piggy.foodie.daily's Profile

喺瑞典文裏面，「Fika」唔單止係喝杯咖啡，更係一種放慢腳步、享受當下嘅生活態度。將軍澳嘅 **Fika 餐廳**，就係一個可以讓你實踐呢份慢活精神嘅空間——環境文青舒服，氣氛自在輕鬆，無論係同朋友傾偈，定係自己一個嚟「Hea」，都可以好好咁享受一頓飯嘅時光。今次試咗幾道頗有驚喜嘅菜式，同大家分享下：炭燒西班牙黑毛豬梅頭烤日本甜薯（招牌菜式）主角係一塊厚切黑毛豬梅頭，炭燒香氣淡淡透出，肉質軟腍得嚟唔失咬口。醬汁帶獨特鹹香，同豬肉好夾。旁邊嘅焗芝士大啡菇亦係亮點，鹹香芝士配上多汁菇身，非常惹味。仲有幾件烤日本甜薯，香甜綿密，成個配搭豐富又滿足。義式生牛肉他他配鵪鶉蛋、多士呢道前菜做得幾精緻，生牛肉他他調味恰到好處，入口清新嫩滑，同配料好夾。原來以鵪鶉蛋蛋黃撈混喺牛肉之中，口感更順滑。配上脆口多士，整體層次分明，係一道清爽又優雅嘅開胃菜。醃豬頰肉蕃茄意大利飯呢個燉飯有驚喜！豬頰肉切成一粒粒，口感有啲似香脆嘅乾麵包粒，帶有焦香同鹹香，同軟綿嘅意大利飯形成有趣對比。飯裏面加入新鮮茄肉，酸酸哋好開胃，整體味道平衡得唔錯。整體感受：Fika 唔單止係店名，更係成間餐廳帶俾人嘅感覺。食物有心思，環境令人放鬆，真係可以慢慢坐、慢慢傾，好好享受一個屬於自己嘅「Fika時刻」。如果你都想喺將軍澳搵個角落喘息一下，呢度會係一個唔錯嘅選擇。…Read More

喺旺角開咗間連香港人都勁like嘅湖南菜，價錢又抵食，最平人均五十蚊就搞掂，難怪成為最受香港本地人喜歡嘅湘菜，仲係排隊王！餐廳位置就腳，係正旺角市中心！而且坐得闊落，無論係家庭聚會定係同friend吹水食飯，一樣咁適合。仲有一樣要讚，餐廳即叫即炒，聽到廚房炒菜聲，傳黎陣陣香味，上菜快到你唔信！款式又多，辣度可以自己揀，午市套餐人均五十蚊，免加一，絕對係附近學生同打工仔嘅日常飯堂之選。湘式拌魚皮 魚皮爽脆彈牙，wasabi味啱啱好，唔會攻鼻，只係吊吓鮮味。加埋辣油香味，溫和又開胃，成個感覺好清爽，係唔錯嘅前菜。湘味酸菜魚 酸菜魚份量足，魚片又多又滑溜。酸菜爽脆入味，湯底酸酸辣辣好鮮香，連入面嘅粉絲都索滿湯，超級送飯！辣椒炒肉 夠鑊氣！豬肉片炒得又香又嫩，油香豐腴。辣椒鮮辣開胃，醬汁濃淡啱啱好，超好送飯，係一道經典嘅家常風味。膠原脆皮豬手 外皮炸到脆卜卜，裡面依然軟糯黏嘴，骨膠原口感濃厚，香得嚟唔膩，仲幫皮膚補充埋骨膠原。乾鍋肥腸 肥腸處理得乾淨，滷完再炒，口感軟糯中帶咬口。用大量辣椒、花椒同香料爆香，麻辣入味，鍋氣十足！麻花糍粑 外脆內糯，口感豐富。跟嘅紅糖味道醇厚，點嚟食甜味更有層次，風味更加正。鴨屎香檸檬茶 杯檸檬茶份量驚人，真係抵飲！鴨屎香茶底醇厚，帶獨特花香，同檸檬嘅清新酸爽夾得啱啱好，冰凍解渴，同濃味湘菜係絕配。解暑西瓜檸檬茶 西瓜檸檬茶果肉多，仲有大塊清甜西瓜。檸檬嘅微酸帶出西瓜嘅鮮甜，冰涼清爽，超大杯勁解暑！整個電飯煲飯東北五常大米，米粒飽滿，軟硬適中。熱辣辣，聞到陣陣飯香，直接成個電飯煲上枱。全場爆滿而且的確係抵食，最欣賞佢辣度可以自由選擇，迎合埋香港人口味，難怪門口仲排長龍，真係排隊王！…Read More

如果鍾意火鍋又貪心想食多啲嘢，呢間冰室絕對係你嘅不二之選。呢間店唔止有齊晒火鍋食材，仲貼心地提供熟食同前菜，等你未開鍋都可以先醫肚，真係夠貼心！選擇多到眼花撩亂店內有多達19款烤魚同雞煲選擇，款款都好吸引，令人選擇困難症即刻發作。海鮮方面亦非常豐富，無論你鍾意蝦蟹貝類定係魚類，都一定搵到啱心水。🐟 蕃茄味烤魚 我哋試咗佢哋嘅蕃茄味烤魚，真係驚喜連連。條魚肉質超滑，外皮香脆，幾乎冇骨，食落口感一流。配上酸甜嘅蕃茄醬汁，味道層次豐富，令人一啖接一啖，停唔到口。食完條魚已經飽咗一半，真係名副其實嘅「大滿足」！🍹🍨 飲品甜品同樣精彩除咗主食，店內仲有多款特色飲品同甜品，包括雪糕，為你嘅火鍋之旅畫上完美句號。總結：唔單止食物選擇多，味道亦有水準，無論你係火鍋控定係海鮮迷，都一定會食得開心又滿足。難怪全場滿座，記得book定位啦。…Read More

呢間手撕雞既分店都成日見，原來係屯門就開左全港第一間手撕雞堂食店，果然名不虛傳！$168皇牌二人套餐性價比超高，同朋友點左「秘製香辣雞」 - 雞肉嫩滑中帶嚼勁，麻辣醬汁層次豐富，慢慢咁滲出嚟，溫和辣度中暗藏驚喜後勁，令人欲罷不能！小食推薦雙拼「麻辣豬耳」+「涼拌海蜇」，薄切豬耳爽脆入味，海蜇處理得恰到好處。鍾意辣啲仲可以點埋香辣雞嘅辣汁。配埋上湯娃娃菜及老火湯，完美平衡麻辣滋味。整整成碗白飯，不知不覺間就食哂。原來仲可以成為會員，仲即享$20下午茶優惠，真係好抵呀。仲見到新登場既「麻椒手撕雞」，睇相都幾吸，下次又試下先。…Read More

尋日喺尖沙咀行街，餓餓哋求其入咗間泰國菜館，點知發現咗個不得了嘅寶藏！佢哋個海南雞飯，竟然好食過好多掛住招牌嘅海南雞專門店，真心冇誇張！食曬先知原來可以加八蚊轉雞髀，超級抵下次一定要轉雞髀食。海南雞飯 - 嫩滑到無朋友！一客海南雞飯上枱，賣相已經對辦。急不及待試咗啖雞，哇！真係不得了，啲雞肉超嫩滑，皮爽肉滑，雞味香濃，個熟度控制得啱啱好，食落去係滿口嘅鮮甜同嫩滑，完全超越咗我對一間泰國菜館整海南雞嘅期望，絕對比好多專門店更出色！至於個油飯，同樣功不可沒。飯粒粒粒分明，乾身有咬口，但每粒飯都均勻咁染上金黃色，充滿雞油香氣。足料船湯金邊粉 - 黑椒湯底濃郁惹味朋友叫咗個雞脾肉船湯金邊粉，我都試咗幾啖。個湯底一飲就知係功夫野，微辣得嚟好香，味道濃郁到不得了。幼身嘅金邊粉索盡湯汁，非常掛湯，但依然根根分明絕對冇黐埋一舊。除咗雞髀肉仲跟埋兩粒彈牙魚蛋，成碗粉份量十足。泰式小食拼盤 - 即炸香脆我哋仲點咗個小食拼盤（炸蝦餅、炸雞翼、炸芝士雲吞），全部即叫即炸，炸蝦餅啖啖肉，真材實料；炸雞翼醃得入味；炸芝士雲吞熱辣辣卜卜脆！，邪惡但好滿足。總結今次喺尖沙咀呢間泰國菜真係食到超預期，尤其係個海南雞飯，絕對有實力挑戰區內嘅專門店。味道、用料、份量都冇得彈，性價比高，以後喺尖沙咀諗唔到食咩，呢度肯定係我嘅飯堂首選！…Read More

葵涌廣場出名係美食集中地，競爭咁激烈，要喺度企得穩真係唔容易。呢間車仔麵舖頭可以屹立多年，唔單止有實力，仲有穩定水準。今次再去食，依然冇失望。我哋叫咗兩碗車仔麵：秘製汁米線配豬腸、魚皮餃、雞翼、蘿蔔 豬腸乾淨冇異味，魚皮餃滑溜有鮮味，雞翼滷得入味骨肉一啜分離，蘿蔔夠腍又甜。秘製汁鹹香微辣，米線掛汁力強，食落好惹味。孖寶辣汁河粉配黑椒牛丸、豬皮、魷魚 牛丸夠彈牙，夾住淡淡黑椒味；豬皮吸晒滷汁，好爽口；魷魚爽口得黎唔韌。孖寶辣汁香辣夠勁，河粉滑溜唔黐口，辣得過癮。🥚 再加鹵水蛋一隻 滷得入味，蛋香濃郁，簡單但好食。🌶️ 最鍾意佢有辣菜脯任加唔嬲，香辣脆口，配麵一流，一定要試！整體嚟講，配料新鮮，醬汁有特色，價錢合理，難怪可以喺葵廣長期受歡迎。…Read More

一間宮廷風火鍋店，外觀華麗吸睛，遠遠已經令人好奇心爆棚，忍唔住走入去一探究竟。🍲 玲瓏浮凸花膠雞湯鍋（半隻） 一坐低，就睇中佢地既玲瓏浮凸花膠雞湯鍋😂。（佢哋嘅餐單設計真係非常之特別）。湯底滾起時，先嚐一兩碗原湯，花膠足料，入口滑溜，湯頭濃郁，滋補感即時湧上心頭。之後再落雞慢煮，層次感更豐富。🥩 大滾友牛肉拼盤（細） 牛肉拼盤誠意十足，集合雪花牛、牛頸脊、牛舌、骰仔牛柳粒、牛小排、安格斯同牛黃喉，每款約五片，肉味香濃，油花分佈靚，兩三人分量剛剛好，食得滿足。🦞 龍蝦墨魚丸： 丸子外層彈牙，入面有真龍蝦肉粒，雖然外表平平無奇，但咬落去好有驚喜。芝士獅子狗：呢款獅子狗好好食，芝士香濃，質感比一般獅子狗更細膩，絕對係高質之選。🌿 打邊爐竟然有水蓮，喺香港真係罕見，爽脆清新，為整體味覺加分。🥤 竹蔗茅根飲品 配搭一大樽竹蔗茅根，清甜解渴，啱晒火鍋後降溫。😊 店員親切有禮，食完仲有啫哩送上，畫上完美句號。…Read More

呢間小店，絕對係「選擇困難症」嘅考驗！估你唔到個名叫麻辣串串香，但餐牌由日式烏冬掃到去雲南米線，再跳去串燒小食，花多眼亂，但難得每樣都保持高水準，成為街坊至愛既中日餐廳絕對有道理。🍜 主食類：誠意十足-特上虎蝦鍋燒手打烏冬：大大隻虎蝦爽口鮮甜，湯底少少辣又夠熱，手打烏冬煙韌吸湯，一碗超滿足。- 大大碗雲南米線：真係名符其實「大碗」！酸辣湯底醒胃，配料多到尋寶咁😆：牛腩淋滑、豆卜索汁、潮州魚蛋、墨魚丸同魚皮餃樣樣有（走了豬血），豐富到暈。🍢 邪惡小食：款款有驚喜-餃子讓雞翼：雞翼皮燒得香脆，入面釀滿 juicy 餃子餡，口感同味道都滿分，記得襯熱食！-蒜香脆皮豬手粒：第一次見呢樣！雖然叫粒，但實際係大大件😂外皮脆炸得脆脆，肉質鹹香，鍾意香口野嘅人士最岩。-鐵板牛油帶子：鐵板夠哂熱，上枱吱吱聲，牛油香撲鼻，帶子大粒又彈牙，鑊氣十足。-涼拌墨魚頭：冇輪係餐前定餐後食完濃味嘢，呢個爽脆酸辣嘅涼拌菜就啱啱好，又爽又彈牙，正！-蒜香焗金菇：呢個好出色，雖然係一道簡單嘅菜，但真係唔係度度都好食，係呢度到尾，凍左都仍然好食，讚✨！-雞軟骨串：火喉掌握得好好，香脆又冇燒燶，咸咸香香，的確好食！總結： 雖然店細款式多，但真係估你唔到，每樣菜式都感受到用心。價錢親民，分量足，絕對係值得encore嘅街坊寶藏小店！優惠提示：下午茶2:30-5:30時段，凡惠顧雲南米線系列，加兩個餸,送凍飲品一杯! …Read More

行入呢條街，未入門口已經聽到老闆娘爽朗聲音招呼客人。打理全場嘅，就係呢位一人分飾多角——落單、煮嘢、傳菜、收錢——嘅老闆娘。忙碌之餘，仲會同你吹兩句水，呢份人情味，未食已經暖咗半個胃。小店唔大，但坐滿街坊，就知唔簡單。今次除左皮蛋，其他涼菜都賣哂啦，下次早啲黎！重慶網紅酸辣粉一上枱，香辣味直衝鼻！紅油亮澤，薯粉不是煙韌彈牙，係一咬出斷嘅。酸度醒胃，辣度夠勁之餘唔會嗆喉，食到最尾仲有陣陣麻香，非常正宗。仲有左香港獨家技術:重慶小面以糊辣殼炒辣椒乾，果然係靈魂所在！罐罐三鮮米線呢個係驚喜之作，半罐湯底半罐料,豐富營養，成罐湯都飲哂！特式罐罐湯底米線、自設廠房~特製煙韌米線，用瓦罐上，熱辣辣，湯底鮮甜到不得了。仲係新鮮食材製作：鮮海帶絲同綠豆芽索盡湯汁，鮮豬肝片同眉頭肉片嫩滑唔嚡口，仲有鵪鶉蛋同爽脆青瓜片，口感豐富到爆。米線幼滑，吸咗湯精華，啖啖都係滋味，份量十足。黃金皮蛋皮蛋晶瑩剔透，蛋黃流心，配上酸酸辣辣嘅醬汁，開胃到停唔到口！辣油香同皮蛋嘅獨特風味出奇地夾。冰豆花 食完辣嘢，呢碗冰豆花簡直係救星！豆花滑不溜口，豆味清香，加上冰凍糖水，瞬間降溫，解辣一流。冰粉賣哂，下次早啲黎。自家製酸梅湯唔係開粉沖嗰隻！飲得出係真材實料熬出嚟，酸甜平衡，梅味濃郁，清涼解渴，同重慶菜係絕配。總結：老闆娘笑住話：「聽日要食就早啲嚟啦，下晝打風唔開架！」呢種街坊小店嘅親切感，而家買少見少。食物有風味，人情味更濃，絕對係會令人想「返轉頭」再幫襯嘅地方！溫馨提示：老闆娘一腳踢，可能要當自己屋企一樣「自動波」同埋要耐心等吓，但保證值得！…Read More

呢間隱世小店真心有heart✨！餃子全部即叫即煮，每隻都大到似元寶咁，皮薄餡多爆汁勁足料，真係誠意之作～ 湯餃（6隻）配花膠淮山豬骨湯 個湯超清甜！無味精感，比足料架！ ▪️粟米香菇鮮肉餃：一啖咬落去已經聞到濃郁香菇味，粟米爽甜▪️紫菜椰菜鮮肉餃：紫菜味出奇地夾，口感豐富 ▪️韭菜鮮肉餃：韭菜新鮮唔臭青，傳統但好食煎餃（9隻）金黃脆底唔油膩▪️酸菜鮮肉餃：酸菜開胃解膩，好有驚喜，咬落索索聲▪️白菜鮮肉餃：經典口味，肉汁鎖得好好 ▪️冬陰功鮮肉餃（必試！）：香辣椰菜+冬陰功味好濃，淡淡甜味好過癮，第一次食呢種配搭竟然超夾，不妨試一下新口味！ 小食 ▪️手拍青瓜（酸辣）：爽脆入味，辣度啱啱好 ▪️皮蛋豆腐：肉鬆鋪滿夠惹味，但醬汁芫荽味幾濃，唔好芫荽嘅人一定要留意甜品 ▪️椰香西米芋圓：椰奶香滑，芋圓煙韌有嚼勁，甜度適中完美收尾！ 總結：呢間餃子質素真心高，冬陰功味創意滿分，湯底同糖水都感受到用心。人均$100就可以食到飽，一定會再回頭試其他口味～🥟💯…Read More

住咗大西北咁耐，居然而家先發現呢間寶藏大排檔！即叫即炒夠曬鑊氣，味道仲勁過市區名店！招牌咕嚕肉 一上枱就聞到酸甜香！外皮炸得脆卜卜，咬落啖啖肉唔肥膩，酸甜汁掛得勻循，白飯殺手，伴碟嘅菠蘿仲爽甜多汁，可解油膩！豉油王蝦蝦隻隻都大隻又新鮮，豉油香炒到滲入蝦殼，蝦肉爽彈又入味，連蝦殼都脆到可以啜埋，簡直無得頂～椒絲腐乳炒通菜鑊氣十足！通菜翠綠爽脆，鹹香濃郁，仲有椒絲提香，簡單但係炒到超級惹味，正～隱藏喺屯門嘅平民高手，價錢抵食份量足，鑊氣仲勁過唔少酒樓，仲可以向餐廳訂海鮮或者海鮮加工添！以後宵夜又多個選擇，大西北街坊絕對要試！💥🍳…Read More

前一日係屋企追韓劇，睇睇下好想食炸雞，今晚幫襯左呢間韓式外賣店，落單後等大約10分鐘就拎得，返到屋企又可以邊追劇邊食炸雞啦！揀左2-3人A餐：韓式火腿紫菜飯捲 紫菜包得實淨唔會散，火腿同醃蘿蔔脆脆哋，芝麻香噴噴，令人食唔停口！蘿蔔魚糕湯（胡椒味超濃！）一開蓋就聞到勁香胡椒味！仲有好多魚糕，比足料，飲完冇口渴原味無骨炸雞炸雞外脆內嫩，咬落仲有肉汁爆出嚟，咬落啖啖肉好滋味新鮮辣泡菜 呢個泡菜真係好辣！但酸辣脆口夠哂正宗，雖然辣但有少少停唔到口飲品：韓國青葡萄汁+梨汁追加！甜辣炸雞翼+炸年糕 雞翼甜辣醬掛滿哂，皮脆肉嫩。炸年糕少少脆又煙煙靭靭，推介！整體黎講，味道正宗，辣度過癮，外賣包裝仲好細心，成餐都只係二百幾蚊！…Read More

前排去完中山返嚟，成日好想再食鹵水鴨，經朋友仔介紹原來近近啲呢一間嘅鹵水鴨都唔錯喎~今日黎到餐廳時間尚早，仲可以嗌午餐添😂一人揀左一個套餐，再叫埋小食。食神叉燒飯（即係叉燒煎蛋飯） 叉燒燒得啱啱好，外皮微脆又帶啲蜜糖甜香，又唔會甜到好漏，肉質軟淋又多汁，再加埋一隻脆邊煎蛋，撈飯食真係一流！秘汁鹵水家鴨飯 鹵水汁濃郁得黎唔會咸，鴨肉入味又唔韌，仲有啲香料味慢慢滲出嚟酒仙醉雞卷 雞卷好嫩滑，每一片仲有杞子點綴，酒香味淡淡飄出，但唔會太濃，食落清爽又開胃，凍食更加正拍蒜青瓜 青瓜爽脆到爆，蒜香味十足，辣辣哋，食完油膩嘢之後清一清個口就最啱，鍾意食辣嘅千祈唔好浪費佢嘅辣汁，配埋醉雞卷簡直係雙重滋味！霸王花紅蘿蔔粟米湯 飲得出冇加味精，霸王花煲到軟淋淋，淡淡清甜味飲落好舒服！整體都幾高質，仲發現唔少街坊幫襯，真係抵食又滿足。…Read More

同朋友喺呢度食晚飯，叫咗12貫壽司套餐同壽喜燒定食，整體質素唔錯！所有定食都包括前菜沙律、茶碗蒸同麵豉湯。我都幾鍾意佢嘅茶碗蒸，夠熱又鮮甜，仲非常滑溜。我哋揀咗12貫壽司套餐壽司整體新鮮，醋飯做得幾好。特別鍾意：活赤貝&白象拔蚌：爽脆鮮甜 大拖羅&中拖羅：油脂甘香，入口即化 海膽：creamy無腥味 牡丹蝦：超大隻又鮮甜 其他如銀雪魚、左口魚邊等都高質，12貫款式多樣化，大滿足！仲包一碗細盛海膽角切魚生飯海膽鋪滿，魚生足料，加埋啖啖三文魚子，撈飯食好滋味！另一款定食揀咗關東和牛壽喜燒 和牛肉質軟嫩，湯底甜鹹適中，蔬菜豆腐吸晒湯汁，好味！仲試埋和牛漢堡扒，肉汁豐富；鱈魚乾超脆口，價錢抵食，非常推薦！…Read More

前段時間去過潮汕，不過冇機會食到荔枝蝦球，得知道荃灣呢間「自己人」竟然有呢款點心，立即約埋朋友嚟試下先。一入門口就已經被一幅牆畫吸引住，然後旁邊就可以見到師父們準備點心，半開放式嘅設計，看得見嘅衛生，食客食得安心。金魚戲水兩粒湯蝦餃外表設計成金魚嘅樣子，非常有趣，好似真係喺魚池遊水咁，唔捨得食鮮荔枝球煙韌糯米皮細味有點甜，包裹住蝦粒，外面一粒粒紅色嘅脆脆，口感豐富小小梨子梨子造型嘅鹹水角外皮，入面包裹住牛肉及黑椒內餡，口感煙煙靭靭潮汕滷水炸乳鴿呢款炸乳鴿必選，外皮脆肉質嫩滑，肉汁都鎖住喺入面，十分滋味滷水鵝片這盤滷水鵝片睇起來油亮入味，鵝肉切得厚薄剛好。吃起來肉質軟嫩，帶點嚼勁，滷汁的香味很濃，但不會太鹹，反而有點甘甜 汕頭醬炒牛小排(沙茶醬)牛小排肉質軟嫩，沙茶醬香濃惹味，鑊氣十足。醬汁裹滿每塊牛肉，鹹香中帶微甜，配飯一流黃皮燉鮑魚湯色金黃清亮，鮑魚軟嫩彈牙，黃皮果香清新解膩。燉煮火候恰到好處，湯頭鮮甜，滋補又不油膩咸話梅手打檸檬茶個人比較喜歡呢一款咸話梅手打檸檬茶，話梅鹹香同檸檬茶嘅酸味非常夾清香茉莉手打檸檬茶茉莉花味香濃特出，飲落口感清新，亦係唔錯嘅選擇餐廳環境非常舒適，店員服務亦不錯，啱哂同朋友嚟飲下茶食點心慢慢嘆…Read More