eat_slim's Profile

是次係油麻地睇戲，行下行下都係去番佐敦呢個飲食之國食飯。呢間野開係佐敦最靜既德興街，呢度除左間上海野同德興火鍋做得住之外，間間都靜過鬼。許願樹舖位真係幾大，如果book場做party我諗都可以坐到50-60人!由於趕時間，所以叫左個簡單d既豬扒豬仔包套餐同紅酒燴牛柳意粉。豬仔包幾脆而家塊豬扒都幾香又好味。牛柳意粉不過不失，最緊要係份量夠，男仔食一定會飽。兩份餐都配餐湯同飲品，賣四十幾蚊，真係唔貴架。不過所見當晚都唔夠大個客，睇黎要支持落去真係諗諗計!…Read More

係沙田搵食，除非你知窿路，如果唔係都係mall food。沙田新城市廣場間間餐廳唔係貴到死就要要排餐先有得食，見到呢間野竟然冇人等位就食。兩人叫左兩個lunch set，一個泰式肉碎炒烏冬、一個豆腐炒雜菜，套餐連青檸梳打同例湯賣大概$50份，係新城市算係平。可惜食物既質素只符合茶餐廳level，如果要俾咁貴去食d咁少肉既烏冬，冇咩味既豆腐炒菜(一D泰國味道都冇!)，我寧願俾三十零蚊食個茶記ABC餐!…Read More

係soho區一個冇乜人留意既角落，竟然有間價錢比較相宜既西餐。由於趕時間，所以叫左一個ginger green waffle with vanilla ice-cream 同original waffle with berries and coconut ice-cream。個green waffle有陣綠茶味，幾特別喇。另外厚味waffle冇咩特別，但係個coconut ice-cream都唔錯。仲有叫左個skillet，用左d薯仔、青椒、煙肉等等去炒，份量唔算好多但係原來都可以餵飽我地三個女仔!飲品叫左推介飲品棉花糖朱古力, 士多啤利白朱古力仲有americano ，店員仲好落力介紹飲品，讚!以咁既價錢係soho食到野，都算抵喇!…Read More

係灣仔好意外發現呢間小店，見到佢裝修好似幾靚，係同朋友坐下吹水既好地方。講左好耐要食cup cake，終於可以試到。我地揀左animal cup cake，設計幾得意，味道都ok，配上一杯cappucino，坐一個下午真係寫意! 此店裝修好似以法國做主題，但係又賣cup cake，不過好坐都冇咩問題。…Read More

係k11行來行去諗住食tea，但係間間餐廳都貴死，唔怪得間間拍烏蠅! 見到呢間oceanna最多人，因為佢價錢相對地平。不過一分錢一分貨係真既，佢有一個半自助既午餐set，有自助salad bar(咁都幾多有好幾款菜同通粉salad)+一款住菜，菜色名寫到好似好高級，不過其實都係普通煎三文魚啫，味道唔算太突出。我地用$10加左佢做promote既三個mini pizza，味道算係咁，但係好似唔夠熱。佢服務都算幾周到，都有番d高級餐廳既風範。不過如果以咁既價錢，我寧願俾多少少去食soho好d既餐廳。總括黎講，k11既餐廳只係得一個字 - 貴! 咁既情況，只會不斷咁換餐廳!…Read More

係我最熟既佐敦食街行行下，無意發現呢間好似西餐但係實情係有印巴風情既小餐廳。印巴藉侍應好熱情咁係門口推介佢地既午餐，我地見價錢唔係太貴就一試無妨。我地叫左一份咖哩雞+薄餅同佢既招牌Four Seasons pizza，佢既咖哩果然有印度風味，係正宗咖哩。不過pizza都不失準，可以話比香港人最愛既pizza店更好味! 因為店內人客唔多，所以侍應都好主動問我地對食物既意見，仲叫我地多d去呀。雖然佢既地理位置唔係太好，但係至今仍然係度，證明好既野食係開係邊都冇問題!…Read More

為左配合英國既主題，食subway係不二之選。夜深人靜既中環，只係間中有幾個準備去老蘭既外國人幫襯下，我地揀左當日推介既sub同肉丸sub，套餐包括一罐汽水同類似mrs field 既朱古力曲奇。老實講份量真係唔係幾夠，食左好似好似冇食咁，而且睇住佢焗都唔覺好熱! 相比係外國既subway，食完一隻sub可以幾餐唔食黎講，香港subway唔抵食囉。仲有店員見有人入黎都好似當冇野咁，要改下喇。…Read More

我地既法文老師話要同我地慶祝一下我地名字紀念日，所以推介左係soho好多老外幫襯既泰國菜。全間舖可以話得我地兩個係本地人，所有對話都係以英語進行! 一行三人都叫左幾多野食︰1. 木瓜沙律 - 味道都幾豐富2. 菠蘿炒飯 - 原個菠蘿上，材料十足，抵食!3. 炸魚餅 - 炸得燶左少少，但係總算過得去4. 咸肉炒芥蘭 - d肉真係幾咸另外每人叫左個椰青飲，清清地都幾解渴! 食泰菜始終都要飲番d東南亞風味先夠feel! 加上此店全都係老外，真係好似去左泰國遊客區!…Read More

是次為左去西灣河睇電影節先有機會黎到呢間完全唔起眼既餐廳。佢個門口好隱閉，唔係睇openrice都唔知有呢間野，加上佢個門口係好矮，個人高d都過唔到。成間舖都係用紅色牆，好誇張既裝修!舖仔細細，但係都差唔多坐滿人。我地兩個人叫左兩個套餐︰1. 蘑菇忌廉湯︰好香既菇味，夠濃郁2. 黑椒豬肉螺絲粉(有蕉)︰佢有個好怪雞既名，唔記得係咩。出奇地黑椒同蕉好來，一辣一甜，幾有趣3. 白汁魚柳意粉︰香蕉當然唔少得喇，但係蕉味冇咁出仲飲左兩杯有蕉既飲品(所有menu上既飲品都有蕉)，雖然唔算太特別，但係本人佩服老闆既心思去設計咁多有趣既名! 而且貫徹始終以蕉為主題! 太安樓果然係咩都有!…Read More

山長水遠去到小西灣行下，點知出面落大雨，唯有食個下午茶hea下。小西灣藍灣半島商場好少人，扒王之王都係得小貓三四隻。見佢有個咩火雞沙律好似幾特別，即管試下。好少見香港餐廳整沙律唔用mayo，竟然俾油醋汁，咁都幾好食。另外叫左個黑豚肉三文治，其實都一般火腿冇咩分別，好似叫黑豚特別高級d咁。好彩冇再出現旺角扒王既差劣服務態度，靜靜地食個tea都幾舒服。…Read More

某次去完中環睇戲，當然要搵d新野試下。係中環soho區，梗係要賣d老外都會食既野，咁非burger莫屬。呢間野好近蘭桂坊，老外去蒲前都要醫肚打底。佢舖仔細細，全部都係高腳椅，OL著高跟鞋好似唔係咁方便坐! 兩個人叫左一個魚飽同手打牛肉漢堡+薯條同汽水，牛肉堡係招牌菜，所以肉汁都幾夠，唔失禮。個魚飽就冇咩特別，但係以咁既價錢同size，我覺得佢抵過麥記囉。其實我已經好耐之前去食，到左今天佢仲生存到，係中環黎講，已經係成功!…Read More

我地係除夕專登揀人地去搵位倒數既時候去食糖水，所以都係等左一陣就有位! 之前睇肥仔食神介紹佢用雞蛋殼裝雞蛋布甸有創意，所以就點左一盒六隻($58)試下。肥仔果然冇介紹錯，d雞蛋布甸真係好有雞蛋味，口感綿滑，好耐冇食過咁好味既甜品!! 不過$58得六隻真係貴左d! 另外叫左一個話要等10-15分鐘既藍苺梳乎厘，點知等左一陣就有得食。梳乎厘一如概往，而且又勁細杯，一陣風就食完，成$40一杯實在太貴!!!!!!…Read More

去年大除夕為左要食每年一度既火煱宴，所以就聽朋友介紹呢間日式shabu shabu專門店。之前睇食評都知佢價錢唔平，因為佢主打係日本入口新鮮材料，所以都預左多d錢找數。三個人總共叫左兩個鍋︰鹿兒島A4和牛SET(HK$350)︰一碟雪花和牛大約有6片(好少...)，老實講其實冇咩特別，冇我期望入口即溶既感覺，有少少失望。黑豚鍋SET(HK$280) : 黑豚肉都算幾腍滑，但係都係個句 - 唔夠喉嚨為左開多一個免費既湯底，叫左一份(HK$80)廣島蠔(一份兩隻)。隻蠔真係幾大，但係烚完之後就細隻左好多，不過都算幾鮮味。每個SET都配上一份蔬菜拼盤，有高麗菜、金菇、冬菇(2隻)同類似唐蒿既菜，仲可以揀要飯定稻烏冬。個烏冬雖只係得一小撮，但係真係好彈牙，正! 湯底方面，我地試哂佢幾種湯底︰壽喜燒 - 味濃，好重日本醬油味道，最合配牛肉; 立魚湯低 - 魚味濃，啱烚菜; 木魚清湯 - 清得得甜，百搭之選。此店乃有線前娛樂台男主持(好勁日文o個個)所開，佢自己親serve客，仲得閒問下d客好唔好食同夠唔夠(又叫人試下佢d串燒、餃子)，而家佢店舖設計似足日本小居酒屋圍埋一齊食野，真係幾日本feel既。不過埋單$792/3人，但係都唔算好飽，食正宗日本菜係有代價既! p.s. 仲有每人係要收購20枝豆費，太貴喇!…Read More

係中環上完堂， 近近地係食個平平地既晚飯!佢呢間野其實係主打食米線，但係個日唔知點解覺得好鬼飽，所以求其叫一個勁麻甩既豬骨湯泡飯+蒜蓉雲吞，兩人Share。一心以為個豬骨泡飯可以食到豬骨髓(有飲筒啜個隻)，點知佢骨髓冇之餘，肉都唔多，結果好似食豬骨「湯」飯! 不過個雲呑d蒜味幾濃，辣辣地幾惹味攞返少少分咁喇。不過佢收得早，10pm已經要打烊，中環OT族就唔好去喇!…Read More

呢日朋友係澳洲返來，就來呢間野度幫佢洗下塵。我地叫左一個沙爹螺肉，一個雲吞雞，一個啫啫雜菌煲同一個南瓜炒飯。個沙爹螺肉似係ｄ蒟蒻造的，唔係太似螺肉，沙爹味唔係太濃。個雲吞雞就幾好食，個湯清得來唔算冇味，仲有好多隻菜肉雲吞添。個啫啫煲都唔錯的，熱辣辣，食得多ｄ假肉都要食下ｄ真齋既。至於個南瓜沙飯都幾大幾足料，食到飽晒。呢度ｄ阿姐服務態度唔錯，都算坐得舒服，但ｄ冷氣都幾勁下。…Read More