LeungChiSang's Profile

偶然喺旺角一個寧靜角落，發現呢間日系珈琲店Bone Studio（骨子裡）。難得小店感覺似鬧市中嘅寧靜綠洲，未食嘢已加分。我order咗杯dirty。呢間店有淺焙台灣豆及深焙日本豆兩個選擇，我㨂咗前者，杯咖啡口感輕盈易入喉，唔錯。食多個北海道紅豆吐司，賣相一流，細細件但好好食。紅豆蓉好多，而且呈完整顆粒狀。整體嚟講唔會死甜，加埋牛油同蜜糖，配合軟硬適中嘅吐司，用嚟配咖啡好match（不過選深焙日本豆嘅黑咖啡可能會更夾呢款吐司），令我想起去名古屋旅行時朝早最愛食嘅紅豆多士。兩樣嘢埋單$96，唔平，但算係正常cafe價。而且呢度感覺比較chill，冇旺角鬥市嗰邊咁擠擁，應該都會再幫襯。…Read More

傍晚沿荷里活道行去上環，見到呢間主打外賣嘅漢堡包店（都可容納三至四個人左右堂食）外表幾型仔，就食個fish burger試吓。問煮餐同收錢一腳踢嘅店員係咩魚，佢話係鯛魚，不過係淡水嘅，所以可能會有啲泥味。淡水鯛魚即係台灣鯛個類。睇番英文menu寫住tilapia我更明白，即係我哋香港叫嘅羅非魚。羅非魚雖然係淡水魚，但少骨肉滑，炒魚片係唔錯嘅做法，但用嚟炸我就未試過。個魚堡即叫即整，食落味道唔錯。塊炸魚有加入啤酒調較個脆漿，所以口感幾酥脆。魚肉好大件，泥味就冇，肉質當然冇海魚（例如鱈魚）咁緊緻，不過係可以接受嘅程度。呢度嘅他他醬調得好好，配料仲有醃青瓜同車打芝士，賣$78整體嚟講個魚堡都算交足貨。另外，我加多$28變set，有埋幼身薯條，另加$8將汽水轉成自家製lemonade，即係總共$114埋單。值得一提個lemonade好refreshing，有用新鮮檸檬，而且酸度剛好，抵讚。…Read More

世界排名第二、亞洲排名第一酒吧呢兩個朵太勁，作為一名愛小酌一吓嘅香港人，總要試過先有資格批評，所以我嚟幫襯Bar Leone。避開星期五、六、日夜晚呢啲隨時要等兩、三粒鐘嘅日子，特登閒日（周二至周四，周一休息）開門前嚟到，唔駛等咁耐。下午五點開門，我四點九開始排隊，我前面大概有十個人左右。到五點條龍已變成有廿幾三十人。單拖一人提前嚟，總算做到第一輪客兼坐到吧台位，呢點好重要，因為吧枱位先可以同bartender盡情交流兼睇到佢嘅調酒功架。Bar Leone係一間意大利cocktail bar，所以第一杯我揀意式經典雞尾酒嘅Negroni，試吓基本功。呢度有兩種口味選擇，我揀咗草本味較重嘅Fig Leaf Negroni。杯酒好有層次感，嗰舊大厚冰有助慢慢釋出雞尾酒嘅草本味，而塊柳橙就帶畫龍點精作用。叫份Smoked Olives 🫒 下酒。啲橄欖煙燻味好重，有啲似食煙肉嘅feel。本質係鹹嘅，所以淨食未必啱，但配帶甜味嘅雞尾酒就係perfect match。第二杯打大佬，叫了鎮店之寶Olive Oil Sour。微甜微酸易入喉，酒中加入靚靚初榨橄欖油，令整體變得更複雜，用番酒鬼術語杯酒好rounded（圓潤），令人飲得非常舒服，有驚喜。最後一杯要咗Caffe Paradiso。同樣有咖啡同whisky（Nikka）做base，似輕盈版Irish Coffee，但加咗海鹽嗰層泡真係神來之筆。聽bartender建議，要同一時間飲晒兩層，果然更好味。價錢方面當然唔平，埋單同去中價酒店食自助餐差唔多。我算飲得多囉，見同坐吧枱位嘅客人都係一杯起，兩杯止。不過以呢間店嘅名氣同出品水平，平均百幾蚊杯雞尾酒都可以接受。而且呢度bartender解釋杯cocktail好清楚，加上酒吧氣氛好chill，至少唔使任何dress code，抵加分。…Read More

之前經過深水埗新開呢間「緊張」，覺得裝修幾型，原來係主打馬拉咖喱麵嘅餐廳，呢次就專登過嚟試吓。呢度嘅咖哩麵有四款湯麵同一款乾撈選擇。湯麵個湯底一樣，麵都係油麵加米粉嘅摻摻，只係因配菜唔同有四個價錢。我㨂咗第二平，即係$88嘅咖喱雞。個湯底飲起嚟幾舒服，濃度適中辣度算有後勁，整體嚟講幾啱我口味。至於配料除咗煮得軟熟嘅咖喱雞肶外，仲有白魚蛋、流心蛋、豆卜、豆角、肥仔芽菜同我好like、相當吸汁嘅怡保炸腐竹。其實個湯底有啲似我喺新加坡食嘅咖喱麵，反而同我喺怡保街頭，食湯上面有一層紅油嘅咖喱麵品種唔同。搵一位貌似老闆嘅店員問吓，佢話佢哋個門派冇落咖喱油，所以唔會紅色一片，仲同我講我食嘅係預設辣度，對上可選擇更辣同超辣兩級。飲品方面，我點咗杯「淨混桔」，即係有醃桔仔同酸梅嘅桔仔水，唔太甜，酸酸哋幾開胃。另外叫多件班蘭葉巴斯克蛋糕。色水唔錯，只計件巴斯克蛋糕喺好食嘅，但班蘭葉味就唔太突出囉。埋單連加一合共$186，其實唔平，但食物質素係唔錯嘅。講番店名，原來老闆老家來自吉隆坡華人聚居地之一嘅增江區，馬拉話叫Jinjang，同普通話「緊張」個音差唔多，而咖喱麵正係當地嘅特色美食。…Read More

曾聽過港島有間N+Burger水準唔錯，原來佢哋喺啓德開咗間分店，路過正好一試。點咗佢哋嘅$68 classics original漢堡包，加多四十蚊轉combo配炸薯角同homemade lemonade（16 oz），即係$108埋單。呢間鋪標榜佢哋嘅牛肉來自澳洲自家牧場，係草飼安格斯牛。落單後等咗五、六分鐘就有嘢食。個burger賣相好工整靚仔，蔬菜牛肉同麵包比例好好，食落啲牛肉真係幾juicy，據報由Bakehouse供貨嘅麵包亦軟硬適中有口感，nice。炸薯角亦有水準，夠香脆，特別欣賞佢哋調配嘅honey mustard，用嚟dip炸薯角食好夾。至於嗰杯lemonade酸度夠，味道有驚喜，仲睇到啲檸檬絲，冇揸流攤。睇番google map呢間漢堡店全港有四間分店，價錢同感覺似Shake Shack同Five Guys，但質素真係贏晒兩間美國連鎖店囉。…Read More

聽聞旺角呢間主打天丼/天婦羅嘅「捌加廿陸居酒屋」性價比唔錯，但上次嚟因太多人排隊而放棄。呢次剛好喺佢哋晚市剛開始時（我大概1735入場）嚟到，順利食到。點咗個$108嘅特盛海鮮天丼，內有兩隻黑虎蝦、一件那歌魚、鱚魚、帆立貝、四季豆同金菇。賣相唔錯，味道亦合格。當然海鮮質素我唔會同港島一啲天婦羅名店去比較，但我稍嫌兩件魚嘅質地同我預期落差較大，珍珠米上嘅醬汁以天丼嚟講亦太少。Happy hour時段有啲items特價，要了一個$29.9嘅雞皮餃子，夠香口幾好食。配杯同樣$29.9嘅麒麟生啤。呢杯啤酒就真係要批評吓，menu標名係570ml，但倒出嚟只有八成滿，真係好懷疑有冇400ml。既然係咁，不如唔好寫個容量出嚟好過囉。晚市要加一，最終三樣嘢埋單$185，算平嘅，但未到抵到爛。最後六點半左右離開時門口又有人排隊，閑日嚟講算好旺場吓。…Read More

唔少食肆埋怨香港人北上消費，而唔反省自己店餔嘅食物質素值唔值得人幫襯。始終食物做得有heart嘅就一定有生意。好似今次喺北河街街市對面嘅「成點心館」，就食到我今年最滿意嘅一餐點心。下午三點去到呢間自製點心嘅小店，居然full house。好彩剛好有人離開，我一支公就坐到最後一個位。呢日點咗水晶筍尖蝦餃、綠蘭脆米腸粉同千島醬脆皮蘿蔔糕三款點心，連茶位$96埋單。蝦餃皮薄，皮有韌性，內餡蝦肉有汁夠鮮味，最重要嘅係有筍尖，呢個先係傳統做法嘛。而家太多酒樓嘅蝦餃冇咗筍，味道總係爭啲，所以呢間小店嘅出品就好啱我口味。綠蘭脆米腸係加咗炸脆米嘅蝦腸，顏色幾靚，加埋內餡有脆肉瓜粒，口感加倍豐富，好食。千島醬脆皮蘿蔔糕唔係新奇嘢，我喺其他點心專門店亦食過差唔多嘅點心，但呢度嘅蘿蔔糕真係煎得超級脆，抵讚。不過我坐喺風口位，啲木魚碎較易飛起。總體嚟講三款點心都有水準。我四點離開時依然滿座，閒日見到咁都知街坊好支持，好嘢始終有人欣賞。值得一提嘅喺呢度百分百要搭枱，四個位嘅卡座分分鐘要坐四組人，如果好介意呢樣嘢，或者著重環境同想慢慢hea嘅就真係唔好嚟囉。…Read More

疫情前曾經喺新加坡食過兩、三次海南雞飯名店「文東記」，幾年後就喺開咗兩、三個月嘅香港分店回味吓佢哋嘅出品。星期日下午茶時段嚟到，見到有tea set menu，決定食白切雞配油飯跟兩件脆皮豆腐嘅下午茶餐。細細碟嘅白切雞，外表似新加坡分店嘅出品，都係白皮雞肉。店家幾乎比晒雞胸肉，但肉嘅口感係OK嘅，唔算柴，仲有一件近脾位嘅有少許啫喱狀物體（優質白切雞嘅標準）。當然，呢種白皮雞都預咗冇乜雞味，其實大家喺新加坡食到嘅海南雞大多數都係咁樣，同樣冇乜雞味。至於油飯好細碗，外表感覺同白飯差無幾，但食落都夠味，而且感覺唔太油膩。三碟醬汁黑豉油、辣椒醬同薑蓉就正常發揮啦。另外，嗰兩件脆皮豆腐相當水嫩，真係做到外脆內軟嘅效果，好食😋。呢餐連埋一支味道幾清新嘅薏米水都係雙位數價錢埋單，算喺咁囉。…Read More

噚日去完深水埗買嘢後，行上西九龍中心，試下出名排隊超耐嘅Italian Bite。呢日晚市做兩粒鐘共五輪70位客。我17:10分左右嚟到，十分鐘後攞到18:45嘅籌。18:35返嚟，18:50落完單叫咗一個前菜同一個意粉。大約15分鐘後，前菜Burrata芝士配車厘茄嚟咗，配兩小塊麵包，賣相同味道OK，但Burrata cheese唔係完整一舊，有少少失望。等到19:25，我order嘅Lasagna（意式千層麵）嚟啦，份量係少嘅，但味道啱我口味，肉醬同千層麵融和得唔錯，焗得亦夠香口。呢餐連攞籌連等待，都花咗超過兩粒半鐘。總結嚟講，花$136一意粉一前菜，有真正意大利餐廳水平，價錢係OK嘅，但份量少兼太花時間，加上店家安排上比較亂，所以應該食一次就算。講時講，記得當年去意大利旅行時，喺餐廳食個餐隨時花三、四粒鐘，慢就係佢哋嘅飲食風格。睇返佢哋人手編排，兩個主廚用電爐煮意粉，兩個人負責前菜同甜品，一個人收銀同take order，一個人洗碗，都係完整餐廳結構嘅縮影，同埋佢哋每次都係煮同一款口味意粉，然後先煮第二款，睇嚟個意大利人主廚兼老闆係有要求嘅，想跟番正常餐廳運作，不過咁樣亦會拉長客人等候時間，尤其係food court咁玩法，好多人未必理解。…Read More

在下午茶時段於牛頭角行往港鐵站方向，偶然發現這間賣手抓羊肉飯的餐廳。新疆手抓飯本身在香港已屬少見，印象中只有港島一、兩個地方有售，東九龍這邊真的第一次找到。原本只想叫一客$58的羊腿手抓飯嘗嘗，但受不住店員的遊說，最終點了一客$88、碟頭大很多的豪華版羊腿手抓飯。果然有料到，羊腿很大一隻，外表看落有點乾，但食落羊腿肉既不柴且無羶味。配合的飯亦不錯，有我去新疆旅行時嘗過的那種風味，若油潤感再多少少就更好。另外，建議店家可加一點提子乾於飯上。整體來說這餐算唔錯，一解自己對羊肉手抓飯的癮，不用上深圳都食到。見店家連「好地」的新疆啤酒吐魯克都有入貨，下次來可以一試，也可嘗嘗其羊排同大盤雞做得如何。…Read More

一個星期內我兩度嚟深水埗這間「池家人煲仔飯專門店」，可見佢哋嘅出品有啲吸引力。首次幫襯喺閒日下午九唔搭八時段，內有唔少空位，單人匹馬唔駛排隊直入，食咗個水準極高嘅臘味煲仔飯，料有切開成片狀嘅臘腸、膶腸、臘肉同一小舊臘鴨，份量唔多唔少但收$58算合理，而且飯粒粒分明夠油香，飯焦呈塊狀恰到好處。第二次周五晚去到就人山人海，同朋友二人就排咗近一粒鐘先入到座，然後order後亦等咗25至30分鐘先食到煲仔飯。呢晚食咗$88嘅黃鱔煲仔飯，黃鱔用香港常見粗大嗰種，同台山黃鱔飯用的幼身兼去咗骨嘅黃鱔唔同。鱔肉質地緊緻且味道唔錯，但就要識吐骨頭，至於豆豉等調味OK，唔會太鹹。不過，呢度嘅黃鱔飯冇落葱，顏色同香味差咗啲，飯焦亦冇乜。這或許同魚類煲仔飯不宜焗太耐有關，睇嚟想食多飯焦嘅煲仔飯，都係要選臘味排骨類多油分又襟煲嘅配料好啲。總體而言呢間店嘅煲仔飯係好食嘅，但就要避免喺晚飯黃金時段嚟。看店名英文寫hotpot rice，想笑，因為我唔係想食打邊爐，正確煲仔飯嘅英文應該喺claypot rice囉😌。…Read More

12月去咗3次！$99一個大pizza加兩罐自釀craft beer，仲要免加一，真係唔夠你玩！2024年內地勁多餐廳同茶飲店品牌進軍香港，但我都零興趣幫襯。原因好簡單，貴過大陸嘅話，我點解唔上深圳時先幫襯。不過凡事都有例外，呢間賣自家品牌craft beer嘅「Richkat貓員外」喺深圳有好幾間分店，但向來未試過，直至上月路過其中環石板街分店，便試吓。第一次幫襯飲咗杯on tap嘅hazy IPA，感覺唔錯，晚上八點前happy hour價$68免加一，以craft beer計中環呢個價真係超級便宜。而我喺店內亦看到上述pizza set嘅宣傳單張，相當吸引。不過，中環分店冇廚房，想食pizza要去上環荷里活道的分店，之後我就去咗後者兩次，一次食肉一次食素嘅12吋pizza，分別是散叫價$118嘅手工辣肉腸薄餅同$108嘅黑松露雜菌薄餅。兩者都有中上水準，厚度大約是是pizza hut厚批同薄批中間。總之，一個pizza加埋兩罐任選330ml嘅craft beer，即使兩個人share都夠，點計都抵到爛。唯一限制係呢個pizza set只會喺happy hour時段，即係晚上八點前供應。啤酒方面，叫得craft beer佢哋嘅選擇都唔少，on tap嘅話有八個tap頭，罐裝選擇亦差唔多，整體水準都拍得住本地薑好似少爺啤左右嘅水平。我最like喺一款名為Starboy嘅Hazy IPA，另一款Imperial Stout亦啱我口胃。雖然係大陸品牌，但去幫襯嘅都係外國人為主，去過三次只有一次遇到識講廣東話嘅客人，interesting。…Read More

終於食到挽肉と米。未食過日本那間，冇得比較，但香港這間的出品我是覺得好食的。不過吃過便算，要提前預約太煩了，我未必會做回頭客。佢哋嘅漢堡扒細細舊，但油份、口感確係唔錯。既然店名挽肉と米，日式漢堡配白飯，後者的重要性亦不可忽視。店家用秋田小町米，我亦滿意其飯所煮出來的煙靭程度，白飯任添下我便吃了三碗。店裏主要只賣一客三個漢堡扒的套餐，包括味噌湯同一隻生雞蛋同任添的白飯，未計加一下$138，以IFC這地段來說不貴，我加了一個有唔少牛肉碎的小吃薯仔沙律，兩樣嘢連加一共收咗一百九十大洋。畢竟中環黃金地段，兼且攞碳烤牌不容易，價錢當用來支付這兩樣東西便覺可接受。佢哋建議漢堡扒的三個食法：原味，加蘿蔔茸與自家柚子醋，以及配生雞蛋。三個食法中我最like加蘿蔔茸及柚子醋，夠清新。值得一提的是他們的漢堡扒本身已夠味，但其提供的八種配料真的唔錯及夠多元化，令我忍不住添加。最近在內地發圍嘅肉肉大米亦進軍香港，我曾在內地食過，若兩者比較，挽肉と米仍勝一籌，畢竟碳烤便是王道。…Read More

魚蛋粉界的legend回歸了……講的是老字號「夏銘記」也！我絕對是老顧客了，由他們的店在勝利道時代營運時開始幫襯，跟著他們去油麻地、西營盤，這次便在佐敦重開，計落都有三十年了。這天唔順路也繞路而來，當然要食該店兩大名物魚蛋粉同原條炸魚片。最愛他們的魚蛋夠魚味，唔會過份爽彈（通常加入其他無謂添加物才會爽彈），水準依舊出色。另外，我感到他們應有微調魚蛋粉用的湯底，與西營盤時代相比魚湯鮮味更突出。至於炸魚片更是正斗，微帶魚鮮鹹香，一吃難忘，是「夏銘記」的絕對王牌。年輕時嫌貴唔會order原條魚片，但到咗呢過唔知仲可食多幾多次的歲月，都係食咗先算。至於點辨別是否真夏銘記回歸？一試其辣椒油便知也，充滿後勁同爆發力，一吃便回不了頭。當然，這次回歸此店整體價格又上調了，同其他魚蛋粉店相比確要貴一、兩成，這也是無奈之舉。…Read More

果然是第一流的清湯牛腩！這間位於旺角的「傳承清湯牛腩專家」，很早之前已列入我的想食清湯腩店家清單之內。這天在閒日的九唔搭八下午茶時段終來幫襯，但仍要等超過15分鐘才有位。一如老饕消息所言，下午約兩點後已沒有崩沙腩、牛坑腩和爽腩等特別部位，我也只好點了普通的清湯牛腩牛筋麵。結果真的沒有令我失望，湯鮮甜，普通牛腩的肉質口感俱佳，不會過瘦，牛筋屬老人家也能輕鬆吃下的軟度，總體來說是我近年在九龍吃過最好的清湯牛腩，不過份量略少，吃得未夠過癮。下次我應會在店家剛開門時來，這樣才有機會吃到我想吃的爽腩😋由於此店店面細，坐得唔會太舒服，且只有一名樓面員工，招呼清理一腳踢，所以難免執唔切枱，影響人流運轉，這亦是要改善的地方吧。…Read More