kityee0923的個人專頁

食物相當有水準 環境舒適 員工亦非常客氣可能由於佢個地點關係 本身我對佢冇乜期望 但估唔到啲嘢咁好食每一樣菜式個水準都好平均但一定要多人食先至食到仲有好多大菜 （例如元蹄 雲吞雞）我哋都未試到8個人食到飽飽連甜品都食唔落😆太多嘢想食 下次要再去可以試埋其他菜式同埋甜品希望佢可以保持落去 香港有太多食肆因為環境關係維持唔到 見到真係覺得十分可惜尤其是係啲食傳統菜式嘅店舖話時話銅鑼灣都有一間雪園 有冇人知道佢哋有冇關係呢？…查看更多

感覺食物比以前好味道清淡得來亦唔會淡茂茂都唔錯嘅可能由於係自助落單嘅關係 啲員工有少少十問九唔應 但態度唔算算係好差嘅 懶散咗少少啫如果員工嘅態度可以積極返少少就會更加好…查看更多

難得經過附近諗住去食吓差唔多三點都仲要喺門口攞飛等食物水準都還算可以 但唔係好大驚喜我覺得牛肉麵個湯底可以好啲鹽酥雞 泡菜 都不過不失呢期周街都開咗好多台灣嘢有比較之下 覺得佢有啲普通…查看更多

間餐廳啲裝修真係靚 用嚟打卡喺一流但係裏面有個員工啲態度真係好差我哋訂咗枱 6:00坐低 揀嘢食揀Cocktail睇Menu用咗好耐時間 因為真係好暗 黑色背景Menu啲字又唔明顯 睇得好辛苦好不容易諗到食咩 叫嘢食嘅時候幾乎搵唔到人 當時得我哋一枱坐喺dining area 但啲員工就唔知去晒邊 到我哋要搵到人嗌嘢食嘅時候 個員工先同我哋講話今日焗爐壞咗 呢樣又冇嗰樣又冇 咁點解唔喺我哋坐低俾Menu我哋嘅時候講呢？ 我哋又要重新諗過食乜 佢仲要黑哂口面好唔耐煩嘅態度到我哋問佢係咪有靚嘅露台影相 佢就指俾我哋睇喺出邊 點知出到露台完全同上網啲相唔一樣嘅？後來我哋先至自己發現原來網上靚相嘅地方喺天台飲嘢嘅area 唔係露台出面 佢完全唔講清楚 由得我哋自己搵囉 啲嘢食其實真係好一般 都真係志在影吓相先至會嚟 但唔會有下次囉值得一提嘅係我哋上到天台 嗰度嘅員工友善得多仲主動Offer借個腳架俾我哋影相同我哋講慢慢影唔使急 十分之Nice係樓下室內食飯嗰度啲員工就十分麻麻囉…查看更多

名副其實地如標題 好睇唔好食淨係俾對眼食就OK 靚影相 打卡就夠喇雪糕唔好食 色素糖漿都唔好食 個churro趁熱食本身還可以 可惜朱古力糖漿冇朱古力味 其他五顏六色嘅糖漿完全唔知咩味個雪糕本身非常之cheap 加咗好多唔同材料落去 整到色彩繽紛就賣到貴晒 其實賣得咁嘅價錢如果可以揼少少本落去個雪糕度一係整個滑嘅 一係整個好食嘅乳酪 性價比會高好多而家樣樣都唔好食 加埋全部更難食只可以遠觀而不可吃下😅試一次 打完卡就可以咁嘅價錢 我寧願返去食Smile 😆…查看更多

舊式店舖都理解亦明白衛生情況差 地方污糟枱櫈黐立立都算 可以接受但啲人態度實在太差！話我俾嘅錢太污糟唔肯收??!?!?!!!!? 堅持要我換一個如果好聲好氣講都算 兩個阿姐仲要加貌似老闆嘅龐大身形男人走出嚟鬧話唔會收！我最終係有換俾佢 但真係想知究竟俾啲個硬幣付款係咪唔係錢嚟？好想知如果當時我堅持唔換佢報警 會唔會話個硬幣唔乾淨我唔當俾咗錢？算唔算犯法？我唔係想為咗小小事做西客 但幫襯買嘢俾人話到好似唔俾錢咁真係條氣好唔順😡…查看更多

雖然價錢平 又多人排隊好多人買 但真心覺得啲餸係唔好食㗎 只不過係呢區太少兩餸飯嘅選擇所以啲人先至覺得佢好好 啲餸真係好油 食咗個蒸雞 炒四季豆 再加$15要咗條魚 個蒸雞全部都係豆粉一pat pat咁 炒四季豆非常之油淋淋 條蒸䱽魚普普通通 少少鞋個白飯都還可以嘅 唯一覺得好嘅係佢支檸蜜囉下次可能我要試吓蒸肉餅嗰啲 或者冇咁油膩會好少少 兩餸飯喺中上環真係好渴市 如果佢可以做好少少相信生意會更加好而家大家都咁注重健康嘅年代 如果可以少油少鹽就更加好喇…查看更多

食過好多次，雖然次次食完都好口渴（口味略重），但真係好好食，令我不斷回頭。最鍾意係嗰樽泡蘿蔔😋 我大愛，又夠酸又爽脆，好味到不得了👍🏼 如果可以我直頭想就咁買樽蘿蔔番屋企😆份量又足夠，性價比好高我食過豬扒、豬頸肉、醉雞、豬軟骨、豬耳都超好味 朋友食過話佢個牛腩都好味真心覺得味重咗啲，食完會有口渴嘅感覺，久唔久食下我覺得可以嘅難怪因佢長期都勁多人排長龍平心而論我個人又唔覺佢哋態度有問題喎可能係踢哂腳顧唔到太多嘢啫…查看更多

今日天氣熱到溶，喺街度行完一輪去食晏，一坐低嗰下熱到係咁撥扇其實只係因為出面熱先會咁熱，坐落就會慢慢涼番但一個好貼心嘅店員專登幫我哋整咗把專用風扇，嗰刻真係覺得呢間舖嘅服務非常之有心，值得一讚食物方面非常好👍🏼我哋食impossible burger 同牛油果🥑意粉兩樣都好好食，清淡得嚟夠味，唔係淡戊戊嗰啲一般人印象中嘅素食都係無味嘅，或者唔好食嘅。其實係佢哋未遇到好味嘅素食啫如果香港多啲有質素嘅素食店，應該會多啲人唔抗拒食素…查看更多

恕我直言試左鴨腿冬陰公檬唔係話難食嘅，不過應該叫鴨腿番茄🍅湯底檬完全零冬陰公味，冇香茅味冇辣味冇冬陰公應該有嘅香料味，只係勁濃厚番茄味鴨腿可以如果唔好對佢有冬陰公嘅期望係可以接受嘅檸檬🍋批直頭冇檸檬味得個甜字，而且好多糖粉，應該叫砂糖批至真😅連我超食得甜嘅都食唔落，因為真心難食杯茶ok嘅，有啲橙皮檸檬皮味感覺清新星期六下午去都幾多人幫襯，大部份都係食緊burger，可能強項係burger都唔定下次有機會可以試吓burger應該會好啲…查看更多

首先講嘢食我叫左黑豚肉磨菇便當加鹽酥雞小食價錢係平，但真係⋯差基本上如果咪埋眼你會以為自己食緊肯x基個磨菇飯，完全唔知邊忽係似台灣便當個鹽酥雞不過不失，同你喺冷凍舖買番屋企自己炸嗰啲一樣，唔太差個柑桔蜜就幾好，沖得夠濃至於氣頂⋯我中午12點幾去到，見冇人排隊以為好好彩由於第一次幫襯，見個餐牌冇台灣便當最普遍嘅排骨便當同雞排便當，所以我就問個職員我：請問你哋有冇排骨便當或雞排便當？佢：有小食我：🤔？ 佢：有鹽酥雞嗰啲小食我：喔即係冇排骨或雞排便當佢：你跟番個餐牌叫啦，我唔明你想要咩呀！🙄🙄🙄係，我表達得唔好，令佢唔明係，我應該知道食飯時間佢居然冇人買係伏係，一切都只能怪自己太傻…查看更多

下午茶價錢好抵，$36有碟細細碟炒嘢加嘢飲干炒牛河 一個字：「好燶」 一大陣𤓓味好唔得肉絲忟米：硬掘掘凍冰冰淡戊戊平心而論，好想支持下年輕人，但試完真係太伏，希望廚房可以提升下質素，以便繼續支持黃埔區好渴茶餐廳，如果啲嘢好食真係唔憂冇生意…查看更多

裝修好靚，周圍都係花花、粉紅色，好girly好夢幻我哋散叫食午餐，但見到好多人打卡食tea set點心雖然唔係樣樣都好食，但都有幾款好特別 （個燒賣普通到唔記得影相添）未去過都值得去試吓嘅…查看更多

一向都勁鍾意食Tapas，好鍾意佢細細碟每樣一口可以試好多款嗰種滿足感呢間PicaPica食物水準幾出色，尤其係個Paella，海鮮🦞味非常香濃，入哂啲飯度好正我平時唔太好食飯都覺得好好食有幾個菜係我食西班牙菜必食嘅就係乳豬、蛋餅同八爪魚。乳豬好一般，個人認為另一間較為好食蛋餅香重香料味好鍾意八爪魚🐙幾好食其實仲有好多dish想試，但奈何人少食唔晒咁多下次想試吓佢個紅蝦熱狗🌭️ 見枱枱都嗌好吸引…查看更多

朋友介紹話restaurant week menu 抵食，即刻去試試。餐廳地方細細，只有幾張枱同bar枱。其中一邊有賣佢哋嘅product，例如酒、意粉、ham等等⋯果然食物水準唔錯午餐有頭盤，主菜，甜品同飲品，個咖啡好有心機畫咗好靚嘅花，令到成餐飯好完滿下次再去要試吓佢啲tapas同ham先得員工嘅服務態度亦好好有少少插曲係有一位店員（唔知係咪係新黎）不停上錯菜上錯枱，但全店其實只係得5張枱，都幾搞笑…查看更多