jade.foodlover's Profile

以茶餐廳嚟講，當普通嘅客飯午餐都只係五十幾蚊連例湯同熱飲嘅情況下，$58一個全日早餐呢個定價稍為進取。肉類有吉列魚柳、豬扒、雞扒、同漢堡扒四揀一，今日我就揀咗魚柳。英式全日早餐 $58 配凍奶茶(+$3)一上枱賣相有驚喜，份量十足，當午餐食絶對夠飽。主角魚柳炸得過咗火喉，外皮偏硬，肉質較實，炒蛋有兩隻蛋嘅份量，滑身不過冇奶香。芝麻醬沙律食落夠新鮮，薯餅同廚師腸都不過不失。牛角包有成隻手掌咁大，雖然係急凍貨，但係烘熱咗，外層鬆脆有牛油香。總括而言成個all day breakfast唔比出面打卡cafe賣過百蚊一個嘅味道差。…Read More

喺MegaBox溜完冰之後口痕想食個下午茶，見到呢間Cafe嘅蛋糕賣相非常吸引就坐低咗。自選二款 $68呢個套餐可以喺價值$38以內嘅雪糕、蛋糕、同飲品之中揀兩款。我哋就揀咗富士山芝士蛋糕同伯爵茶拿鐵配白玉。富士山芝士蛋糕賣相好可愛，係免焗芝士蛋糕嚟，芝士味香濃，口感輕盈，如果餅底比例再多少少就perfect。嘢飲相比之下較為遜色，冇伯爵茶味，似港式奶茶多啲，唔記得嗌少甜，甜度極高。白玉正正常常，口感煙韌有糯米味。餐廳以富士山為主題，成間舖嘅裝修都係少女感滿滿嘅天藍色，而且每一件蛋糕嘅賣相都好精緻。不過餐廳係半開放舖位，環境比較嘈，同埋採用半自助形式，執枱清潔嘅頻率低少少。如果想嚟打卡都值得一試。…Read More

當日同朋友去觀塘apm嘅genius bar整手機，本身預好快搞掂，點知整完都已經8點幾，附近好多餐廳都閂咗，諗住搵間就近嘅餐廳解決晚餐，就比我發現咗呢間餐廳。明太子醬薯條 $48薯條係波浪型嘅，似茶餐廳嗰種不過再粗少少，偏鹹冇乜薯仔味。沙律醬份量慷慨，唔驚食到最後冇晒醬咁乾真真，明太子份量都唔少，陣味好出，不過就有少少腥。成碟份量好大，一上枱見到都嚇親，最後我哋兩個女仔係食唔晒嘅。鰹魚熟成封門牛柳,香煎鵝肝,溫泉蛋配黑松露炊飯 $208封門柳經過熟成之後肉味香濃，而且餐廳煮得生熟程度啱啱好，肉質粉嫩，咬落唔韌。鵝肝煎得香脆，但係冇乜油香，普普通通，下面係日式炊飯，本身望落以為似意大利飯咁，但係食落口感比意大利飯腍好多，冇牙都食得，每一啖都有香菇同醬油味，溝埋溫泉蛋口感更加creamy，絶對係呢間餐廳嘅必點菜色。焦糖燉蛋千層窩夫酥 $68Croffle擺盤好靚，不過係凍嘅，配上富奶香嘅布丁醬、薄薄一層脆焦糖、同幾粒爆谷，食落冇croffle應有嘅香脆同層次感，煙煙韌韌，不過味道幾夾。沖繩黑糖咖啡$48有少少焦香嘅黑糖味latte，不過不失。餐廳裝修幾靚，有啲乾草乾花嘅打卡位，食物又唔差，絕對可以一試。…Read More

今日book左間西餐廳同男朋友慶祝半週年，點知嘢食唔好食之餘，服務又令人好失望，成間餐廳除咗個維港景觀之外其他嘢都對唔住佢個價錢。首先同好多中高價位嘅餐廳一樣，呢度嘅侍應一嚟就會問你要氣泡水定冇氣水，記住話兩樣都唔要，要普通水就得，如果唔係盛惠一支$68。Mezze Medley $148叫咗一份地中海小食拼盤，上面有鷹嘴豆蓉、炸鷹嘴豆泥球、辣茄子蓉、地中海式酸菜(欖欖、朝鮮薊、小黃瓜)各一兜仔，同數塊圓麪餅配馬格布里辣椒醬。成個拼盤嘅味道唔係大眾香港人嘅口味，尤其是個酸菜，比中式酸菜更加酸。但係都叫做有記憶點，頗具特色，只係份量比較細。Squid Ink Pasta with Boston Lobster $298每份意粉有半條波士頓龍蝦，來貨新鮮，用蒜蓉香草牛油煮，肉質爽滑，味道鮮甜。墨汁意粉係新鮮意粉，但係煮過咗龍，冇al dente嘅口感，只有少少彈牙嘅感覺。意粉配上蕃茄龍蝦汁，帶出墨汁嘅鮮味。Dry Aged- The Wagyu Bavette (300g) $438 呢塊牛扒係我對成餐最失望嘅一道菜。佢係切好咗一件件咁上，但係切之前rest得唔夠，啲肌紅蛋白水就晒出嚟，令到肉質食落冇咁juicy。嗌咗medium，係就係煎得幾粉嫩嘅，但係咬落去好似食樹皮咁，𡁻極都𡁻唔爛，完全食唔出係和牛。加上和牛本身肉味唔濃，都唔知食緊啲咩入口。汲取今次教訓，以後淨係會去steakhouse食牛扒。Traditional tiramisu $88甜品算係呢餐飯最好食嘅嘢。手指餅浸到濕潤，富咖啡香，可惜酒香欠奉。Mascarpone忌廉口感細滑，唔會太甜。忌廉同手指餅嘅比例大概係5:2，口感偏creamy。另外呢間餐廳嘅侍應service畀我感覺好chur，令我好大壓力好唔舒服。本身上菜時間掌握得唔太好，個前菜小食拼盤未食晒就一次過上咗兩個主菜，唔想攤凍咗個主菜變得唔好食，咪諗住將個小食拼盤擺埋一邊最後先食，點知有兩個侍應過嚟分別問咗兩次使唔使收盤，講咋唔使住過幾分鐘又嚟問多次。食完主菜嘅牛扒，食緊啲伴碟嘅時候又嚟問使唔使收，搞至好似我哋霸住佢啲碟用咁。好啦，到食晒前菜主菜、收晒碟之後，個甜品又遲遲都唔上。等咗10分鐘再去完個厠所先出到畀我。講真，我去啲人均百幾蚊嘅餐廳service都好過佢，完全冇expect過食千幾蚊一餐飯service會咁差。第一次食呢個價位嘅西餐食到一肚氣，總括而言，可一不可再。…Read More

呢間cafe行日系簡約路線，環境感覺平靜舒服， 但係就冇打卡位。當日食完晚飯先嚟，所以淨係叫咗一個疏乎厘pancake當飯後甜品。榛子焙茶梳乎厘班戟 $138呢款係其中一款每日限定嘅味道，不過當日供應充足，我哋9:00pm先入座，接近係當日最後一枱客，都仲點到。每碟有一疊三塊梳乎厘pancake，配料有榛子忌廉、焙茶(北海道3.6)牛奶布丁、同埋榛子脆脆。Pancake蛋香味足夠，口感濕潤，生熟程度掌握得啱啱好。個人鍾意空氣強入口即溶嘅pancake，但係可能因為呢三塊pancake疊埋一齊，面嗰塊都尚算鬆軟，底下嗰兩塊就畀上面嘅重量壓扁咗，食入口係實嘅。榛子忌廉榛子味濃郁，唔太甜，帶淡淡焙茶香，但係份量少，唔足以平均分佈喺三塊唔算大嘅pancake上。焙茶牛奶布甸口感彈牙，焙茶味唔算好濃，加埋榛子脆脆營造不同層次嘅口感。總括而言，以呢個價錢嚟講，味道係唔錯嘅，但係無論係pancake定係配料嘅份量都偏少，性價比唔高。而且整體來講榛子嘅味道偏濃，幾乎蓋過咗焙茶味，唔夠平衡，榛子控嚟食應該好開心，焙茶控(本人haha)可能就會失望。…Read More

Steamed Pork Momo (6PCS) $20Momo餃子即叫即蒸，麵皮乾爽煙韌。豬肉內餡冇咩特別香料味，似食緊中式餃子，係比較大眾化嘅味道，呢個價錢真係冇投訴。Fried Chix Cheese Momo (6PCS) $25同樣係即叫即炸，麵皮炸得硬脆，雞肉芝士內餡嘅東方香料味突出，反而食唔出芝士味。Spicy Chicken Duo $30炸雞外脆內嫩，30蚊有兩大塊，外層灑上滿滿cayenne powder，香得嚟唔會太辣，絕對比某連鎖炸雞快餐店嘅出品高質，唯一美中不足之處係炸雞入面好似冇乜餣過，咬開層皮就冇乜味，不過好彩都冇雪味。The Origin Burger $45(Parmesan Truffle Fries Combo Set +$15)個漢堡其貌不揚，以為伏咗，反而食落唔差。兩塊包皮內側搽滿牛油烘到香脆，配上煎得硬脆嘅煙肉，簡直邪惡至極。不過牛肉餅用嘅肉質素唔係太好，多筋又冇乜肉味。薯條係幼身嘅，似連鎖漢堡包快餐店嗰啲食落中規中矩，冇乜特別，帶少少芝士同黑松露香味。店內食物即叫即製，所以就算當日得兩枱客，都要等比較耐先上菜，不過食物送到嚟熱辣辣都係值得嘅。…Read More

放工成日經過呢間Cafe，望到入面裝修係幾classy嘅工業風，一直都好想試但係次次都已經閂咗門，上星期日放假特登過嚟呢頭try try佢。鵝肝炒蛋Croffle $72本身好鍾意食croffle，呢碟croffle完全冇令我失望。炒蛋生熟度啱啱好，鮮嫩香滑，而且份量足夠覆蓋成件croffle。鵝肝相比之下口感稍為遜色，係室温嘅，而且冇煎過嘅香脆感，但係入口依然油香四溢。雖然張相見唔到件croffle，但係佢絕對係呢道菜嘅主角，上枱熱辣辣，香脆可口富油香，層次分明，令成道菜口感豐富。Flat white $40咖啡飲落偏nutty，冇酸味，入口順滑。拉花有别於一般嘅心形拉花，係天馬造型，激發我嘅少女心。Cafe仲有一隻好可愛嘅貓店駐守，門口又有拉卡位，絶對係一間內外兼備嘅cafe。…Read More

呢間cafe嘅tiramisu被譽為全港最好食嘅tiramisu，之前嚟過幾次唔係賣晒就係太多人排隊，今日第四次來訪終於食到。另外仲嗌咗一個沙律，補充膳食纖維攝取量。鮮橙羽衣甘藍藜麥沙律 $68本身只係諗住求其嗌個沙律，點知食落有驚喜。沙律醬汁酸酸甜甜，蓋過咗羽衣甘藍嘅草青味，配上一粒粒藜麥同洋蔥碎，增加口感嘅層次。雖然鮮橙分量太少得幾片，而且完全唔甜，但係整體個沙律都好食，係一道唔錯幾開胃菜。提拉米蘇 $52不過正所謂希望越大失望越大，呢件tiramisu同我嘅期望有好大差距。首先以賣相嚟講，佢嘅四邊切口唔齊，仲有一小塊飛咗出嚟。味道而言，個人認為咖啡味同酒味都唔夠濃。個人比較鍾意手指餅浸到濕晒嘅感覺，而呢件tiramisu嘅手指餅中間仲係白雪雪嘅，食落口感唔夠濕潤。總括而言，Cafe嘅食物不過不失，定價進取，但係味道只可以用普通嚟形容。另外值得一提嘅係Cafe採用自助形式，喺counter落完單之後會比一部取餐機你，到部機響再出counter攞，而且食完之後要自己收拾枱面將餐具放喺指定位置分類擺放。如果咁啱經過唔使排隊可以一試，但係如果山長水遠過到嚟要排長龍嘅話就唔值。…Read More

朋友bookmark咗呢間Cafe好耐，上星期終於得閒過嚟試吓。芝士焗肉丸配自家製燒烤醬 $88肉丸都係現成急凍貨，芝士份量足夠，做到拉絲效果。個自家製燒烤醬嘅味道我就食唔出同坊間嗰啲有啲咩唔同，而且好稀，掛唔到汁上肉丸。如果想食肉丸，可能去某連鎖傢俬舖食會開心啲。松露油忌廉野菌汁貓耳朵意粉 $102一上枱就聞到淡淡嘅松露香，貓耳朵意粉有啲厚度，口感煙韌，野菌菌份量雖然唔多，但係食落新鮮，面頭有少少合桃碎，增加口感嘅層次。成碟意份份量偏少，男仔嗌一個可能食唔飽。伯爵茶忌廉日式疏乎厘鬆餅 $88伯爵茶味幾清新，忌廉份量足夠。Pancake有空氣感，食落軟綿綿唔會太濕但係略欠蛋香。雖然配料比較單調，得忌廉同埋少少餅乾碎同脆片，但係整體嚟講性格比幾高。總共叫咗三樣嘢，計埋加一埋單$306，cafe嚟講唔算貴，但係食物份量較少，三個女仔食唔飽。…Read More

The Matcha Tokyo呢間喺銅鑼灣新開嘅舖頭主打有機抹茶飲品同甜品，店內有一張長吧枱畀人企喺度飲/食。今日年初二嚟到，都有唔少人排隊，不過排咗大概15分鐘就買到，再等多5分鐘就飲得。Matcha Latte Float $52Matcha latte float則係牛奶抹茶配一球牛奶雪糕，牛奶抹茶沖得好濃郁，因為冇落糖，所以甚至會有少少苦澀，但係配上奶香十足嘅牛奶雪糕就中和返抹茶嘅苦澀。雪糕因為浸咗落液體度，所以會有沙沙地嘅口感。抹茶控可以一試，但係如果可以自己揀甜度，口味就會更加大眾化。…Read More

Ocio星期六約咗朋友喺旺角食飯，本身諗住試對面嘅Black Coffee, 但係見到太多人排隊就放棄咗。奧斯芝士牛肉漢堡配薯條 (午餐配餐湯及餐飲) $89 (+10%)漢堡扒非常多汁飽滿有肉味，配料豐富，味道清新，中和咗牛肉嘅膩。芝士醬份量十足，每一啖都食到芝士味，仲多至漏咗一pat出嚟，用嚟點薯條食。薯條夠晒粗，炸得恰到好處，外脆內軟。點芝士醬一流。朱古力麻糬窩夫 $65 (+10%)窩夫朱古力味香濃，入面有一粒粒煙韌嘅白麻糬同黑朱古力，不過麻糬份兩唔夠多，唔係每一啖都食到。Toppings有幾塊朱古力簿片同一球朱古力雪糕，如果多啲toppings、口感豐富啲會更好，食落會冇咁乾。之前食過大圍同將軍澳嘅分店，三間嘅質素都差唔多，呢個價位嚟講環境、服務、味道都唔錯。…Read More

午餐免費配珍珠奶茶或芒果綠茶，叫咗兩個乾麵餐，轉其他飲品補差價。鹽酥雞乾麵 配仙草奶茶(+$3) $44鹽酥雞味道正常，但係個乾麵出晒事。乾麵完全唔乾，個麵底煮到淋晒，仲要冇瀝乾水，碗底全部都係水。食食吓啲鹽酥雞跌晒落碗底，浸到淋晒，明白點解唔可以好似得你豬扒咁用個碟分開上。肉燥分量太少，撈埋落啲麵度好淡口。仙草味道正常，但係畢到碎晒，奶茶都係伯爵茶底溝奶精，嗌咗少甜都係好甜，飲咗半杯已經好膩。吉列豬扒乾麵 配芋香珍珠奶茶(+$3)塊豬扒呈詭異嘅橙色，又薄又細塊，冇切斷食得比較麻煩。乾麵嘅評價同上面一樣，不過豬扒分開咗裝，唔會浸到淋晒。芋香味係好假嘅香精味，冇茶味，珍珠口感都尚算正常，不過同樣冇乜味。總結食店嘅定位係低價、填得飽肚嘅平民食物，似細個學生哥嘅時候冇乜錢食嘅街坊小食店，想懷舊嘅可以嚟試吓，我就覺得可一不可再啦。…Read More

餐廳門口有好搶眼嘅燈牌，入嘅裝修擺設都幾有特色。下午茶 回味醬骨架麵(無味精豬骨湯麵+$2) 配 珍珠奶茶 $52醬骨架有兩大嚿，餣得好入味，第一啖食落好香口，但係調味重，愈食愈鹹，食到一半要浸落湯度溝淡啲味。第一嚿肉質偏乾硬，有少少癡骨，要成嚿夾起咬啲肉落嚟；第二嚿就腍好多，可以用筷子篤啲肉出嚟食。配菜有沙律菜、半隻醬油溏心蛋同榨菜。溏心蛋都係偏鹹，但係蛋黃晶瑩剔透，口感軟滑，質素唔錯。榨菜用水沖走表面嘅鹽份，味道清爽。無味精豬骨湯有淡淡嘅豬骨味，素麵幼身、口感偏腍，個人鍾意彈牙少少嘅麵。珍珠奶茶有驚喜，雖然都係奶精溝出嚟，但係茶底係伯爵茶，茶味突出，仲有少少彿手柑嘅餘韻。珍珠就平平無奇，始終餐廳嘅飲品唔可以同出面手搖舖嘅比較。順帶一提，店家提供即棄餐具，而且提供膠手套方便客人用手食醬骨架。雖然比較衛生同方便，但係就唔環保。總結食物味道唔錯，價錢公道，如果下次嚟會想試下佢嘅撈麵。…Read More

去到嘅時候比較夜，遠處已經望到門口嘅招牌開咗燈，非常搶眼。去到已經剩返5種pastries, 點咗佢最signature嘅肉桂卷。Espresso Cinnamon Roll $35肉桂卷圓轆轆脹卜卜咁，焗得色澤均勻，肉桂糖嘅份量多到漏出嚟。雖然一直擺喺個櫃入面，但係肉桂卷攞上手仲係暖嘅。一啖咬落去麵包外皮有少少焦香，入面非常鬆軟，食落有麵粉香。一開始食到濃縮咖啡糖漿微微嘅香甜同濕潤，漸漸肉桂味就蓋過咗咖啡味，壟斷咗成個口嘅味蕾。成個包冇想像中咁甜，肉桂味好濃郁，甚至有少少澀，唔覺意一啖接一啖食晒成個，完全唔覺膩。雖然價錢唔平，但係食得出食材嘅實感，物有所值。…Read More

同朋友行完大老山，諗住落黃大仙食個下午茶，就求其入左間門口有個傳統大招牌嘅茶餐廳開餐。下午茶餐B: 吉列豬扒配西多士 $35做運動消耗完熱量之後梗係要食返啲高熱量食物補充下。下午茶餐免費配熱飲。豬扒睇落好大塊，但其實揼到好薄，咬落香脆唔油膩。西多士花生醬餡份量適中，配糖膠牛油簡直係邪惡之選。下午茶餐H: 豬軟骨米線 $42茶餐廳好少會有豬軟骨食，餣得入味唔會死鹹，米粉軟硬適中，菜芯鮮綠。總結下午茶性價比高，食物水準正常發揮。…Read More