apwvsxrwx2bn's Profile

$58 酸菜魚片濃湯鍋米線魚片算滑，份量都算多，個湯底夠酸夠辣，好過癮，米線索晒啲湯汁好正，價錢來講，性價比幾高。$68 招牌花膠濃湯鍋米線個湯真係幾濃郁，飲落足料熬，鍾意養生嘅可以試下。$28 脆辣雞髀菇即叫即炸，熱辣辣好脆口，灑咗啲辣粉好惹味，送米線一流，抵！$17 招牌奶茶茶味夠濃，奶滑程度合格，同連鎖店嘅有得fight。$15 羅漢果菊花茶唔會太甜，清清地幾潤喉，食完濃味米線飲返杯，即刻順喉晒。總評：平民米線店之選，酸菜魚同雞髀菇必點！價錢合理，味道穩陣，係唔想煮飯嘅好選擇🤓…Read More

自家製生牛肉他他估唔到牛肉他他可以整得咁好食！牛肉剁得夠碎，口感好鮮好豐富，調味啱啱好，唔會太鹹，食落好fresh，鹹鮮味同牛肉好夾。三文魚子配原隻磯煮飽魚沙律原隻飽魚煮得淋得嚟又彈牙，磯煮做法好入味，沙律菜新鮮爽脆，撈埋個醬汁好開胃，三文魚子落得唔吝嗇，每啖都有爆漿感覺，個配搭幾有驚喜。牛肝菌野菌忌廉湯 vs 龍蝦濃湯兩款湯都咁正點！菌湯香濃順滑，飲到好濃郁嘅蘑菇香味，口感粒粒啖啖蘑菇，龍蝦湯就更霸氣，真係成隻龍蝦嘅精華所在，飲落仲有啲蝦肉碎，如果硬要揀，我個人鐘意龍蝦湯多啲，因為個鮮味真係冇得頂。自家製牛骨髓牛油包熱辣辣嘅麵包搽上牛骨髓牛油，邪惡到極點！個包外脆內軟，牛骨髓牛油香到不得了。忍唔住encore多件，減肥？聽日先算啦！黑松露鵝肝威靈頓牛柳今晚嘅重頭戲！牛肉生熟程度啱啱好，粉紅色嘅肉心好嫩滑，最愛鵝肝嘅油香同黑松露嘅香氣完全滲入咗牛肉度，外面層酥皮又夠脆，真係值回票價。西班牙谷子黑毛豬鞍配蘋果莎莎豬鞍扒煎得恰到好處，肉質Juicy唔會乾柴，個蘋果莎莎好醒胃，清甜嘅果味同豬肉出奇地夾，平時好少讚豬肉好食，但呢個真係有驚喜。比利時朱古力心太軟切開佢真係有流心效果，濃郁嘅朱古力漿湧出嚟，朱古力味夠濃但唔會太甜，完美作結。士多啤梨梳打 & 白桃梳打兩杯梳打都咁好飲！士多啤梨味香甜，白桃味清新，氣泡夠足好解膩，食完濃味嘢飲返啖，即刻清爽晒。要特別讚服務非常好👍🏻要特別讚下啲侍應，態度友善又細心，成日主動斟水同換碟，介紹菜式都好詳細，加一服務費比得心甘情願！總括：由頭盤到甜品都冇甩轆，食材質素高又煮得有心思，威靈頓牛柳同個牛骨髓包真係必點，絕對會再encore！價錢算好合理，質素同服務都對得住個價錢，值得推薦！…Read More

無花果鵝肝多士件鵝肝煎得幾靚，外面脆口，裡面好似軟滑嘅Cream咁，一入口就化咗，個無花果醬甜甜地，夾埋一齊食可以減低啲油膩感。塊多士夠脆，整體嚟講係好食嘅，不過一個人食一件就夠喇，食多件可能會滯蜜汁燒焗花雕醉香雞呢隻雞真係正，一拎出嚟已經聞到好香嘅花雕酒味。塊雞皮燒到甜甜地脆卜卜，有啲似食緊蜜汁叉燒嗰種感覺，啲肉又夠滑，仲有陣陣酒香，食落好唔錯。係成晚最驚喜嘅一道餸龍蝦汁蟹肉扁意粉個意粉嘅龍蝦汁都幾濃味，每條意粉都掛滿晒啲汁，食落去係好鮮味嘅。蟹肉份量都算足料，唔係得個樣。不過食得多呢，可能會覺得個味有啲單一，有啲漏牛脷串串牛脷係厚切嘅，咬落去超淋滑，一啲都唔韌，仲有好香嘅炭燒味，簡單落啲鹽同黑椒已經好好食，係水準以上嘅燒串蝶豆花柚子梳打 & 荔枝梳打兩杯嘢飲個樣都好靚，好適合相機食先。蝶豆花柚子梳打飲落好清新，酸酸甜甜好解膩，荔枝梳打就有好香嘅荔枝味，唔會太假，食完啲濃味嘢飲返杯就啱晒呢間餐廳冇伏，整體味道都交足功課，尤其係隻醉香雞同牛脷串，會為咗佢哋再嚟幫襯，價錢算係中上，適合同班Friend或者紀念日嚟食餐好嘅，仲可以帶埋寵物…Read More

花雕藥膳雞煲（半隻）$168雞肉新鮮嫩口彈牙，湯底入味滋補，醬油費$8/位，十優狀丸$108每款海鮮丸2粒，共10粒，有部分係手打，牛舌芯$118賣相唯美，肉色新鮮，口感彈牙，強烈推薦，牛胸爽$98 必試！形狀均稱，多汁同時口感不油膩，爽口彈牙，鴨血$59大大舊，新鮮帶有少許會愛上嘅鴨穌味，什茹籃$70擺設好靚好卡通，茹味濃郁滋補，服務費10%店鋪環境好chill好骨子☺️店員服務周到講解詳細，埋單都係$701…Read More

呢間韓國刀削麵，最吸引亦係最特別嘅就係佢個水冷麵，我平時食飯嘅喜好習慣同其他人有啲唔同，就係中意正餐同水果一齊食，佢碗水冷麵完全滿足到我，首先我中意酸酸尾尾嘅味，最堅嘅係佢碗麵有埋冰粒，啲冰粒都算好大粒，食落好有質感，而且佢碗麵有埋鮮蘋果，勁愛上，啲麵係蒟蒻蕎麥麵，食落毫無壓力。之後要講嘅就係佢個牛骨湯刀削面，首先佢個湯好有骨味，超濃味，啲手工麵好彈牙，口入面都感覺到啲線條，同埋佢啲蒜係勁唔慳咁落，所以成碗都好入味。至於佢個薄餅，脆得黎係適度痴牙gel口，好有層次，基本上如果平常午餐可以就咁當一餐果種，而且好有家常便飯嘅熱度，新鮮滾熱辣出黎，而2杯野飲味道似小朋友中意飲果種水果飲料嘅味。好味到清哂全部一件不漏…Read More

🍵滋潤養生茶$40原隻雪梨超足料，仲配其他養生材料，唔會太甜，直情係原汁原味，滋潤養生🧋A8野蠻奶奶$40奶味超重，底層有紅豆，好似特色紅豆冰咁鎮江餚肉(牛)$88食落好有鮮味，水晶部份水感岩岩好而且入哂味，自己食多盤都唔漏一家蔥油白切雞$138超多料，肉質非常新鮮新甜，食落唔痴牙好滑，蔥味愛好者必吃，個湯差啲想飲埋極品蜜汁金華火腿$188肉質表層閃亮度剛剛好，味道甜帶咸，個包蒸到好鬆軟，配有桂花味蜜一齊食海鮮全家福水餃$88每一粒塊皮都係用唔同海鮮食材做，手工感極強，沾蒜醋食，地道感好濃炸芝麻團$49絕對係細緻脆，入面係芝麻流心，好gel口好好食，幾飽都食得哂就知咩料另外餐廳服務都好熱情細心，感覺親切同有人情味，係額外加分項🫶🏻中意食野配中式靚碗碟嘅朋友都可以去試💕呢間餐廳少油少鹽少糖，食落零壓力😍…Read More

呢間係香港第一間韓式炸雞店，因為小妹唔點食炸野，但係比佢個韓式魚子湯強烈吸引左，魚子狂熱者必試，佢個湯雖然係有啲辣，但因為料足，加埋其他配菜，總體個口感係就算辣你都會不由自主一啖接一啖咁食，佢個辣味冇乜甜味，好似泡菜濃湯果種乾辣味咁，鹹鹹地。第二個菜式就係韓式菜包肉，呢個菜係白灼，個軟度灼得好軟糯，林林地好有咬口，因為佢塊肉肥肉部位又好彈牙，肉質位置又岩岩好暖暖地咁，本身都幾飽但你會清得哂成盤，佢有幾個汁沾黎食，全部輪流換住食都好上癮，同埋因為小妹唔點食澱粉野，呢個菜式有營養得黎好食又有益，絕對可以當正餐冇壓力。最後佢本身有自家醃製蘿蔔，又係好出色，強烈推薦！…Read More

因為我係唔點食澱粉同炸野嘅人，雖然冇試炸雞，但比佢個韓式魚子湯吸引左，呢個湯岩哂中意食魚子嘅人，仲有好多芽菜索哂啲湯一齊食，有少許辣，平時食唔到辣嘅我都易入口同接受，主要系溫度配搭所有材料就算好熱，都忍唔住想一啖接一啖咁食🥵另外韓式菜包肉，呢個有2款汁可以一齊沾黎食，白菜系煮到軟度岩岩好唔太林，包住蒜頭連肉食，刷新左我對”生菜包”嘅味道與口感體驗🥰同埋個餐廳總體裝修地道，算衛生，有鐘仔呼叫服務，都人性化，紙巾盒係痴喺牆到撕落黎用，超方便加分。…Read More

睇到佢個話梅蕃茄就好想試，一試不能回頭，搞到唔中意食蕃茄嘅人都愛上食蕃茄，佢係冰鎮嘅，兩樣配搭簡直係絕配，佢蕃茄仔咬落去喺個口度爆汁，口感已經好得意，酸酸鹹鹹甜甜咁，我之後一經過應該會例點，另外佢個酒醉鮑魚，酒同鮑魚味嘅配搭令你唔識飽，啲味整得好有層次，口感爽靭又滑，然後就係佢個瑤柱雞湯翅，百幾蚊嚟講都算合理，佢本身加$10有埋白飯，不過我唔食飯，所以冇加，味道就係翅湯嘅味，魚翅料係原條一舊仔掉落去，都有4-5滿匙仔嘅量，最後就係佢個木瓜雪蛤膏，雪蛤膏放到個木瓜中間滿晒，有凍熱揀，不過雪蛤膏嘅味單食就比較淡，一定要連埋木瓜啲肉一齊食就甜少少，食落就係原汁原味嘅感覺，清清甜甜，十分推介。不過佢夜晚比較多人，我見到坐滿晒，晏晝反而唔使點等，一入去就有位，因為佢位唔多，所以大家請自行抽時間去試。…Read More

呢間餐廳一入到去，就已經好似去左東南亞旅行咁，好有風味同風情，我個人認為佢嘅飲品做得好有特色，我叫果杯係coconut做底，但飲落有啲甜同辣，好得意，之後係佢啲印度薄餅做得好鬆軟，佢個柚子蝦沙律食落好清甜同清新，酸酸地幾爽。食食下又忍唔住叫左佢個招牌特色熱奶茶，仲正！有啲似泰式奶茶嘅味道，但有自家特色野，我好中意有自家秘制味道嘅感覺，所以淨係野飲都帶到好多新靈感同味蕾沖擊，中意新鮮感嘅人應該會愛上呢種感覺，最後叫左佢個煎魚試，雖然我覺得係幾好味，脆得黎好林嘅做法，不過始終有骨我唔中意，但主角一定唔係條魚囉哈哈。…Read More

講下個服務先，服務員會好自覺幫你加水，而且感覺好有人情味，有枱咁岩生日，老闆親自棒生日蛋糕仲唱生日歌，呢點令人留低深刻印象。接落黎就要講下啲食物，首先係個粟米湯，應該係自家製，平時一般餐廳好罐頭味，但呢間冇味精味，一定係冇咁濃味，但絕對係原汁粟米味，之後呢間嘅牛肉質感整得好鮮，無論係刺身定係牛扒，肉質都係好咬同易軟化果隻，味道亦係中上級數，佢唔係濃烈重口味果啲，但食落你會覺得 ohh nice果種，值得一試，另外個芝士薯容係直接清盤，佢嘅creamy程度同濃香會令你不自覺地食完一啖又一啖，非常推薦！…Read More

呢間係位於迪士尼入面嘅bakery，姐係你要買左票入到去先食到嘅，喺迪士尼一入去果條大路大街，先講下佢嘅賣點，當然就係裝橫同精品主題野啦，迪士尼fans一定會幫襯嘅甜圈，因為佢大部份嘅donuts都係迪士尼卡通人物嘅化身，有維尼熊，米奇老鼠，其他小眾少少都有，因為我唔係超級fans，所以都講唔出啲名，不過一家人或者一班friends去影吓相打吓卡又真係幾有氣氛，佢個背景同周圍嘅氛圍燈光，基本上隨便影都係靚，不過啲donuts真係食感覺，因為我係食唔哂一整個，太漏，中意食甜嘅可以食得哂，但一定要飲野，可惜冇熱茶，得啲梳打汽水之類，有啲又好搶手賣晒，所以食完一個donuts真係玩幾個鐘都唔想食嘢。…Read More

見諒因為冬天夜晚好凍，之後一入去坐低點左個湯之後停唔到，全部食到最後一件先醒起影相，講下佢啲燉湯先，其實我夜晚如果想食得健康啲，尤其係宵夜，我一定係去呢間，因為主題比較健康，又係飲茶，通頂都冇咁大壓力，佢啲茶都好有回甘味，至於佢嘅燉湯算足料，入味但飲唔到味精味，每盅湯都佔左一半係材料，感覺幾好，佢個流沙包都好出色，流出黎嘅奶黃食落係做到有沙粒嘅口感，但我最中意食係佢個紅棗糕，好煙靭同埋又唔會太死甜，蒸得好好食，推得推介。…Read More

佢主要係類似室內大排檔嘅裝修，行起上嚟都唔多方便，地下階磚勁滑果啲，個廁所肥少少都應該出入有困難，如果環境衛生同設計再好啲，應該評分可以再高啲。咁多道菜，個人認為最出色係椒鹽粟米，薯仔炒牛柳粒，同埋佢個燒鵝，個粟米整得幾特別，甜得黎又有少少椒鹽嘅鹹，唔難處理，佢個乾度同硬度咁岩食落唔易痴牙，至於個薯仔炒牛柳粒好入面，如果唔係一枱人一齊食飯，呢道餸可以自己一個食哂，最後係佢個燒鵝，佢個盛器下面會放一個蠟燭仔，好少大排檔會咁上，個皮好脆，啲肉好嫩，成為全枱被熱烈討論嘅餸，推介。…Read More

佢嘅套餐好適合啲團年飯，冬至，有老人家但唔想喺屋企煮就落街食嘅酒樓，個服務都係比較casual，叫啲姐姐比多壼茶都係溝通混亂嘅style，主打街坊生意。講返佢啲餸，街坊生意黎講，佢嘅味道係算抵食夾量多，一定夠一家四口食果種，晚市酒樓套餐黎講都係平時果啲酒樓野，佢個菠蘿咕嚕肉係幾出色，食落去夠熱，皮夠脆，肉感算彈，有啲食落好粉，佢唔係，所以都覺得幾nice，炸蝦球都好食，佢大部粉啲餸嘅肉質都算彈口，不過我就唔係太中意平均每個餸啲汁太結，應該係hin粉落太多，除左呢樣野扣分，總體都ok。…Read More