kimada的個人專頁

去開奧海城睇戲，夜晚就順便在商場搵間嘢食，去到朋友說好吃的「一風堂」試試。環境係幾舒服的，我哋被安排坐喺卡位，一邊有梳化，坐外面的櫈底有個籐籃可以用嚟放袋。侍應見到我哋有小朋友就俾咗兩張餐紙同顏色筆，可以在餐紙上油下顏色同玩吓連結遊戲。我哋叫咗兩個兒童餐同埋兩碗拉麵。先講兒童餐，大家要留意，我哋5:30入座，叫咗之後食食下，見隔離枱又想嗌，但侍應已經話賣哂，當時我估6:30都未到。我哋叫咗其中2款(因為第3款已經賣哂)，角包定食($48)，拉麵定食($52) 如果要加支野菜飲品，就要加$10。角包定食幾得意，係隻雞的造型，小朋友見到都開心。個包係饅頭包，仲要再軟D，夾住平時食拉麵個塊叉燒，又幾夾好好食，塊叉燒好Juicy，肉汁索哂入包，真係好好味。不過我唔鍾意佢兒童餐其他配搭，薯條好油好林，連小朋友都唔想食(最真實的評價)其他嘢都好似單薄咗少少，半邊粟米、薯蓉、蛋糕，好奇怪的配搭。呢個$35的熱推 中津監修唐揚雞，係熱辣辣雞肉都OK滑，不過唔入味，同埋得4件....性價比極低，平均一件要$8.5，太貴了吧!餃子賣相OK($40有6件)，不過好細粒，同埋個皮底唔脆，都係林!!因為有小朋友關係，我哋都冇叫黑丸同辛丸，只可以叫特製白丸($88)同埋一碗濃厚豚肉拉麵($80)味道超普通，又唔可以叫好味，又唔可以話難食，屬正常，但係我只覺得值$50-$55，唔知係咪真係連鎖就一定會品質下降呢?!…查看更多

上op搵到一間餐廳個名同我個女英文名一樣，所以就想去試吓，順便話俾呀女知餐廳名同佢一樣。睇餐牌見價錢都唔算平，所以就試下叫咗個二人餐，先來個粟米湯，但係我唔鍾意冇咬口的，粟米都煮到溶哂，而且感覺有少少水，唔夠「傑」，不過可能真係想煮做湯，只係個人口味唔係咁鍾意。烤餅就幾好食，而且賣相都好好睇，感覺就係有調味，我哋爭住食，如果可以多幾塊就好。這個日本帶子黑松露什菌意大利飯都一般般，不過不失，食落去feel到重黑松露味，但係帶子太少，不過正體是可以的，只係覺得不配這個貴價錢。($145)我呢個扒王去到西餐廳都會想試下佢塊安格斯肉眼扒，我叫咗5成熟，血色正常，不過有少少腥味(我食過D即使係5成熟但係都好juicy肉味冇腥味)。而且塊扒有1/3係肥囉，感覺好似食少咗咁，如果散叫都要$278，我覺得同等價錢可以食更好味。最後甜品係紅莓啫喱，不過我都係鍾意食番正常味道多D...…查看更多

同一個朋友兩家人去佢屋企和富對面的新店試試看。本身都唔知係食咩菜，只係大約知道係食西餐。不過門面見到咁多德國籏先知係食德國菜。店內環境都唔算太黑，因為我個人好怕去一D餐廳好黑好暗。先嚟呢碟63度溫泉蛋伴黑松露卡邦尼伴青口 $138，青口我就麻麻地，個卡邦尼意粉都不錯，不過太creamy，打散埋個溫香蛋撈埋落去，就更加「傑」好正常的煙三文魚沙律大蝦意粉爽番少少，我覺得好食D香煎牛油扇貝配海鮮龍蝦汁意大利飯 $152 好食係好食，但一上枱見到就知唔夠食，對我嚟講真係兩啖可以食哂貝殻上的飯，哈哈～ 扇貝7成熟係幾好食最後上枱當然係德國豬手老實講，唔夠新界嗰間德國餐廳好食，因為最講究真係個皮，食落唔脆就真係可以打交叉，其實我唔知佢係咪因為見我有小朋友所以碎上，因為我期望係原隻上，如果真係咁細心，下次最好問一問先！整體嚟講每樣嘢都有少少失望，當然佢如果價錢平拉番勻就OK，但係4大4小都食咗$820，我就覺得質素唔達標lu...…查看更多

呢日打算同屋企一齊去打邊爐，但係諗到有小朋友，一來怕佢哋走嚟走去會危險，二來一打打幾粒鐘，都怕佢哋唔會坐得定。今次好豪咁試一次邊爐外賣直送，Order咗酒窩的四人餐再加多個海鮮盤。上網訂好方便，仲可以額外按金租埋個爐同個煲，因為佢係4款混合湯底，所以一於租埋佢個4格煲唔駛煩。速遞好準時就送到嚟，個外賣盒大到連個人都可以塞入去。一層一層打開由雪花和牛開始，每樣嘢一見到都非常震撼！因為個場面真係幾誇。海鮮拼盤睇落OK，食落仲OK，超新鮮！湯底全部密封包住，要剪開倒出嚟，有豬骨、沙嗲、麻辣同埋黑松露四款湯底。仲有幾款特色丸，好正係呢個企鵝造型(雖然有少少唔似，睇咗好耐先認得出)另外一樣最吸引係個調味料真係好似去咗酒家咁，有好多樣可以落，就連豉油麻醬都包埋，真係完全咩都唔駛買就可以打得。不過就有D貴，始終有品質保證，大時大節先試下都無妨啦！…查看更多

成日經過的一間食店，睇個名都唔知原來係食西餐。我哋叫咗個2人餐，前菜同忌廉湯都幾特別，忌廉湯係紫色，估到就係紫薯做的，飲落真係有陣紫薯味。煙牛肉什菜沙律都好正。香草羅勒醬大蝦燴意粉真係超正，有兩隻冇殻一隻最大的連殻燒，真係幾特別的設計。意粉份量不少適中，足夠一大人飽肚。另外蜜糖黃金豬肋骨伴蛋包飯都不錯，睇個樣以為好un，但確實又OK林同入味，加上蜜糖好有BBQ感覺。我最後都叫多一份法式芝麻蝦多士，好多地方甚至坪洲話好出名的蝦多士都係不外如是。不過呢份蝦多士確定好味，有黑白芝麻配搭，非常香口，蝦滑彈牙。最後呢杯紅豆冰真係好有surprise好經典！因為真係名副其實的「冰」，有椰奶喺側面同埋個冰都係椰子冰，所以特別好食，不過如果當飲品又唔係好夠喉。價錢還算可接受，性價比OK！…查看更多

今日經過開天后，就遇見這家小店，一望上去就好似北京老街舊小店，只有老闆娘一個在店裏預備。叫"老Come"都真係幾攪笑煎餅有超多不同餡料不過第一次食還係揀番佢最招牌的北京烤鴨煎餅都有賣豆漿及其他飲品最有特色係小店內外隔着一塊玻璃，可以清楚睇見老闆娘親手煎餅整個過程2-3分鐘就攪掂，睇上去真係好好食而且仲覺得好大塊如果唔係好肚餓，份量都夠兩個人食熱辣辣咬落去，好香嘅蛋香味，裏面的烤鴨加埋佢特製海鮮醬，唔會太鹹不過我期待餅皮會有少少乾身同香脆，好似印尼薄餅嗰種口感，依家我就覺得太過林同濕。不過餡料有埋青瓜葱同埋最緊要一塊好似油炸鬼的薄脆，口感就真係幾豐富！…查看更多

今晚去咗間平時成日經過，但每次都唔記得咗去嘅地方。因為佢個位真係幾隔zip...不過又因為隔zip，所以先至環境僻靜，唔會好多人，基本上唔訂枱walkin都會有位。一個好傳統特色的泰菜餐廳，帶住兩個小朋友，逼於無奈都係食D好typical嘅菜式。不過又確實有D驚喜，雖然係耳熟能詳的 菠蘿炒飯、炒金邊粉、串燒同埋小食拼盤。但係全部味道都不普通，好食過自己原先想像。炒飯唔會因為吸哂D菠蘿汁攪到好濕，D飯粒仍然係好爽，仲有蝦真係好大隻，撈埋面上肉鬆同腰果一齊食，真係特別正。金邊粉好幼好滑，小朋友勁鍾意食，食到完全成餐都冇講過嘢同分心，好專心咁一直食到最後。小食拼盤好正唔係春卷，反而係平時最唔想食嘅煎魚肉同蝦餅(因為一食就會飽哂)D肉好明顯真係人手打過, 如果唔係冇可能咁彈，件件都好似有空氣喺裡面咁好脹好彈，食完一啖即刻想食第二啖。串燒都係超驚喜之作，因為不論牛豬雞，串串肉質都唔老，好有咬口，唔會燒到又燶又乾。最正係個串燒醬，有花生香﹐辣度適中。嘢食真係好OK，反而係飲品我覺得一般。紅豆冰只係feel到椰汁味，紅豆唔多，我個人鍾意大乍樂嗰種紅豆爛蓉蓉，唔鍾意一粒一粒感覺好生。菠蘿冰仲菠蘿味汔水多D，菠蘿肉唔多!不過整體還是OK，值得再來。BTW 冷氣真係超大，吹到D食物凍哂!…查看更多

呢日俾杯紅豆冰相吸引，就揀咗去呢間老鳳冰室食個brunch聽個名就知道玩懷舊，裝修沒特別，只係用裝飾物去補充懷舊的味道，如果冇哂D decoration就只係一家普通樣的茶餐廳，大概翻新唔想用太多錢去裝修吧，都好正常!不過始終都係食物最緊要餐牌幾得意，舊信封的設計我哋叫咗兩杯特飲，飛仔華田同埋紅豆冰，雖然個樣好懷舊，但係呢款杯其實變相裝得好少，上面一大舊Cream，其實真係成杯嘢飲唔多夠飲，極其量都係叫來打打咭，小朋友又鍾意個啤牌(張啤牌真係食得)之後叫咗佢當日的午餐set，這個豬扒烏冬一般般屬普通。餐前湯還可以，唔係100%罐頭湯，仲有D餅碎咬下懷舊嘢要食吓蝦多士，即叫即炸，算不錯，不過食落我覺得唔太夠嚼感，裏面的蝦膠真係有D膠另外叫咗個即焗肉醬意粉，即焗始終係好味D，熱辣辣又夠肉碎少油，整盤食哂!雖未算得上好好味，不過當作一個小下午茶也不錯。…查看更多

星期日嚟到深水埗B出口，就係公和隔離的一家新開拉麵店，前身就係一家正宗印度薄餅店。其實都開咗一段時間，不過遲遲都未有機會去試一次，因為每次去都見到有人龍。今日未六點就去到，點知都一樣係要排3-4張枱，唔算等咗好耐(15分鐘內)只係企喺街出面有D熱。入到去發現其中主廚係日本人，其他職員都係本地年青人，一睇餐牌款式不多，3款湯底配不同配料，有泡菜、紫菜粟米、多叉燒等。最正係可加麵底，可解決小朋友食唔哂的問題，而且設有兒童餐(不過我覺得貴過個大人拉麵就太過了，如果可以平番少少就好)兒童餐一出來就感覺超可愛，估唔到一家小小的拉麵店都有兒童餐，不過起初以為好少嘢，因為只見一個bearbear蓋着的碗。原來一層一層可以打開，由上而下有布丁、炸雞塊溫泉蛋等餸、最底層是拉麵，再加杯橙汁。大人就點了碗加了麵底的紫菜粟米叉燒拉麵(仲可以選擇走溫泉蛋就減$10)還點了支蜜瓜味汽水$20，味道還可以。再點一個極上叉燒拉麵，就是多幾倍叉燒。先講拉麵，真的超爽彈牙，麵條好分明，真係食完一啖立即想食下一啖。醬油味湯底不會過鹹，叉燒真係好軟身好滑，吸上湯汁吃更好味。溫泉蛋有炭燒香味(我都唔知真定假，但真係食入口就有種香味)食過咁多日本拉麵，感覺這家真係好好食，值得再去。…查看更多

今晚去荔枝角工業區那邊本打算食一家餐廳，點知星期日原來唔開門，行行下見隔離有間勁似拮嘢家同埋peppa晏的食店，見佢勁少人坐得C服又靜，就入去求其食吓。可能真係平日番工時間先多人，星期日晚嚟真係包場一樣。設有自助區自己斟水拎餐具等其實同連鎖式食店冇咩大分別，可能人少地方又闊落所以好自在咁點餐食嘢。樓面一個呀姐做哂執枱收錢一腳踢，態度雖然冇咩笑容同冇耐性，不過都係helpful嘅，會主動推介你食咩！牛肉鑊好多料，烏冬食得出似超巿放冰格嗰隻幾彈牙個特盛牛肉食超大碗，大過拮嘢家個特盛，夠兩個大人食加幾蚊又可以有菜俾小朋友食老實講冇誇張，嘢食唔會有驚喜，但係我覺得好食過拮嘢家喎！我見幾個comment又彈又話唔好食，其實幾廿蚊嘢食就用番性價比去計算吧，我已經覺得好合理。而且每套餐仲可以跟一個超平小食，即叫即炸架！個炸紫心蕃薯餅好好味呀！$3一件咋真係好抵食，我唔敢講一至五都有呢個質素，但係平日夜晚人少少可能㕑師都慢工出細貨，真心OK!…查看更多

實在太正啦! 一開始都按奈不住要讚咗先! 因為食物實在太好食，性價比極高!!位於馬灣的一家歐陸風餐廳，同職員傾計先知原來係由芬蘭人主理的餐廳。未入去餐廳，在餐廳外已經相當吸引，因為拖住兩件的我，餐廳外面已經係沙灘，我就知道今餐可以安安落落咁食!佢哋會提供一堆沙灘小玩意俾客人任玩，仲可以帶出去海灘玩。(忠告：還得到先好借)餐廳內在環境唔算好大，正常坐到十幾枱客仔，不過都足夠call成班一家大細朋友開Party，而且平日嚟個Feel更加正! 另外最正係大人坐喺裡面，可以放心望住外面小朋友玩沙情況先講大人嘢食，真係無得輸架。呢個頭盤蟹肉牛油果沙律，牛油果同蔬菜配上嚟好夾好好味。炸雞件一樣出色，好肯定裡面雞肉仲係Juicy，唔係好似人哋外面嗰D炸到D肉乾哂鞋哂軟芝士配埋個法式麵包，一脆一軟...(冇嘢講)Carbonara極好味，大廚仲同我講話呢隻意粉係好稀有，產量勁少，所以超高質。的確食落去好彈，Feel到呢個闊身意粉好新鮮。Pizza屬正常，雖冇驚喜但都好味。最後甜品都OK，我欣賞佢係按季節時段供應，可能下次嚟又第二樣嘢，務求按最高質水果去做時令甜品。最後不得不介紹兒童餐，我未見過我兩個小朋友可以風一樣快清哂，尤其係成日食剩嘢個妹，而且佢好有心思的有兒童餐具，唔係「依家+C」嗰D hea膠餐具喎，用矽膠製造真心係靚嘢! 又睇得又食得!好耐未食過咁高質的親子餐廳，讚!!!!…查看更多

尋日同老婆去到尖沙咀一家串燒專門店食嘢! 因為佢以前食過四川當地串燒，好懷念嗰陣味，又話香港都食唔番，我自己都覺得香港好多街邊檔整得好差，一係就燒到過咗火攪到D肉好UN，一係就D味普通到自己去BBQ都燒到。奇怪店名叫「肚餓了」但LOGO是隻鳥，咁點解唔索性用個「鳥」字? 哈~店內環境偏暗，地方不大，所有枱櫈都係高坐式。有餐紙自己用筆去揀食咩，如果唔知係點樣都仲有本餐牌可以有圖有真相。驚唔夠飽所以點咗好多樣!先嚟呢個「汁燒BB露筍 $39」真係SURPRISE，好爽之餘仲鎖仲好多水份喺裡面，一咬落去唔乾好Juicy好掂。然後再來「鹽燒牛舌 $59」我係牛舌精超鍾意食牛舌，佢仲要係厚切上，起初擔心會唔太熟或者UN，但係原來超林，一咬就有少少似和牛的溶化(當然未至於咁勁)，同樣唔乾好Juicy。你睇我咬一啖好清脆的切口，絕對冇誇張，唔駛扯唔駛撕肉質好林。「蒜蓉燒虎蝦 $59」同「「黃金醬虎蝦 $59」呢個我覺得有少少貴，蒜蓉OK，但黃金醬就唔夾，其實好似沙津醬咁，蓋過蝦本身的鮮甜嘥咗隻蝦!以下都屬於普通，都好味! 「燒雞軟骨串 $39」「芝士丸 $20」唔夠味可以自己再加辣粉、孜然粉等「安格斯牛柳粒 $79」「西班牙黑毛豬件 $69」好得，唔UN，好多肉汁，如果黑毛豬層次再分明D就更好!「勁辣跳舞雞翼 $30」食落酸酸甜甜，辣味之後先嚟，感覺好特別。最尾都一個驚喜，「棉花糖多士 $29」，加上朱古力醬，味道預期的好味(因為BBQ都試過)，不過佢燒得好食過我燒。店內仲有好多款手工啤酒供選擇，我揀咗呢支苦澀味冇咁重，反重果味好香好易入口，正! 「ALL DAY iPA $68」…查看更多

今日放工約咗老婆去Shopping，咁啱做緊Summer SALE，買完嘢就梗係搵下嘢食，但係又唔想行番出去口福街嗰邊咁遠，所以就睇下呢個商業中心有咩餐廳，我老婆超鍾意食印度薄餅，我哋見到一間印度餐廳就諗住試一試。其實本身在店外見到個樣咁，好似cheapcheap快餐店咁，但係唔想再周圍行，就諗住博一博...一行入去只係見到一枱係香港人，其他都係外國人同埋印度人...全部侍應都係印度人，感覺好地道好正宗。我哋首先叫咗個薄餅 Parotta，原來佢薄餅都分好多款，我哋就叫咗最Normal嗰隻配咖喱三角豆，塊餅超新鮮同埋應軟則軟，應脆則脆，點埋咖喱汁夾住嚟食啱啱好，唔會太辣，啱怕辣的老婆口味，佢超滿意。然後再叫咗個masala dosa(中文叫煎餅)，佢最有特色係有好多唔同醬料可以點。因為塊餅超薄，所以外面煎得好脆，切開裡面都係咖喱什菜什豆等，雖然冇肉，但係點埋醬汁食，其實真係好飽肚同埋好野味。之後真心覺得唔錯，所以叫多兩個小食 Pepper Vada and SamosaPepper Vada 我就覺得唔太啱我，食落去第一啖係幾得意，但係食落好乾，好似食緊麥餅咁。Samosa 咖喱角就同我哋平時食開好唔同，感覺似食炸油角，餡就似頭先煎餅既餡，都係什菜什豆等冇咩新意，似煎餅既Mini版不得不提就係呢度既飲品，非常Surprise我哋叫咗一杯薄荷橙同埋橙菠蘿汁首先佢唔係雪到冰一冰的果汁，感覺好Fresh好健康另外真係完全feel唔到溝水，同埋原來橙+薄荷都好好味，原來係呢度推介!…查看更多

今晚一家人破例地豪食和牛，因為小朋友考試將至，鼓勵一下他們。(其實自己想食甚麼理由也找到)因為自己都食過連鎖的「X角」，所以想到些樓上店試下，這家聲稱是100%日產和牛，主力「佐賀牛」及「飛驒牛」不過「飛驒」實在太貴，我還是先試試「佐賀牛」。今次揀選的部份有肉眼、牛肩及一般紅肉。這個厚切肉眼超吸引，紅肉與白色油花分布均勻，肉質好、味道濃郁。呢個牛肩的油花分布、肉的色澤及紋路，真係非常均勻，這就是傳說中的A5了，真係望見都覺得似藝術品唔捨得食。薄切佐賀牛紅肉，用嚟牛涮鍋也必定超好味。全部佐賀牛只是輕輕的調味，就已經很美味，口感柔軟。這佐賀牛肉眼，燒上來仍然很軟身，外觀跟普通牛肉已經很不同了。最震撼我係這A5佐賀牛肩肉，這個算是我吃過最美味的了。全部都超JUICY，幾粒鹽花已經帶出和牛肉香及超濃郁和牛鮮味，咬落去真係好似味王咁要大叫「好....好....味....呀」…查看更多

由生煎皇后主理的「麵館」，粉紅色霓紅燈超搶眼。除了主打食麵之外，還有多款點心小食，最特別係見到有多款平民飯類，希望下次有機會再試。新張期間還有九折優惠。有江若琳打正旗號的生招牌，必定吸引很多食客光顧。香橙豬脆骨湯麵 $55看上去跟豬軟骨沒甚麼分別，但它有很多爽口軟骨，難怪叫它做豬脆骨。鹽酥雞粒 ($30) 不算太貴，而且份量也適中。它不是很爽脆那種，亦不會只有粉沒有肉，椒鹽調味很想追着吃，感覺就是想配上杯大啤去吃。火焰芝士吉列豬扒湯麵 $48吉列豬扒不厚身，不重炸粉，感覺爽脆，肉質不乾。加上一塊焗香芝士，很濃郁的芝士味，令吉列豬扒更升華。來到鎮店之寶，五色水餃湯麵(轉烏冬+$5) $60大家最想知當然這五色餃是甚麼來頭。黑色 (墨魚汁) 不意外~ 但餡卻配上了黑松露。黃色 (蛋) 餡 (冬菇絲、木耳絲、荀絲) ~ 橙色 (紅菜頭) 餡 (蝦肉芝士)~ 喜歡重味的朋友，這個一定會愛上。綠色 (菠菜汁) 餡 (素菜、小棠菜、冬菇粒) ~ 必定想到是最素的一款水餃。白色 餡 (原味豬肉)~後來職員跟我們說鍋貼已售罄，我們改了要炸小饅頭，細細粒很可愛，炸得脆脆的，屬正常。但最值得一提的是這個放在枱上的調味，一個是特製菜脯，另一個是孜然辣醬，一聞到這陣味就想起四川傳統味道。…查看更多