地跟跟！佢話可能頭先唔夠湯 餐飲都係有點甩漏，我一開始就叫定飲品 (因為條街熱到飛起)，但隔離枱食完嘢先叫餐飲，仲快過我有得飲不過，食物賣相同味道都 ok 的 定價都可以接受！我下次會去試晚餐，期望到時冇咁亂啦！:)…Read More

一直以來稻香都好似冇試過做火鍋放題，突然間推出，鍾意打邊爐嘅我一於去試吓！:)$138 +10% 呢個價錢其實都算吸引，不過要八點半先開始，對於較早食飯嘅人可能就會太夜了:( 但對於我呢啲夜鬼就 very good 喇！開頭都會諗稻香一向火鍋都唔平，做放題會唔會得好少選擇呢？但原來我諗多咗！淨係湯底都有六款，七個人或以上可以揀兩鍋！第一次去就試吓高鈣豬骨鍋先:) 每人可以加一蚊食鮑魚，我梗係唔放過啦最欣賞係有海蝦任食，夠大隻而且出手又唔會太孤寒 (我指長沙灣呢間，其他唔知)！除咗蝦，花膠同生蠔都值得一試！肥牛亦都OK！P.S. 有汽水同韓式飲品任飲，不過冇包啤酒！只係有虎啤特價，$13.8 一樽…Read More

由六月初見到佢裝修，到6月20號終於試業，不過我決定等佢開一個星期左右先去試吓終於決定7月1號晚去試吓，開頭以為佢冇套餐，但原來都有，仲唔算好貴！原本諗住叫二人套餐，點知一個想食拉麵，一個想食飯於是分開一人一個餐 (見圖 S1, S2) 啦。冷盤嘅金菇同泡菜都好味，不過金菇略嫌有啲酸開頭以為小食得好少，點知半份紫菜包飯同一客春卷都幾多！食完都有少少 full 鋪頭有分室內室外，雖然地方細，但係整體感覺唔錯會再去，反正住附近…Read More

我同保姆鍾意食 hotdog，好耐之前已經幫襯過 iconic 嘅熱熔芝士狗; 知道呢期 "海膽狗" 同 "松葉蟹狗" 仲有菠蘿啤都好紅 終於上個禮拜夾到時間去紅磡店試下！！舖位實在係細嘅，為咗坐低食得舒服少少，都等咗 15-20 分鐘 ~ 先有位！再等多一陣先有得食未有嘢食先飲嘢，所謂啤酒其實係無酒精的，但入口味道真係幾似！不過飲飲下同菠蘿 mix 咗就好爽！熱狗餐加 $58跟餐小食揀咗粟米 美女店主推介一口牛粒，又真係堅正喎 一口牛粒 $48主角(1)：海膽狗 $98我本身唔食海膽，保姆話真係好正！配埋幾塊牛油果嘅感覺好 fresh！主角(2)：松葉蟹狗 $138一出場我已經嘩咗一聲 真係好吸引 入口更加覺得正爆炸！因為我堅鍾意蟹肉 啖啖蟹肉真係無得輸因為海膽狗先上，所以我未食完松葉蟹狗，保姆已經食完 突然間，佢轉身同美女店主講：[唔該，要多一個四重芝士熱狗吖！] 我即時反咗下白眼 *呢個人相當有可疑*結果，佢真係食晒可能好多人都覺得食熱狗食到過百蚊好貴！講堅，就咁睇價錢係有少少貴嘅，但係，質量都不能忽視啫！又唔係日日食，偶然食下都唔錯吖…Read More

其實我已經嚟過 3 次了，都係食 semi-buffet (dinner)，係咪食物質素真係咁吸引呢？又唔完全係嘅 首先，如果你鍾意西餐，個人又幾花心 (對食嘢) 呢度係唔錯嘅選擇！葵芳新都會廣場平時都已經好多人，Friday night 自然更甚！原本想帶我個 "保姆" 去試牧羊少年，但太多人，加上唔想坐室外，所以走返去商場再揀！突然醒起 Mr. Steak 個半自助晚餐，嗱嗱聲行去望下多唔多人…… 門口小妹話等4個號碼就有位，咁好啦，就揀佢！(竟然唔記得影低 menu) 推廣優惠 $69 有四隻生蠔，入口感覺好 creamy 但比較細隻，我覺得一般，下次唔會食。食完蠔就出去揀嘢食 南瓜湯味道幾好，螺絲粉沙律正 (其實我對螺絲粉無咩抵抗力)，雜菇就比較凍，麻麻 螺嘅味道有點怪，個人比較喜歡翡翠螺！凍蝦就好好多喇主菜(1)：五成熟燒汁西冷牛扒 ($228)，侍應小妹好細心咁問要邊一款芥末：比較酸 or 比較辣 (當然揀比較辣) 牛扒都保持水準啦，唔會太差，份量亦都可以嘅 (保姆話)主菜(2)：芝士焗龍蝦配意大利飯 ($188)，半邊龍蝦再加一隻拑，味道還可以，意大利飯好普通，好 cream整體嚟講其實唔錯，最平嘅 semi-buffet dinner set 好似係 $148，就可以任食沙律吧、麵包 (今次無食)、湯、前菜小食、飲品 (我整咗熱檸茶比自己但無影相)，仲有甜品 (食咗個芒果布丁又唔記得影相)…… 環境都可以啦，有室外室內，我地坐室內二人位，唔算太迫; 手袋可以放入一個布籃，再放個籃喺櫈底。…Read More

之前已經試過兩次，感覺都唔錯，仲申請咗會員卡：堂食九折 (=免加一)冷盤 $74 : 可以自選四款前菜，今次試咗 "素鵝"，"牛"，"雞絲粉皮"，"烤麩"！個人比較欣賞 "素鵝" 味道排骨担担麵 $59 ： 排骨質感都唔錯，担担麵嘅花生醬好豐厚，味道超濃！我本人唔多接受到菜肉餛飩 $32 芥末青瓜木耳 $36：芥末味道只係好輕微，但都幾 fresh 津菜肉絲炒年糕 $58 唔記得影低張單，以上價錢可能有少少出入 但我記得埋單係 $259…Read More

經過呢間餐廳好幾次但一直無試過，今晚終於決定比次機會佢！希望唔會失望啦！(p.s. 本人係西餐愛好者):)八點幾來到，得幾個人入座，所以唔洗等位！室內好光，一面牆貼上假草裝飾，感覺好清新！點了二人餐再另加一份 $45/六隻雞翼 (p.s. 本人亦係雞翼狂迷)！餐牌無提及餐湯，但原來有南瓜忌廉湯配蒜蓉包，湯幾好，唔會太漏凱撒沙律有驚喜 法包亦都唔錯 意粉同意大飯都還可以，但確實比較飽肚 至於雞翼，醬汁無咩特別總括來講，我會再來嘅…Read More

[因·果] 新開張的2-3日後，我同保姆決定試一試佢😎 (實情係當晚落雨，唔想行咁遠，又諗唔到食咩好，所以……)見佢細細間，諗住都係普通茶記咁上下，見有小菜晚餐：$50/一款小菜，$96/兩款，$138/三款; 最後決定揀三款😅見到黑松露蛋已經想食 (愛回家 mode)，仲有蝦仁喎！果然無失望，仲有驚喜添😋 海南雞亦都估唔到係無骨兼咁嫩滑😉 芥蘭牛肉呢，牛肉唔太老，唔靭！*注意：飯竟然好多，估佢唔到😰經過呢次晚飯，對呢間餐廳印象唔錯，可以再去！於是，就有以下嘅相喇！😊一向都好鍾意蕃茄湯粉，呢個特餐簡直啱晒心水！不過，一個女子食呢個餐確實太多，要有人分享半個包啊😜…Read More