hushush's Profile

買完花覺得有啲肚餓，見到呢間餐廳轉左招牌，好奇驅使我入去試吓。俾佢個醉翁便當吸引咗，因為咩都有啲（刺身🍣，天婦羅🍤鰻魚飯🍱，麵豉湯…）賣相好豐富、好吸引，望落去幾新鮮，點知食落去都係好新鮮！三文魚，帶子，甜蝦非常鮮甜；天婦羅熱辣辣好香脆，鰻魚飯望落去細細地，但係其實食晒都好飽。連個麵豉湯都材料十足，覺得好有心思。整體來講，新店舖嚟講食物質素都算幾好，環境舒服私隱度高，會想試埋佢嘅晚市，仲可以瘋狂飲酒。…Read More

去開花墟買花就黎試吓近期ig成日見到既awaitcafestudio，門口嘅白色牆好吸引，最鍾意簡簡單單白雪雪嘅感覺。入到去環境都好舒服，花草樹木有很療癒的感覺，叫咗個我最愛嘅All day breakfast，見佢啲配搭好得意有雞骨腸同埋玉子燒，好日式嘅感覺，仲有叫咗個青醬帶子巴馬火腿意粉，當然唔少得我最愛嘅焙茶latte la..果然過我哋冇令我失望，好豐富嘅感覺而且有別於平時既all day ，日式嘅嘢食好有新鮮感。個青醬意粉真係好出色，青醬嘅味道好濃郁而且意粉嘅軟硬度啱啱好，帶子可以再煎香少少😚。焙茶latte同綠茶latte 放埋一齊顏色好舒服，茶味都好香，佢哋係用日本嘅美好園，呢個位值得加分，同埋一啲都唔甜，最啱唔鍾意食咁甜嘅我。最後見到隔離枱食cake好吸引就叫咗個青檸芝士蛋糕試吓，食得出佢嘅cheese好滑，係高質嘅感覺，酸酸甜甜咁好開胃，同焙茶嘅味道好夾。整體來講，環境舒服有大自然嘅感覺，店員亦都好nice，食物唔單止樣靚而且質素都很好，會再嚟。…Read More

食飯時間同班同事經過海防道，就被大廈門口張all day breakfast 相吸引左，望望間餐廳名，叫「shhh cafe&studio」好似好得意又無見過咁，就決定上去試吓。聽返員工講原來係新開cafe黎，唔怪之得之前唔覺眼啦。我二話不說就叫咗個all day breakfast，Cafe員工介紹我試吓個shhh’s signature 飲品，好啦等我試吓啦！杯shhh’s signature 賣相真係好靚，面頭有層泡，飲落去好似生啤嘅感覺好得意，而且味道都好特別。原來佢係一個冷榨柚子嘅啡，味道好清新，唔會太甜又飲到好香濃嘅咖啡味，真係唔錯All day breakfast 都黎埋，賣相都真係好似張相咁吸引，煙三文魚同沙律都好新鮮。好欣賞佢條香腸同抄雜菇，我個人覺得食all day最重要係條香腸同菇😂，香腸味道好濃郁，唔單止聞落去好香口，外脆內彈牙嘅感覺，炒雜菇味道都好好，醬汁嘅味道好惹味又唔會搶咗左菇菌特殊嘅味道。我見其他同事嘅意粉同飯都好吸引，下次可以再嚟試過，仲有幾欣賞佢地嘅咖啡，除咗拉花唔同，咖啡師會因應唔同嘅飲品配上唔同嘅杯子，都真係幾有心思。除此之外，Cafe嘅環境好舒服，一路播住純音樂，對住九龍公園呢個靚景，仲有好多打卡位，每張枱都擺放左鮮花，周圍都放左唔同嘅植物，感覺好舒服好清新。經過大家一致同意，呢間Cafe會成為我哋嘅日常放lunch既選擇，哈哈！…Read More

妹妹今個月升職話帶我地去食好東西，真係滿心期待, 佢話之前同朋友食過好誇張好好食，一去到見到其他枱上面嘅食物，真係陣容好勁。好一個「航母式軍艦海鮮鍋」。 最平二百幾蚊一位有交易。有海鮮又有其他火鍋必備嘅食物，亦有配菜。見到呢個鍋真係有啲嘩然嘅感覺，心諗五個人食食唔食到咁多啊。😱😱😱我哋湯底要左番茄湯，咁大盤海鮮真係第一次見，呢個時候當然要相機食先啦！ 盤入面有好多種食材，真係數都數唔晒，分別勁大粒帶子，好厚鮑魚，會郁嘅海蝦，口擘擘嘅蜆，花呢花綠嘅花蟹，長長既貴妃蚌，仲有好多配菜例如蕃茄芹菜係入面！一開始店員叫我地先食海蝦，隻隻都好大隻，仲好估唔到咁鮮甜，之後開始食帶子，基本上真係有一隻手掌咁大，小女真係第一次品嚐咁大又鮮甜嘅帶子。唔使講啦鮑魚亦都好美味，佢吸收埋番茄湯嘅味道。好啦開始食蟹啦，雖然唔算好大隻蟹，但估唔到肉質咁鮮甜爽口，仲有啲唔夠喉嘅感覺，因為太好食啦。食完海鮮仲可以佢嘅海鮮蕃茄湯底繼續打邊爐。但由於我哋個個都已經九成飽所以只係叫咗幾款。我哋點了肥牛、萵筍同蜂巢豆腐，當然唔少得炸響鈴！ 以為佢淨係海鮮出名，但原來牛牛都咁好食，牛嘅味道好濃，再加上我哋嘅番茄湯底，味道夾得好好，好惹味，炸響鈴都好新鮮。我哋四個叫咗一窄竹蔗水，竹蔗水唔算太甜， 剛剛好有清熱嘅感覺！爸爸就叫咗啤酒飲。總括嚟講餐廳舒適，店員都好有禮貌咁同我地講解食海鮮嘅先後次序，重點係佢啲海鮮好新鮮，價錢仲要唔算貴。整體上嚟講我真係好滿意呢餐海鮮宴。…Read More

今日放假終於出城市😂好耐冇出過去銅鑼灣走走，就同友人去咗銅鑼灣逛逛。由中午行街街到差唔多夜晚，當然有好多戰利品，但原來開始有少少肚餓啦。銅鑼灣太多嘢食花多眼亂唔知食咩好，友人就提議去天后一間日本野到食串燒，行到好攰我當然冇所謂😏跟住佢好食好東西啦餐廳好有霸氣叫海魂燒🔥。好啦！我哋二話不說就點左幾樣食物：魂燒芝士石鍋炒飯、鹽燒鮮雞腎、一口帆立貝海膽..........食物好快就送到，第一個係必點既魂燒芝士石鍋炒飯，因爲我見個個都點佢。首先就將個飯撈勻，然後大大口咁放入口，口感好豐富，芝士味好香濃，然後慢慢咁食到粟米嘅甜味，好yummy !小食邊面，鹽燒鮮雞腎好好味，食落去好爽口，係好新鮮既感覺喔。味道剛剛好，調味適中，香料十分惹味。而我最欣賞嘅就係一口帆立貝海膽，真係大大粒帆立貝包住新鮮嘅海膽，賣相好吸引，真係好想大啖咁食落去，海膽個種鮮甜嘅味道真係好難形容，好似係海邊嘅感覺，帆立貝都好好味，雖然佢冇海膽咁鮮甜，但味道都唔會比海膽搶咗，好想食多好多個，但無奈已經好飽啦，唯有下次再嚟品嚐佢啦。…Read More

荃灣真係有好多好東西食，個個星期五都好次放監咁，今次揀左呢間白宮；個名好吸引囉。Lunch都好多麼人，等左差唔多三個字先去，睇一下個Menu已經揀到要食咩，煙三文魚田園沙律，凍既熱情果紅茶。飲品好快就黎左，食物可能太多人既關係，都要等左幾個字先有得食。wow賣相唔錯啵，煙三文魚指定動作，捲到好似玫瑰花咁，味道都唔錯，唔會太鹹，不過我就覺得個黑醋好濃，而且甜左少少，不過整體來講都幾好食價錢好合理。飲品方面揀左熱情果味紅茶，酸酸甜甜咁好開胃。…Read More

男朋友今日生日我哋一早就book咗入咗愉景灣嘅酒店兩日一夜慶祝下。喺愉景灣休憩咗大半日就落咗黎呢間酒店嘅餐廳食晚飯，因為食咗個下午茶，我哋都唔算太肚餓，所以就係叫咗一份牛扒同埋一份小食-炸薯條雞翼，好開心因為男朋友生日，所以酒店仲送咗兩杯香檳俾我哋。經過多次嘅酒店餐廳經驗，我覺得通常酒店嘅食物都唔會太好食，點知今次真係出乎意料。我好少食到牛扒係啱啱好，"really medium "，因為通常食都會太熟，你今次一望到佢個樣已經覺得唔錯，食落去仲好有驚喜。旁邊係薯仔同你非一般好食嘅蕃茄。講返塊牛扒先，肉質好鬆軟，味道剛剛好，唔會太重口味，點小小海鹽牛嘅味道更加突出，而且我最欣賞嘅係佢真係做到五成熟呢個效果，出邊好多餐廳都未必控制得咁好。仲有佢嘅脂肪比例均勻適中剛剛，整體來講有好高嘅分數。反而個炸雞翼就相對上冇咁出色，感覺上好肥膩，食到第二隻已經唔想食落去，而且雞翼只有鹹味冇咩特別既味道，雞翼旁邊配嘅薯條薯仔味好重好香，薯條嘅粗有各有不同，有唔同嘅口感，感覺都唔錯。香檳嚟到都好滿意，仲要係生日送嘅，最後係埋單既時間，佢送左份甜品俾我哋，話係生日嘅驚喜，真係連我都唔知，感覺上酒店服務好好，所以今次餐晚飯唔單止味道出色，酒店服務質素都唔錯，俾我地唔少嘅驚喜同快樂。…Read More

早餐 - 成日諗都唔知食咩好，經過嘅時候不如買個包算，點知買下買下，買咗個糯米雞食，返到公司即刻開黎食。哇！好大個呀，成隻糯米雞差唔多有一隻手掌咁大，我諗應該中午都唔使食喇。打開啲荷葉已經聞到好大浸好香嘅味道，熱辣辣出晒煙，望落到材料好充足，冬菇、肉、鹹蛋等等全部都有，而且佢個味道都好好，唔會太肥膩，但係都有味道，反而個鹹蛋就硬左少少，不過整體來講都係好惹味。今次真係錯有錯着，而且價錢續抵，得閑要買下糯米雞食先。…Read More

食完lunch已經諗緊今晚去邊度食，突然間諗起不如打邊爐囉，仲要緊係去吉野家啦。呢間吉野家開咗無耐，開喺愉景新城，環境好開陽，設計亦都好新穎，見到佢啲顏色，會令你覺得好開胃。當然依然係叫我嘅最愛芝士竹崙火鍋（濃湯、肥牛、烏冬、雀巢檸檬茶、最緊要加多一盒芝麻醬），我真係十年如一日，次次都叫呢個。每次都等唔切火鍋，未滾就已經要食，蟹柳好好味，今次野菜特別多，大愛啊！我真係唔明點解芝士竹崙咁好食，不過食嘅時候記得攤凍，唔係好容易會熱到個嘴仔，三粒真係唔夠喉下次買多份先。個肥牛就肥咗少少，感覺上有少少肥膩，烏冬依舊好食，真係唔講你唔知，我最鍾意就係打完邊爐個個濃湯底，我知道可能會肥膩左少少，但係真係次次都飲晒咁滯。整體來講，呢間吉野家咁開陽事實係有少少唔自在，但食物依舊好食，價錢亦都冇乜大改變，好驚夏天會停咗個吉野家打邊爐。…Read More

茶木真係越開越多，總有一間係附近，有時唔想諗食咩都會走咗入去。12點都未到就入咗去，人唔多唔使排隊，今次竟然冇叫到紅燒牛肉麵，叫咗個豬扒肉操飯食，等左差唔多半個鐘先至上，好彩個飯熱辣辣味道都唔錯，總算冇白等，但我記得平時上菜冇咁耐，第一次食荃灣呢間。食物方面，感覺上豬扒比以前大左咁（自我感覺），我有啲食唔晒，肉燥飯唔錯，味道好重，好鍾意食隻糖心蛋，茶木嘅糖心蛋都係我最愛食之一，仲有叫咗杯凍咖啡～唔記得叫咩名啊，但味道好好，唔算好甜，上邊個雪糕好好味。…Read More

今日去深水埗買電腦用品，行咗成個鐘好攰啦就搵吓嘢食啦。其實深水埗真係多咗好多嘢食，但仲係好掛住以前食過嘅點心店，真係越嚟越出名，係深水埗行過去都差唔多四五個字。可能夜晚嘅關係，人又唔多，好快就入得去，好掛住個雪山叉燒包，叉燒包依舊熱辣辣好好味道，呢個叉燒包真係保持到水準。其他點心都嚟到，不過我覺得蝦餃同燒賣就大不如前啊，唔單止冇味到，而且好肥膩。賽螃蟹春卷都幾好食，脆脆嘅春卷，點解我上次冇食到嘅。不過最令我失望嘅都係嗰個糯米雞，味道差左好多而且入邊啲料好唔足，好多糯米飯。滿心歡喜咁行過嚟，食點知餐廳食物差咗咁多，我諗今次係我最後一次食添好運了。…Read More

「青花」兩個字真係完全唔覺佢係一間泰國餐廳，入到去好似一間cafe咁，感覺好清新。係小清新嘅感覺啊哈利。入到去望望餐牌先知原來係食泰國嘢，真係估佢唔到，簡簡單單叫個燒菠蘿蟹肉炒飯，仲要左個惹味拼盤，當然唔少得要佢嘅特色飲品啦。兩個人食應該夠食嘅，個炒飯好快就嚟到賣相好靚呀，食落去薑黃粉嘅感覺好重，隔離嗰啲燒菠蘿大大嚿，食入口好清甜，蟹肉估唔到有幾新鮮喎，炒飯味道香濃，好有層次🍍。個拼盤話咁快都上左、總共有五款，分別菠蘿雞翼，蔗蝦、青檸雞鎚、炸雞卷同魚餅：菠蘿雞翼食落去好清新，感覺上冇咁肥膩、蔗蝦正正常常，炸到脆卜卜，而且啖啖肉、青檸雞鎚感覺就怪少少、炸雞卷食落去都好普普通通、至於魚餅味道一般，但友人就幾鍾意食。飲品方面，唔記得咗個杯係咩啦，但係好靚一大杯紫色嘅蝶豆花茶，甜甜地嘅感覺，可以落檸檬同檸檬汁任君選擇，而我自己個人就比較鍾意落檸檬片，感覺酸酸甜甜好清新。整體來講，呢間餐廳食飯好舒服，環境好清新，食物質素一般但係賣相好靚。…Read More

公司又嚟咗新同事，次次有新同事返老細都會請食飯真高興。開咗年咁耐都好似冇乜點出去食飯，今日終於可以出下城市食好東西。呢度環境好舒服好新潮餐廳有，一入到去見到好多店員，好似歡迎我哋，哈哈自我感覺良好。一人一個lunchset，我叫咗個芝士餐肉牛肉雞蛋鍋飯，再加多左兩隻辣味雞翼，同埋要左杯是日水果茶，水果茶係蜜桃茶。 飲品冇乜蜜桃味但係甜甜地味道都尚算可以。之後再黎左雞翼，雞翼唔算好辣味，細細隻咁，味道都唔錯。之後等左幾個字main就嚟咗，芝士沸騰嘅樣真係好似好好味，果然都不負眾望，味道不錯，韓國午餐肉真係特別好食，反而牛肉味嘅比例唔算多。整體來講，餐廳環境好舒服，好多顏色令到人好開心，而且地方都算大，比較靜，可能係lunch嘅關係，食物質素都唔錯，食完之後仲會送水果俾我哋食，感覺都好滿意，下次會再嚟。…Read More

年三十晚係一年嘅最後一日，梗係要食好啲啦。一個人走咗去譚仔叫咗碗炸醬清湯米線，唔小心加多碟豬耳同一碟皮蛋，完全唔知自己會食得晒。米線好正常冇乜特別依舊好食，最愛米線伴炸醬，因為我覺得譚仔嘅炸醬好好食，好有味道，好容易入口。最愛嘅豬耳辣度適中，涼拌來講我覺得唔夠凍，可以改善一下，一路食一路食話咁快就比我食晒成碟。差啲唔記得咗個皮蛋，食完米線先發覺再食埋個皮蛋係好困難嘅事，因為好大碟，唔緊要，用我最大嘅努力一路食一路食，皮蛋好爽口，味道好重。完全估唔到一個人可以食晒三樣嘢食，再飲埋杯凍檸茶，簡直係爽歪歪，減肥呢啲嘢就等過完新年先啦。林去俾錢嘅時候先發現自己唔記得食土匪雞翼，我諗我真係譚仔嘅忠實fans。…Read More