carsonwong's Profile

雖然呢排好熱但都無阻我想打邊爐既意慾, 黎左九龍城既大邊爐…. 上左樓之後地方唔算太大但一D 都唔會覺得迫, 坐低左之後侍應好快就拎左MENU同調味盤黎包括䓤花, 蒜蓉, 辣椒等等……湯底好足料我地叫左冬陰功拼冬瓜瑤柱首先講下打邊爐唔少得既材料，當然係肥牛啦。我地叫左手切安格斯肥牛，總共叫左兩碟, 真係好好味, 肥廋均衡而且好有口感又夠味, 食落口一D 都唔韌濃味既湯底就梗係要配響鈴啦，佢地呢隻同出面既有D唔同，少一份油膩但係一樣咁好食，叫三秒腐皮。同朋友都怕熱氣，叫左酸梅湯同竹蔗茅根水，佢地話係自己煲既，酸梅湯清涼開胃，竹蔗茅根水感覺夠清潤，好好飲。豬肉片厚薄適中，食落無雪藏味又鬆化，油份唔算多剛剛好，值得推介後面有四色水餃同埋花膠，全部人手包，好新鮮好好食最後要講下既係呢隻東洋金薯。以前從來未食過，佢地店員極力推薦我地食，咁就叫左一碟。開始打既時候放落去，煲足兩個鐘頭吸收晒湯汁，但係都仲有保留到金薯本身既甜味。…Read More

朋友忽然興起話要食串燒，就近就揀左呢間去到既時候可以揀坐室內定室外，室外就吸煙區，咁我同朋友都唔食煙既，就揀左室內喇！閒話少說，因為肚餓，我地一坐低就開始TICK野食。香草牛油燒花甲佢既香草味好濃郁，同D牛油味都好夾，滿意。食完個花甲一次過上左個5 combo：燒雞腎、芝麻雞翼、A4和牛牛柳粒、燒鰻魚同埋巴西厚切牛舌。雞腎一向係我至愛，呢度既雞腎亦冇令我失望。芝麻雞翼就係雞翼帶點芝麻香味，希望下次有機會試埋佢既麻辣雞翼。A4和牛牛柳粒同鰻魚都達到應有水準。反而有意外驚喜係巴西厚切牛舌。老實講，見到佢厚切既外貌，我極度憂心佢既靭度。不過咬落去既第一啖呢個憂慮已經一掃而空未食完已經黎埋蒜燒煙肉卷，同埋蒜蓉燒扇貝呢對蒜燒孖寶，對於我呢種愛蒜之人就真係啱哂。不過我朋友就怕怕地太重蒜味既食物，扇貝佢都接受到。但煙肉卷佢就麻麻地，所以如果怕蒜味重，可以叫另一款蒜燒雞脾菇煙肉卷。雖然都係蒜燒，但相對地冇咁多，加埋雞脾菇少少爽口彈牙既質感都真係幾好食。最後黎張大合照…Read More

收左工落左去銅鑼灣搵地方食飯，之後就去左呢間茶餐廳。一上到去，唔洗等就有位坐。唔洗一分鐘就已經諗到食咩，今日既晚餐就決定左要鋸扒。叫左個美式什扒，等左十分鐘都冇就已經有得食，真係好快手。個扒餐一上枱，已經有好香既味道。再望真D，個雜扒真係好多野食。個雜扒包括有豬扒，牛扒，雞翼，腸仔，火腿，再配埋薯條同雜菜。真係又大碟又抵食。所有既野食個味道都唔錯，其中豬扒最好食，好易咬得斷，食落爽身，好味。其他既都唔差，味道幾好，只係覺得豬扒比較好食D。講真，咁既價錢食都咁多野食就真係幾抵。下次再黎都係會食返呢個，因為真係太抵食啦。…Read More

又到左食午飯時間，今日去左食日本野。等左幾分鐘就有位，都幾快。入到去坐低，環境比人既感覺都幾日本既居酒屋feel。好快就叫左個牛肉火鍋，本身就跟一碗飯，不過我就加錢轉左烏冬。唔係等左好耐就有得食，呢度既牛肉火鍋個份量都算多，唔會話得好少野係個鍋入面。牛肉個味道唔錯，連埋烏冬一齊食就更加好味。鍋入面仲有其他既材料，有好多菇同埋好多菜，仲會有其他材料。烏冬就唔會煮得太過淋，有D彈性，食落口感唔錯。其他既材料都煮得幾入味，而且個湯既味道唔會太淡，成個鍋既味道都好夠，唔會淡而沒味。下次如果再食就試埋個羊肉火鍋先，因為見到人食都好似幾好味咁。…Read More

今日遲左食飯，去到已經可以叫下午茶。坐低左睇睇個餐牌，又幾經濟BO。之後就叫左一個鮮茄焗雞球飯。等左一陣就有得食，個賣相唔錯，感覺好似幾好咁。一食落口，味道岩岩好，唔會話茄汁味太濃同太酸。酸度適中，食落幾開胃。雞肉唔會太過老，味道岩岩好，唔太淡味。成個焗飯再配埋D芝士就更加好味，層次豐富左。如果下次遲左食飯都可以再黎呢度試下其他下午茶餐，好食之餘又可以經濟D。…Read More

今日出左去同成班同事去食lunch，有人話想食米線，就走左去呢間食。等左幾分鐘就入得，入到去坐底都係例牌動作，就係睇下有咩食。我自己就叫左一個阿糊金湯餃子雞肉米線再加罐可樂。等左一陣就有得食，都算幾快。一食落去，味道都唔錯，米線唔會煮得太淋，因為太淋既米線對於自己個人黎講就唔太岩心水。餃子味道都OK，幾大隻，同埋餃子皮唔算厚，唔會話靜係得餃子皮食。雞肉都煮得岩岩好，唔會太過老。其他既材料都OK。整體黎講就唔算有太大既驚喜，算係正常既米線。有機會都可以再黎試下其他野食。…Read More

撞正係北角呢邊做野，收左工行經呢間滿記，見好耐冇食過就入左去試一試。一坐低，見到佢有期間限定。係用草莓整既甜品，睇落好似幾吸引就叫左個士多啤梨西米露。一食落口就覺得味道唔錯，佢用既士多啤梨都幾新鮮，酸酸甜甜好好味。再配埋個士多啤梨雪糕就簡直係一流。而佢個底就全部都係西米露，一食落口，啖啖西米露，正丫。而且佢仲有D碎冰係入面，同西米露一齊食個口感真係好好。同平時食到既有分別。西米露加上雪糕一齊食都好好味，食落去又另一種感覺。今次個甜品真係唔錯，下次睇下有冇機會再試埋另外幾款。…Read More

同幾個朋友係屯門行完街食完飯，之後仲話唔夠喉，就同埋幾個朋友走左去食糖水，去左屯門碼頭果邊，發現原來唔係太多選擇，最終決定左去呢間。其實佢地d甜品唔可以話有特色，但係就勝在可以坐室外，又可以帶埋狗狗。我地就一人叫左一樣黎食，基本上都係普普通通，同平個食開個D差唔多，冇咩太大特別。我會比較鍾意食芝麻糊同埋棉棉冰。我覺得佢呢度既芝麻糊比平時食到既好，因為佢既芝麻味重，又夠香。而個棉棉冰就真係好大份，基本上一個人係可以食哂既，不過食完會好辛苦。棉棉冰既味道很好，唔會太過淡味。另外兩個都唔差，只不過我唔太特別鍾意，所以就覺得普普通通。…Read More

年年做節都要呀媽一個人煮咁多人飯咁辛苦，今年決定order盤菜，方便又好味！之前同朋友已經order過呢間，覺得幾好，今次再試。8個人order左個細嘅，唔包送貨，所以我地叫左架貨van搭去拎。盤菜幾足料，有正路嘅雞，鴨，蝦，冬孤，芋頭，魷魚，螺片，炆豬肉，枝竹豬皮同蘿蔔。最好味係d魚蛋同魷魚！魚蛋好彈，魷魚好入味，不過好快就俾人搶晒，搞到我唔夠食！好彩仲有枝竹同蘿蔔呢D比較入味既野食，因為我本身好鍾意D好入味既野食，所以呢D就岩哂我啦。而且D雞既肉都好滑，唔會太過老。其實，盤菜不嬲都會lon個架係底防止會痴，不過今次呢間果個架就唔算高，無呃人，見到咁大盤，就真係咁大盤野食！8個人叫個細嘅其實都好夠架啦！下次多d人食先再挑戰個大嘅！…Read More

剛好媽媽生日，咁岩又睇到報紙話尖東開左間新放題，大家就決定去試下查完一輪，之後先知原來放題達人係板長/板前集團架，咁樣應該都OK嘅！去到一坐底就叫左隻魚生船，D魚生好新鮮，由於太過肚餓，所以唔記得左要影相@@除左魚生，我地仲叫左好多唔同既野食，清酒煮蜆，一口牛，大量魚生壽司，芝士西蘭花，炸多春魚，黑松露炒飯。。。成晚最like就係個北寄貝sashimi, 好大隻，好味！encore左好多次，我諗我一個人都起碼最少食左二三十片。食到我地個個都抱住個肚走，下次有機會都會再黎試多次，睇下會唔會一樣咁好食。…Read More

咁岩撞正有朋友生日，所以就黎左呢間野食韓燒，之前都聽過好多人話好味，又話好正宗，我就緊係滿心期待啦。點知食落就有少少失望....可能自己本身唔太好內臟同豬皮，佢地特色野咁啱就係呢兩樣。試完都唔覺得太好味....反而燒肉方面就真係唔錯，由其係五花腩，燒出黎既味道非常好，而且食落去又唔會覺得太油膩。而且，間野都有好處嘅，就係可以任fill用黎包燒肉嘅生菜，好多其他地方都無咁好，有得可以任fill。如果靜係食燒肉既話我一定會再黎食。…Read More

黎到呢間食野，我覺得麵唔係重點，個重點係佢d點心！之後都去過幾次，今次再去，我同朋友都叫左個黑高湯葛粉絲套餐，每個餐跟2個點心，所以共4個。有溏心蛋，酸梅炸蝦丸，香菇臘腸雲吞 ，竹笙金腿百花卷最好味係個酸梅炸蝦丸，酸梅醬會係蝦丸爆出泥架！雖然係二人餐，但係好多點心都係三件上。其實兩個人食就覺得有D飽。…Read More

倒數個晚, 為左送別2013, 決定左要食得好D，所以被朋友約左去呢間食我地一行4人去食，一坐低就拎起餐牌，好快叫左幾道菜，朋友話見到隻啤酒雞好似好過癮，一直都想試，今晚終於可以試一試。隻雞一上枱，就傳出一陣陣濃郁既焗雞香味，仲噴哂煙咁，跟住大家都急不及待, 開餐喇喂~~~撕開雞脾，放入口，熱LALA，雞肉好嫩，好”淋”，好快就比我地KO左成隻雞。當然，豬手一定唔少得，當晚見到好多人都有叫，侍應會切埋俾顧客，好細心。我最鍾意食佢D皮，好香脆，而且味道調得不錯，應該人人都食到。我地叫左D有酒精成份既飲品，食住豬手飲下野，感覺唔錯!!之後，我地仲叫左碟依家好興既腸，咩香腸都有，朋友話最鍾意波型個粒，因為好香肉味，係佢鍾意既味道。最後，當然食埋甜品先，因為睇個餐牌，真係好抵，而且賣相真係好吸引，朋友最鍾意食芝士蛋糕，所以叫左個焦糖芝士蛋糕，大家分黎食。朋友話，個芝士蛋糕好正，好香軟，下次黎食個陣一定會再叫。…Read More

收左工凍冰冰唔知食乜，經過華姐見到咁多人又未試過、我同我朋友就走左入去食牛腩啦。其實我本身就唔太鐘意食牛，所以叫左個菜肉雲吞，不過我朋友佢就勁鍾意食牛，所以叫左個清湯牛腩菜飯，之後就再加多左一個腩汁蘿蔔。我朋友話D牛腩就一般，冇咩太大特別驚喜。但係個蘿蔔同雲吞我地都覺得好正好好食。鋪內位置方面就唔係大多架啦，係就係迫左D，不過好食就已經值得迫一迫啦。…Read More

星期五晚，一個人行完街買完野，見個肚有D餓，就走左去呢間試下D野食。佢係買完野食就再搵位坐低既，同平時既快餐店既形式有D相似。我就叫左一個喇沙米線同埋一杯熱檸茶，D人會即刻係你面前沖好你既飲品，仲可以幫你落埋糖，等我可以唔洗自己落，感覺幾貼心。之後就搵個位坐低，等佢拎黎比我。等左一陣就有得食，個賣相真係唔錯，不過我就覺得比較細碗，如果比較大食既朋友仔一定唔夠填飽佢既肚。味道都唔錯，飲左一啖湯，有陣陣既椰香味，好濃郁既湯。米線比較淋身，但係就吸收左湯既味道，所以食落口既味道好濃。其他既材料都唔錯，不過覺得比較少同埋比較薄。整體係唔錯，不過都係份量比較少。下次再黎會試下叫其他，唔叫呢款。…Read More