kt543's Profile

上星期同朋友去咗旺角御滿屋食放題，兩個大人加個小朋友，$800有找。刺身款式算多，我哋第一輪就叫咗磯煮鮑魚、象拔蚌、虎蝦、三文魚、油甘魚、甜蝦、螺同帶子。鮑魚同象拔蚌幾爽口，唔會韌；虎蝦大大隻，肉質結實；三文魚肥瘦適中，油甘魚有魚油香。最驚喜係帶子，鮮甜唔腥，我同朋友都encore咗兩轉。朋友個仔就最鍾意甜蝦，話好甜，自己食咗十幾隻。熟食方面，燒鵝肝係必點！外面香脆，入口即化，我哋叫咗三次。川燒珍寶鮮蠔真係好大隻，燒得剛剛好，唔會乾。燒平目魚燒得香口，魚肉仲保持到嫩滑。天婦羅炸粉唔會太厚，蝦同蔬菜都脆身。仲有幾款中式菜都好正，陳年果皮蒸鮑魚夠淋又入味，御品鮑汁燴花膠煮得夠淋，個汁撈飯一流。乳鴿好脆又多肉，小朋友最愛。甜品有馬來西亞極品榴槤，味道濃郁。Movenpick同Haagen-Dazs雪糕任食。飲品櫃有多款汽水、果汁，茶，仲有啤酒任飲，大人都可以輕鬆下。兩個鐘夠食，食物款式多，質素對得住價錢。特別係有齊刺身、燒物、炸物同中式菜，大人細路都啱食，服務都唔錯。…Read More

鑽石山站一出，行兩步就見到「木子烘焙」。作為一個麵包迷，我經過忍唔住入去，佢啲麵包款式多到眼花撩亂，個個賣相都好吸引，令人有選擇困難症。今次我主力試咗兩款三角菠蘿包。個絲襪奶茶味，外皮真係好脆，一咬落去「索索聲」，裡面啲奶茶醬多到差啲漏出嚟，味道好濃，完全無偷工減料。個摩卡味都一樣咁正，咖啡同朱古力味平衡得幾好，唔會太甜，同樣係外脆內爆醬，食完個口仲留到陣味。另外買咗個抹茶烏龜包俾姪女，個樣得意到呢，佢拎住唔捨得食，最後都係成個KO咗，睇住佢食到咔咔聲笑。第二日朝早，我帶咗個開心果果仁乳酪包返公司做早餐。一打開個膠袋已經聞到陣陣開心果香，咬落去質感好實在，滿滿嘅果仁同乳酪，完全唔會得個「空氣」字，食一個已經好飽足。至於個絲襪奶茶冬甩，質地係夠軟熟嘅，不過奶茶味就比三角包淡咗少少，如果可以再濃啲就更好。最後買咗鐵觀音合桃雙色軟歐包同提子鬆餅俾屋企人做第二朝早餐。阿媽話個軟歐包有淡淡茶香，夾埋合桃好香口；老豆就話個提子鬆餅唔錯，好香牛油味。呢間舖頭嘅麵包有心思，又靚又好食，下次會再買番公司做早餐。…Read More

今日同朋友行開旺角，突然想食台灣野，就試咗豉油街呢間「阿木台灣麵」。鋪頭坐得幾舒服，唔會逼，又乾淨。我點咗碗紅燒牛肉麵，上枱見到有四塊又大又厚嘅牛𦟌，燜得夠淋，筋位仲有啲咬口。湯底飲落幾清，唔會太油，有淡淡嘅藥材同醬油香。麵身係我鍾意嘅粗麵，掛到湯又唔會太軟，幾好。朋友叫咗鹽酥肉便當，白飯上面淋咗啲滷肉汁，佢話啲鹽酥肉炸得脆脆哋，幾香口。另外我哋加咗兩款小食：芝士肉鬆蛋餅同香酥炸雞扒。蛋餅皮煎得啱啱好，入面真係落足肉鬆，每啖都食到。炸雞扒果然好大塊，外皮炸得金黃，肉質都算嫩。套餐飲品有半價，我叫咗杯粒粒白桃汁，入面有果肉，清清甜甜幾解膩。朋友試咗芝士岩鹽奶蓋炭燒烏龍茶，奶蓋鹹鹹哋，同烏龍茶幾夾。埋單計返，兩個人食到飽飽都係$275, 仲要無加一服務費，服務員仲要好有禮貌，喺旺角來講真係好抵食。…Read More