bbgirl712's Profile

咁啱去到冇人，坐低冇幾耐就已經有10個客。外賣同堂食都有。唔少人過嚟買外賣。叫咗matcha soda, truffle basque cheesecake + french toast. 冇諗過黑松露cheese cake都幾好食！黑松露好香！但係老實講，cheese cake同french toast其實都係分開食。french toast吸咗好多蛋漿，好濕潤，夠蛋香，糖漿啱啱好，唔會好甜Matcha soda好濃綠茶香。matcha 打到soda面嘅creamer 都好滑。見到以前有留言話職員態度唔好。我相信已經改善咗今日一入到舖頭職員好友善，叫我哋個客攔河先。今日真係好熱，仲要勁潮濕。完全唔會吹我哋落單。仲主動問我哋使唔使介紹。有好多款baked goods!! 真係花多眼亂，見到佢嘅曲奇，carrot cake, loaf cake全部都好吸引！個樣唔係預制品嘅感覺。唯一就係價錢定位都有少少高. Matcha soda x2, cheesecake french toast 都$200…Read More

平日夜晚差不多七點嘅時候一個人去食見到有四個吉位但係店員要求我搭枱我問佢可唔可以坐四人枱其中一個位店員強調要搭枱我最後坐喺四人枱先有人嚟先算結果第二位食客入嚟佢即刻安排佢坐我對面隔離仍然有兩個吉位🤔其實我唔介意搭枱只要你張枱夠深唔好我食嘢嘅時候同對面個食客個頭好近🫣其實有冇諗過好尷尬？仲要係唔識嘅一男一女唔高興係店員嘅態度一個人食就係坐得舒服啲嘅自由都冇？其實我都係一樣俾咁多錢食飯Lunch time繁忙時間我理解但係夜晚確實唔算多人我坐低到走嘅時候都係不斷有吉位以後一個人我唔會再嚟呢度食嘢一係就外賣食物不過不失未去到嘩然可能我嘅味蕾都比我嘅感受影響咗…Read More

你嗰三次，總結一下三次嘅體驗。第一次係食avocado scrambled egg sour dough toast, latte. 個蛋好滑，牛油果都新鮮。旁邊嘅沙律菜都有清新嘅沙律汁。咖啡就梗係好飲啦，話晒都係主打咖啡嘅小店。第二次食咗大大早餐，latte. 牛角包都有少少糖中。但係又唔係會好甜，有驚喜。煙肉就唔係最靚嗰隻嚟嘅，雞蛋相對今次都冇咁靚。不過80幾蚊咁大份，我嘅要求越唔會去到咁高😅 第三次嘅體驗。egg bebedict❤️ latte. 出面真係冇可能呢個價錢食到Egg Benedict會有齊煙肉同煙三文魚。三文魚好新鮮唔會有嗰浸腥味。兩個蛋黃都係流心，煮得啱啱好。總結三次嘅體驗。坐外面對住出面嘅大坑渠有一番嘅風味。住左附近幾年，一般都無異味嘅。去到小店係要自己開摺檯同埋椅子。外面最多可以放三張枱。客人都好親切，會讓位其他客人放枱，教大家點放。買嘢食係入去counter同靚女買嘅。店內可以電子或現金支付。咖啡永無失手，每一次都係上咗食物先至會上咖啡。我覺得呢個次序好貼心。由於星期一至五都係靚女一個人主持店內嘅運作，食物同咖啡都需要耐心等候。不過我覺得等候嘅時間好合理。美中不足就係店內暫時都係用即棄餐具，會有少少影響美食嘅享受。好難得香港有呢一類型嘅小店。都希望可以多啲見呢一種給客人可以遠離繁囂，享受食物嘅小店。…Read More

同朋友過嚟食大閘蟹放題。到大廈嘅門口其實已經有少少令人卻步。沿着一條污糟嘅樓梯上一樓，餐廳門口嘅走廊油淋淋到不得了。每一步都要行得好小心，容易跣腳嘅鞋千祈唔好着過嚟。入到去被安排坐窗口嘅卡位。其實成個餐廳嘅感覺都唔係太衛生。自從covid，真係未見過有餐廳嘅衛生水準可以咁低。門口油到會跣腳，再加上一塊千年都唔覺有洗過嘅膠地氈，行入去果下已經覺得不妙。不過諗住食蟹同埋火鍋都係煮到熟一熟嘅嘢，應該唔會肚痾呱，亦都唔想掃朋友興。就繼續坐低。餐廳入面攞嘢食嘅area一樣都係油淋淋。一步一驚心。出面嘅嘢食我完全冇攞過。一心淨係食蟹，火鍋淨係食咗幾片牛肉。豉油都費事。最驚嚇係食食吓發覺有隻BB小強喺我地張枱。唔知好彩定唔好彩我唔驚曱甴。我哋好冷靜咁用紙巾拍死佢。點知交俾店員嘅時候先發覺佢未死。店員一句說話都冇講，連埋個食物兜一齊收咗之後，件事就完咗。隻小強其實未死，佢將成個兜入邊嘅野就咁倒咗落去架收廚餘嘅手推車度就算我見有食評話啲蟹唔掂，好彩我嗰晚啲蟹全部都正常，都好食嘅。火鍋料我就唔建議啦。樓面同事嘅服務還可以啦，都有禮貌嘅。呢個值得加分。但係餐廳嘅衛生真係有好大嘅進步空間。…Read More

喺外賣平台叫咗個總匯蛋餅，同埋香腸滷肉便當。明明寫咗粟米，魷魚，芝士同埋肉鬆。嚟到嘅時候變咗粟米，芝士加一大堆罐頭吞拿魚。完全貨不對辦。個香腸滷肉便當超級hea. 完全俾之前嘅食評欺騙了😓…Read More

好多年前都有食牛涮鍋。冇諗過今日食嘅質素會差到呢個地步。連罐裝汽水，包裝飲品都唔再提供。只有一部汽水機，仲要係百事。汽水機出嚟嘅汽水好淡，啲冰有啲溶溶地嘅狀態。成件事就好似喺薩莉亞打邊爐咁。但係佢唔係薩莉亞嘅價錢囉:(雪糕就一向都係軟雪糕，但係就算今日嘅芒果味同埋牛奶味，我只係食到糖嘅味道。我食第二貴嘅餐，兩個人都要七百幾蚊埋單。剩係得牛肉係比較好食。出面夾嘅配料，菜唔係好新鮮，啲丸亦都唔好食。想搵粒正常啲嘅牛丸，貢丸都冇。今時今日呢個價錢，出面有大把選擇。我完全唔理解點解仍然會有人排隊食。食完真係嬲咗。…Read More

叫咗一個麻辣（小辣）米線， 餸揀咗滷水腩肉同埋貢丸。外賣盒係分咗格嘅，米線同滷水腩肉係麵格，貢丸就係湯底入邊。亦有兩條生菜喺湯入面。不過因為生菜吸晒麻辣啲油我就冇食到啦。服務方面正常，員工有禮貌，會主動去門口吸引食客，不過建議唔好太進取，有時行過睇餐牌未必係想即刻食。會俾到壓力顧客行快兩步喇。平時食譚仔我食開少米線。不過呢個米線我食得晒。相信比較大食嘅男士就未必夠飽喇。講講個湯，第一啖已經覺得好辣，食多幾啖就覺得好鹹添。食到尾我差唔多係夾硬食埋，因為唔想嘥嘢。食完成碗米線之後我飲咗一支水。呢方面可以進步一下。滷水嘅腩肉係好食嘅，有四小粒，份量還可以接受，多一兩粒會開心啲。滷水都入味，我覺得好食嘅。貢丸就正常貢丸啦，唔係特別差嗰隻。都彈牙，肉質都唔錯。整體來講如果個湯可以淡返少少，麵嘅份量多番少少，就會好啲。湯嘅選擇其實都幾多，不過揀餸方面我可能需要多少少時間去習慣。食開以前嗰間口味都幾唔一樣。因為冇咗豬柳/豬頸肉，午餐肉，響鈴同埋紫菜呀！唔怪得我望住個餐牌好耐都唔知點咩好😅😂呢個係我個人問題嚟嘅。食開嗰幾樣就只會嗌嗰幾個餸。希望餐廳會改善以上嘅地方，如果唔係我嘅飯堂就少咗一個喇。…Read More

平日午餐嘅體驗呢間舖頭無限食用時間，兩個人都會比四人枱。坐嘅位置相對鬆動，和隔離枱嘅距離適中。唔會聽到隔離枱講嘢，除非講野好大聲。店員禮貌相當好，有問必答，亦都好樂意為食物作出介紹。Set lunch有跟湯/沙律。我揀左湯，今日係紫薯湯。有紫薯嘅甜甜地，又有少少鹹，加埋都ok. 我叫咗seabass。個魚剪得唔錯，望落去份量好似細細份咁，但係食完我都啱啱好。魚下面嘅薯蓉相當幼細同埋好香牛油同奶味，加分👍🏻白汁都係有忌廉嗰隻，唔係用麵粉開嗰啲白汁，做得唔錯。都好香👍🏻招牌港式奶茶，跟餐可以加$15。茶底好香，唔有苦澀味，奶嘅份量亦都好適中，飲完唔會漿住個口。應該都有300ml. 唯一可以再做好啲，就係可以加埋個小甜品就仲好啦！…Read More

今次係上openrice訂枱。店嘅大招牌係另一個名，門口有一個細牌寫住Sleepless. 呢一方面有少少唔清晰。入店前，店員會為客人噴消毒噴霧及量度體溫。不過店內位置較少，所以同隔離枱都唔會有吉枱，大致上同其他客人都只係一板之隔。未有做到50%嘅入坐率。如果想傾密計，亦都好容易比隔離聽得一清二楚。所以同朋友食完就走咗啦。平日午餐只提供lunch menu及少量食物嘅選擇。2點後先可以叫benedict嘅menu。但係下午茶應該唔會食呢類型嘅嘢吧🤔🤔所以我和朋友最後叫咗個all day breakfast. 本身係素食嘅breakfast，如果想加煙肉或者腸仔，都要另外加錢。由於加嘅價錢都唔少，大約$20(如果冇記錯嘅話)所以最後都冇加。All day breakfast 有牛油果sourdough 1/2塊，1/2塊牛油多士，黑松露炒蛋，沙律同埋蕃茄。牛油果sourdough味道唔錯，都做得幾脆。炒蛋本身我自己就唔係好鍾意配黑松露，所以冇乜意見。但係百幾蚊一份all day breakfast 係呢啲嘢嘅話，我又覺得有啲over priced. 蕃茄基本上係九成生，無grill/煎夠時間。蕃茄同菜都係不需要烹調的，所以覺得誠意有點欠奉。另外都有叫咗個咖啡，我叫咗flat white，朋友叫左cappuccino. 正正常常，不過不失。飲品無得跟餐加錢，是另外計的。如果朋友仔想要特別拉花嘅咖啡係貴$10的，平均50幾蚊一杯。整體上我覺得環境唔係10分舒適，食物嘅質素亦都一般。離開時亦會叫顧客將自己用過嘅紙巾等等放入垃圾桶才離開。本店除咗衛生意識比較高之外，這個價錢，這個食物嘅質素，我覺得都係因為租金問題。如果環境可以舒服少少，令客人可以放輕鬆坐耐少少。這個價錢我沒有太大意見，但係如果坐得咁迫都係收呢個價錢就各位自己考慮吓啦。…Read More

之前喺觀塘食過晚市，知道原來佢地lunch先做蛋餅，所以今次過嚟堅尼地城呢邊試吓，諗住食lunch就冇死啦，終於應該可以食到蛋餅。點知一問先知原來呢邊係晚市先做蛋餅。真係比佢哋玩死！😭😭😭😭明唔明白好想食但係兩次都食唔到個種晴天霹靂嘅失望收拾心情之後，我哋叫咗一個香菇肉丸麵線，焢肉飯，酥炸魷魚，台式香腸，蚵仔煎。食物名稱有講錯嘅話請原諒😅麵線好QQ，味道正常，唔會好鹹，有啲肉滑咁嘅豬肉，香菇片。啲湯食食吓會變稀。焢肉飯好好味，唔會太多汁，豬肉亦都啱啱好半肥瘦🤤飯同肉嘅比例亦都啱啱好，唔會到最尾淨係食白飯酥炸魷魚嘅粉啱啱好，鬆脆得來唔會口。加埋九層塔，超級好食。調味亦都適中，食完唔會好口渴平時好少叫呢個，因為總係覺得台式嘅蚵仔煎好濕好淋咁。但係佢呢個蛋好香，有酥炸嘅口感，中間嘅粉亦都唔會太多。都係好好食😋台式香腸反而就好一半，唔係特別香，亦都唔係特別差。個肚唔多位嘅可以試下其他嘢小芋圓奶茶，同埋唔記得咗另外呢杯係咩啦😅不過不失，少冰，算大杯👍🏻👍🏻…Read More

真係好好食，一定要返熱嚟食！係寒冷嘅冬天， 一塊曲奇加一杯熱茶簡直係人生！買嘅時候都覺得有啲貴，畢竟都成$3x一塊，又無promotion。但係返到屋企望真啲屋企嘅size我又唔覺得佢咁貴喇。Mrs F一塊都$1x, 但係等於cookieism嘅半塊。味道亦都偏向油膩，同埋超級甜。我本人已經係焦糖粉絲，都覺得稍為略甜。暫時我試咗阿嬸嘅期間限定嘅檸檬柚子同埋gingerbread walnut. 兩塊我都係屋企返熱嚟食。兩塊嘅味道都好濃郁，但係唔係好甜嗰隻。檸檬同柚子味好出，但係唔會有酸嘅感覺，夾咗白朱古力好襯。Gingerbread 都係好spicy好warm，甜味適中。油就一定有㗎啦，冇油嘅曲奇都唔會好食啦。阿嬸曲奇嘅質感唔係得個脆或者chewy。我自己覺得有啲似cookie and scone之間。所以口感比較豐富，外面脆入邊鬆軟帶少少chewy。食得出佢個recipe唔係咁易做到。價錢貴咗嘅部份就當係R&D啦。一個好嘅小食都需要好耐時間去研發嘅。我一次過買咗5塊 ，又唔敢一次過食晒所以放入密實袋再擺咗入冰箱。攞出嚟返熱後都一樣好好味。放咗入冰箱就唔使迫自己幾日食晒變肥妹仔啦！…Read More

星期六晚食大閘蟹放題， $458一位加茶錢及加一，買單$524/位。有任食片皮鴨，每位送一隻七頭鮑魚及燉湯，任食幾款甜品及糯米飯。湯同鮑魚會送上枱，其餘片皮鴨及甜品及糯米飯需要自己出去攞。質素不過不失，任食都冇乜要求嘅。但係有時都要排隊，有啲浪費時間。大閘蟹佢寫明係三至四兩。每人會送一隻凍嘅花雕蒸蟹，呢隻蟹就好細，而且冇乜膏。放題嘅大閘蟹有三款，清蒸，花雕蒸及鹽油焗。蟹嘅質素唔錯，蟹膏都好靚。但係食咗成晚，無論點樣落單都唔覺有花雕蒸蟹。除非佢嘅花雕味實在淡到食唔出。另外要留意嘅就係上菜時間十分之慢，雖然寫咗製作需時，需要15至20分鐘。但係第一輪嘅蟹，足足等咗45分鐘先上枱。每次落單又只可以每人一隻。但係放題時間是兩小時。唔知係有心還是無意啦。明知做唔切，是否應該一早開始準備？定係驚我哋唔會食其他嘅食物。但係因為上菜太慢，想食多啲都食唔到。有啲搵笨囉。不過可能只係呢間分店嘅問題，有朋友食過其他分店嘅大閘蟹放題並沒有出現以上情況。真係好令人失望。不過值得一讚係樓面嘅姐姐，太多由頭到尾態度十分良好。換碟速度快，又有講有笑。反而同經理投訴上蟹嘅速度太慢，佢完全沒有意欲去追廚房出蟹。同佢講完都完全冇打算跟進嘅一副樣。…Read More

唔記得咗邊日同朋友OpenRice book咗枱一點食lunch. 見OpenRice佢寫開一點，應該冇問題啦。上到去有一位員工在用膳中，有2個唔係嘅。點知我哋一坐低左，三位員工齊齊圍住一張枱開飯。客人啱啱到，員工先至拎個lunch出嚟嘆😳本來諗住佢會快食，等佢食埋先落單，都唔想阻住佢。點知佢幾個都係慢慢食，食左半個鐘，水都無俾我地，放低左餐牌就自己去咗開飯😳😳😳一句野都冇講。結果我哋坐咗半個鐘之後先至落order。。。等得嘢食嚟，我哋結果要趕住嚟食，因為冇諗過佢咁慢。嘢食同以往差唔多，ok la. 但係態度有改善空間。覺得冇以前咁乾淨，坐低嘅時候有啲up味，唔知係枱定梳化啲cushion. …Read More

新年之前睇電視見到已經好想試，但係見新年期間都不停斷貨，都一直未有機會買來試。前日行開屯門站過去舖頭買咗盒。原來係V city一田個度落電梯落街行過去，過左紅綠燈個個商場就係。一上電梯就有個foodcourt, 佢就係foodcourt嘅左邊頭一兩間舖。原本我係街市個邊入口入去，都揾左一陣先揾到😅原味蛋捲。比起恒X或者美X嘅粗。但係一咬落去原來好鬆脆，唔會有食曲奇嘅感覺。蛋香夠，唔會太甜。每日都食幾次食幾條😂😂🐽原味$78(如果我冇記錯)，大盒過美X又平過佢。以前我會鍾意食恒X，但係原來呢個仲好食!…Read More

睇相就知道邪惡嘅程度係幾誇張落單之前有少少猶豫，擔心有芝士嘅鹹味，仲應唔應該落糖漿呢？上菜嘅時候有糖漿連埋，就試吓落糖漿。結果原來幾好味😂一定係我見識太少喇唔怕肥嘅朋友值得一試感想，好彩凍檸茶叫咗走甜🙈…Read More