涷奶茶少甜's Profile

我係一個不折不扣嘅蕃茄狂迷，一直想試吓呢間餐廳！😍🔺牛扒龍蝦丸嚟嘅濃湯螺絲粉 (小辣)湯底：濃郁，重蕃茄味。係用番茄熬製而成，茄膏唔多。足料，有好多蕃茄蓉、洋蔥。酸甜適中，好味！😋螺絲粉、滑蛋、墨魚丸就正正常常。不過牛扒值得一讚，唔韌，好淋，幾有牛味，呢個價位嚟講有驚喜。另外，份量好足，特別啲湯好多，食到我同朋友好飽！…Read More

🔺手撕雞絲肉燥飯飯係珍珠米，抵讚！肉燥好多，不過個人認為略鹹，要配埋佢個秘製醬汁先會易啲入口。講起個秘製醬汁，佢係小小甜又少少鹹，好開胃，好惹味，記得一定要落！手撕雞好嫩滑，不過個人就麻麻哋跟雞啲青瓜， 下次應該會叫翻豬扒或肥牛。🔺古早珍珠奶茶珍珠有咬口，唔粉，有驚喜！整體嚟講，呢個餐$60，都算幾抵，推薦！…Read More

個人好喜歡蕃茄湯😋喺OpenRice見到呢間專食番茄湯嘅餐廳咁多好評，今日就試一試佢！🔺滑一滑蕃茄濃湯烏冬 (新鮮騸牯滑牛+炒滑蛋)先講一講個湯底！好足料！茄味好夠！食得出係新鮮蕃茄熬製，而非落咗茄膏。有好多蕃茄蓉，因為個湯少少澀，所以烏冬會好掛湯，食到我舔舔脷😆😆😆蕃茄愛好者必試！烏冬彈牙，係用手打烏冬，好有咬口，一啲都唔淋。😋相對嚟講，滑牛同滑蛋嘅味道就冇咁出色，不過不失。牛肉有少少韌，唔係特別有牛味。😖不過，份量好多，可能你食囇啲麵都未食囇啲餸，食完會好滿足！…Read More

今日經過富善，久違地試一試呢間咁多年嚟依然屹立不倒嘅茶餐廳😙🔺酸辣豬頸肉米線豬頸肉味道就普普通通，不過好淋，一啲都唔韌，而且有豬頸肉嗰種特別嘅爽口！ 我數過，夾埋有大約6-7塊豬頸肉，都算多，可以每一啖米線都同肉一齊食！湯底比較重口味，略酸+略鹹，食完會好口渴。個人喜歡清淡少少，所以就麻麻地啦。酸菜、蔥花、芽菜份量適中。可能因為我叫外賣，米線略淋，堂食嘅口感應該會好好多。😞咁因為呢間餐廳唔係主打米線嘅，所以下次應該會試吓叫其他嘢食！…Read More

呢間餐廳近年開到周圍都係，今日終於一試！價錢就偏貴，不過食物質素都有翻咁上下，尚算可以接受。🔺黯然銷魂飯 (叉燒煎蛋飯)呢個叉燒煎蛋飯係出乎意料地非常好味！🤩食叉燒煎蛋飯最驚個飯好乾，但呢個就唔會，因為隻蛋係流心蛋嚟嘅，輕輕一篤個蛋黃，啲蛋汁就流曬出嚟！蛋汁+佢嘅自家頭抽一齊食，甜甜地又鹹鹹地，食到我舔舔脷。😋主角叉燒就更加抵讚！叉燒雖然偏瘦，而且都幾厚，但係食落卻一啲都唔韌。我覺得叉燒嘅調味比市面一般嘅叉燒鹹，但連埋佢甜甜地嘅醬汁一齊食就啱啱好。唯一美中不足嘅係只係得四嚿叉燒，略少。價錢 ($65) 偏貴，但係個人認為值得，推薦！…Read More

🔺農場雞扒蘿宋濃湯通粉先講吓個羅宋湯！個湯真係好好飲😋味道好濃，茄味好足，但又唔至於係好酸嗰隻，好易入口。個湯亦好足料，有蕃茄、西芹、椰菜、紅蘿蔔、薯仔、瘦肉，每一啖湯都會連埋啲蔬菜一齊食到！我覺得，呢個湯係連啲唔係特別喜歡茄湯嘅朋友都會鍾意，食到我舔舔脷😙😙😙個雞排都有驚喜！肉質好嫩滑，大小亦適中。不過，因為我叫外賣嘅，個雞扒浸咗喺個湯一陣，所以就唔知個皮脆唔脆啦。雖然，呢個早餐冇餐包或者雞蛋腸仔嗰啲配料，但我覺得佢嘅味道係值得呢個價錢($38)，跟餐嘅凍奶茶亦有一定水準，所以我一定會再嚟多次！…Read More

🔺芋圓丸子薏米味道平平。食得出都落咗幾多糖醬，所以有種 inorganic 嘅甜味，個人就麻麻地陣味😮‍💨丸子都幾有咬口，不過芋圓就令人大失所望，唔煙韌之餘仲好粉，亦冇芋頭味。今日一試還可，但就未必會再幫襯啦。…Read More

呢間平民日本餐廳係我一個住大埔嘅朋友推薦嘅，佢話，以呢個價位，呢間餐廳嘅食物質素絕對係物超所值，所以今日就嚟試試佢！🔺滑蛋豬扒飯第一眼睇到就覺得好大碗，而事實上係我直情食唔曬成碗！多嘅唔止係飯(珍珠飯😋)，啲菇(有幾種 eg. 秀珍菇)仲多，係多到每一啖都有個隻，食得好滿足。不過，可能因為我係叫外賣，個豬扒嘅外皮好「濕」，一啲都唔脆，呢點就少少失望啦。另一個主角(滑蛋)嘅味道亦不過不失，冇話好重蛋味咁。個汁頗甜，個人嚟講OK，但亦可能有朋友會食到有啲「漏」。…Read More

🔺沙嗲牛肉腸仔米線沙嗲醬好夠味，而且係食得出落咗花生醬！米線好掛汁/掛醬，牛肉亦唔算韌，推薦！😆不過，價錢略貴，份量唔多。😞一般呢個價位嘅茶餐廳早餐都會有埋餐包(例如牛油方包)，佢就冇啦，所以少少失望。🔺涷奶茶奶香夠曬！至於茶底，雖然飲落順滑、香醇、有一定厚度，但苦澀味頗濃，飲完可以 expect 口腔有甘甘哋嘅感覺。整體嚟講，作為一杯跟餐嘅涷奶茶尚算高質。😙…Read More

🔺冬菇菜肉雲吞小鍋米線呢個小鍋米線係酸辣湯底嚟，咁我就叫咗小辣，飲落唔會話太重口味/太酸，好易入口！個人認為，成碗米線最正嘅地方係米線嘅口感，非常煙韌，比其他米線有咬口，唔會話太淋或者太硬！配料方面，冬菇就有4粒，大小適中，每粒都吸曬個酸辣湯底！而且好重菇味，最大嘅加分位係一啲都唔韌，好味。不過，雲吞就得2粒，啲餡料(菜肉雲吞嘅關鍵！)就不過不失啦。另外，值得讚嘅係，碗米線嘅酸菜同芽菜落得好多，基本上每一啖湯都一定會食到佢哋！…Read More

今日嚟到試吓個二人晚市套餐！咁我哋大約1930到，個日係閒日嚟，可能因為舖頭唔大，位唔多，我哋大約等咗半個鐘先可以入座，所以想嚟嘅朋友可能book定位先！🔺南瓜忌廉湯都幾 creamy 啊，不過南瓜味唔重，整體不過不失啦！🔺海鮮拼盤有4X青囗、2X蜆、2X蝦、2X螺、2X帶子、4X生蠔，可以點辣醬/wasabi/燒汁。個人認為生蠔略腥，其他就比較易入口。😰鍾意海鮮嘅朋友可能會更加喜歡，不過因為個人囗味，我就麻麻哋呢個。🔺菠蘿特飲酸酸甜甜咁，好開胃，仲幾大杯添，配啲海鮮食就幾夾。🔺炸蝦、薯餅最好味係呢個！炸蝦炸到金黃色，外皮夠曬脆，但入面蝦肉又唔會好粉，配埋沙律醬食，我比100分！個薯餅好似溝咗啲蟹肉，食落唔會好似普通薯餅咁單調。😍🔺蒜蓉白汁蜆肉意粉雖然蜆得4隻(略少)，而且意粉個底有啲油，不過蒜蓉同洋蔥味好足，食落好香口，都唔錯！…Read More

今日喺深水埗行街行到好熱，經過呢間糖水就決定試試佢！舖頭冷氣好足，而且舖面乾淨+企理+寬敞，枱同枱之間唔會話好近，坐得好舒服。🔺 招牌迷你剉冰好足料啊！$28就食齊剉冰、西米露、芋圓、珍珠、紅豆、薏米！咁嘅份量，正常都起碼$35，所以真係好抵。😙味道方面就不過不失啦，不過芋圓同珍珠都好彈口，唔會話好粉咁，絕對值得食多次！…Read More

今日嚟試呢間來自菲律賓嘅快餐店！咁因為我係叫外賣，而且買完過咗兩個鐘先食，所以味道同堂食會有啲出入！😮‍💨🔺快樂桶(3件雞髀+3件雞胸)外皮OK脆，肉質(特別係雞髀) 好嫩滑，唔會好乾。配埋佢個蘑菇汁食好特別！🔺祖樂堡有驚喜！蕃茄醬+千島醬好夾。😙…Read More

女朋友話呢間餐廳好抵食，今日同佢嚟到試吓，果然佢冇講大話。大約十款意粉，每款嘅份量都多到好得人驚，兩個人食一碟都絕對夠食！雖然大份，但價錢個 range 只係$35-45 (dinner) 咁上下，名副其實嘅大件夾抵食。雖然味道 overall 嚟講就唔係話特別出眾，位置亦比較隱蔽、難搵，但勝在平，而且環境昏暗，富有格調，坐得亦幾舒服，所以我覺得值得一去！🔺羅勒蕃茄牛肉意粉好大碟，不過味道有啲淡，唔夠酸，啲牛肉亦冇乜味，所以我哋落咗啲茄汁去食，如果再去未必會叫多次。🔺燻香煙肉墨西哥捲餅（配薯角）煙肉略鹹，但配埋個捲食都幾好味。薯角有驚喜，熱辣辣，有啲蜜糖，所以甜甜哋，好味！😙…Read More

喺OpenRice見到呢間越南嘢咁多好評，今日去咗沙田，決定試一試，果然冇令人失望！😛我叫咗個一人套餐，主食、小食、飲品三樣嘢夾埋$89，晚餐嚟講算幾抵食。個位雖然有少少迫，但整體算乾淨，都坐得幾舒服。🔺主食：越好雙寶飯雙寶即係雞扒同豬扒，兩樣都好重香茅味，雞扒特別嫰滑！個飯仲有蝦片、太陽蛋、酸蘿蔔，食完好滿足。😄🔺小食：越南炸春卷春卷好足料，外面炸得好脆，點埋個魚露一齊食仲好味。😙🔺飲品：青檸梳打略酸！不過好冰涼，配飯食好舒服。😌…Read More