GPRS's Profile

見到咁多好評，一心諗住應該好高質。可能希望太大所以食完覺得只係普普通通。今日食嘅係香煎去骨雞腿飯配黑椒汁($45)，加煎蛋 (＋$4)。其他食評話D汁另上，但今日我個飯唔係，D汁已經淋咗上雞扒度。我見其他人嘅飯都係咁。我估汁另上呢件事應該無咗。加咗 $4 嘅煎蛋係全!熟!蛋! 我懷疑有幾多人會 expect 一個頹飯上嘅蛋係全熟嘅。好失望。塊雞腿嘅皮係淋唔係脆嘅。雖然我無 expect 脆雞扒 (畢竟只係 $45)。個味道都醃得 ok 嘅。真心講個飯唔係差嘅，但只係好普通唔係特別好味。但價錢平，希望佢生意興隆等我哋糧尾有多個選擇。:)…Read More

我係個烤肉控，但平時出旺區食嗰D都要每人$500＋，所以有時都覺得肉赤。見屋企附近開咗間新嘅烤肉放題店價錢 OK, 趁農曆新年得閒就去試吓。全店只見有3個侍應，所以當滿座嘅時候想搵個人都唔容易 (現時大部份香港餐廳都有嘅問題)。但D侍應，尤其是嗰兩位女侍應嘅服務態度非常好。食烤肉最怕一身油煙味，但呢間餐廳抽氣做得好。我有時燒牛舌因為多油攪到好多煙，但烤爐旁邊個抽風位明顯即時吸走哂D煙，值得一讚。食烤肉好考個食客嘅煮食技巧，餐廳檯面上有個牌教你點燒每種肉，好貼心。我當日一個人好早去食晚餐，全店只有兩檯人餐廳應該唔太忙，我寫嘅肉每樣亦只係兩塊，但執餐嘅人咁簡單都執錯。好肥嘅肉(例如豬頸肉同一口牛)執多D出嚟 (比我 order 嘅多起碼一倍)，而且一入座佢又會先比一盤你無 order 嘅肉你 (又係好多肥肉)，唔知係咪專登等你食飽D唔好叫咁多。但我叫嘅某D肉例如豬肉香腸等等又無嚟。呢 part 令人好失望。D肉質素 ok 啦，3百蚊 per head 都唔洗，算交到貨。佢執得太多肥肉，我食到尾覺得超越膩，好彩個雪糕幾好味 (每人只有一客)，餐飯攞返個尾彩。…Read More

我經常去食元氣，今日行過上環信德中心嘅元氣，見無人排隊就走入去食 lunch. 原本食物都無咩特別，但個三文魚壽司竟然有骨! 我無諗過壽司會有骨，一啖放咗入口，點知比D骨“吉”到我個口入面好痛，我成件壽司吐番出來 (太肉酸無影相)！ 入面起碼有2條骨，因為吐出來之後我見到最小一條長一條短嘅骨喺塊魚度。唔知係吉損咗個口定件三文魚有問題，之後我個口覺得好腥，無哂胃口。我同經理講，話壽司有骨，佢好似無咩嘢咁，只係細細聲望都唔望我咁話會提醒廚房小心D! 我唔係要賠償，但連道歉都無，咁都得？？ …Read More

每次去新加坡工作，我都會食好多叻沙。因為香港我食過好多餐廳嘅叻沙都覺得唔好味。有時癮起，我都寧願煮百勝廚好過。今日咁啱見到呢間餐廳有叻沙，仲話螄蚶係泰國空運到港，就入去試吓。因為喺香港失望咗太多次，我無影相就開始食個傳統叻沙! 竟然好好味，真係可以拍得住新加坡嘅水準! 湯底好鮮味，唔太辣又有椰奶味，螄蚶好新鮮! 雖然蝦似急凍，但味道ok。雞絲，豆腐扑魚片都 ok。個湯底真係無得輸! 我一定會再返去食!P.S. 門口張相係食完決定要食 Openrice 影的。個叻沙9秒9食完無影相。…Read More

咁啱星期日要去荔枝角附近，見呢間餐廳評價幾多。差不多下午12點去到，地方唔大，好彩仲有一張檯所以唔洗等位。我食 All day breakfast, 價錢以呢個地區來講算貴，係中環嘅價錢。但每項食物都好好味，連平時我唔太鍾意的茄汁焗豆呢度都整得好好味，所以真係好得! 美中不足係唔知點解個炒蛋咁多水？？不過我朋友食嘅德國炸豬手就普通，少少偏咸。我哋每人加咗一個黑松露薯條。薯條普通但個黑松露醬係幾好味的。但本身我哋食量不大，食唔哂，下次應該2個人 share 會好D。…Read More

我已經買過好多次，久不久想食燒味時我就會嚟幫襯。食過慢煮叉燒，普通唔係慢煮嘅叉燒，白切雞，豉油雞，燒鴨，燒腩仔。樣樣都覺得好味，而且雞同鴨可以揀無骨 (但要加$10) 。我好鍾意佢個燒味汁分開上，自己可以決定落多少，而且味道比一般燒味鋪嘅汁淡 d, 好似健康小小。惟一唔好就係個 menu好長好複雜，不過食多幾次我而家一去到就知自己想 order d 咩。如果個菜 (而家好似係 $13) 可以平返少少就 perfect嘞。…Read More

因為想食牛扒, 見到呢間餐廳好似新開張, 見 Openrice 有唔少好評, 以為 OK, 點知中伏!Book 咗星期日晚, 事先已經揀咗食物。佢只得沙律, 1個 main course, 再加個意粉, 共3 個 course。沙律意粉無得自選, 只可以揀 main course。我地揀咗一個牛扒一個豬扒。每位 $350。去到發現原來成座工業大廈所有門口都鎖哂, 再打電話去餐廳, 佢叫我地由停車場入。去到停車場個管理員叫停我地, 要比按金登記身分證攞張咭先可以搭電梯。都幾麻煩。去到餐廳, 入到門口已經見有2班人開緊 party, 一班係大陸人, 成間餐廳嘈到拆天, 而且油煙極大, 已經覺得唔掂。跟住我地兩人坐咗15分鐘, 但完全無職員招呼或者同我地講過嘢, 水都無杯, 2個人齋坐完全無人理。我老公忍唔住, 行入去廚房搵職員, 個職員叫佢自己去飲品櫃攞嘢飲。我地 2 個都好嬲, 點解無人招呼我地, 要我地問你你先叫我地自己攞嘢飲?之後我地再等多15分鐘, 第一道菜嘅沙律終於到。係一隻帶子加一大碟菜。隻帶子煎過但煎唔夠時間或者唔夠火候, 完全唔香, 你只可以當佢係刺身咁食。沙律醬好酸, 我食咗半碟已經放棄。之後一直仍然係無人理我地, 食完無人收碟。我地 order 咗牛扒, 我老公去問個職員點解無人問我地想食幾多成熟。職員答: "我地不嬲都整 medium rare, 好少會轉。"我地好嬲, 有咩可能你幫我決定食幾熟? 唔通你鍾意煮十成我地就要跟你食十成熟咩?  個職員就好 hea 咁問: 咁你想食幾熟丫? 我答佢 medium. (但後來牛扒都煮出來都係好生, 真係你有你講, 佢有佢煮!)之前等咗30分鐘先有沙律, 你估吓個牛扒等咗幾耐? 係再等多45分鐘。食西餐通常係大家個 main course 一齊上菜, 但呢度只上一個 main course 比你, 好彩我地2個都食牛, 所以可以一齊食住等。再等多大半個鐘, 個豬扒終於上菜。唔好味。我食咗一半又放棄。餐廳有部足球機, 就在我地張枱附近。我地等食物嘅時候, 不斷有人在側邊玩足球機或者圍觀。又嘈, 有時又比D圍觀者撞到我地! 再等多半個鐘, 終於有職員同我地講有3款意粉可以比我地揀。我地已經坐咗2個半鐘, 我地同職員講, 唔該個意粉直接打包, 我地唔想再食再等。等到夜晚9點, 個意粉終於到。我地攞起個外賣盒, 比錢即走。只得 3 個 course 嘅晚餐竟然等咗3個鐘先上齊哂, 成晚都係等, 無人招呼, 仲搞到成身都係油煙味。場內似乎大部份客根本本身就係店主 / 店員自己嘅朋友。我就明點解咁多好評!!!…Read More

見雜誌介紹, 好想試吓佢個炸雞脾。今日下午3點到達，舖唔大，好彩剛好有位唔洗等。我唔食得辣，叫咗小辣。幾 ok, 外層脆口但唔算油膩。朋友叫咗鹵水雞脾，好滑好入味。另外叫咗個糖水，無影相。個樣無特別但味道唔錯。食得出呢間餐廳幾有 heart。…Read More

今日大除夕早放工想食好 D, 去咗碗屋食放題。雖然價錢 ($568+10%) 比一般放題貴, 但服務、食物質素及環境的確好。入座後每位可以三選一送一客牡丹蝦、鮑魚或薯蓉焗帶子。我選咗牡丹蝦，好新鮮好好味。我食咗 2 round 刺身。每樣都好味而且份量好足。燒雞翼，我覺得乾咗少少。銀鱈魚西京燒好好味但我太心急食唔記得影相。 鵝肝多士，多士好脆。薄燒牛肉，來碗屋一定要食。蔥好香牛肉好 juicy。海膽小手卷。細細件唔太飽肚可以食多 D 其他嘢。今日大除夕餐廳送比每檯的驚喜禮物。大滿足!…Read More

估唔到我會忍唔住要呢篇「食評」。差不多2年前發現呢間餐廳，久不久就來食吓 lunch。而家越來越多人幫襯，不單唔可以訂位，仲要人齊先入得。因為而家無得訂位，我專程約朋友早些 (12:15) 去。我最早到，餐廳只有幾個人客，餐廳出面成條街得我一個，三十幾度大熱天時，我問可唔可以入去坐，朋友就快到。 我一入去坐，幾乎比人全程監視，老闆娘不斷問我人齊未，可唔可以打比我朋友催佢地快 d 到。不幸地我平時唔遲到的朋友咁啱有事要遲少少。我坐唔夠10分鐘，餐廳仍然有6成座位係空位，老闆娘就好客氣地請我走。我好明白鰂魚涌 lunch time 時間有幾繁忙, 所以好理解點解要人齊先入得。所以如果你想食呢間餐廳，記得最好唔好約人直接去嗰度等，唔好有朋友遲到，就算人齊去到，記得食快 d，因為之前嘅經驗話我知，其實你一食完佢地會立即埋你單同執哂你嘅餐具。食物味道一般，服務 & 用餐時間同茶餐廳差不多但價錢貴過茶餐廳。之前有食評話老闆娘十分好客，又話雖然 lunch menu 無咗麻油雞麵線但老闆娘都會幫佢叫台灣廚師煮。我去食過咁多次，都試過同老闆娘傾計，其實老闆娘係唔會有時間同你傾的，亦唔會比你 order menu 無的食物。大家真係唔好有錯誤期望。(當然唔排除有可能係老闆娘特別唔想 entertain 我啫)我以後唔會再來，講完。…Read More