Faye_wong's Profile

佢哋嘅湯頭有皇湯,牛骨湯，高湯又有分原味高湯，蕃茄高湯同豬膶高湯，素食有海帶湯 。面有兩種陽春麵同埋扁陽春麵 。我叫左海龍皇湯$140，裏面有蟹肉魷魚帶子蠔同海蝦，配料非常豐富 。湯麵洋溢着一層薄薄蝦油，湯頭香而不腥，飲得出有濃郁嘅蝦味，冇海三碗咁濃但飲落去係舒服 。佢呢個湯頭絕對係誠意之作 。不過如果湯頭整體程度係好湯好麵同海三碗嘅中間或其偏向海三碗，應該會更岩我口味 。如果陽春麵伊麵嚟講，好似伊麵更加襯呢個湯底。另一可惜嘅係裏面嘅魷魚同蝦都煮得熟咗少少，唔夠彈牙。另外，仲有叫到上湯津白同埋醋海蜇頭，呢兩款菜都不錯。喺銅鑼灣絕對可以賣得起呢個價錢，而且仲會有好多人食 。相反呢個價錢喺銅鑼灣都有好多選擇。希望你地keep住水準，繼續俾驚喜我地啲消費者 。有機會我都會繼續支持小店同埋試埋佢地其他湯頭 。最後值得一讚嘅係姐姐都好好服務，殷勤咁斟水，可能個杯有啲細飲兩啖就冇 。…Read More

第一次嚟就係食咗佢$83嘅豚骨原味湯底拉麵，最基本就算唔好食都應該唔會難食掛 。麵條係我鍾意既幼麵，有筍，味道唔錯，兩塊叉燒有輕輕燒過同半隻流心蛋，兩樣都ok. 論湯底味道，佢只可以說一般般，冇乜味 。所有嘢加埋，就變得好一般 。我寧願搭過十令分鐘既車去返啲我覺得好既拉麵舖食 。始終我對拉麵都有一定嘅要求。驚喜嘅係佢有係限量醃左少少辣既芽菜提供。下午茶時段2:00至5:59 佢哋有八五折優惠 。如果依個優惠做全日的話，我就覺得差唔多 。另外，加多$10可以配餃子或者章魚燒再加多一罐罐裝飲品。我加咗$10配餃子，有兩隻。睇返舊時啲食評，似乎我要加12蚊轉濃湯湯底 。或者比$138貝汁雞豚清湯拉麵⋯好老實說，當一啲好出名嘅拉麵舖都係賣八十零蚊碗既時候 。而佢八十幾至一百三十幾不等 。人流多少唔多唔少都跟味道或定價成正比 。小店嚟講，確實要支持 。希望餐廳可以好好咁諗下點樣係深水埗進步同埋生存 。星期一中午12:45，餐廳裏面只有一個食客，中間嚟多一個 。由我開始食到走，總共只有三個人 。我想我食了大概15至20分鐘，臨走嘅時候，有多3個人入嚟 。深水埗確實係一個平民嘅區，尤其老人家特別多（雖然全港都係🤣），最平$83一碗麵老一輩既未必會肯捨得食 。而且舖頭兩旁有兩餸飯三餸飯，粥舖，魚蛋粉等等更經濟嘅選擇 。…Read More

唔係好明點解咁多食評/社交媒體網站都咁讚呢一間雞湯米線 。講到湯底好入味，雞肉又鮮嫩 。以下為我親身試左兩次嘅體驗。第一次我試咗招牌花膠米線，湯底唔算濃味，而且雞都普普通通 ，唔算得上係滑 。食完之後其實冇再特別諗起呢間餐廳，之後就算食都係去樓上果間食 。相隔咗一段時間，無意中喺社交媒體網站post見到d foodie評價呢間仲講到好好咁，所以我約左友人做完gym過嚟試多次，今次椰子雞米線，講返少少過嚟時候嘅經過 。我同朋友兩個大概8:30左右過到嚟，已經有六，七人以上排隊排隊 。咁啱我哋排到去嘅時候啱啱好佢哋截龍。大概10分鐘左右我哋被安排入座 。因為已經諗好食乜嘢，已經可以即刻落單。我同友人都係Order米線扣底，大概45分左右，米線到左 。今次個椰子湯都好失望，椰香係有不過湯底仍然淡口 。而且我同友人果兩碗米線係超多，感覺佢地煮剩而我地又係last order，所以無視我哋小米線嘅request將全部米線俾晒我哋 。雞方面同第一次一樣，都係鞋既，朋友果碗even佢比左幾舊髀既位置質地都唔見得係滑 。去到九點嘅時候有個姐姐行埋嚟同我哋講佢哋夠鐘要收舖，示意我哋好快啲埋單 。我哋由排隊到入座嘅時候都冇職員提醒我哋呢一樣嘢。再加上食物嘅質素不似預期人地評價，第二次嘅用餐體驗係非常之差 。觀塘呢個地方食嘢實在有太多選擇，想食同樣嘅種類亦都有 其他選擇，這一家不了 。…Read More

二撇雞光顧了好多次，亦都試過以下菜式 。花膠雞，黃酒藥膳雞同埋胡椒濃湯雞都係穩陣之選，絕對唔會令你失望 。黃酒藥膳雞同胡椒濃湯雞佢哋啲雞已經放喺湯裏面。不過花膠雞濃湯啲雞係另外分碟上 。放湯嘅雞同分開上嘅雞嘅質地都唔同 。我比較喜歡另外上嘅雞，似食緊海南雞咁滑嫩 。今次想推介一下吊你癮小鍋，佢裏便嘅材料包括有放湯嘅雞，巨雲吞，蟹柳，酸菜，豆卜，魚角，冬菇 。非常非常多料！湯底酸辣得來唔似係坊間嘅酸辣米線嘅味 。味道雖然濃郁，但飲落好舒服，而且一啲都唔頸渴。上菜嘅時候湯底熱辣辣，由於湯底非常開胃唔經唔覺我可以食晒成碗米線 。佢哋米線嘅質地煙煙韌韌同坊間嘅米線都好唔同，冇咁粗，有啲似南記嗰種米線 。我非常喜歡 。如果食雞湯食得悶嘅非常推薦呢一個米線 。花膠雞濃湯，非常推薦黃酒藥膳雞，推薦胡椒濃湯雞，推薦鮮茄濃湯，茄湯味道普通，可以一試沙薑雞，沙薑比較鹹，麻麻吊你癮小窩，非常推薦佢話就話收九點，不過8:30都仲有人排隊 。我成日趕尾班車嚟食🤭，食到過左9點佢哋都冇話要趕人 。而且佢哋租埋隔離舖位，座位非常寬敞舒適 。…Read More

欖角冰梅骨正常味道冇乜特別，如果煮到啲肉同骨有焦香更好。招牌紅燒乳鴿王都係冇咩特別，無論喺生熟程度同調味方面都唔覺好好食 。有機會再介紹我覺得好食既燒乳餐廳比大家 。南乳炆齋菜煲鍾意食佢呢個南乳齋菜煲，味道唔會過濃過鹹 。配菜亦有好多，不過如果佢再多啲大白菜/旺菜就更好 。送飯一流 。脆皮雞（半隻）當晚最後半隻嘅脆皮雞俾我哋叫咗 。聽聞佢哋係用新鮮雞嚟去整。不過果日隻雞調味偏鹹。其實如果用新鮮雞去整個調味應該要輕手返少少，突顯返隻雞嘅鮮味。餐廳好似有兩層，我同朋友共3人坐咗喺一個卡位 。嗰個卡位似係兩人座，兩個人坐同一邊連個袋都唔知放係邊 。另外注意餐廳收10:00，個人認為比較適合家庭聚餐 。佢另外仲有啲六人餐八人餐提供，喺銅鑼灣灣仔呢啲套餐價錢都確實無可厚非。下次如果家庭聚餐都可以考慮一下～…Read More

一笑食堂搬舖之後光猛同闊落好多，佢可以單點或者預約omakase。今次試左單點，唔記得影低餐單，大致菜式名稱如下～沖繩苦瓜炒蛋海膽手卷，吞拿魚蓉手卷七味烤魷魚關東煮味醂魚乾紅酒煎鴨腿甲羅燒配法包燒魚（唔記得咩品種）金桔檸茶，日本既桔仔雖然第一次嚟，老闆同員工都好親切。好似返到自己個飯堂咁 。我見好多食客都呢度既員工有講有笑，應該都係街坊比較多 。食物除左本身味道外，人物氣氛都好重要。呢度既食物唔係驚為天人，但係度食都好開心 。值得一讚係吞拿魚蓉手卷，海膽手卷，沒有飯，紫菜夠脆，$45/款，海膽貨色唔錯，沒食到有腥味 。另外，店裡有生啤清酒賣，林林總總既清酒都係劃一價錢，當日我冇叫清酒不過印象中好似係百令二百蚊一枝720ml。同朋友開開心心咁坐左兩個多小時 。餐單肉類比例多 。希望老闆加多幾款蔬菜款既菜式 ，例如日式炒野菜，椰菜絲etc …Read More

我認知呢間餐廳應該係叠到好高既魚生丼開始，之後聽聞佢地又做過一排omakase。一直都係冇緣朝聖，原因係丼飯當時大熱要排隊，omakase只有一個小時用餐時間，我對於排隊既餐廳還可以，但不一定要食 。不過對限時既餐廳非常抗拒 。中午返工食lunch時候被茶餐廳趕走都算 。連夜晚都限時嘅話，我就覺得太難過了。點解今次終於的起心肝試宗像屋 。原因係佢好似車仔麵配搭咁多嘅飯團吸引。🍙🍙暫時未有機會去日本試當地的 。佢應該都係香港第一家人去做呢個嘗試 。入到間餐廳原來係one man Bank 。接待，整嘢食，收錢都係同一個人。先唔講人手住 ，我同朋友每叫咗一個丼飯（竹）同埋兩個飯團share食 。師傅推介明太子魷魚同埋醬油蛋黃 。睇得出師傅好緊張整野食呢個過程，因為人手唔夠，同埋佢要確保食材即刻可以送到客人度 。確保紫菜要夠脆，飯也是有些溫度 。所以其他後面坐低未落單嘅客人都要等佢完成上一張order先至可以落單 。如果魚生丼同飯團比較，個人認為性價比飯團會比較高。正如我開頭所講佢哋有好多唔同配菜嘅配搭，好似車仔麵咁 。樣樣我都想試 。另外嗰個魚生飯係好食嘅，不過唔及飯團咁有玩味 。其實兩個飯團都係賣幾十蚊 。而且加多個湯就係一個set都係幾十蚊 ，咁又一餐 。但係賣一個魚生丼就要百令二百蚊。唔係好明呢間餐廳主理人會將呢兩樣野放係同一家餐廳賣，究竟佢係點定位？最後埋單嘅時候同咗師傅講咗兩句，佢話老細好似唔肯加人比佢 。佢自己一個做得辛苦 。係師傅問題定係老細問題？人手服務方面點解得一個人咁harsh? 呢間餐廳唔係食快餐喎 。睇返以前呢間餐廳都幾多人手而且又有日本師傅，現已風光不再 。究竟是誰捨棄誰？…Read More

第一次嚟食天星係食酸辣少辣，佢個酸好單調，感覺佢既酸係用左醋嚟佢吊起佢 。唔係好覺係酸菜，如果用酸菜好食好多 。朋友話佢嘅豬軟骨係全港最好食，我本身唔算meat lover, 食米線第一選擇都唔會係豬軟骨 。今次特登叫左豬軟骨嚟食，佢係好入味同淋，連軟骨都入晒味 ，又大份。係好食不過稍嫌調味過重。食多幾啖好膩 。第二次改食麻酸辣少辣，今次食完令我對佢地個湯底改觀 。麻同酸夾埋一齊食得好過癮 。建議大家可以叫蜂巢豆腐，連埋湯汁咁食超級好食。反而今次可能有麻辣，唔係好focus佢個酸 。所以麻酸辣比酸辣嘅湯底好食好多。第三次都係食返麻酸辣，不過今次個麻酸辣變左濃味重口味 。食到一半已經食不下去 。冇第二次一路食一路又麻又酸辣咁過癮 。總括嚟講，佢哋煮湯底嘅質素應該唔係好穩定。同一個湯底兩次食都有差，而且差距都幾遠 。舖頭比較長同窄，坐位來說唔算舒服同寬敞 。好食既酸辣/麻酸辣米線除左老闆娘真係只有老闆娘嗎？…Read More

龍如酒家係朋友介紹，山長水遠嚟到流浮山緊係食海鮮 。撇除海鮮嘅質素，其實海鮮新鮮就間間都好食，最主要係食佢哋師傅煮嘢食火喉同調味 。1）豉椒炒蜆唔記得係蜆定花甲，炒得好野味 。乾淨無沙 。2）龍如脆腩唔記得咗係咪呢個名不過朋友點名話要試佢哋嘅魚腩，我本身麻麻食魚，但係佢整得好香口，連骨都可以食埋 。3）薑蔥花蟹整體嚟講佢啲海鮮都好新鮮，唔係水蟹，啲肉都好實淨 。4）清蒸陳皮鮑魚唔係南非鮑，肉質都軟熟同滑 。5）椒鹽瀨尿蝦佢地加左大量洋蔥，又幾好食，調味又唔會過咸 。6）腐乳炒通菜，正常一個炒菜 。本身想點埋佢地豆腐滾湯，不過佢哋當日話豆腐變壞咗所以無緣佢地滾湯 。其實豆腐好容易係出面臨急買到，但係佢地都寧願唔做，相信佢哋對品質都抱有要求 。…Read More

來發係我近排最喜愛嘅打邊爐餐廳，原因好簡單，我俾嘅錢主要係花喺食物上面而唔係環境上面，咁當然餐廳嘅環境亦都坐得很舒服企理理乾乾淨淨 。而且又無限時任坐 。我食來食去都係佢哋嘅椰子雞煲，石橄欖雞煲，但係兩個雞煲都好好食，百食不厭 。睇得出佢哋啲雞係有精心挑選過，有雞味。雖然佢哋肉類方面唔係用啲好頂級嘅質素，但係套餐嚟講咁嘅價錢咁既質地已經好對得住我哋呢啲嘅消費者 。丸類同滑類都好出色，好食！我每次都會食佢哋嘅煲仔飯，唔算好有飯焦，飯粒分明醬油調味好 。今次叫咗個白鱔煲仔飯，臘味都好食 。有段小插曲就係有個姐姐喺我同朋友們食到差唔多嘅時候過嚟收嘢，佢由左邊枱執到右邊枱，我地筆左幾碗起泡既湯底 。唔知佢係咪嫌我地筆得太滿 ，佢一路執一路自言自語，因為佢唔係即刻收走，最後碗湯唔小心倒左啲係朋友旁 。其實我地都好直接，倒瀉左即刻處理左佢便好了，但佢又想解釋 。下次呢啲咁危險既野盡快執左佢就好了 。千祈唔好喺度冉冉洋洋。呢段小插曲並唔會對我哋有影響，下次都會再嚟幫襯 。希望食物質素繼續保持水準，而我又可以試更多唔同嘅湯底。…Read More

泓一同野見，上次試左泓一既雞白湯 。今次試試野見雞白湯 ，野見湯底冇泓一咁濃咁”傑”。湯底我會buy野見，而且我都好欣賞佢嘅配料雞胸肉同叉燒都好食同個湯好夾 。但係我果隻流心蛋不似預期，雖然佢未去到熟蛋黃但係啲蛋黃已經凝結，蛋白都偏熟咗 。佢地雞白湯配嘅麵條唔係普通既幼拉麵，唔知係咪混左啲小麥係裡面 。不過我食唔到麵既香味，麵條既質地偏爽，掛湯一般 。呢款麵條唔算係最佳配搭 。整體嚟講呢個拉麵都唔差，又有蔬菜我喜歡 。醬油配料方面佢地只有七味粉胡椒粉提供 。沒有醋，蒜，檸檬汁 。我係醋人，本身拉麵都比較滯，喜歡最後幾啖加幾滴醋解膩 。希望餐廳未來可以有醋/檸檬汁提供 。所以最後未有飲晒成個湯 。我個人很喜歡小店因容易同佢地交流食物上心得，好可惜今次我坐bar table但未有機會 。anyway, 比心機，你哋仲有進步既空間 。…Read More

今日經過尖沙咀嘅時候突然諗起之前好多人排隊嘅三碗面 。然後就走咗去韓國街嗰度睇一睇。果然，6點令鐘可能未有太多人收工，前面排着一對情侶而已 ，排左10至15分鐘左右就可以入去 。店裏便要等所有人食完先至開始入下一輪。一入到去舖頭嘅時候店舖裏便充斥着蝦味，腥味，海鮮味？老闆亦都集齊所有人嘅order，然後返去廚房開始煮麵 。大概等了五至10分鐘左右就已經有得食。第一次嚟，我點了一個海蝦濃湯Roast beef伊麵 。第一口先試湯頭，有千千萬萬隻蝦煮成 。大家想要濃味嘅蝦湯食呢一間唔會有錯。牛肉嘅做法佢哋係會薄切燒牛肉，然後再淋上一層油 ，似煙燻過，牛肉7成熟很滑好食 。不過龍蝦湯配牛肉我個人不會這樣配搭，但係餐牌只有這種沒有選擇 。因為牛肉本身有油浸住，所以牛肉食到最後都係有一堆油 。可以牛肉切薄了些又浸住層油，感覺油膩左少少，但牛肉咁樣做法我係欣賞的 。佢呢個蝦濃湯配伊麵嘅做法，令我諗起村爺爺 。但好可惜村爺爺呢幾年嘅質素開始下降，我已經冇再去食 。當年村爺爺嘅濃蝦湯湯頭冇佢咁濃，但係都好食。本身以為自己可以成個成碗麵嘅湯都可以飲晒，但係飲到一大半嘅時候我覺得有啲涸喉 。可能湯頭醇度太高，飲到一大半已經飲不下去了 ，很可惜 。呢間會有下一次，不過唔會點呢個濃蝦湯，下次會試去嘅金華火腿煲雞濃湯 。希望唔會濃到涸喉 。…Read More

6/10假期去食brunch, 一開始既starter 已經有5款 。1）吞拿魚他他，吞拿魚唔算係啲咩好驚艷嘅quality不過都算新鮮，份量慷慨又有生菜墊底。2）吞拿魚醬小牛肉，似係食緊三文治裏面嗰啲醬同埋塊肉咁 。調味不錯，所以配麵包係非常之夾。3）羅勒蕃茄焗蛋，有焗芝士鋪面 。而且裏面有三隻蛋，蛋黃係生嘅 。蕃茄醬嘅味道酸酸地很開胃 。不過呢個餸都係要配麵包食。就咁食好似淨係食緊蕃茄醬。唔係好明點解呢個餸會落三隻雞蛋，兩個人食覺得有少少Heavy 。4）番紅花忌廉煮青口，個人唔係太鍾意熟咗嘅青口 。反而我比較鍾意喺啲大型嘅超級市場出售嘅生青口。所以呢個菜對我來說中規中矩。佢啲汁又係可以配麵包食。5) 巴拿馬火腿多士，又係多士?!!!! 可唔可以係巴拿馬火腿配蜜瓜，清爽啲 。Starter 嚟講，有三款菜式嘅Source都可以用嚟點麵包，我覺得overlap左同埋食麵包未到意粉都飽左啦 。希望餐廳見到可以執下果四款starter之後可以嗌兩個意粉，聽閒佢地意粉係自家製，quality 有保證 。我哋叫咗一個慢煮牛面頰寬帶麵同埋加左$20叫咗個忌廉龍蝦扁麵 。意粉嚟講寬帶麵比較好，扁麵食落有啲聲音，口感唔太好 。不過扁麵掛汁一流 。忌廉龍蝦比較濃味 。牛面頰肉味濃而且軟熟 。各有各好。最後仲有Tiramisu同埋紅莓醬奶凍 。飽到上心口都係$268/人 。總括來說呢個brunch 性價比好高！最重要係可以同朋友坐低慢慢食同傾計，無時間限制 。 …Read More

假期前一晚8點令，本身想食後面街既餃子。不過經過幾次都幾得佢賣相都好吸引。於是試下去睇下使唔使排隊等位啦。堂食既人都多，幸好仲有兩三張二人枱未full, 可以直入點餐坐底認真睇下食咩，餐牌選擇有主食同埋啲少食。選擇唔多，但相信會更加專注食物質素。落單點左一個signature 808 rice bowl 同埋一個黃金蟹卷。再加多一杯椰青水。首先黎左個少食，發現貨不對辦，因為個炸卷包住條蝦。即刻問一問店員會唔會上錯菜。點知店員話蟹卷既蟹已經轉左蝦多時。店員係講單既時候並沒有提醒。他也很有禮貌地提議如果唔岩食可以換。既然都煮咗出黎，我就照試試蝦卷。如果以$68來說有6條分量也ok, 不過師傅沒有等炸油隔好就上碟。碟底留下了很多油。蝦卷包住一條蝦連埋啲蘿蔔絲，再配沙律醬。但是蝦既size 比甜蝦還要瘦。食完這個卷不會覺得難食但也不是很wow 的感覺。輪到個rice bowl 賣相很吸引，切粒既salmon tuna 配上大粒枝豆，沙律菜也很新鮮爽脆，配上wasabi yogurt, topping 有魚子。食落個配搭都很不錯。啲刺生算係規規矩矩。不過唔知係味個壽司飯配左醬，食多幾啖有啲膩。兩個人都食唔晒一碗飯。最後杯椰青水都係正正常常。唔會係九龍城新鮮既椰青水。$38來說就唔值。反而見到隔離枱飲緊紅肉火龍果汁同蔬菜汁，都係一樣價錢。不過應該試過一次就好了，口味不是太岩我…Read More

之前有人介紹左佢地既早餐，我都好鐘意佢地啲早餐，特別係果個蕃茄湯底，食得出佢個湯底係用心制作，唔係果啲好假蕃茄味。平時幫襯開佢地早餐，下午茶，今次就試下佢地既午餐。梅菜扣肉同牛三寶河。佢個梅菜扣肉唔會好油，扣肉都唔算好肥。食左都唔覺好有罪惡感。梅菜好清甜，好好食！扣肉都好淋好入味！平時唔鐘意食碟頭飯既我，竟然成碟食晒！$45送烚菜一碟，物超所值。朋友食嘅牛三寶河，分別有牛腩、牛筋、牛肚。整體嘅味道都唔錯，全部都好有味，湯底唔會太濃味。唯獨是河粉比較厚身，我比較喜歡薄身滑溜溜既質地。連凍飲好似$5x. 我最支持小店，呢間小店啲老闆又好人，又接受改變，肯諗啲新嘢出嚟。日後都會多多幫襯！…Read More