WingKC's Profile

魚生飯ok，三文魚都係正常，d米都軟稔彈牙麵豉湯d海帶都爽口沙律菜都新鮮座位都唔算寬敞，坐得舒服但同隔離枱好近。樓面得2個人，下午1點開始做唔切，周圍都有人舉手追餐埋單。朋友甩底轉order 外賣，要等20分鐘拎外賣評價係：唔駛錢嘅話會再食。…Read More

舖細，要等，但值得，價錢係偏貴但好食，粉係彈牙爽口，湯飲完唔口渴，應該冇味精，牛柳新鮮，軟稔但應該冇加工過。小食，米紙卷，冇乜味好普通；春卷，包菜好食；牛油雞翼，蜜糖炸蒜調味，超正。回頭指數 - 如果去開旺角又有時間排隊會再去食。…Read More

聽講粟米椰子湯穩陣，叫咗，湯到，試湯，冇味，唔明點解其他人會讚，入座一定要你食售價188嘅海鮮套餐，冇得散叫，海鮮以外每份收錢嘅配料冇講明單點份量，即係你叫3份食物，佢比1份你都冇得同佢拗。海鮮，質素參差，有d新鮮有d有沙有d唔鮮。其他配料，例如魚蛋都係外購，差極有個譜。環境，冇人服務，仲要加一，員工顧住自己人開party，中間有一兩個著便服嘅小姐過嚟serve 你，唔知點解…個電爐完全冇力，大火開好耐都唔滾。食完之後睇返comment 先知有蒜蓉辣椒蔥，但冇人比過我哋，全程齋豉油加冇味湯底打邊爐。食完碗碟骨碟冇人收，放海鮮木桶漏哂水都冇人理。舖頭出名粥底火鍋但完全唔係想像嗰回事，只係最後比d白粥你用嚟撈你用剩嗰d湯。第一次好想快d食完走。…Read More

旺角女人街旁邊d餐廳其實好多間都係得個樣為免中伏，而家已經好少去嗰邊食嘢，本身今日諗住去沙爹王，但經過見到呢間，女友想試就入去，叫咗碗撈檬，好多檬痴埋一pet pet, 我夾出黎掉喺枱上面，但因為我成日驚人加料，通常唔會叫佢換，但有個阿姐見到咁，主動走過嚟問我咩事同即刻換過碗比我，40幾蚊咁嘅服務同嘢食一流講返嘢食，叫咗雞絲撈檬，好足料，新嗰碗d粉好食，但普通，認真講佢唔係特別好食，但性價比一流…Read More

今日終於試到神秘嘅宗像屋，7點去到都排長龍等咗好耐，但門口有凍水供應，唔錯，菜單係冇價錢的，要問先知價，今日一場黎到梗係試最貴嘅極上魚生飯，詳細菜單睇圖據說佢地魚生飯有3種食法:1就咁食，2包紫菜食，3加湯食，詳細睇圖魚生飯其實好食嘅，但其實中間所講嘅11種料都切碎哂，基本上佢有幾多料新唔新鮮我睇唔到，因為大部份都係吞拿魚蓉，其實小弟以前讀書做過日本餐廳知道吞拿魚蓉其實係d唔值錢嘅多筋位刮出嚟，咁啱我又食到條咬唔爛嘅筋，令我更相信係d魚蓉喺筋位刮出嚟比2塊紫菜你扮手卷食都係 gimmick嘢，不過最後加湯食反而有驚喜，好似蠔仔粥咁，個湯好鮮總結，好食，但極唔建議食極上，因為咁樣賣$298，唔抵仲有，我地認為成晚講日本嘅廚師其實係香港人…Read More

主要想試傳聞中既龍蝦包, 老實講, 期望過大, 龍蝦肉係煮完放凍撈D白汁夾入去炸過既面包, 同埋朋友同我都覺得呢個價值$288龍蝦包並唔係全隻龍蝦, 龍蝦肉食得出算係爽口新鮮, 但大家都覺得舊面包好食過D龍蝦肉 另外點咗個burger, 好夠料, 但太"漏", 2舊大牛肉, 1塊煙肉, 加芝士汁, 加幾塊菜, OK好食, 同朋友share 一半都覺得食肉食到有膩...另外叫咗小食炸雞, 好食, 粉薄肉汁多, 不過芥苿醬可以再濃D青瓜soda, 出奇好飲仲有杯水果茶, 飲真D其實似係紅茶加熱情果汁, 再加一少堆雜果粒總結就係,  成餐$770, 性價比黎講, 唔抵, 但可一試…Read More

只能夠講性價比係超越超級嘅超值，今日lunch 叫個拉面$55，有沙律，餃子，同甜品沙律，菜，番茄新鮮，汁夠餃子2隻，煎得好脆，好食湯，湯底我覺得係有加味精，但相信個底真係用骨煲出黎，面，彈牙，唔會太軟太硬有半隻糖心蛋，3塊叉燒同木耳，幾大碗最後仲有甜品奶凍，唔太甜，好食…Read More

巴黎鐵塔，自己溝嘅嘢飲放落個樽再篤落個杯度，有gimmick, 但唔好飲。食物的描述：巴馬火腿意粉同黑松露飯冇咩味本身想試白桃慕絲，但嚇驚咗唔敢試。最後兩個主食+兩杯嘢飲埋單~$350,老實講，唔抵...但地方大，係坐得舒服，主動拎櫈比你放袋，見到其他人d 甜品好似幾好樣，建議剩係黎食甜品傾計。…Read More

Sorry 如果用黎比茶餐廳，實在有d對唔住茶餐廳了，第一次食見到門口以為fine dining, 價錢都係…啱啱食咗兩個set, 揀咗大力水手pizza 同牛扒，牛扒抵食，可以成餐，低級牛扮高級牛同時冇去筋同肥，三份一以上都係肥肉同筋，大力水手pizza 得芝士，仲抵，飽到呢…菠菜，茄醬同兩隻生雞蛋都可以冇味…同好漏…甜品係cream cheese cake 上面嗰pat再加倍魚膠粉，環境嘈同細，夾硬路中心放兩張細枱，成餐落黎食咗近$500, 係堅唔抵……Read More

認真mode,呢間唔會再去，原因:1. 門口姐姐態度唔好，話執枱要等，等咗十幾分鐘都人理，其間keep住有人行落去…2. 人手不足，入到去waiter 小貓三四隻，拎住攞位飛企喺門口冇人理3. 性價比，$300個dinner, 你會發現佢個menu 其實種類唔多，但唔同汁醃就當多一種，好似，黑椒汁雞翼，韓式雞翼， 七味雞翼， 一種肉就用三隻汁當三款菜式，睇完發覺食嘅肉類唔多4. 刺身=雞肋，種類唔多，師傅小器，建議用刺身cost買肉5. 海鮮唔鮮，黃肉扇貝，梅淋蝦肉… 有彈有讚:地方大，通風好，一開始送嗰隻大蝦好食…Read More

同屋企人食生日飯, 諗住去大名鼎鼎既大榮華九龍灣店食, 因為一直以黎大節日都book 唔到位, 今次唔係咩特別日子, 所以book 到, 但規定只可以book 6:00 同8:00, 不過都明白, 咁出名酒樓, 就吓佢都好正常, 同埋我地屋企慣左早食, 所以冇問題尋晚食咗:五味雞: 本人覺得同豉油雞冇咩分別馬拉糕: 食唔出同我樓下間酒樓有咩分別紅酒燴牛仔骨: 味道ok 但過咸乳豬+燒肉: 除咗肥過外面燒味店, 都冇咩特別豬油撈飯: 全晚最好食, 其他餸都比唔起呢一砵飯唔知係咪太出名, D 人做到好忙, D 姐姐態度並不友善同埋名太響, 搞到期望太高導致失望...要讚既嘢就係真係抵食, 所有餸都係劃一價, 成隻雞都係$75…Read More

難食!! 同朋友經過瓊華諗住搵D 特色嘢食下, 喺樓下廣告牌見到佢幾特別就走上去試下, 一睇原來之後喺銅鑼灣食過, 記得應該唔差就入去, 點知入去7:30 完全唔駛等位, 燈光暗, 但唔舒服, 好嘈, 根本話佢係一間茶餐廳都俾面左佢!黑松露意粉, 唔知落左咩, 一D味都冇, D白汁同水一樣咁!咖哩雞+蛋包飯, 用鹽酥雞加D冇味咖喱汁, 就收你80幾仲有個牛肝芝士西蘭花, 放塊卡夫芝士上面就叫芝士西蘭花, 好心你整靚D 先甜品blueberry cheesecake, 從來未食過有鹼水味既cheese cake 我咁大個仔都係第一次 食左一啖 就成件cake 唔食.最好食都係個白朱古力雪糕pancake, 因為成件嘢都唔係佢地整, 件pancake 勁乾唔暖, 明顯放好耐OR 第二度買, 勁多白朱古力, 驚甜你唔死餐前湯, 白菌湯, 凍!餐飲: 檸水, 唔知佢用咩技術先可以切到咁薄, 要問佢拎多幾塊檸檬先夠味員工, 個個掂行掂過, 唔理人, 衣著是但…Read More