Princess Pink's Profile

搬左去4/F後間隔唔同左，一邊係店鋪一邊係電梯底，waitress送菜到外面座位都要經過等位的客人，有d奇怪。晚上7點幾去到拎籌，要第四十幾個二人籌(A飛)，足足等左個半鐘有多，餓到9點先入得 一心想去砌沙律，好彩臨入座個waitress即刻俾左隻碟我叫我快d夾左先，因為沙律吧9點就收檔。其實預左要等位，但因為見到有二人位冇人坐(超過5分鐘)，可能編排座位有問題，導致輪候時間拖長左...希望遲d有改善！沙律吧：粟米夠甜；生菜同豆都好新鮮；蜜桃同菠蘿雖然係罐頭貨但都係新鮮，唔似擺左好耐；薯仔沙律反而冇銅鑼灣o個間咁好味，可能係沙律吧同廚房出既分別(銅鑼灣店冇自助沙律吧)；車里茄好新鮮又大粒；長通粉都幾好味，不過已經俾人夾得8899；有沙律醬同千島醬揀(個人喜愛兩溝)三文魚菠菜意粉(白汁)： 三文魚肉好味，不過菠菜反而得幾條好似吝嗇左d！睇落去好杰身，但其實個sauce冇乜味，如果忌廉味再濃d會更好！雜扒配蒜蓉包： 吉列蝦唔錯，有鮮蝦味；豬扒唔"un"，個醬汁幾好味；雞肉太油；最失望係薯角，勁大陣油味，未食過咁難食的薯角蒜蓉包唔夠蒜蓉所以唔夠香，同埋見到隔離檯o個碟焗得少少焦好似脆d好味d，即係每次的水準都唔一樣。凍檸茶同鮮橙汁都冇乜特別，因為太飽所以冇+$8食是日甜品。整體食物OK，但明顯質素比銅鑼灣分店遜色，同埋等位實在太耐，有待改善！…Read More

朋友介紹，諗住一嚐呢間上海菜。入到去覺得裝修怪怪的，同網頁張相相差好遠，酒樓唔似酒樓，打冷唔似打冷，連正式餐牌都冇個，得點心紙，款式少到揀唔落手。壽眉冇茶味，茶壺杯碟又怪相，侍應亦冇禮貌...最後揀左五款比較穩陣既菜式：落完單約8~10分鐘，開始起筷：雞絲粉皮 - 真係唔值 $50，份量又少，又冇乜味，粉皮又唔滑又唔爽，冇乜雞絲同青瓜，醬味又麻麻，食過任何一間食店既雞絲粉皮都好過佢。半隻雞 - 唔記得隻雞咩名堂，但係隻雞瘦到骨多過肉，皮又唔夠香，肉唔滑，冇乜雞味，又唔足半隻，從未見過雞脾切得兩舊肉一舊鎚仲要係好細舊。小籠包 - 好細粒，普通貨色，雖然有湯但係肉味淡，$36/6件唔太值。黑醋茄子排骨煲 - 確實係有個煲，但係只有糖漿冇汁，D糖漿厚到一pat pat，D油仲多到成煲野閃令令，茄子有皮冇肉仲咬唔爛，排骨同豆角只係食到糖漿味而唔覺係黑醋味...多油多糖都叫「有營」？水煮魚 - no comment，因為我冇食，朋友就話好辣，似魚柳多過新鮮魚肉。上海粗炒 - 最後先上檯，好細碟，好似要$4x定$5x，連茶餐廳貨色都不如，又硬又乾又冇料，肉都冇多塊，真係齋炒烏冬。食完個個都好似冇食過野咁，我就淨係覺得食左好多油落肚，完全冇營！最後侍應見我地碟碟差唔多清晒，連唔好意思 / 唔該都冇聲就急急腳收晒D碗碟，好似想趕客咁。埋單三百幾，一D都唔值。估唔到稻香集團會出產呢種質素既食館，客家好棧同稻香酒家都唔會差成咁，以後唔會再黎「上樓」。…Read More