河馬一號's Profile

今日傍晚嚟到油麻地度睇電腦，就食埋飯先返屋企。可能依兩日天氣凍，突然好想食雞煲，諗起有朋友推介，就嚟咗呢度試下。一入門口就見到非常非常之靚嘅旺角市區夜景，簡宜有種大地在我腳下嘅feel。坐低之後店員就會隨即奉上「混醬寶盒」俾客人混醬。睇下有咩食先～依度算係主打雞煲，仲有好多款唔同款式嘅湯底，但今日一心衝着雞煲而嚟，所以就揀咗重慶麻辣雞煲，要BB辣。因為已經有半隻雞嘅關係，唔想食太多肉，所以就另外再點左一啲海鮮同配料，再要左杯鹹檸七，好豐富喇！首先嚟嘅係飲品，食雞煲呢啲比較重口味嘅嘢，飲杯冰凍嘅鹹檸七，就又聚火又解辣喇！而且依度嘅飲品都超大杯，食火鍋令人飲得盡興好緊要！然後主角雞煲就嚟喇！雞煲嘅雞件本身已經熟咗，輕輕滾翻熱佢，就可以開動喇！雞件好大件，好厚肉，醬料掛得啱啱好，味道當然係夠，但係唔會太油太鹹，BB 辣仲有少少刺激，就算係冇送白飯都唔係太重口味。之後其他配料就陸陸續續咁嚟喇，叫咗脆肉鯇魚腩、桂花蚌、手打牛丸、冰菜同埋佢哋招牌嘅芝士響鈴。食晒雞件之後就叫店員嚟加湯，因為叫咗蔬菜，唔想太油，於是我就撇左啲油佢就岩岩好喇！冰菜係冬季限定嘅，上邊係好似有一粒粒水珠咁，食落係非常之爽脆清甜，我係好鍾意食，未試過嘅一定要試下！桂花蚌同脆肉鯇魚就又係我嘅最愛！有一點嘅話，我通常都會叫。 桂花蚌灼一灼就食得，入口又鮮甜又爽滑，好正！脆肉鯇魚腩切得好大件，又爽又彈，好滿足。牛肉丸係自家製手打嘅，入口有好濃嘅牛肉味，好似食緊「牛滑」咁！至於鋪頭嘅招牌芝士響鈴，上枱嘅時候仲熱辣辣，應該係新鮮炸起。略略過一過湯，一啖咬落去，又香又脆，啲湯汁又爆出嚟，入面仲有一層芝士會爆漿添！仔細睇一睇果然係一層芝士喺入面嘅，係比較特別！當然啦，一個人都唔食得太多件，食左依個都唔使食粉面喇。留意返呢度如果係7:30之前埋單嘅話，火鍋配料就會做返有半價，算係非常之抵食！又多一個食雞煲嘅新選擇。食下食下，一開頭時間尚早時比較清靜嘅鋪頭，就轉眼間都坐滿晒，果然係唔少野！…Read More

今日星期六咁岩行去大圍買啲嘢，時間黎到大概下晝2:00 ，朝早食咗嘢但冇食LUNCH，有啲唔三唔四，但有少少餓，就諗住都係食啲嘢先。行過見到呢度竟然唔知幾時開咗間新(?)西餐廳，店出面擺咗好多餐牌，好似都唔錯咁，就入咗去食啲嘢喇。唔好講笑雖然話已經差下晝2:00，但推門入去先發現入面竟然都仲差唔多有八九成滿，喺一條咁靜嘅街都算幾有趣，而且仲見到有外籍人士嚟幫襯添。坐低先望到成間餐廳個感覺係比較有格調，佢係算半BAR半西餐廳咁，天花吊左一盞好大嘅水晶燈，有種低調嘅奢華，算係幾落本嘅裝修，大圍後街街坊小店黎講有啲估佢唔到。店內有電視播直播球賽，夜晚黑應該幾適合一班人嚟睇波或者傾計。睇吓餐牌仲係serve緊午餐，因為唔係十分肚餓嘅關係，所以就叫咗一個全日早餐嚟試一試。午餐包沙律或者餐湯，再加餐飲，都係一百幾十蚊有交易。先來餐湯，是日餐湯係南瓜湯，夠熱，飲到有少少南瓜蓉，唔會太甜，亦都唔會係成口粉，唔錯。然後主菜全日早餐就上檯，一睇陣容都幾鼎盛。有德國香腸、松露炒蛋、燒蕃茄仔、牛角包仲有砌成好靚一朵花咁嘅煙三文魚。先試一試比較特別嘅黑松露炒蛋，一般來講我麻麻哋鍾意食坊間嘅松露乜乜乜，因為通常嗰陣黑松露嘅味都會好假，有時甚至有刺鼻難聞嘅味道。但呢度嘅松露醬味道唔錯，有返菌類嘅香氣。蛋炒得幾滑好嫩，唔錯。然後係細細粒嘅蕃茄又甜又香又好juicy，可以減低油膩感。個煙三文魚呢，都唔錯，食落有魚油嘅香味，唔會話太鹹。德國香腸係非常脆皮，好正宗，好似喺德國餐廳食到嘅，有肉味亦都有香草味，一咬落去好juicy，係真材實料，應該係比較優質嘅來貨。有驚喜嘅就係佢地嘅牛角包，唔知係佢哋自家製定係來貨 ，暖暖的，一咬落去係非常鬆化，可以見到入面嘅氣孔好靚，唔會話好油膩索哂油咁。唔怪之得我聽到隔離枱嘅外籍人士都話依間野嘅麵包真係好唔錯。最後包連埋一杯熱檸水，幾十蚊就食咗一個好唔錯嘅late lunch。我見到佢門口出邊好多餐牌，研究左一下，好似夜晚嚟食晚餐嘅話，仲有好多更多套餐同埋特色啲嘅西餐可以揀，下次過開嚟一定再要試真下。…Read More

說起來也有很久沒有入九龍城了，是晚放工要過來買點東西，路過看到有間新開的泰式串燒店，就進來吃些東西才回家。串燒店在打鼓嶺道街尾、龍城邊陲，離城中心大概只三幾分鐘路程，但入夜後，就是有一種清清靜靜的感覺。推門進去，由於時間尚早，暫時只有一檯年青客人。店經理迎了出來招呼，然後一個人就佔據了一張柱子旁的二人桌，自成一角。四周打量了一下，店面裝修乾脆利落，微微帶點東南亞風情，沒有一般串燒店的喧鬧油煙，感覺上是約人聊天聚會的好地方。點菜就用一張「點心紙」，主力供應的固然是各式串燒，肉類海鮮蔬菜也有，然後再加一些基本的泰國菜式、小食跟粉麵，以小店來說，選擇也是豐富的。一個人吃得不多，但憑感覺心多多的也畫了一堆串燒，再加一杯泰式鹹檸七來聚聚火，粉麵就真的吃不下了。先來的是泰式鹹檸七。跟想像中有些不同，是完全沒有冰的，鹹檸檬已經預先被篤得粉碎，方便客人連渣一起喝，有意思。串燒當然是要即燒的，也要略略等了一會第一batch的串燒才上檯，有燒蜜糖雞中翼、燒牛柳串、厚切鹽燒牛舌、燒雞心 、燒墨魚丸、燒泰式魚餅、燒雞肉腸，竟然也是一大碟了。燒蜜糖雞中翼($14)－ 吃燒烤怎能沒有燒雞翼呢?! 還原基本步，要了蜜糖雞中翼，新鮮熱辣，皮微脆，肉嫩，也醃得夠入味，簡單就是美，是一個很不錯的開始。燒牛柳串($14)－ 牛柳肉質鬆化，但又不會太過被梳打粉招呼過，輕輕的灑上一點孜然粉，再掃上一蜜糖，燒得香口，又帶juicy，很好。厚切鹽燒牛舌($22)－再來就是牛舌，一看果真是「厚切」，幾乎有太卷般厚了，拿上手是「墜手」的，但豈不是容易很硬很韌？一口咬下去，咦?! 出奇地竟然外皮脆肉是稔的，肉中心更是帶點軟懦的感覺！一邊吃一邊在想，也有可能是先把牛舌鹵煮稔了才把外皮燒脆，是精采的。一串兩大件才賣$22，攪什麼?!燒新鮮雞心 ($22)－ 標明是「新鮮雞心 」，燒得是略帶乾身，咀嚼起來，就是有一朕內臟特有的鮮甜甘香的感覺，喜歡內臟的朋友可以一試。燒雞肉腸($10)－不知怎的，吃串燒，個人總是喜歡也叫幾味“processed food” 助助興。最喜歡的，就是這款最“basic” 的雞肉腸。沒有去考證是不是採用了廚師腸，但雞肉腸燒了以後，沾了蜜糖的皮微微脆口，肉質會變得稔滑，又香又軟，令人想起郊外bbq。這是個人最喜歡的雞肉腸演譯方式。$10 有兩條，便宜令人發笑，甚至可能是比屋邨大排檔還要便宜。燒墨魚丸($12)－墨丸應該是來貨的，還好也不是一口粉的貨色。吃起來也有墨魚肉和脆骨，還可以的。燒泰式魚餅 ($14)－個人飛弗。泰式魚餅應該也是來貨，咬下去是比想像中更加軟稔一點，也可以的。吃到中途，剩下的幾味也來了，分別是燒翠玉瓜、燒白鱔，也有燒菠蘿。燒翠玉瓜($12)－ 吃了太多肉類，總要來一點點蔬菜清清胃口。翠玉瓜燒得剛好，一咬下來，爽脆多汁，好吃。燒白鱔($38)－接著就是期待以久的燒白鱔。個人喜歡吃白鱔，這裡的是「窄身厚切」做成串燒。沒有多餘的調味，就是爽脆、彈牙，唯一不滿意的，就是一串，一下子便吃光了。燒菠蘿($18)－最後來個燒菠蘿作為「甜品」。菠蘿應該是有挑過的，又或應該是直接選用了金菠蘿，一客份量也不少。一口咬下，甜甜帶微酸汁液在口中迸發，為這一餐串燒畫上一個直接了檔的句號。一邊吃著串燒，一邊感受著片刻悠閒的時光。時間漸晚，店裡也陸續來了客人。不要以為只吃了一堆串燒，沒有吃粉麵也是10成飽。埋單不用$200，貴嗎？吃串燒從來也不會超級平，始終是手工心機製作，就是當掃街站著吃的街鋪或大排檔也要十多元一串的時候，這裡坐得舒舒服服價錢也是差得不遠，食物又有水準，個人覺得是值回票價。推門離開，才發現忘了拿外套，經理見狀立即幫忙跑進來替我取回，小店服務是真心不錯的。…Read More

話說石門京瑞一期商場地下依間日式shabu shabu店，見到佢裝修左好耐，呢個禮拜終於開咗喇。今日就趁去石門買嘢，一於就黎試一試佢哋嘅lunch先。價錢來講就係算係同其他日式shabu shabu店差唔多，幾標準。lunch放題有$118同$168兩個價位。同一般日式火鍋店一樣，都係每人揀一個湯底（湯底都有例牌果幾款啦），肉品任食然後再喺出面蔬菜丸類飲品任拎咁。之前行過見到佢哋門口個牌寫住星期五六日公眾假期有lunch放題，係開11點嘅，咁今朝瞓晏咗就諗住早早地11點嚟到就食啦，點知嚟到就見到佢地好似有排都未開，所以唯有行一陣，四圍兜一兜買住野先。之後兜左幾次返嚟，發覺佢都係未開，見到好多本來喺門口等緊嘅人都話又走咗。最後竟然等到12點先開門，足足比佢門口寫嘅時間遲咗一個鐘！我估可能餐廳新開張未咁有效率可以準時開，但建議餐廳可以更正一下，免得客人空等，呢度印象分左就要扣少少喇。12點開門嘅時候大家擾攘左好一輪先安排到入坐，揀左貴Ｄ嘅＄168個prime 牛肉+黑豚肉set，要返最穩陣嘅北海道昆布湯底。不過睇真啲原來lunch放題限時只係得60分鐘，喺香港比較罕有，但我今次一個人黎食應該ok掛。首先出去巡一巡。飲品方面，就有荔枝茶蘋果茶之類，亦都有汽水無糖茶任飲，都唔錯。雞肉就任拎，丸類呢就有貢丸、麻辣包、芝士丸、芥末沙律醬包、芝士腸仲有菇類烏冬公仔麵之類，選擇唔係非常多，但係都算OK。蔬菜類就正常啦，比較特別有冰菜同羽衣甘藍。攞完嘢食返到埋位就見到牛肉豚肉同埋湯底已經嚟咗，但係湯底都又等左好一輪先至開始滾。12:05進店後一開單已經開始計時，其實進店起，到埋好位拎埋嘢食個湯開始滾可以開動嘅時候，其實都差唔多過左成15至20分鐘，即係話其實只係淨返大概得八九個字食野。食物其實係唔錯嘅，prime牛肉質素ＯＫ，肥瘦適中，當然日式火鍋嘅style就會刨得比較薄啦，但係都唔會話好似張紙咁，食得出肉嘅質感。我偷睇左人哋普通嘅嚴選牛肉($118)，質素好似都唔錯，CP值似乎就高D。黑豚肉同雞肉就正常，煮太耐就會變柴。昆布湯底幾足料，味道唔錯，幾鮮甜，能夠帶出食物嘅原味，唔會完全好似清水咁。印象最深刻嘅食物，就係冰菜同麻辣包。冰菜灼一灼之後就非常爽脆鮮甜。麻辣包就最有驚喜，咬開入面真係有好香嘅麻辣香味，有啲啲辣油咁好香好刺激，我都食多咗兩粒。其他仲有啲糖果，夜晚好似應該仲會有雪糕供應。店內裝修就正常，乾淨整齊，不過擺檯算迫，兩人檯比較窄，我自己一個人嚟安排左兩人枱但其實差唔多要霸晒成張枱。但佢地嘅放題食物檯就分開兩處，分別喺店面嘅一頭一尾，一邊係蔬菜，一邊係丸類，所以幾乎每個客人都要成間店行勻，就比較唔方便。而且我被安排坐咗喺中間嘅位置，就喺走廊邊，走廊只係夠又係一個人經過，變咗好似成日都好多人擦身而過，就比較坐得唔係咁舒服。因為自己一個人嚟食，所以就唔需要傾計，可以埋頭密密食，但最後都係只係食到3盤牛肉（每盤4塊)，最後2, 3分鐘先用食哂煮好嘅烏冬! 但係其實石門呢度其實假日其實好多時都係有家庭客，見到六七成都係家長帶著一兩個比較小嘅細小朋友反黎，大嘅都係7,8 歲，黎食一個60分鐘嘅火鍋放題，個人感覺就真係比較有挑戰性喇，更加唔好話帶住3-5歲小朋友果D。我見到隔離嗰檯一家三口最後15分鐘買單嘅時候，第一round肉都係食咗3份2，好似完全根本都唔夠時間食咁樣。而且食到時間剩返15分鐘嘅時候店員就過嚟買單，坦白講啦咁樣有少少騷擾，因為好似感覺上又好似冇咗幾分鐘咁。但係價錢來講，佢哋價錢只係標準，又唔係特別優惠，但時間只係得60分鐘，其實唔係太係唔夠食，未必夠飽，操作上有啲困難，希望店方可以改善下呢一樣野，例如改成70-80分鐘都好。尤其呢度都唔係話市區頂級嘅旺區，都唔需要SET到時間咁趕嘅。埋單＄１８５，算ＯＫ的，但唔係十分抵食，而且食得太急，同長輩黎要考慮一下。…Read More

之前見到佢哋買依間餐廳賣廣告賣得好行嘅五顏六色小籠包，就覺得好得意。今日約咗朋友嚟MK食飯，我都唔知道原來依間餐廳，就係食呢個彩色小籠包嘅地方！既然一場黎到，當然要好好試一試啦。叫咗一份彩色嘅小籠包，我記得係有就係有原味，蟹粉味，麻辣味，鵝肝味之類嘅，仲有人蔘味，芝士味咁，有啲就比較正常，其實都算係食得出佢咩味道嘅。個人覺得最深刻印象係麻辣味，個味幾出，幾香，又唔辣。其他仲叫左一Ｄ小菜同埋包點啦。依一味蟹粉豆腐都唔錯，份量都幾多，豆腐好滑，應該係用左盒裝豆腐。不過個蟹粉汁就鹹咗少少，可能係師傅落味落重手左，攞嚟送白飯就好。甜品呢就叫咗一個驢打滾，佢應該係糯米卷之類嘅嘢，夾埋裡面係豆沙，外面再在沾上黃豆粉，係非常之軟糯有咬口。旺區黎講，依度食物都唔錯，又坐得幾舒服，位置又非常方便，感覺都食得過嘅，如果下次約朋友喺依頭食飯，佢都可以考慮吓。…Read More

今日嚟咗帝都食lunch 自助餐，在場好多人都話呢間自助餐，其實成日都搞優惠吸引人嚟食，可能係因為喺新界區，閒日中午就比較難有好多人去食啦。好多人話佢麻麻地多嘢食，但其實如果係lunch嘅自助餐來講，我覺得OK。今日啲嘢食就比較大眾化，基本上都可以搵到你想做嘅嘢，熟食，飯同埋佢哋嘅串燒都唔錯，甜品都算多，仲有自製窩夫，帶埋小朋友嚟食都唔錯。比較推薦嘅有日式爐端燒，係即場有師傅燒嘅，就新鮮熱辣。佢地成日都唔同嘅Promotion，仲有唔同嘅特色食品，轉下款等大家冇悶，都算係可以嘅，但真係要附近返工，或者係放假嘅朋友先會嚟到食。…Read More

今日天氣熱，次次過見到佢哋出邊鋪頭出邊嘅雪糕poster，就好想食！今日就一於豪Ｄ買咗支朱古力軟雪糕試下。佢地嘅軟雪糕，入口不嬲都好滑，唔會起晒冰咁，朱古力味好香濃，可以話係朱古力軟雪糕界的經典。我就鍾意要個窩夫筒載，貪佢可以食埋個筒底。用杯嘅話呢，其實佢哋嗰個杯同埋匙羹，又係做得非常之特別，令人差啲想用完之後收埋佢！當然啦，正如佢地嘅朱古力一樣，價錢就比較貴，算中上，大概要$50一支雪糕，你話好貴其實又唔係嘅。朋友有Member卡，好似有9折，但當然基本上如果做超特價嘅時候，就會排隊排到非常之長好壯觀啦！…Read More

今日黎到鑽石山嘅荷里活廣場買啲嘢行到好攰，就入嚟食個甜品坐下抖下。雖然佢哋個名好似係只係賣抹茶甜品，但係其實佢哋都有好多熟食，好似拉麵，飯嗰啲。今日因為之後仲要食晚飯，所以就淨係要左一杯抹茶雪糕新地。配料係可以任揀嘅，今日我就揀咗呢個抹茶鴛鴦雪糕，再加粟米片，麻薯同埋白玉，仲有紅豆。個底都係抹茶味嘅雪糕，其實都唔錯，唔係話好甜，或者太苦。粉類都係QQ的，幾有日本style，再加脆脆的粟米片，夾埋一齊好平衡。成個甜品好大杯，食晒成杯野其實都幾飽，幾滿足。其實之前食過佢地嘅拉麵，其實都唔錯，做得唔會比專門拉麵店差。依度坐得都幾舒服，如果係約咗人上嚟坐坐，傾下計嘅都唔錯。…Read More

沙田新城市廣場嘅底層有一間明珠閣，其實係好似飲茶咁食點心嘅。佢地午市嘅套餐都幾抵食，有單人粉麵餐，或者有兩個人以上就可以試二人餐，就最抵食。佢哋嘅二人套餐，有燒味，自選嘅點心，同埋炒粉麵飯，都係百二三蚊到，兩個人食其實一定食唔晒！差唔多３個人黎，都可以叫一份二人餐再加一兩樣點心。呢度比較推薦嘅就係佢地嘅叉燒，全部厚切，同埋部位應該揀過嘅，都係帶少少肥的梅頭，如果散叫嘅話其實都幾貴。另外，當然仲有啲而家新興造型非常可愛嘅點心，好似依個一個雜錦三色包咁樣，最可愛嘅豬仔拎咗係手會係唔捨得食，餡料一般都係朱古力，豆沙，奶黃之類。如果行開附近要飲茶，其實可以一試，唔一定要上7樓去美心嗰度排隊啦。…Read More

今日過嚟馬鞍山買啲嘢，見到呢度開咗間Pepper Lunch咁耐都未試過，就試吓喇。叫咗個牛扒餐再加三文魚，仲有薯蓉。之後先知道原來佢係跟白飯嘅，再黎個薯蓉就差啲食唔晒。拎餐果陣佢個扒係完全生嘅，我都有少少擔心佢會唔夠熟，點知過多一陣我就係擔心係會太熟喇，哈哈！因為佢係西冷嘅關係，所以我唔係太想佢太熟會太硬，好快就上去拎起Ｄ牛扒，放喺蔬菜嘅上面喇。總括來講，味道都唔錯嘅，但係可能我太貪心，加加埋埋叫得太多野啦，加加埋埋成百蚊，其實都可以夠去快餐店或者平價西餐廳食FULL SET的雜扒餐啦，所以抵唔抵左見仁見智啦。…Read More

老實講呢間薄餅店其實香港都開咗幾多，包括沙田有分店我哋都行咗好多次，但係唔知點解其實我自己就從來都冇黎過。今日晏晝先就第一次幫襯，一於嚟咗試下。見到佢哋個LUNCH MENU好似選擇唔多，但既然諗住試吓佢地嘅Pizza，我就選擇左海鮮pizza啦。當然啦，佢哋係正宗嘅鬼佬Pizza，唔會係好似鞋底咁厚，咬落去真係非常薄，好似有一張紙咁薄，香脆唔油膩。薄餅上面就輕輕搽咗應該係蒜蓉牛油嘅醬，之後上面都鋪左好多海鮮，擠少少檸檬汁，簡單直接，鮮味也美味。因為個Pizza底比較薄嘅關係，所以一個就係一個人嘅份量，一個人差唔多都食晒一個。如果突然在附近想食鬼佬Pizza，依度都會係一個快捷方面的選擇。唯一就係lunch選擇就比較少，如果帶住老人家，或者咁啱果三款幾口味係唔啱嘅話，就會比較難選擇喇。…Read More

沙田新城市地下，其實都有好幾間餐廳。如果午餐想食西餐嘅話，依間Parkview會係一個選擇。今日叫左個雜扒餐set lunch，陣容其實都鼎盛。除咗一般雜扒有嘅牛扒豬扒之外，仲有羊架，半隻開左邊嘅虎蝦同埋脆皮腸，都幾豐富。配菜有燒翠玉瓜同薯仔，配埋同埋執醬汁食都OK，翠玉瓜都好，好爽脆多汁。唯一就係呢度係半開放式嘅同商場，有時可能會比較嘈。價錢當然係新城市價，都唔係算平，但午飯時間日日都幾多人嚟食㗎。…Read More

其實我個人嘅口味就比較特別，食牛扒呢就麻麻哋鍾意食煎或者炭燒嗰Ｄ，反而鍾意食夠肉味，比較嫩滑多汁嘅Roast Beef。 不過，如果想喺香港食有水準正宗嘅Roast Beef，其實選擇就比較少，Lawry’s 就係城中其中一間比較大路嘅選擇。今晚同朋友嚟到依度食，就係每人叫咗一份燒牛肉。食左半份龍蝦湯同冰旋沙律做前葉之後，就係時候直入正題上燒牛肉喇。好多專門食燒牛肉嘅地方，都係有餐車將整條prime rib推到客人面前切，呢度都唔例外。師傅會喺你面前切你order左嘅份量。不得不讚嘅係，佢哋切嘅份量好準，生熟程度都做得好好算，講到尾依兩樣都係供應燒牛肉嘅考牌位。好久沒有來，我都唔客氣，叫左個大大份的diamond cut，因為一向覺得燒牛肉一定要厚切先正架麻！燒牛肉要左medium，入口同我想像中一樣咁柔軟多汁，無渣有肉味，正是食roast beef追求嘅效果，正！ 配埋gravy同少少mustard，仲有薯蓉、yorkshire pudding 同埋忌廉波菜做side dish，就係一個最經典最理想嘅配搭。唔好講笑，依個份量睇落好似好大 (其實實際上都真係好大，哈)，咁但係我居然只係用左10分鐘，就食晒喇！！！！食物，服務，環境都好好，但呢度如果冇信用卡優惠嘅話，其實都真係幾貴.... 所以都係好偶然嘅時候，先會嚟食啦.……Read More

今日嚟咗沙田宜家行下，順便跟住食埋飯。依度午餐時間都幾多人，好多時都要排一陣隊先可以入。上次見到人地個龍蝦意粉好似好正咁，今日再去就一於豪少少試吓啦。上檯時擺盆非常霸氣，係有半隻龍蝦上，仲有啲蕃茄仔，熱辣辣應該係新鮮煮。意粉都唔錯，幾彈牙，醬汁係夠晒每一條意粉都有龍蝦汁，又唔會太鹹。龍蝦係波士頓龍蝦，係有半隻，肉質都OK，唔會霉，當然啦，其實唔係好多肉食。整體來講，呢個價錢來講係唔錯，收貨有餘，當然啦唔可以同Cafe Landmark比，個價錢都差幾倍啦。再配埋野飲，凍檸蜜係做得非常之清新，用嘅蜜糖好香，飲完之後個人係非常舒服。總括講，如果行開依邊，依度都係一個唔錯嘅選擇。…Read More

好多人都知道宜家傢俬嘅餐廳食西餐，可以話係價廉物美，簡簡單單咁，但係水準一啲都唔差。不過食咗咁多年肉丸，煙三文魚之類嘅食物，有時可能都有啲嫌，但係其實佢哋除咗肉丸之外，平時都會keep住更新佢哋嘅菜單，不時會提供唔同嘅主菜，有時都幾有驚喜。好似今日去食咗lunch，就發現今日嘅精選竟然有羊架！你知啦羊架通常都係比較貴嘅主菜，去西餐廳食分分鐘都要可能要$200一份，但係今日只係需要幾十蚊就可以食到，梗係即刻要左份啦。一份羊架大大份，正如相片所見都得唔錯，份量好足，有成3，４件，而且唔會好細件。而且羊架嘅生熟都處理到啱啱好，中間仲係有粉紅色，唔會係熟得太犀利。配埋個汁，同埋薯蓉配菜，只係幾十蚊，就有呢個高級餐廳享受，雖然人多嘅時候都幾迫，都要坐到會冇咁好，咁但係你嘅食物水平來講都算係幾好㗎啦，平靚正，所以成日都咁多人啦。當然啦，依Ｄ特別主菜嘅choice唔係成日都有啦，係不定期出現，黎到有咩食就要睇彩數喇。…Read More