sauling28's Profile

香港大把甜品店，但係款多好食真材實料黃店價錢親民真係好稀有，夾更要講佢既缺點的話，就係對我黎講太遠同埋要等到佢四點先營業。我果日同朋友大約四點半到到，已經有五六個學生食緊，就諗有學生黎食既應該唔會差得去邊。之後睇下個餐牌，嘩～好多野食，久違既興奮感。佢淨係刨冰我係咁咦睇下已經有８到９種味，仲有榴槤甜品、芋圓同紫薯甜品（呢Ｄ甜品好少係同一間店同時出現同埋通常唔平），再望下個價錢，最盡都係５十幾真係好抵。我同朋友一個叫冰一個叫芋圓冰，淨係睇賣相已經覺得好好食。佢上面個紫薯唔係紫薯雪糕，係真係紫薯整成蓉再整到個波咁，下面係榔汁冰，一個甜一個唔太甜既組合味道岩岩好，加埋Ｄ芋圓既口感係超好食。粉紅兵團唔洗講真係好可愛，同埋比想像中大份，同埋估唔到後面有Ｄ小丸子既野，所以食落好有滿足感。我諗呢間店如果係晚市一定超好生意，真係好想佢開多幾間分店等其他區既人都可以食到高質甜品。…Read More

之前未試過黎長沙灣食野，因為有事要到呢頭食野，上網見呢間係黃店就想試下。大約點半到店面，無諗已接近lunch hour尾聲入面都仲係咁多人，但係Ｄ人都食得七七八八，所以都係等左５到１０分鐘就入得。打開個餐單，發現佢都幾多款野食可以選擇，主要都係定食同烏冬，我同朋友一人叫一個定食。見到個餐送到黎，就覺得都幾抵食，佢除左個主菜，仲有中華沙律同味噌湯，加埋都係六七十蚊，ＣＰ值高。我叫左個滑蛋鰻魚定食（每日限定數量），蛋同鰻魚好滑，而且份量唔少，再上多汁（應該後加鰻魚汁），所以Ｄ飯好入味，不知不覺會食好多。朋友叫左個鹽燒鯖魚定食，好唔好味唔知（佢覺得好食），但係上菜果下好香。如果有機會再黎呢頭，一定會再食。…Read More

好耐之前食過幾次，覺得ＯＫ好食。前幾日同朋友行開灣仔銅鑼灣就返黎再食。我地每次黎都會叫炸雞＋其他野食，今次就叫左酸辣炸雞同泡菜芝士薯條。我個人食辣既程度係勉強食到韓國有隻可愛卡通既芝士辣味杯麵，所以佢果度既酸辣炸雞同泡菜芝士薯條對我黎講其實唔太辣。再加上之前食過佢個甜酸炸雞之後，我佢個甜酸果道對我黎講太濃，所以今次叫左酸辣炸雞。酸辣炸雞個炸粉唔多，雞件無骨，分量多雞件細，所以岩女仔食同方便，一件雞分兩次咬已經食左。佢個汁有Ｄ似Ｍ記既泰式辣醬，而且都落得多，對於鍾意酸辣既既我黎講好正。重點係佢入面除左炸雞外，仲有韓式炒年糕，不過分量唔多，應該４—６舊，但已經好夠，因為如果又叫酸辣炸雞又叫炒年糕又叫薯條就真係食唔到咁多，所以如果係想食炒年糕，點炸雞都ＯＫ。泡菜芝士薯條係第一次食，之前都無諗過泡菜同芝士可以整一道菜，但出黎既效果真係好夾，泡菜既酸辣同爽口加多芝士真係好正（雖然好邪惡）。因為之前一直食開泡菜湮肉薯條所以都未試過新野，無諗過咁有驚喜，我下次都再點佢。重點係，我地兩個女食咁係食得飽，但個價是唔貴的，每人都好似~$50(無野飲，不過灣仔銅鑼灣咁多野飲店出去飲埋都唔貴)，同樣食雞，價錢都係同ＫＦＣ差唔多但好食Ｄ，所以都幾抵。…Read More

之前係度食過一次晚餐覺得唔錯，但果次無影相所以無寫食評，今次就試下午茶時段，無左我最鍾意既香蕉拔絲同雪糕，但係都仲有好多野食選擇，只係75分鐘食得有少少趕，如果想同朋友邊食邊傾計就rush。衛生方面，探熱消毒做得足，如果要出去拎野食就一定要戴手套同口罩，所以都唔擔心交叉感染，環境都乾淨，位與位之間都有透明膠板分開，所以都放心用餐。食物方面，今次好欣賞佢個蘋果脆片、藕餅、香蕉糕同楊枝甘靈（重點：應該落左唔少花奶所以好好味），比較可惜係食唔到碗仔翅（我見無哂之後無fill，所以應該75分鐘得一round?）。但野食真係搵唔到唔好食既，結論是88蚊有得食正餐同甜品以尖咀黎講是抵食的。…Read More

 本身好少出筲箕灣，上網睇見呢間ＯＫ又有拉麵食價位平民就諗住應該唔錯，入到去環境都算乾淨。可能我早去到，所以間店無咩客，間店空曠加上店員講野都幾夠中氣，所以都幾應聲。野食就食左個拉麵，唔夠熱，湯底比較淡，麵ＯＫ，肉都ＯＫ，野飲就糖漿落得多但攪唔勻所以最後超甜。個價都算親民既但俾同樣價位可以食到更好食既野食。係度寫食評都係想店家睇到可以改善工作態度同食物質素，希望佢既優勢唔好淨係得交通方便同價錢親民。…Read More

幾年前係台灣食過覺得好好食，見係香港都開就過黎試下。今次試左個牛油果pizza、莓果甜在星、400次咖啡(朋友叫)同牛油果沙冰。我本身鍾意食牛油果既, 覺得牛油果pizza好好食，佢上面D牛油果醬好足, 每一啖都有牛油果味，加上我地係叫薄批，所以兩個女仔好快食哂, 1D都唔heavy。莓果甜在星個餅底都係薄，上次有white cream(怕肥就唔好叫甜在星， 因為份量都唔少)同埋莓果醬, 酸酸甜甜好岩夏天食。400次咖啡同牛油果沙冰都好creamy同份量都多， 但牛油果沙冰就比我平時飲開果D甜，不過係好飲既。因為我地都係單點驚兩個女仔食唔哂2人餐，所以個價比跟餐貴, 但係發現其實應該可以食得哂，所以下次會叫餐。P.s. 我係台灣食過珍珠奶茶甜在星, 希望呢度可以加呢個餐單, 謝謝…Read More

之前去過一次食，果時係晚餐，貓貓都活躍會同你玩。今次食下午茶，多過一半都訓緊，但佢地都好乖會俾人摸，係夏天一路涼冷氣一路摸腦再細細聲同FD 吹水都幾chill 。我諗去得貓cafe都唔會太睇重食物質素，味道覺得ok接受到，但未去到好好食既程度，就係普通café味道，選擇都比較少，入場費包一杯野飲，我叫左果茶，飲開珍奶微糖既我會覺得好甜。$160一個TEA好值唔值真係見人見志，但身為一個無養貓又有得係度玩貓既人覺得環境OK，TATAMI坐得舒服，又多貓行埋黎係開心既，會再黎但唔會成日黎。…Read More