天邊一條蕉's Profile

一大班人慶生🎉，因為要方便朋友去左黃埔食，估唔到住宅區大排檔都可以盡興！呢間餐廳菜式選擇多，包括好多經典粵菜小炒，好有驚喜🤩！仲有仲有，唔好以為小店無海鮮，同老闆傾開，佢話每日都會去街市買餸，有鮮食鮮，有要求可以預先同佢講～～今晚有蟶子同貴妃蚌，有口福！🐓芝麻雞 以前成日食，依家比較少見，估唔到呢度有！雞皮連芝麻炸到勁香勁脆，但入面雞肉🍗唔會老，仲好嫩、好多肉汁。沾埋麻醬一起食，芝麻香真係搞唔掂！🐟蜜汁美極煎封鱔 美極煎鱔整得唔錯，美極嘅鮮味加上蜜汁🍯好夾，鹹甜交錯好過癮！鱔雖然唔大條，但肉質彈牙，香而不膩。😋🔥豉椒炒蟶子 一上菜就已經覺得好壯觀，蟶子每一條都勁大條😲，放入口淡淡肉超爽，果然係每日精選！豉椒炒絕對唔會出錯，香到食得落一碗飯。🍚🧄蒜蓉粉絲蒸貴妃蚌 蒜蓉膽拖貴妃蚌，加上吸收左精華嘅粉絲，鮮味無窮！✨🐚清烚田螺田螺好大隻肉夠厚，鮮甜到唔洗點醬都夠味！🥘鐵板雞雜腰花 雞雜唔成日有，用XO醬炒過，鑊氣足，香中帶辣，惹味到不得了～😍仲有其他菜式都好出色，好似紹菜豆腐浸潮州魚蛋🥬(魚蛋大大粒)、蟹肉冬蓉羹🦀（濃稠適中有口感）、豉油王炒麵（麵條幼條條分明勁香口）～～有啲卧虎藏龍嘅感覺😂😂!下次要再試下其他菜先得！👍🏻…Read More

平日的灣景中心極為繁忙，星期六剛好會展舉辦動漫節，平台依舊熙來攘往。與友人相約晚餐，由於溫度稍降，所以選擇坐在戶外位置，製造仿如於外國餐廳進食的環境（=扮旅行）；雖然沒有冷氣，但有流動風機，又偶有自然晚風，算是舒適。二人食量不算大，只點了白酒青口和冷盤，已經非常飽肚。白酒青口是餐廳其中一款招牌菜式，可以選擇500g 或1kg，因為不打算點意粉飯，所以要了1kg慢慢吃。青口滿滿一盤，隻隻肥美，味道濃郁具酒香又不覺膩，似乎再多也可以吃完。另外，配菜薯條亦非常不錯，熱辣辣香脆可口。冷盤份量十足，有四款火腿和麵包多士（配有鵝肝醬），最適合慢慢吃邊聊天，火腿種類全都不同，硬的軟的、鹹的淡的，一次可吃不同味道。美中不足是麵包，說是多士不夠脆，說是一般麵包又不夠軟，口感有點尷尬。每人要了兩杯生啤，十分休閒。值得一提是侍應生服務殷勤，當晚全場爆滿，他們都很勤快，經常留意客人需要，十個讚。…Read More

泰斗入口稍為隱蔽，出升降機的時候有點別有洞天的感覺。正是中午時分，餐廳燈光調度略暗，但因有一排露天座位，有充足自然光，頗有情調又環保。從此餐廳看露台位置，有點外國feel。三人行點了不同種類的食物：小食拼盤-超好吃的小食拼盤，有蝦餅、魚餅、春卷和肉卷，熱辣辣的上枱，炸的程度剛好，非常香口，配以甜酸醬，令人驚喜想encore。烤墨魚-墨魚不韌有咬口，略嫌燒烤時間不足，不夠香口，較好的部分只是剛熟。胡椒炒青口-這碟青口稍稍遜色，青口大約只有六、七隻，不算大只，而且胡椒味流於外在，完全不入味。。。。。沙嗲串-雞肉牛肉都十分juicy，烤得香口，大大串令人食得滿足，沙嗲醬有花生醬香非常惹味！粉絲大蝦煲-兩隻大蝦開邊，粉絲夠入味，鍋上仍有「滋滋」聲，飽肚之選。最後點了芒果糯米飯（忘記拍照），芒果香甜，但糯米飯有點過甜。然而整體來說，泰斗相當不錯，滿足的週末飯聚。…Read More

因為工作關係，多次經過這間餐廳，無論是午間，下午時段至晚上，餐廳總是滿座。在高檯位置，總伴隨嬉鬧笑聲，非常有氣氛。直至去年平安夜，提早於兩點下班，同事提議去喝一杯，才首次試了這餐廳。由於臨時起意，沒有預訂，想不到過了繁忙時間也爆滿，幸好仍有最後幾個窗旁高檯位置。我們已吃了午飯，所以只叫了啤酒和all day breakfast, 同事們也隨意要了burgers。食物相當不錯，然而當時更深印象，是一班顧客已開始慶祝聖誕，已在喝香檳拉花炮，時而輕踏舞步，節日氣氛相當濃厚！相隔數月，疫情稍為轉好，再去一次shoreditch, 未能去旅行也想感受一下英倫風。這次二人預約了午餐時段，同樣爆滿，walk-in 顧客都未能安排座位。簡單的一餐，要了炸雞翼，牛扒和海鮮意粉，還有生啤和咖啡，整體水準不俗。相比上次充滿節日興奮，今次倒充滿英倫休閑氣氛，帶點慵懶和輕鬆情調，友人情侶慢食閒話家常，暫時離開繁囂鬧市。…Read More

之前朋友話第三街附近有間小店食物唔錯，做完野八九點去開附近就搵佢一齊試下。見到呢間小店，有晚餐、小食，進口手工啤，大家唔算好餓，於是叫d小食同幾支手工啤慢慢嘆。裡面大概有六七張枱，仲有向街既幾張高枱，感覺有少少似置身外國小街餐廳甘，休閑舒適。餐牌食物選擇唔算多，同老闆傾左兩句，知道佢地最近試緊新菜式，慢慢更新緊餐牌。老闆見我地唔太餓，介紹左幾個小食。酒煮大蜆 - D蜆好大隻好新鮮，啖啖肉，個湯酒味濃郁，超正。最驚喜係看似平平無奇既幾件自家焗制多士，非常香脆，沾下湯食，配合絕佳！川味辣子雞 - 既香且辣，雞粒juicy，送啤酒一流，𣊬間食完，唔餓都有encore衝動。爆脆墨魚大口仔 - 脆漿出色，唔會過厚，脆外皮加軟內裡軟墨魚頭，好味。一口哈哈蝦 - 又一惹味小食，蝦隻炸透香脆，但唔會乾，蝦隻頗大極足料，可能要食兩口，細隻少少或者更加有口感，不過味道無得彈。煙肉焗菠菜 - 菠菜切段，同熱辣辣芝士水乳交融，加上粒粒煙肉，簡單而令人食唔停口，碟都lam乾淨。不過可能焗完有d縮水，份量稍少。整體黎講呢個小店食物相當唔錯，最欣賞佢幾碟炸物唔係一樣味道，而真係各有特色，抵讚抵食！仲有d好味多士配酒煮蜆，而家仲好回味。手工啤有幾款味道，我最鍾意花香。店員亦服務殷勤有禮。大家去開附近不妨一試，期待小店新菜式。…Read More

連放幾日假，食評癮起，於是寫番近排去過既餐廳；又睇番自己之前寫既食評，發現原來唔少好評既已經結業。。。所以食過好味既真係要食多幾次，黑門就係其中一間。去黑門食飯都有d機玄巧合，只係兩條友肚餓，去到棉登徑發現有位泊車，條街一排都係食店，間間都幾吸引，只係呢間最近車位。好彩無失望，入到店收銀姐姐好殷勤安排坐位。見到有人食燒海鮮，香氣四溢極吸引，令人食指大動。即刻先食海鮮—羅甲燒，又叫左帆立貝同蜆。羅甲燒好香，燒到殼都脆，好味。帆立貝都好，佢有特別既調味，唔錯。最欣賞係蜆，用酒燒本身都好香好夾，但d蜆仲有淡淡海水味，啖啖精華。然後叫左個刺身盛，量算多，但件件魚都係厚切，而且好新鮮，海膽香濃creamy，要慢慢嘆d刺身，簡直係享受，再加多個三文魚手卷，完美。另外仲有叫左雜菜天婦羅同炸蓮藕。同樣質素高，仲有我鍾意既秋葵；炸蓮藕好似薯片甘，好香口，但可能鹽花唔均勻，有幾塊略鹹。整體來講好滿意。呀仲有件趣事，店家好有愛，應該會按客人要求播生日歌切餅慶生，當晚食左兩個鐘有三枱，都幾好氣氛。…Read More

好耐無黎沙田18飲茶，今日放假同媽媽兩個黎嘆下午餐。酒店於平日有優惠套餐，不過未必樣樣啱食，所以都係決定單點。松子菜莆粒帶子炒飯 - 夠乾身好惹味，唔同材料炒香十分有口感。炸蝦角 - 兒時最愛，而家唔係度度有得食，即炸熱辣辣，裡面蝦肉大又爽，每隻都脹卜卜，趁熱食一d都唔油，正。北京填鴨包 - 幾新穎，最啱人少食唔到填鴨既我地，可以過下口癮。包好軟熟，但填鴨同醬味竟然好似叉燒包，最終顯得無咩得別。叉燒 - 本來想叫燒腩仔，但原來週末先有。侍應推介叉燒，於是一試。好在有聽侍應講，個叉燒係超好味！肥瘦適中，燒得極有肉香加上少少燶邊，簡直係近年最佳叉燒！金萡紅豆桂花糕 - 賣相精緻，味道清新，唔會過甜，稍不足係桂花同紅豆一叉就分開。沙田18坐得舒適，環境清幽，食物好不話下，服務亦一流，教人如何不愛它？…Read More

呢間邊爐成日都坐滿人，walk-in 有位十分好彩。突然好想食醉雞，於是叫左個醉雞鍋。味道其實唔錯，可惜d藥材太碎，好似越食越混濁甘，蓋過左酒香。雞件份量多，又夠滑，整體唔錯。象拔蚌好靚，兩個人食唔到一條，好在可以要半條（$680），fit晒，切片厚度剛剛好，爽脆新鮮，唔錯唔錯！另外再加兩隻蟶子，淥完仲係好大隻，好似大約$30隻，抵！手切肥牛每次必點，維持到水準，夠新鮮、牛味十足唔會韌。魚卜有七件大大條，落水縮少少，不過好滑好彈牙，口感一流。自家雜餃第一次食，係意外驚喜，新鮮上枱唔會雪到硬晒，調味唔錯，估唔到餃都做得甘出色。其他竹笙海帶木耳生菜都幾好，成餐都好滿足，飽到捧住肚走。…Read More

九點左右到店，門口仲有人等緊位，幸好有兩人枱，唔駛等，店鋪唔算大，大家坐得都幾密，眼見都係一家大細或者慶祝生日，氣氛幾溫馨，店員又同顧客有講有笑，有家既感覺。第一次試呢間，店員熱情介紹食物和食法，我地要左個醉雞加象拔蚌套餐，另叫其他火鍋料。醉雞鍋十分香濃，雞非常入味又夠滑，我個人認為酒度足夠，但略為甜左D，蓋過左D藥材味。象拔仔唔錯，幾新鮮彈牙；蝦亦都夠大隻爽口；不過蟶子就好細隻，而且可能開耐左唔算新鮮。牛肉非常正，肉味夠有咬口；脆鯇有三大件，完全係厚切，爽脆抵食；自家製餃其實口感唔錯，不過醃肉應該重手左，鹹左D。整體黎講都算不俗，可以再試。…Read More

收工近九點，突然想食爐端燒，搜尋到呢間係荃灣四坡坊既居酒屋。位置頗隱蔽，座落民居粥店之間，不算起眼。由於太肚餓，兩人一下點左一大堆串燒小食，大部分既味道相當唔錯，我最鍾三角雞軟骨，第一次食幾特別，好香又juicy；燒廣島蠔$48有兩隻，而且size 唔細，好抵食；月見免治雞串都好有口感；螢光魷魚漬又多又大條，必點；蟹膏炒飯香濃到不得了，三扒兩撥就食晒。以同類型既居酒屋比，呢間質素不錯，價錢親民，絕對值得encore 。值得一提係店員有禮親切，工作勤快，俾個贊。另外店內一直播放九十/二千年代既日文歌曲，估唔到仲聽到Speed 和Every Little Thing，年輕日子感覺返晒黎。…Read More

睇到雜誌介紹期間限定海膽拉麵，真係看見也心動！打電話去留定海膽，聽電話的哥哥服務好好！三人收工去鋪頭，唔駛排隊不特已，竟然一個人都無，可能係星期四啦，又或者附近太多麵店，競爭好大。一人一個海膽拉麵，真係成板海膽，好新鮮；麵既硬度可以揀，我要偏硬有口感的，唔錯！不過我最鍾意都係個蜆肉湯底，鮮甜美味，一隻隻細蜆食肉連湯，加啖海膽，簡直將工作煩惱一掃而空！我地仲叫左溫泉蛋，略咸。煎餃子，熱辣辣有肉汁流出，幾好。仲有叫左粟米粒，烤得好香，一黎已經搶食，無影低。海膽拉麵過左九月就無得食，好在有機會一試，希望下次黎試第二款。…Read More

紅磡食肆何其多，早兩個幾月偏偏經過此店的時間被門面吸引，藍色店面在舊街裡非常sharp醒，門外看了看，內裡佈置簡單舒適，只有幾張枱和一張高bar枱。以此店規模來說，食物種類算多元化，主要是西日fusion，而且當時不用等位，二人決定一試無妨。侍應推介可先試玫瑰多士，推介就即管一試。它的賣相不錯，有些玫瑰花碎，好優雅呀~~~最初也擔心會不會太甜，因為甜味四溢，香而不濃的甜味，伴著玫瑰的清香，它的多士烘到熱熱的，少許香脆。三個字：超好食！點了兩份主菜，一是豬扒漢堡，一是秘醬海鮮意粉。豬扒漢堡大大件伴薯條沙律，才一百多元，在其他西餐廳一定不止。包夠熱又鬆軟，豬扒大片又juicy，不會乾爭爭，炸粉厚度適中，讚。薯條都不能不提，看樣子不過是舊式茶記波浪薯條，熱辣辣固然是基本，竟然炸得均勻，最重要是調味適中。我真的覺得，做一份如此美味的漢堡，每個細節都如此到位，實在不簡單啊。秘醬海鮮意粉，相比漢堡賣相就普通一點，不過看到有幾隻蝦又有蟹肉，用料豐富，都值回票價的。萬萬想不到秘醬十分惹味，加一點微辣，食到唔停得口！後來一問才知道是先己調製的，據聞廚師對醬汁調味是非常有研究的。最後還叫了甜品和咖啡。有曲奇綠茶果凍和菠蘿荔枝果凍，兩款配搭都好好味，又係唔會太甜，擺係隻玻璃杯，更加賞心悅目。咖啡味道不錯，是用非洲咖啡豆，香濃。由前菜到餐飲，雖然身在小店，但似是酒店級的享受，而只用平民的價錢，完全是吃得出的認真和用心。今次真的尋到寶~希望小店繼續努力！…Read More

第一次食南亞菜，都有d怕唔啱口味，不過朋友試過極力推介，即管試下！先食個魚柳芒果沙律，對我黎講個配搭好新鮮，魚柳係炸過既，都有成五六件；芒果好鮮甜，個沙律微酸好清新，五個人每人分少少開下胃唔錯。跟住就食海鮮pizza,個餅底好鬆軟，唔會太厚，芝士味香濃，都幾好食，但唔算特別。個燒羊脾就好好食，用左唔少香料(當然我唔知有咩)，一d都唔膻，燒得好香，有四件，一齊分d黎食就啱，唔會漏。另外仲有叫左海鮮墨汁麵同埋咖哩雞印度薄餅，一黎到大家爭住食相都影唔切。個麵淡左少少，麵有d腍；個咖哩好香，配熱辣辣薄餅食到停唔到口！…Read More

要在粉嶺找一間咖啡店真不容易，星期日在聯和墟路經這間咖啡店，下午茶時間又有點餓，於是入內一試。餐牌是人手製作的，看得出花了心機，看圖文都覺得賞心悅目。店內有很多特色咖啡(特調)，好吸引！點了一杯"小熊維尼"，是一杯苦咖啡，在杯邊加了焦糖，冰冰的、酸酸甜甜，很特別呢，合我口味！另外點了焗大蘑菇，蕃茄煙肉和吞拿魚，好多汁，充滿芝士香，兩件好夠飽。連鎖咖啡店當道，很開心聯和墟有間咖啡食物質素俱佳，舒適又有人情味的Bittersweet。…Read More

估唔到六點多點都要等位……不過都係等左20分鐘。其實主要係想打邊爐，不過又心思思想食燒鵝，所以叫了一份例牌。熱辣辣、脆卜卜，肉嫩又juicy，不愧為招牌菜，未食過真係要試下。打邊爐點少得肥牛，呢度肥牛好新鮮，一點都唔韌，肥同肉分佈均勻，意外之料的好食。另外叫左個海鮮盤，見到個幾隻結冰蠔，本來唔係好開胃，不過佢既螺片、蚌、魷魚同帶子，又幾好味，出面一份蚌都6,70蚊，呢度一大盤先148，十分抵食。其餘仲叫左丸類、蘿蔔、粟米、鮮竹卷咁，都唔差，只係無咩特別。湯底叫了豬骨湯，個湯又幾好味，有人係咁飲湯，同埋真係有舊大豬骨。三個人埋單先430左右，真心抵食，唔怪得咁早就有人擔櫈仔、霸頭位。推介~…Read More