limanlam's Profile

呢間米線我已經幫襯咗好多年啦，由老闆娘親自煮，到依家開新舖佢出黎做樓面，雖然我都覺得無以前咁好食，而且食物質素都唔係咁穩定，辣度都唔係好穩定（我次次都係叫小小辣，但有時候完全唔辣，有時候辣到鼻涕眼淚一齊流>.<好難捉摸呀大佬）。不過！相比起坊間既酸辣米線，呢間野都仲係優勝好多。大家睇下！！！！啲雞絲幾多（雖然以前仲多，係舖滿個米線咁濟。）呢個價錢，絕對抵食我本身最鍾意食既送係冬菇，因為好大粒，同埋煮到好淋，一咬落去勁juice。不過就唔係成日keep到呢個質素，有時候啲冬菇又細粒又硬，今次食既就係有小小硬同細粒，所以小小失望。佢個湯係偏甜同鹹，有啲人可能會覺得太重口，不過我就好鍾意不過都係果句，以前好食啲。>.<…Read More

呢度既裝修本身係木為主，好有日式既感覺。不過因為疫情加咗啲隔板，而啲隔板個樣又唔係咁靚仔，我覺得係令到餐廳整體既感覺係差咗，有啲似連鎖快餐廳。另外，檯同檯之間都比較近，隔離檯講咩基本上都係聽到曬，私隱度好低，唔係一個舒適既傾計地方。好，講食物！！！我係下午茶時間黎幫襯，不過就唔見有tea set，只有聖誕套餐。由於同行既朋友好刷得，所以下午茶都要叫飯食佢一見到鰻魚就話要叫，送上到黎，發現個賣相同openrice啲相係有啲分別，份量都比較少，唔係咁抵食。不過味道唔錯，蛋都夠滑，不過我個人就覺得飯好淡味，可以有多啲汁或者加小小調味比較好。（可能純粹我重口味）而我就叫咗甜品，整體上都唔錯，不過個吐司個邊焗得脆小小會好啲，因為個邊有啲韌，我要好大力先切得開，對於一個要保持優雅形象既女仔黎講，食呢舊野會顯得我有小小暴力。推薦玫瑰花茶，冬天飲都幾適合，個胃暖翻曬，仲可以無限refill熱水。（是咪好精明）呢杯蘇打就無咩特別，不過賣相就好似一般茶餐廳，我覺得餐廳可以花多小小心思係餐具同杯碟方面，會令我更加覺得值呢個價錢。因為我要影上ig 打卡架嘛。整體黎講，我覺得食物質素同環境唔係幾對得住呢個價錢，所以覺得性價比低，不太推薦。最後，職員態度都好好呀…Read More

之前食過甜辣烤雞同鐵板軟芝士烤雞，食兩舊就覺得好濟，次次都食淨。:(試咗蜜糖香滑烤雞之後，我就每次都淨係叫呢個。2個人叫一份，啱啱好。我係肥仔就可以自己食一份。我覺得有骨嘅特別好食，因為可以吮雞翼尖。味道甜甜地，又唔會好濟，而且唔係炸既，感覺上無咁有罪惡感（自己呃自己）。…Read More

今次係生日飯聚，呢度無論係環境定係食物質素都十分令人滿意，而且服務態度都好好，絕對值得推薦。賣相絕對登得上大堂之雅，俾我呢啲港女打卡一流。全部都好鮮甜，令人十分回味。餐廳送的生日甜品💗…Read More

本來係想同朋友去食港女下午茶，但係即日打電話去預約已經賣曬，只可以單點食物和甜品。如果想食$268嘅tea set建議大家提早預訂。餐廳環境非常舒適寬敞，有室內和室外位置選擇雖然係假日，我地去到餐廳位置只有一半滿，相信大家假日黎都唔洗等位。見到現場好多人都係食緊tea set，影緊相，可惜我book唔到其實上菜都幾快，好快趣就上咗炸薯條，唔知係咪我太肚餓，我覺得薯條好好食（雖然炸薯條好難唔好食）不過淨係配咗兜茄汁，咁就$58，份量唔算多，唔係好抵食。燒肋骨反而份量算多，有4大舊，我覺得個汁都幾好味，夠味，但係啲肉有啲乾，好似有啲overcook咗，整體黎講不過不失啦。長通粉味道好一般，而且雞肉又係overcook咗，咬落去覺得已經梅曬。呢個最唔推薦。薄餅係我最鍾意既薄批，小小辣，都算足料，味道唔錯，不過賣相就唔係好好啦，因為牛油果就唔係好新鮮，有啲已經發黑，我朋友即刻話唔想食了。附上牛油果close up 一張，HEHE。然後，就到甜品同野飲，我地叫咗甜品set（Signiture Desert Set），$78包一杯野飲同甜品。如果大家覺得食物太貴，又book唔到tea set，可以考慮叫呢個，然後同朋友坐低傾下計都唔錯。味道都不過不失。最後！！！！！！拉花0分。。。。奶味比較重，味道普通，不推薦。其實我好鍾意呢度既環境，不過食物就難以令我回頭。完…Read More

住開梨木樹既邨民就知，梨木樹商場真係美食沙漠，無乜食物選擇，亦都無咩啱後生仔女食。:(仲有我一直都好想梨木樹商場可以開一間台式飲品店，終於呢個願望達成了！仲要係賣埋台式野食。雖然呢度都有幾個堂食位，但主要係做外賣。食物包裝都有啲心思係用紙盒，有台灣既味道。值得讚！食物方面不過不失啦，唔算好好食，但係係梨木樹商場黎講，已經算唔錯。今次叫咗兩個乾拌麵，味道不錯，肉燥麵最推薦，肉燥份量都幾多。不過整體份量係真係比較少，可能男仔食會唔夠飽。食物價錢都唔算平，不過叫主食再叫野飲可以半價，真係抵飲。野飲如果單買就少貴啦。仲有，唔建議大家買奶蓋，我飲過兩次，啲奶蓋係太過流質，我未拎返屋企就已經同啲茶融為一體，有啲失望。希望餐廳可以改善啦。 …Read More

今次已經係第二次幫襯，完全冇令我失望！餐廳裝潢係有復古既感覺，同埋好雅緻，好適合假日著到靚一靚黎打卡，我有留意現場都有港女影相打卡，哈哈。而且餐廳面對海濱公園，景觀也不錯。 今次係聖誕節黎幫襯，比起上次多咗好多應節既裝飾，頗有心思。我係中午黎食，雖然係假日黎，但係人流唔算多，唔洗等位。同上次一樣，我叫咗一份Breakfast Fantasy，真係好豐富，有parma ham、煙肉、法蘭克福腸、新鮮菠蘿、車厘茄、大啡菇、黑松露炒蛋、麵包、沙律同石榴籽。（可以睇圖）雖然份量都頗大，但裡面有好多新鮮既蔬菜同水果，加上沙律醬係酸酸甜甜，其實唔會覺得好heavy或者好濟。細食既女仔可以同fd share都得。餐廳每日會準備daily special menu，今次叫咗個牛仔骨繪飯，因為係朋友叫既，我就不作太多評價啦。雖然份量比較少，不過賣相都係好出色既，打卡一流。仲有職員都好helpful，仲同我地講聖誕快樂。我地叫咗一個飯，一份all day ，同兩杯野飲，埋單$429。午餐黎講唔算抵食，但係放假食一次無所謂啦。同埋呢度環境同食物質素都係值得既。整體黎講，呢間餐廳真係好值得推薦，我會再幫襯，hehe。大家如果放假可以去試下，然後再行下觀塘海濱，係放假悠閒既好選擇。讚！ …Read More

原來葵涌都有這麼高質素的Cafe，實在是令人意想不到的好地方。雖然裝修不算豪華，但勝在空間十分寬敞，環境舒適，可以令人靜下來，慢下來，好好享受Me Time。店內有很多唔同位置的選擇，靠窗的高腳凳、沙發、自修位和電腦凳，還有imac 可以使用。如果大家想找一個舒適的工作空間，這裡都會是一個好選擇。…Read More