木一心's Profile

lunch time時間嚟到附近搵野食，平時都少行去呢邊，所以睇下會唔會有好野食。 見到佢係食台灣野就一於試下佢。一入去間鋪唔算大，但都有幾台客人。叫左個鹽酥雞腸仔滷肉飯加一杯芋香珍珠奶。飲品先嚟既，一飲落口就知唔掂，杯野好淡，好似溝左好多水咁。連奶味都唔係好出，成杯野得聞落去有芋香飲落去就冇味。之後個飯到，試下個滷肉飯先。啲肉好硬一啲都唔淋，估計都冇乜點落肥豬肉，但落左肥豬肉會好食好多。鹽酥雞似普通炸雞又係冇乜味道。最好食既係腸仔，本身以為有3條，原來係剪開左一半既3條。呢個價錢加多10幾蚊就可以食晚市，早知食佢晚市。見人地啲評價好似好食啲同份量多啲。…Read More

由於其他餐廳都要等位，所以入左去試。一直都有見到佢有好多分店，但係講到食就第一次食。叫左個招牌海南雞飯，57蚊包湯同野飲。野飲叫左凍奶茶，好唔掂，好似冇落糖漿咁，叫左佢比啲糖漿我落，落完分別唔大。一開始仲以為係泰式奶茶，感到比fake了。然後雞飯係已經去左骨上，幾好唔錯，雞都滑既唔會好乾，不過就印象唔算令人好深刻。油飯嚟到個陣我以為佢比白飯我，食落係有油味同埋都比較黏口，我自己就比較中意黏黏地既油飯，不過就冇乜味。整體不過不失既連鎖店。…Read More

一直都好想試呢間鋪頭，因為自己好中意食串燒，所以成日番大陸食，見香港依家都有又唔貴就同理fd嚟食。叫左15串個個同埋一人一個飯或者麵。我叫左口水雞飯，不過不失係多左啲碎骨。朋友叫左個麵，聽佢講係算唔錯，然後有2個朋友都叫左飯。嚟到都覺得少佢地話食完唔算飽肚。然後個15串串我地叫左腸仔，薯仔，雞軟骨，南瓜同埋唔記得左係咩。條腸仔仲細過平時食個啲即食腸，味道其實係似蠟腸，薯仔唔算淋，雞軟骨好重口味，一咬係淨係食到調味料味，好難食。然後南瓜係算係最正常，不過都唔算好食。整體嚟講冇下次。…Read More

真係好少入九龍城，如果唔係同朋友真係好少嚟食。由於平時都係旺角食泰國菜多，所以今次就嚟九龍城試下呢個泰國菜出哂名既地方。睇過好多間，朋友都話冇試過，行到攰咁啱老闆向我地招手就入去試下。叫左炒金邊粉，海鮮濕炒河同埋椒鹽軟殼蟹。一嚟到份量係正常size既，不過賣相就還好。個金邊粉唔算好重味道同埋好似唔多熱，因為啲粉痴住左，好難整開。濕河就似食乾炒牛河咁個味道，不過係足料既都有青口個啲。軟殼蟹好好食，都幾脆身。我地叫左杯泰式奶茶，啱啱飲好甜，過左一陣啲冰溶左啲就啱啱好，不過好快就飲完。最冇諗過食完會送甜品，係蕃薯西米露，甜甜地幾好食，有啲想refill呢個。整體嚟講佢係九龍城算平，冇錢又想食泰國菜可以試下。…Read More

平時出開旺角食，已經食到冇咩好食，由於朋友唔想再係旺角食，所以我地去左過2個站既深水埗搵食。一嚟到見到咁多人排隊就知唔簡單，一條街仲要有成三間鋪，睇嚟係有啲料到。我地排個間多數做外賣生意，不過都有堂食。我叫左招牌雞翼，豬手同埋魚腐。朋友就叫左雞翼蘿蔔同埋豬腸。佢地個雞翼同豬手真係必食，好淋好入味。之前去過食一間車仔麵，佢地既雞翼好乾已經冇哂肉汁，就好似屋企食淨再番叮既味道。不過呢度啲雞翼真係好淋好入味，可惜係得2隻，要食就要再散叫。豬手一樣好入味，好好食。反而魚腐就不過不失好普通。份量對我嚟講係啱啱好，行多陣會有啲餓。不過會再番去食。…Read More

好耐之前，記得佢啱啱開既時候同朋友經過試過一次嚟食，當時佢既招牌蝴蝶腩真係好好食。今次咁啱嚟呢頭搵食，就醒起佢。本身打算叫3餸但4餸送豆漿，見價錢差唔多就叫多個餸。叫左蘿蔔，雞翼尖，蝴蝶腩同埋雞腎。全部都比得好多好大方由其雞翼尖，冇諗過食到尾都仲有，有成7，8隻，認真抵食。最普通既蘿蔔令人驚艷，好淋好入味仲要冇渣，真係冇牙都食到。反而蝴蝶腩就好似同記憶中既味道有小小出入，但就覺得普通不過都好食。雞腎唔知係咪太多人叫所以唔算好入味。但係湯底好好味，叫左佢加鹵水汁真係唔錯，蘿蔔又吸哂啲湯汁咁。不過豆漿就有啲失望，唔算好飲，冇乜豆味咁。不過整體嚟講會再番去食，旺區嚟講都算幾平又抵食。…Read More

事關每個星期都要去尖沙咀番工，但食嚟食去都係啲連鎖式快餐店，真係食到悶。本身打算去搵朋友介紹個間平靚正麵鋪，但係又搵唔到，最後發現咗呢間野。見佢價錢唔貴咪上去試下。試咗佢個蛋包飯，佢個蛋包飯好似係星期六日先有，見咁難得咪叫個嚟試下。佢個蛋包飯比想像中好食 啲蛋冇過熟仲有少少滑蛋feel。啲飯都用咗茄醬去調味食落冇咁齋。雞扒既份量比得都多，可以一啖飯一啖雞肉都夠食。又唔會過份煎到乾身，仲有啲咬口。佢有兩種汁可以揀，我揀左白汁，姐係蘑菇汁。另一種唔記得係咪羅宋湯既汁係紅色既，如果佢有黑椒，洋蔥汁揀就好。不過都明小店係想降低成本，anyway我覺得係唔錯，冇其他人講得咁差。…Read More

早幾日黎左尖沙咀番工，尖沙咀平平地都要50，60蚊，見新港中心下面有food court就諗住平平地食個飯。黎到都算多選擇，最後因為想食蕃茄就揀左呢間蕃滿門餐廳。本身見佢個個芝士肥牛金針菇螺絲粉好吸引，但係自己又唔食牛，所以揀左個香辣雞絲螺絲粉。一黎到碗麵好大碟，成碗麵都好紅，係蕃茄加埋辣既顏色。蕃茄既酸加埋辣食就好似食緊酸辣粉咁。碗麵上面有啲炒蛋，味道偏淡，似冇落到鹽。雞絲方面，佢唔係一絲絲既， 與其話佢係雞絲不如話佢似雞粒仲較為適合。份量方面雞既份量比得大方，差唔多每一啖都食到雞絲同埋螺絲粉。螺絲粉就正常水準，佢係比得多，女仔叫可能要叫扣底就啱啱好。仲有3塊豆卜吸盡湯底精華，超級好食。47蚊食到咁大份係尖沙咀黎講絕對唔易，想搵平食可以黎試下。…Read More

琴日約左朋友去荃灣飲野，經過見有啲餓就睇下附近有咩食。見到呢間話米芝蓮推薦又有啲人排隊就決定試下。同朋友講開先知佢地屋企平時都係食呢間生煎包。我同朋友買左招牌， 鮮蝦同黑松露生煎包。 一拎上手熱辣辣，皮薄餡靚一咬開個皮就爆曬啲汁出嚟。唔知係咪佢係用啲油炸過，個包下面脆卜卜，一啲都唔係煎到燶水硬。鮮蝦都好新鮮有彈性唔會梅左。覺得鮮蝦仲好食多左啲層次。 我地企左係佢門口啲企位度，見住啲店員將一個個生煎包放入個爐度煎， 製作過程透明又衛生， 食落口嘅嘢梗係要衛生先食得放心。…Read More

同家姐去moko搵食，見餓餓地又冇見到我地張飛就諗住行下睇下有冇啲咩可以醫下個肚先。見到出面有gelato雪糕食，已經好吸引，入到去先知原來佢都有crepe食。一場黎到唔係唔叫番個crepe食下嘛，叫左個荔枝紅桑子既crepe。一黎到緊係要相機食先啦，真係整得好整齊，一粒荔枝一粒紅桑子咁。個皮底仲要係粉紅色。真係好似藝術品咁靚。食落啲材料都新鮮唔會話有雪味，雖然唔飽肚，但係好想再encore。以呢個價錢有咁既質素完全係唔貴，真係有啲想飛番轉法國嘆~…Read More

難得呢頭咁多泰國菜，係附近番工既我緊係要黎試下。5點幾去到仲有lunch set都算唔錯，包一個主食同一碗湯。個湯係老火湯都飲到有冬瓜係入面。叫左個雞肉金邊粉，係少有以雞肉黎做配料既金邊粉。一黎到見雞肉份量都幾多，不過唔知係咪翻炒定點，啲雞肉有啲凍。不過整體金邊粉個味道係唔差。可能食開比較濃味既就會覺得佢味道啱啱好，如果可以再濃味啲就好。份量黎講lunch食係啱啱好，唔會太多食唔曬又唔會少都唔飽咁。除左雞肉有啲凍整體黎講都算正正常常。…Read More

同朋友夜媽媽10點鐘係佐敦搵野食，行行下見到廟街醒起煲仔飯出名，本身諗住帶朋友食興記，但一入就係四季就決定試下。叫左2個煲仔飯，一個北菇滑雞，另一個排骨滑雞，再加左個蠔餅。蠔餅黎得算快，炸過既蠔餅幾香口，蠔既分量都算多，但就比較多油，有d位食到係多油，不過好好食。10分鐘後就到煲仔飯黎，由於我太肚餓既關係，我冇聽佢講要等2分鐘就開左黎食，唔知係我焗得唔夠耐定本身就燒得唔好，個煲仔飯比較濕同埋冇乜飯焦。要知道飯焦係煲仔飯既靈魂，但佢冇真係有啲失望。同埋d排骨比較多碎骨頭，分量都較少。 食到最後得番d飯。 唔知係我錯覺定乜野，覺得冇網上面啲人講到咁好食，只係一般正常水平。…Read More

第二黎呢間鋪頭食野，每次黎親都見到有唔少人等位，不過人流都算去得快，等左唔係好耐就入得。 上次試左個吉列豬扒拼鰻魚，今次就試佢滑蛋吉列豬扒，炸蝦拼豚肉餅。同上次一樣d蛋好滑淋上炸豬扒上面，口感一流。佢唔會過淋仲保留左d脆既口感，豬扒好食唔係 因為佢d炸粉，而係佢本身都有醃製過。齋食豬扒會覺得偏咸，但加埋d飯食就啱啱好，食到最後d飯都仲有汁係唔錯。炸蝦都算大隻同新鮮，有d唔新鮮既就算炸完都會食得出有種“梅”味，呢個就冇問題。最抵讚既係豚肉餅，本身以為佢係好似可樂餅咁，佢食落就唔係咁簡單，真係啖啖都係豚肉，好好食。 朋友就叫左個細滑蛋吉列豬，都好好食。雖然細既比同樣係吉字開頭既餐廳貴小小，但勝在夠飽肚。以晚市黎講呢個價錢唔算貴仲超抵食。…Read More

叫左個桂花烏龍波霸奶茶，一飲唔知係咪未mix好，飲得出係桂花糖漿加烏龍奶茶。mix完之後都仲係好甜，無奈既係佢甜度固定，所以冇得叫少甜。 波霸食落同其他店舖差唔多，食到佢珍珠出面係比較甜d。但都算有咬口唔會過淋。 整體可能都比較甜所以就飲落奶茶d味唔係好出到。…Read More

佢位於路口轉角位，大大個招牌都幾當眼。 見佢有牛根，豬手同九仔鵝係招牌，就諗住試下九仔鵝。一黎到佢分左湯，個湯好淡冇咩味，本身瀨粉已經冇咩味，不過撈埋d湯食就仲淡。瀨粉係白白地色唔係全透明，不過味道就同普通瀨粉一樣。九仔鵝原來係斬件炆鵝。份量比得都多，但係全部都冇咩肉食，有頸，pat pat位同埋鵝掌咁，雖然冇咩肉食，但一d都唔淋，有d難咬。不過叫做係幾入味，同埋雖然佢算係佐敦少有既餐廳係50蚊有找，但應該未必會再試。…Read More