edith852's Profile

比上次過嚟，呢間餐廳嘅下午茶餐多咗選擇！想食鹹點除咗炸雞窩夫同油封鴨脾麵，仲有三文魚水波蛋多士等等。但太掛住chicken waffle，都係叫返呢樣。先讚waffle真係做到香脆鬆軟😋雞就由之前啖啖肉雞件轉做雞鎚，滑啲但食起嚟冇儀態啲🙈幾鍾意雞嘅調味，外層炸漿我覺得可以做得再酥脆啲🙈出面有紅椒粉同少許加咗檸檬汁嘅忌廉令層次更豐富，但係忌廉好少，大概夠每隻鎚送到一小啖...重點係！食完成碟總覺得有啲乾，如果好似西多士咁側邊有一小杯楓糖漿會好好多，兩樣都好食但好似各有各食咁，即場淋應該會令佢哋夾啲同冇咁乾，又唔會比蜜糖整淋哂～咖啡叫咗creme brulee latte，糖漿味道有啲怪，哂咗杯啡，下次都係叫其他😂佢本身杯啡cp值唔錯㗎～…Read More

因為有半價coupon所以揀咗呢間食晚飯。首先叫咗個牛肋骨蛋包飯，牛肉韌如湯渣，出面層脂肪又有牛羶味。講咗加錢轉紅菜頭蛋，佢冇加到...到泡菜五花腩蛋包飯，今次佢有加紅菜頭俾我，好嘅五花腩塊皮爽而不膩，可惜呢碟泡菜、五花腩嘅皮同脂肪都軟腍腍，舊蛋又軟腍腍，撈埋一齊唔知食咗啲乜，口感似肥膏撈飯...卡邦尼意粉似落太多忌廉，調味一般。最搞笑係個韓式炸雞，個炸漿同調味食落竟然似咕嚕雞肉。咕嚕皮唔係特別脆，而且雞肉削而乾，有好幾塊根本得炸粉而冇雞肉；薯條都一般，偏幼而冇薯味。服務方面，侍應態度ok但人手明顯不足，落單收碟都好難搵人，明明全場已經唔算多客。結論係下次不了。…Read More

次次嚟食都唔捨得唔嗌海蝦味噌沾麵，海蝦湯鮮美濃郁、唔會死鹹，蝦味餘韻綿長，而且個湯好掛麵，每次食都覺得好幸福😭麵底就算叫普通嘅量都相當大份，連埋啲湯又會忍唔住一啖接一啖，食完會係滿足嘅一餐！慢煮叉燒軟嫩化口；跟麵嘅半隻溏心蛋高質唔使多講，啲筍都冇「壓味」，平時唔食嘅我都食哂👍店家好貼心咁提供熱石，湯凍咗嘅話可以叫店員加，不過我好快食完就冇加喇。最後食剩沾麵湯，加埋魚湯一齊飲，鮮味無窮🌟呢餐先叫完滿！朋友叫咗濃厚蟹蝦豚骨拉麵。稍稍試咗拉麵湯底，畢竟唔夠沾麵湯濃厚😂但朋友都覺得整體好好食。聽聞拉麵台風其他區嘅舖頭都要排大隊，呢間灣仔新店就冇咩人龍，但質素、價錢、服務都好出色。蝦沾麵同慢煮叉燒仲係灣仔店獨有🤪好想幫佢宣傳但又唔想以後排隊，好矛盾...Btw毒J私心鍾意店內擺設，尤其攻殼機動隊、EVA、Paprika💛而且有說好食是良知，店家兩樣都有，支持！…Read More

經過見店面明亮舒服，決定買一底蛋糕同屋企人分。有紅棗、無花果同原味，三款都有試食，前兩者都係啲市面少見嘅口味。（意外嘅係原味都幾好食，好有蛋香同好鬆軟🥰據講係用鮮奶整。）揀完店員妹妹仲細心問想點切、幾多人食，態度耐心有禮。蛋糕全部當日即焗，仲有牌仔寫住每款蛋糕出爐時間👍我就揀咗啱啱焗起嘅棗蓉蛋糕。其實叫個下比想像中大舊，都驚食唔哂，結果比我哋極速清哂🌚棗味清香，蛋糕體濕潤而輕盈，深得怕甜嘅雙親歡心。可能因為試食切得比較少同入面切唔中棗蓉粒，買嗰時真係冇諗過棗味咁出😂頗有驚喜！…Read More

好鍾意食大阪燒但坐底食嘅好多時都唔平，估唔到喺銅鑼灣搵到抵食大阪燒😍仲要冇乜人，唔使等位～我同朋友分別叫咗香蔥煎蛋大阪燒同海鮮大阪燒，每個餐四五十蚊仲要跟前菜嘢飲，超夢幻！每個大阪燒份量唔係好多，但呢個價錢嚟講算好抵食，個餅唔會話好削，配料都算多！調味都做得唔錯，可以解吓我嘅大阪燒癮。兩款入面我比較鍾意香蔥煎蛋大阪燒，好惹味☺️嘢飲試咗蜂蜜綠茶同麵豉湯，麵豉湯意外香濃，蜂蜜綠菜難得係綠茶加真蜂蜜（唔係包裝好嘅化學茶），有香甜蜜糖味，茶味則稍有不足。唔夠食可以追加麻醬冷烏冬或者明太子意粉，都係加廿零蚊！烏冬我冇試，明太子意粉可惜一般，唔太夠汁，亦冇咩明太子味。真係餓嘅，叫多個餐都抵🥰最後，呢個時候仲會貼少量文宣，其實都係有心手足嚟，店員服務態度都好，會再嚟多多支持💪🏻…Read More