geisi's Profile

平日tea 2:30-5pm樓下顯示嘅Tea Menu同餐廳入邊嘅menu唔同，仲啱食！我諗佢係每個禮拜都會轉，今個禮拜set A，下個星期就set B. 下午茶嘅炒金邊粉一啲都唔馬虎，算好多蝦，唔算好細隻啦 。炒得好惹味。加埋一57，超值。…Read More

今日要食素，記得之前落單嘅時候可以選擇走肉，今次就食咗個走肉嘅泰式炒金邊粉 。我冇走五辛，主要係炒雜菜（紅蘿蔔、椰菜花、菇芽菜、洋蔥）、豆乾、蛋 。好食過佢有肉（雞）嘅炒金邊粉 。如果要走蛋/五辛都可以嘗試同店員講，佢哋好Nice 。…Read More

叫咗招牌涼皮（走辣）加一份雞絲，唔係手撕雞嗰啲雞絲，我覺得似雞肉多啲 。夏天食係真係爽嘅，涼皮煙靭，但最好慢慢食因為好滑，以免哽親 。多汁，應該係想令到成碗嘢都keep住涼，但亦都可能因為咁食完就覺得口渴，所以間唔中食一次就可以了。食完唔係太飽，六成飽啦，男士應該唔飽 。真係啱晒夏天冇乜胃口，又唔想食咁多嘢嘅時候 。暑假，大約晏晝12點幾過嚟，有一個姐姐處理食材，另一個處理落單+製作食物 。都要等一段時間，可能用外賣平台叫會容易啲就時間 。…Read More

第一次去銅鑼灣呢間分店，原來係喺印尼舖頭入面，有啲搞笑，之前筲箕灣食嘅話最少等半個鐘，呢度等5分鐘就得 。原味雞蛋仔：外脆，但裏面軟嘅部份比較少，因為空心嘅部份多啲，整體嚟講都好食，但我依然覺得筲箕灣嗰間係最好食 。銅鑼灣呢間，食一次就可以 。…Read More

趕喺最後營業日之前過嚟支持。星洲炒米：比較似濕炒，味道唔似一般嘅星洲炒米，不過欣賞佢啲蝦係挑咗蝦腸，加埋紅豆沙同埋飲品真係飽到不得了。紅豆沙係有陳皮嘅，不過比較甜。期間聽到好多人叫霸王雞，應該係呢度嘅招牌菜 。有「善心」嘅一間小館，希望佢可以喺第二個地方繼續經營落去 。喺香港呢個乜都講錢嘅地方，仲有啲良心餐廳幫助弱勢社群，真係好難得 。…Read More

見到佢有下午茶set，就入去食啦，對於日本過江龍拉麵唔敢抱太大期望。食咗最基本嗰隻原味蝦湯拉麵，個湯OK好飲喎，好濃蝦味，食完唔會好頸渴。麵都煙靭嘅，有啲後悔揀咗粗麵，如果係幼麵應該更加掛湯，唔知係咪下午茶關係麵比較少。反而我覺得個綠茶蕨餅更值得留意，煙靭得來唔係好似啫喱咁膠，食完鹹嘅拉麵食佢就係完美嘅組合。…Read More

估唔到泰簡單都有下午茶，證明市況真係….10幾年冇幫襯，好高興佢仲喺度。平日4:50到達，原來下午茶只係做到五點，不過佢都繼續俾我坐喺度食嘅。冬陰功蝦仁炒飯：真係幾多蝦仁喎，但飯比較腍，有冬陰功嘅味但唔辣囉，我最欣賞佢有啲芫荽碎spice up個飯（鍾意芫荽嘅人就會鍾意），整體嚟講都好味，好食過茶餐廳啦點都，呢個價錢我覺得都算超值。份量多到晚餐都唔使食。…Read More

次次行完山，終點係梅窩嘅話通常喺度食 。星期六下午三點幾冇乜客係正常，但老闆娘話出邊工程修路，生意大減，希望佢做得住啦🙏🏿椒鹽鮮魷：鍾意佢炸到唔會太燶，點埋佢個醋真係正，行完山最好嘅獎勵 。廈門炒米：正常發揮，雖然偏紅但唔會太甜，亦都唔會鹹 。煎蠔餅：其實我唔太鍾意食蠔，所以呢度嘅蠔無嗰種腥味（鍾意食蠔嘅人會叫佢做鮮味）我覺得反而好，我最欣賞係佢一啲都唔油膩，成個餅鬆脆輕飄飄。 老闆娘提我哋食完個蠔餅要飲涼茶。…Read More

素食粢飯+豆漿$45粢飯有啲驚喜，見到有松子仁。豆漿都重豆味，不過叫咗先知原來有無糖豆漿 。杯熱豆漿超熱，其實唔知個膠杯食唔承受到 。附近冇乜素食選擇，呢度算係有啲選擇啦 。…Read More

初三，所以只有festival menu 。九層塔茄子舞茸菇：呢個醬汁惹味又唔會太鹹，叫完呢個之後我哋叫咗個飯因為覺得撈飯會正 。如果有機會再嚟食飯，我會再點呢個餸 。玫瑰叉燒：見到咁多人介紹就試吓，皮係脆卜卜，偏甜，味道同平時嘅叉燒就唔係好似，當係一舊脆嘅植物肉咁樣食啦 。我覺得食一次就可以 。冬蔭純素蟹肉意大利飯：係有冬陰功味嘅，唔食得辣嘅都食到，除咗三色豆之外，其他餸都比較少，感覺較普通 。karana 植物肉蓮藕卷（原名好長）：炒芝麻令到個卷幾香口，蓮藕味都出 。未算係好食到會立即諗下次幾時再嚟食，但如果喺中環想有個地方舒舒服服食素都可以考慮呢度。嗰日初三人唔多就冇限制用餐時間，平時就唔知啦 。…Read More

差唔多10年冇嚟尖東呢邊，感覺好似去咗大陸咁😅，相信呢間餐廳係比較好坐，而且多位嘅餐廳。星期六嘅brunch，食物種類比較細份，但我同朋友都覺整體質素唔錯 。牛油果煙三文魚芝士薄餅，鍾意薄脆，材料份量適中，佢嘅沙律菜落黑醋都好有誠意 。另外，只要加$12就有杯咖啡，要咗杯flat white（nutty), 雖然唔係太滑，但以經呢個價錢算好ok朋友叫咗個egg Benedict 唔知賣相好，味道都好滿意，中間隻蛋好流心。另一朋友嘅煙三文魚牛油果waffle 就好細份, 不過佢好欣賞個花茶 。Toilet要去返商場嗰個，衛生就差咗少少 。…Read More

好開心搵到一間咖啡好飲，而且有好書睇嘅地方。因為得幾個座位，為咗唔好阻住佢哋，通常我九點就會去，咁就可以食早餐之餘亦都睇到個幾鐘書。價錢我覺得好合理，一份食物(sandwich with salad)，飲品可以減$10 。值得支持 。吞拿魚碎蛋多士：以為得一塊麵包，點知係有兩塊，仲要係厚切，所以食完好飽，吞拿魚碎蛋正常發揮，比例剛剛好唔會太多沙律醬 。蜜糖芥末煙三文魚意大利包：最欣賞嘅係煙三文魚唔會太鹹，而且份三文魚都幾大塊，有菜而且唔會太多醬，感覺都幾健康，個包微烘 。flat white: 咖啡唔會太酸，夠滑夠厚 。…Read More

見到素食group介紹呢度，喺附近行山後就過嚟食。因為一般越南河粉嘅湯都係用牛骨熬出嚟，所以都好耐冇食河粉。所以就叫咗個湯河。素扎肉魚餅湯河：河粉最好食，而且好多，湯清甜，同一般非素食越式湯河味道有六七成似。扎肉同魚餅嘅感覺有點兒加工（可能因為顏色）。但食完唔口渴，感覺好好 。炸蟹餅（細份）：仲以為係用麵包糠炸得好犀利嗰啲炸蟹餅，個皮薄薄的脆，感覺健康啲，味道自然啲，而且口感唔錯。當然唔會期望素食同非素食嘅越南菜一樣味道，但可以有素食選擇而且喺呢個經濟咁差嘅時候真係唔容易 。下次會行返同一條路線過嚟食，希望小店支持到啦 。…Read More

對上一次離康記係以前嗰間康記，都應該係十幾年前嘅事 。雖然知道轉左手，但都想試吓可唔可以keep到以前嘅質素魚腩粥：粥係綿嘅，魚腩有三四嚿但幾腥皮蛋魚片粥：朋友話啲料比較少叉燒腸：腸粉冇以前咁滑，叉燒唔係好多，但又多肥肉，唔係好食到叉燒味炸兩：我期望即場食會脆，但偏腍見到佢門口個招牌拆咗個「新」字落嚟，但好可惜keep唔到以前嘅質素。價錢係平嘅，但我寧願佢貴啲但做到以前嘅味道 。難得嚟到大坑就食呢一餐，失望。…Read More

間唔中都嚟南丫島行索罟灣，行完一圈之後通常會喺度食午餐，再行去榕樹灣。差唔多一年冇嚟南丫島，估唔到少咗咁多人，入索罟灣嘅時候開細船仲要坐唔夠一半人，食飯人都唔多。時代真係話變就變。之前都係食餐，今次散叫。椒鹽鮮魷：呢個唔使講，必食，因為散叫我哋叫咗最細嗰個量（餐牌寫「例」），應該都夠三個人食。星洲炒米：夠鑊氣，唔會鹹，唔辣，正常星洲米應有嘅味啦黃金茄子：因為係切片嘅關係，佢吸油比較多，如果切角會好啲，所以唔夠乾身，淋咗啲，不過味道都可以。兩個人食實在太多。另外叫咗椰青，行完山好熱，極速解渴。題外話，食食吓後面嗰檯大陸人喺度食煙，有冇搞錯？之後我哋要求掉去另一邊坐，仲好，靜靜地繼續一邊享受海景，一邊食午餐。…Read More