SuiWangKwok's Profile

傻婆生日快閃遊，嚟澳門嘅真正目的，就係為咗嚟我哋嘅澳門必到飯堂 My Messy Kitchen ，唔係賣廣告，而係真係可以同大家講呢間鋪仔細細，人情味絕對爆燈，好似去咗自己親戚屋企食飯咁warm咁熱情，成年無返過澳門，一見面好似老友敘舊咁開心，佢哋嘅食品質素我可以講分分鐘好食過d大牌葡國餐廳，佢哋嘅,[特色“葡國巨型魷魚”沙律]、[秘仔烤厚切羊架]、[葡式焗鴨飯]呢啲必食order我都介紹過就唔多講啦！反而今次真係要極力推介佢哋嘅[馬介休球]，佢哋嘅出品同外面葡國餐廳食到嘅好唔同，外面嘅餐廳餡料係薯仔、麵粉多、馬介休少得幾粒仔，呢度嘅會將馬介休全部人手搣碎晒先撈埋其他材料炸，入口每一啖都係馬介休嘅香味，加上少少辣椒粉，直頭好食到好似味蕾在跳舞一樣！超級驚喜咖！大家嚟澳門，除咗去官也街，行入嚟優美嘅小巷試下佢哋嘅味食啦！溫馨提醒：佢哋 7月28日至到8月18日去旅行， 呢段時間唔好去到摸門釘呀🤣🤣…Read More

話說今日有事入屯門處理，去到寶田果頭，發現咗呢間叫 City'n Friends 嘅burgers店，一問之下原來係之前新墟果間 The City Corner 嘅延續， 二話不說就沖咗入去試，我哋點咗個鵝肝漢堡，上枱超邪惡，見到塊鵝肝同塊7成熟手打牛肉漢堡嘅執流緊出嚟，超正，食落唔會好漏，勁香，仲有好耐無食過嘅薯寶，正呀！炸啡菇漢堡，超juicy，一咬入個菇， 裏面嗰浸流心芝勁抽到可以拉絲，配埋個黑松露醬，簡直超級絕配！ 香橙提子沙冰，唔會太甜， 橙同提子嘅配合非常清新，可以消除咗食漢堡嘅油膩感！ 成餐晏就整體滿意程度爆燈， 絕代會再入嚟食！…Read More

前幾日生日，又返咗我嘅second home - 澳門，話說check in攞咗房之後，原本諗住問我家夫人想食咩，點知居然俾佢搶先問我“我哋幾時去食羊架同鴨飯呀？”，喂！好似我先係壽星仔喎。。。雖然我點都一定會去 My Messy Kitchen 食飯，但你係咪要問下我食咩先呢？🤣🤣🤣好！即刻出動去食好西！雖然今次係我半年內第三次去打搞佢哋，但係好食嘅嘢真係點食、食幾多次都唔會厭咖♥️♥️♥️一拉開玻璃門，已經聽到靚女老闆同我講生日快樂，好感動呀，冇諗過我呢個細小嘅過客，同老闆講過嘅嘢佢居然會記得，多謝你呀！一坐低，老闆已經問“你兩公婆係咪又係羊架同鴨飯先？”，睇嚟老闆都已經記得我哋嘅喜好啦(可能我哋兩個係咁食羊架已經食到佢怕啦。。。)一上枱，兩隻厚切羊架上陣，真係堅厚肉大隻，juicy兼嫩口唔韌，最緊要係佢哋嘅秘制真係醃得超級無敵好食，真係好難响外面食到咁好味嘅羊架♥️♥️♥️跟住嚟葡式鴨飯，果陣鴨油煮飯嘅香味，同外面食用牛油煮嘅好唔同，特別香，每啖飯夾住鴨絲同葡式肉腸嚟食真係好正，不過遺憾係食咗羊架再食佢，羊嘅濃味cover咗鴨飯未，口感變得淡咗少少，下次要調轉嚟食👍🏼👍🏼跟住再嚟個葡式“巨型魷魚”沙律，微酸、醒胃，依然保持水準，原粒橄欖爽脆，魷魚唔韌易入口♥️跟住到迷你芝士拼盤，呢個平時老闆係做都會先有，但想堂食都可以嗌到嘅hidden menu，兩種芝士配搭Parma Ham同松子仁加乾果，攞嚟飲黑啤絕對一流。老闆，對唔住，食晒你嘅羊架，搞到下枱客嚟都冇得食。…Read More

話說尋日生日，又返去我嘅second home-澳門，check in 完肚仔餓餓地於是去搵嘢食先，諗到一間之前嚟到點知果日晏晝冇開嘅居酒屋，一入門口已經好似去咗日本咁充滿和風嘅裝修，好，入坐準備嗌嘢食啦！我同夫人嗌咗北海道茶漬飯、豚軟骨烏冬、和風照燒雞肉丸子、 昭和焦糖雞蛋布甸。首先嚟咗北海道茶漬飯，個飯有蟹鉗、帆立貝、同好多三文魚子，茶漬湯好香，每啖入口都有好多三文魚子，鮮甜清香，唯一係個蟹鉗解凍時間唔夠，雪味重。和風照燒雞肉丸，好香，跟一隻溫泉蛋攞嚟點雞肉丸食，首先試燒大蔥點蛋漿，已經好食到痴線，到將條雞肉丸點落蛋漿，嘩！照燒汁同蛋漿混合簡直絕配，免治雞肉入面有雞軟骨混合，好有口感，有驚喜。豚軟骨烏冬，湯底香濃，味噌味好出，豬軟骨好淋，不過下次會揀蕎麥麵，會更加好食。雞蛋布甸又係極品，佢嘅味道好似東京好出名果間老伯布甸店咁，焦糖唔係好甜而且係水質唔結，淡甜而香滑，冇得頂！絕對係下次返澳門要再食嘅餐廳。…Read More

話說有日同夫人响港島行街，突然好想食煲仔飯，咁咪上網search下同問下d港島朋友有冇推介啦！跟住有個朋友whatapp我叫我試筲箕灣間祥囍啦！佢話包我好滿足咁走？不過去到可能要等好耐咖！咁緊要？咁即刻坐車落去試吓啦！去到，可能過咗繁忙時間，一去到就有位啦！都未坐定。。。已經見到有隻巨型豬手响我哋身邊刷身而過，我同夫人已經呆咗。。。都未望menu，又見到好大碟炸九肚魚飛過，真係嘩咗聲，於是即刻嗌嘢食挑戰下啦！第一樣嗌嘅係蝦乾臘味煲仔飯，一嚟到，姐姐嗌我哋唔好開蓋，落豉油响邊等佢滲入去做飯焦，隔咗幾分鐘，開蓋，嘩！好多料呀♥️飯同料嘅比例幾乎有7/3咁濟，放入後啖啖都有臘味同蝦乾，好香，可惜可能焗得唔夠耐，好少飯焦；第二樣嗌嘅係椒鹽白飯魚九肚魚雙拼，上枱碟嘢份量多到高過罐可樂，好大碟呀！九肚魚外脆內嫩，熱辣辣好正，白飯魚條條炸得好脆，好食到停唔到口；第三樣嗌咗啫啫蠔煲，d蠔大大隻有口感，不過遺憾味道太鹹。。。要飲返兩罐可樂中和下先得。。。…Read More

話說果日帶住一個極壞心情去澳門。。。(親人突然離世)。。。淚崩。。。傷心。。。送完親人最後一程。。。心情點差。。。雖然完全冇胃口。。。點都要食d嘢咖。。。於是。。。又去返一間可以令我放鬆一下嘅小店，老闆同老闆娘一見到我隻眼腫晒，就問我發生咩事，佢哋真係好好人，不但冇催我嗌嘢食，仲聽我講傷心事，兼且慰問我。。。好感動。。。多謝你哋🙇喊完，心情終於一d放鬆，於是。。。又亂咁嗌嘢食啦，首先又叫咗隻羊架，老闆娘攞出嚟，嘩！好大隻，超級juicy，唔羶，好嫩滑，肉醬千層麵焗得啱啱好，芝士好香，而且肉醬唔會好鹹，炆牛尾仲好食過上次，個汁收水收得啱啱好，好好食，多謝老闆娘賣晒巨型魷魚沙律，特登整一份俾我，新鮮即整好fresh又鮮甜，味道一流。對唔住，飲咗你哋咁多支黑啤，失禮晒🙇🙇🙇(特別鳴謝老闆、老闆娘俾我特別情況特別order半份餐)咁有人情味嘅小店咁有人情味嘅老闆夫婦就係好難得♥️♥️…Read More

好耐無入過長洲，襯天氣仲有少少清涼，入去行下山、食下嘢、relax一下先，早餐都未食就入咗去，一落船就梗係週圍行搵嘢食啦！行咗入大新街，就俾呢間充滿日本小店風嘅餐廳吸引咗，而且响門口已經聞到好香嘅煮食氣味(可能真係太肚餓🤣)，二話不說就入咗去試啦！傻人夫妻組嗌咗一個一品&一個二品定食，介紹咗一品定食先，主食係明太子茶漬飯，清淡嘅味道入面帶住濃郁嘅明太子香味，將成碗茶漬飯昇華到一個點， 主菜我哋揀咗雞肉豆腐漢堡扒，好香好有口感，連唔食豆腐嘅傻婆都讚好好味；到二品料理，主食係櫻花蝦茶漬飯， 呢個冇明太子嗰個咁香濃，清淡得嚟配搭住陣陣櫻花蝦香味， 主食方面我哋嗌咗是日限定嘅海苔魷魚天婦羅同牛肉可樂餅，天婦羅好脆，海苔同魷魚配搭得好好，可樂餅好食嘅，可惜沙律醬略嫌多咗d，整體都好好食，下次會再嚟試其他嘢。…Read More

疫情前去親澳門，點都一定要嚟鳳城珠記食返碗魚角麵先返香港，仲要打包一磅生魚角返屋企煮嚟同麵一齊食，一聽到可以去澳門，第一時間即刻諗起魚角麵，果日一去到鋪頭，諗都唔諗即刻叫個魚角麵加辣(咖喱汁)，碗麵嚟到即刻筆起隻魚角一啖咬落去，好香，多蝦，好彈牙，配埋咖喱湯簡直一絕，仲要飲埋香港勁少有嘅玻璃樽裝芬達提子，爽呀！另外佢哋嘅薑蔥撈麵都超級正咖，值得一試！…Read More

夜行官也街，行行下入咗條巷仔， 畀呢間葡意式小餐廳吸引咗，於是入咗去試下：第一樣試葡式巨型魷魚沙律， 比起一般葡式嘅沙律冇咁酸， 魷魚鮮甜新鮮而且唔韌，原粒橄欖油香又爽脆，口感清新可口；第二樣試鴨飯，每粒飯都充滿著鴨油， 而且炒得好乾身唔會油粒粒， 鴨絲同葡式香腸煎得好香， 每一啖口腔都充斥著陣陣鴨油香味；第三樣試燴牛尾，老闆同老闆娘仲好好人送咗個發包俾我哋點汁食，講返牛尾先，佢哋炆到啱啱好，唔會散晒，個汁好食到痴咗線，好香好好味，點埋麵包簡直世一呀；第四樣試羊架，香草味好正，唔羶，Juicy到爆燈，啱啱好7成熟，加少少芥辣果味道真係一絕；第五樣試埋蒜蓉檸檬雞翼，酸味同蒜蓉好夾，雞肉又夠焾又入晒味，好好食；最後試埋支葡國黑啤，好creamy ，冇苦澀味，好易入口。整體嚟講，今晚呢餐小店新試充滿無限驚喜，老闆、老闆娘好用心去煮，又好客，食物又好食，下次再嚟一定要再嚟呢度食♥️♥️…Read More

平時無乜幾可會走落大角嘴行下，今日難得落嚟周圍行下睇下邊度有好嘢食先，去到鐵樹街，身為貓奴嘅我就俾佢個招牌同裡面嘅貓畫吸引咗，老闆好好人出嚟叫我哋試下，同埋都有介紹佢哋牆上嘅貓貓都係自己畫咖，好靚，原本諗住堂食。。。點知過咗6點冇得堂食lu。。。唯有叫個外賣啦，嗌咗個日式牛肉飯，返到屋企打開，嘩！牛肉超多又夠嫩滑，牛肉汁好香，溏心蛋熟度啱啱好，蛋黃流心，好好食，下次一定要早d去堂食，順便可以影下店裡面嘅貓貓畫！…Read More