miffyhk123's Profile

今晚同朋友慶祝生日，佢最鍾意食甜品，專登帶佢去旺角呢間甜品店食晚飯，又可以食精緻嘅甜品，又可以食埋晚飯唔使周圍走，一舉兩得。旺角甜牙牙除咗有甜品食之外，最近仲有二人龍蝦套餐，前菜先嚟一人一隻汁煮鮑魚，非常入味，仲切開一片片超級細心。呢個小食除咗鮑魚之外，其實仲可以揀其他小食例如牛仔粒沙律菜等等，選擇都幾多。主菜揀咗芝士烤龍蝦，面層舖上香濃的芝士夠晒香，芝士配龍蝦永遠都覺得係絕配。番茄大蝦面，雖然配料好似好普通咁，但係個意粉好好食，啲汁煮到剛剛好，一啲都唔普通。之後就係甜品，揀咗個拿破侖配Tiramisu加埋個抹茶雪糕🍦呢一餐真係大滿足😋…Read More

佐敦原來有間傳統老牌川菜餐廳老川皇，裝修懷舊有特色，有時傳統老店D野係幾大份又抵食，呢度都可以用手機自助點菜夠方便👍見隔離台個個都叫酸菜魚，當然我都要叫返個金湯酸菜海鱸魚，好大盤，魚片又多又嫩滑，味道要左小辣都好惹味，啲酸菜仲好好味添。紅燒茄子夠晒鑊氣，茄子入味。農家小炒肉同茄子一樣鑊氣十足，肉片量多，我仲好鍾意食入面配料爽脆嘅青椒。飲品叫左傳統嘅酸梅湯及罐裝王老吉，覺得食辣嘢係要配呢啲飲品😆…Read More

突然想食點心，又唔想去酒樓咁貴，就可以選擇嚟中環呢間一點心，唔使加一服務費，簡簡單單專注食點心。啲點心出嚟都係熱辣辣，種類選擇都唔少，有傳統嘅懷舊雞包仔，好多酒樓都未必有，仲有好耐冇食過嘅叉燒焗餐包、酸甜炸雲吞。蝦餃燒賣就可以兩隻兩隻叫，都好方便一兩個人去食，蟹黃蒸燒賣都算大粒、鮮蝦滑腸粉、潮州蒸粉果、四保滑雞扎幾足料，仲叫咗甜品香滑奶皇包、精製馬拉糕。其實佢仲有蒸飯、湯，除咗堂食仲可以外賣，堂食都有紙碟同筷子，不過店舖唔大，如果外賣返公司食都方便。…Read More

今日經過新蒲崗，就去一間小店好運泰國美食，朋友話呢度嘅燒烤都燒得唔錯，店舖嘅裝修都有D特色，餐桌側邊有個大魚缸，裏面都有幾條大魚，令我諗起海洋公園對住鯊魚食飯嘅餐廳。下午茶時間所以叫咗一堆追加小食，雞肉、豬肉、牛肉串燒就當然要叫嚟食吓，即叫即燒，新鮮熱辣辣上枱，啲肉都幾嫩，我最鍾意食佢吃佢嘅雞串，蝦餅都唔錯，幾好食，青木瓜沙律就好似同平時嗰啲口味有啲唔同，裏面就有好多蝦米仔。另外都叫咗個午餐喇沙摻摻，配多個紅豆冰，呢個下午茶都算幾豐富。…Read More

突然間想食鐵板燒，又想食放題，最後同朋友去咗觀塘廣場校長燒肉日韓料理，就可以滿足兩個願望。今次揀咗食足3小時，除咗可以慢慢食之外，仲因為升級可以無限追加食品包含燒烤、刺身、壽司、火鍋、啤酒、甜品、特色飲品。最不可思議嘅係打卡仲有免費升級任食日本北海道A4黑毛和牛、和牛肋條、日本米豚腩，仲有美國頂級手切牛，淨係食呢啲嘢嘅回本！因為天氣太熱，今次主打食雪糕🍦同特色飲品🍸，食燒烤生啤當然都唔少得，其中升級有酒精飲料蘋果酒草莓芒果沙冰好好飲，超級大杯，上面成支蘋果酒，打卡必選。雪糕都好多選擇，俾我搵到個開心果Häagen-Dazs！Dreyers士多啤梨雪條個脆皮好好食，當然維記芝麻糯米糍都係我嘅至愛🤭今餐簡直係大滿足😋…Read More

原來新蒲崗有個室內釣蝦場HABO，坐地鐵去到鑽石山行過去都唔係好遠，位置算係幾方便。望落去都幾大，場內有2個大型釣蝦池，當日都見有情侶、一家大細去玩，連小朋友都釣到，好適合炎熱夏天的一個室內小玩意。所有釣獲可以選擇直接取走或現場烹調，可以烹調不同口味及有精選美味小食，其中食咗個炸薯條真係幾好食。不過就係釣到的蝦唔多，所以唔係好夠食。在場的職員仲會不時給每位初學者傳授基本的釣蝦技巧，唔怕完全釣唔到。…Read More

好多朋友都因為日本地震唔敢去日本，冇得去嘅就喺香港食啦😂今日就去咗灣仔家賀屋刺身寿司專門店食飯。本鮪壽司5點盛做緊特價，喜歡鮪魚當然不能錯過，鮪魚🍣夠肥美，包括火炙大本鮪魚腩、極上本鮪魚餃、中本鮪魚腩、本鮪赤身醬油漬、蔥本鮪魚腩軍艦，再加埋鹽燒本鮪魚下顎，夠曬份量。怕五件吾夠食，叫多個彩虹壽司卷，有帶子、三文魚等，樣樣有D。食壽司之餘，炸物都要食啲，吉列海蝦同吉列三元豚當然不能少，外脆內軟，完全冇油膩嘅感覺。食完炸物，食返個軟綿綿又熱的自家低糖玉子燒，真係冇平時嗰D咁甜。雞爽肉串夠曬入味又juicy; 清酒牛油煮蜆，好香牛油味；蒲燒山椒鰻魚丼一人份量都好大碗，鰻魚又大塊。最後甜係好吸引的北海道千層雲呢拿蛋糕，甜度適中，D cream 好滑，再加個椰子雪葩真係透心涼。剛剛先知原來生日叫甜品可以畫畫㗎，下次都要搵機會畫一幅。…Read More

朋友講話連發哥都去排隊幫襯的米芝蓮推介人氣店暖心芝作，今日趁住經過荃灣都去買嚟食吓，除咗芝麻卷，仲有石磨芝麻糊，同芝麻雪糕。聽講係每日手工限量製作，用石磨芝麻糊搭配純正馬蹄粉，蒸製後再卷出菲林形狀，係久違咗嘅芝麻卷，芝麻味香濃又彈牙，真係幾好食嘅，又唔會覺得好甜，上面仲要有啲芝麻，不過就嫌太細卷，一個人一陣就食晒一盒😋今日趕時間，淨係買咗芝麻卷，下次有機會再食埋個芝麻糊同埋芝麻雪糕🍦聽講都幾好食。…Read More

依家就算唔去日本，都可以享受到日本嘅美食，今日就去咗銅鑼灣重房享受一餐與別不同嘅Omakase。首先頭盤是沖繩特產水雲配上清甜北海道蟹肉，哈哈螺好鮮甜，蘿蔔比較濃味，最後食就最啱。酸酸甜甜嘅醋混合口感有點似秋葵的順菜，配上爽口的象拔蚌，即刻開胃晒!接着就係令人期待嘅主食，首先牡丹蝦配蛋黃醬，全隻蝦炸到脆卜卜，連蝦頭都可以食埋，配上香濃嘅蝦膏，味道令人回味無窮。來自北海道肥美嘅蠔配上酸醋啫喱，真係連我呢個平時好少食蠔嘅人都愛上了它，再配上紫蘇葉，簡直好似一幅畫咁。白國鱒又名鱒魚，屬於油份比較重的魚，肉質軟綿綿，口感特別好味😋洋蔥絲配上醬油漬鰤魚，將味道提升到另一個層次。黃蘿蔔加入鮟鱇魚乾，再配上法包非常好味，加上睇到廚師將蘿蔔切粒嘅過程，真係好似一場表演咁。火炙後的拖羅變得軟綿綿，入口即溶，再用菜包住一齊食好有創意；而拖羅刺身魚味濃郁，兩種口感完全不同。要數色香味俱全就一定係魔鬼魚鰭天婦羅，配上健康素菜汁造出特別嘅效果，好似仙境咁。之後仲有吞拿魚北寄貝壽司；而上層海膽、下層拖羅蓉手卷，食完令人非常滿足。最後仲有非常鮮甜嘅魚湯，同巨峰提子🍇爲今晚美食之旅畫上句號。…Read More

今日晚上同朋友去了灣仔盛記酒家食晚飯，第一次嚟，覺得這是一家傳統酒家，小菜份量多，香味十足，夠晒鑊氣。叫咗兩隻新鮮海鮮大聖子皇（兩隻起叫），同朋友一人一隻，新鮮肥美又鮮甜，蒜蓉粉絲入晒味，真係想食埋朋友嗰隻，店員仲好好招呼，幫我哋拆肉上碟，真係酒店嘅服務，酒家嘅價錢。冷盤沙薑豬手粒，啖啖肉嘅豬手，沙薑夠晒入味，冇骨非常吸引。主菜鹹魚雞粒豆腐煲，送飯真係一流，嚟到個煲都仲係熱辣辣啲油仲係跳緊㗎，最鍾意食呢啲新鮮滾熱辣嘅小菜，除咗雞粒嫩滑仲有冬菇，加埋啲鹹魚真係好好食。…Read More

今晚同朋友去咗銅鑼灣家賀屋食晚飯，朋友話呢間餐廳夜晚都好多人幫襯，所以我都好期待。首先嚟個特選刺身盛-時令鮮魚附，多款新鮮魚生刺身包括三文魚、油甘魚、超大隻赤海蝦等，又肥美又鮮甜。海膽龍珠卷，海膽加上本鮪魚腩蓉，再配醬油漬蛋黃，口感豐富。西京燒熟成黑豚腩肉，西京味噌醃製，黑豚腩肉夠晒肥美，燒到外脆內軟。月見櫻花海老丼定食，有一個蒸蛋、沙律菜、烏冬、味噌湯、同最重要嘅櫻花海老丼，將蛋黃汁加入飯，再配上海老更加好味。吉列芝心豬扒配椰菜絲和芝麻醬汁，豬扒炸到剛剛好，而且夠晒份量，脆卜卜仲有拉絲嘅芝士，一定要趁熱食先有拉絲嘅效果。鹽燒鰝鰺魚頭鮫，我都好鍾意食魚頭鮫，貪佢肉質嫩滑，啖啖肉。鹽燒半切雞皮餃子串，雞皮做餃子皮又幾特別，又唔覺得肥喎。第一次飲柚子檸檬酒，味道酸酸甜甜原來好好飲；蜜桃碳酸酒都唔錯。…Read More

今日去到一間尖沙咀好傳統裝修嘅冰室保頓冰室食下午茶，首先當然要食吓新鮮出爐嘅脆皮牛油蛋撻，店員介紹單叫比下午茶餐抵食，係新鮮出爐，餅底脆口，蛋味濃郁嘅蛋撻。生炸雞髀配沙律🥗，其實可以叫薯條嘅，不過突然間想食吓沙律中和下啲熱氣，炸雞髀炸得剛剛好，唔會太油個皮都好脆口，又夠晒大隻。 保頓豬扒包豬扒大塊，仲有好大塊芝士，包皮都好脆，下午茶加$3飲品可以轉凍飲，要左凍杏仁霜都好大杯。雪糕菠蘿包，有兩個雪糕球，雪糕球甜度適中，配埋個菠蘿包一口咬落去又有菠蘿包又有雪糕咁食先至正！瑞士汁雞翼，一碟有兩隻雞全翼，夠晒入味。法蘭西多士，一睇就知道係好傳統嘅西多士，西多士入面有滿滿嘅花生醬，仲要用好傳統嘅糖漿樽裝住啲糖漿，夠晒懷舊。…Read More

今日同朋友慶祝生日，去咗銅鑼灣御鐵食鐵板燒，好近銅鑼灣地鐵站C出口過對面就係。前菜西柚蝦沙律，好新鮮清新又開胃🥗活龍蝦澳洲青龍🦞好吸引，亦都係我最鍾意食嘅，味道非常鮮甜，肉質嫩滑，充滿蝦膏嘅香味。活南非孔雀鮑魚當然係另一個主菜，口感煙靭鮮甜，肝臟廚師建議最後先食，因比較濃味。極上和牛薄燒，蔥粒被薄燒包住好好食😋食咗咁多肉，食返個日式炒雜菜可以中和下油膩嘅感覺。海膽海鮮炒飯海膽味好香，未食已經聞到香味。…Read More

今晚去左灣仔一虎食拉麵，因為見到有個檸檬拉麵🍜幾特別，呢度坐位吾太多，不過我六點左右去食吾洗等位。檸檬拉麵係秘製檸檬醬跟自家製豬骨湯配上新鮮檸檬，口感好清新，酸酸地反而更開胃，冇咁油膩。另+$32叉燒，+$15素麵，個拉麵幾彈牙，叉燒幾好食。另外叫了白虎拉麵比較簡單，是最基本之豬骨湯拉麵。食完就見到有秋季快閃優惠，星期一至四，只限堂食，凡惠顧任何產品満$110可以$1震撼價享用指定配料其中一份，每人每次只限加購一件。…Read More

今晚同朋友去咗銅鑼灣漁獲浜燒食晚飯，仲有我鍾意嘅龍蝦🦞二人套餐做緊特價。前菜蘿蔔牛舌，牛舌爽口，蘿蔔入味，食落去好似食緊牛肉咁。蟹籽蟹肉沙律🥗上層有好多蟹肉同蟹籽，配上新鮮嘅沙律菜蕃茄，清新好味。刺身三點可以+$98 升級袘羅、深海池魚、赤蝦，赤蝦夠大隻又鮮甜，袘羅池魚肥美。終於等到活龍蝦🦞浜燒，龍蝦非常新鮮，肉質彈牙，加上芝士一齊燒更加好味。活帆立貝浜燒都好大隻，可以配牛油或者清酒煮，今次揀咗清酒比較香，冇咁肥🤣另外以$88加配味噌蟹甲羅燒，蟹肉蟹膏配上梳打餅更帶出蟹膏嘅鮮味。紐西蘭牛柳，未食已經聞到香味，肉質非常嫩滑，配上燒香蒜片更加惹味。龍蝦頭味噌湯烏冬，食完龍蝦嘅肉，龍蝦頭就用嚟煲咗一個好鮮甜嘅龍蝦湯，配上彈牙嘅烏冬好滿足。…Read More