irisch24's Profile

Sky726 位於 T.O.P. 隔離，行完一日街行幾分鐘就到餐廳，好方便～上到最頂嘅25樓，一出𨋢就留意到餐廳嘅佈置，成個天花佈滿小燈，好有情調～晚餐時段嚟可以由日落睇到夜景，去到夜晚嘅景色如繁星點綴一般，同餐廳嘅佈置互相映襯.前菜叫咗燒焗南瓜湯、流心水牛芝士伴蕃茄同香煎煙薰慢煮北海道帶子。南瓜湯用燒焗方式製成濃湯，令南瓜嘅甜味突出，而且又濃郁又滑。水牛芝士配蕃茄排得好精緻，切落去真係幾流心，本身食芝士有啲漏，但配埋番茄個配搭就較易入口，配搭一流～帶子就好厚肉，中間配以菇同石榴粒，令整體味道更加昇華！主菜就叫咗兩款意粉 - 意大利手卷意粉伴野菌、珍寶虎蝦意大利飯伴龍蝦牛油汁。手卷意粉比較少見，係比較硬身嘅意粉，只是略嫌辣肉腸太多，但咁樣先可以令意粉更有味。至於意大利飯，唔係煮得過軟或太硬，完全吸收哂龍蝦汁嘅味道，加埋啖啖虎蝦肉，味道一流！成餐食咗大約每人$500 ，好抵食。雖然望落每碟唔算大份但食落又幾飽。而且食物選擇都唔少，主菜亦設有素食選擇，非常貼心。除咗係拍拖/紀念日好去處，餐廳寧靜嘅格局亦適合老朋友聚舊傾談一番.…Read More

今日經過樂富呢區又想食越南嘢食，見呢間餐廳唔洗等位，內在環境望落好似唔錯，於是決定試吓，點知就中伏了😢落單時，員工嘅態度好差，好似趕著收工咁。叫咗個生熟牛肉金邊粉，想問吓包唔包嘢飲，員工明明話包，點知再睇多次餐牌下面寫著要 +$8，再問佢佢根本冇聽，落完兩個粉同小食就行開咗。食物方面就冇咩特別，唔難食但都算不上出色。諗著問員工攞啲青檸配料，員工好快咁答咗一句「自己去嗰邊攞」，行到去根本冇青檸/香草，只有一兩碟辣椒。一間餐廳如果員工態度差劣，就算食物有幾出色都無補於事，更何況呢間餐廳嘅食物質素都係一般般，唔怪得咁少人嚟食又唔使等位。…Read More

尖沙咀山林道有唔少餐廳選擇，呢日想食海鮮，一於約埋朋友嚟 deep sea oyster & steak~餐廳唔係太大，可以容納約5-6張枱，如果想開小至中型嘅私人派對，呢個場地就啱哂喇.呢度每日都會有精選生蠔推介，今日有五款蠔揀，來自世界各地。我地揀咗個深海精選套餐，入面包2隻生蠔，再另加兩隻生蠔。套餐有前菜、湯、前菜、一個主菜同一杯嘢飲，幾抵食.生蠔叫咗兩隻美國嘅同兩隻西班牙嘅生蠔- 美國嘅珍珠號比較鮮甜，而西班牙嘅海水味就較重，兩隻都易入口，各有風味！三文魚味噌濃湯好足料，有一大舊三文魚肉仲配其他餸料.前菜有套餐嘅牛油大蝦，另加一份西京燒比目魚。大蝦好厚肉，唯牛油味可更香。而比目魚燒得剛剛好，做到外脆內軟嘅效果！小食叫咗燒雞脾菇同安格斯薄燒，兩樣都唔錯，安格斯薄燒好有創意，用薄薄嘅安格斯牛包住嘅蔬菜，味道同質感啱啱好～主菜嘅羊架好厚肉，而且成熟度剛剛好，帶有少量肥膏令肉嘅味道更加昇華.雖然兩個人只叫咗一個套餐同加幾份小食，但都食得好飽，非常滿足～…Read More

朋友約食飯但又唔想食得太貴，便揀咗呢間半快餐式嘅台灣菜。除咗台灣菜最常見嘅牛肉麵、魯肉飯等，亦有唔少嘅炸物、涼拌等小食。野食好快就到了。先叫咗啲小食 share，個人就鍾意鹽酥雞同麻辣牛腱，鹽酥雞夠哂香口，而麻辣牛腱就絕對啱哂麻辣粉絲嘅口味。紅燒牛肉麵亦不錯，牛肉湯鮮甜而濃，當中有牛腱、牛肚同牛筋，牛腱煮得夠鬆軟。幾個人嗌咗幾款餸已食得好飽。惟餐廳服務員有啲冷淡，有少少感覺被人催趕，所以食完快快就埋單離開了。…Read More

呢日約咗好友食雞煲，我地六點就到咗餐廳，尚算少人，空間位置寬敞。之前已經聽過呢度有多款味道揀，好多都係滋補嘅雞煲選擇，例如螺片花膠雞煲、花雕藥膳等，而我地就揀咗前者。店員先用滾水將餐具洗乾淨，非常貼心，亦有好多醬料俾我地自由配搭。除咗雞煲嘅味道可另揀湯底，如果唔揀就會用清湯。雞煲好快就準備好！一擺上枱已經見到奶白色嘅湯好 creamy，飲落嘅味道好濃，即使之後加咗清湯都仲係好 creamy～湯入面仲有勁多花膠同雞，雖然雞肉有少少碎骨，但真係多到食極唔完，花膠更是非常嫩滑，果然夠滋補。兩個人唔係叫咗好多嘢食但都食到好飽！其中嘅手打丸同爆芝響鈴都幾特別，兩樣都係餐廳自製，響鈴層次感豐富，食到中間芝士味都好濃。餐廳呢座大廈嘅特別之處就係佢嘅景色，喺呢個高樓美景下食飯不知不覺就食咗差不多三個鐘，係同朋友傾訴聚舊嘅好選擇～…Read More

收工嚟新蒲崗揾朋友食飯，諗住除咗mikiki 工廠區應該冇啖好食，點行行下見到舊藥房隔離有間好別緻嘅西餐廳。好奇心驅使下就決定去試下～入面唔算好大間，但唔會感覺好迫，配上個開放式廚房相反令人覺得好舒服好悠閒。睇咗餐牌發現原來佢唔止有西餐，連中餐都有得食，有紅油抄手同豆腐飯等，真係估佢唔到。只係今日想食西餐多啲就照嗌住西餐先。本身係明太子控嘅我見到明太子一定要試一試！呢個明太子意粉將啲明太子醬同意粉融合得好好，食落有明太子味之餘又唔會太濃令人接受唔到。啲帶子幾大隻，仲要有4粒！食落口感好好唔會太靱。除咗明太子之外都好鐘意食千層麵，呢個爆多肉醬嘅千層麵唔會太乾，加埋芝士真係口感十足，只係內層嘅麵就比較零碎啦～兩個女人又點可以唔食甜品～嗌咗呢個窩夫，有抹茶雪糕、紅豆、黑糖啫喱。雖然大家都係甜，但各自有唔同嘅味道，唔會互相掩蓋，各有特色，窩夫啱啱上碟仲有少少脆嘅質感，真係夠晒新鮮。呢間餐廳雖然冇啲好出眾嘅菜色令人專登會嚟，但係整體嚟講都好好，裝修食物同服務都好唔錯。如果下次再嚟新蒲崗一定會再諗起呢度～…Read More

好耐冇食過德國菜，難得今日朋友生日就嚟賀一賀佢！專登揀咗呢間因爲佢都算出名，而又評價不錯，算係冇咁伏嘅選擇。準時到所以即刻就入得～不過其實都唔算滿座，所以可能唔洗book枱都可能可以好快有位。餐廳環境唔錯，偏暗嘅燈光令人心情都放鬆～難得今日假期，當然要放下壓力，好好享受呢一餐！一嚟到當然要嗌啲starter, 所以先嗌個忌廉芝士煙三文魚卷嚟開下胃啦。煙三文魚同芝士都係正常西餐廳貨色，但係佢加咗酸酸甜甜嘅瓜同醬幾特別又幾夾，要嚟開下胃都唔錯。小食仲有呢個迷你牛肉漢堡包。以小食嚟講算係噉。牛肉好好食，有肉汁又唔靭數量都唔少，配埋佢哋獨有嘅醬汁真係好好食，如果正餐都有呢款就好啦！德式香腸拼盤—冇香腸嘅一餐仲可以叫德國菜？所以一定要叫個腸嚟食！嗌拼盤係貪佢一次過可以瘋狂食晒唔同款腸。不過老實講我就真係唔太識細分每一隻腸，不過特別記得有一隻係辣辣地嘅芝士腸，係會爆汁嘅，真係好好食！下面有啲炒過薯仔，雖然係配菜都係又唔會太難食，令成個菜式都非常有味道。同香腸一樣，豬手都係德國菜必備嘅菜式，所以就嗌咗呢個秘製德國咸豬手。店員好貼心幫我哋切細啲等我哋之後切都易啲。個豬手認真大份，不過啲酸菜賣相就唔太吸引，而且冇乜味道，似係用滾水烚完就算。相反薯蓉似係撈咗忌廉，即刻軟滑好多。以呢個價錢嚟講嘢食算係唔錯，服務亦都幾好，如果再食德國菜可以考慮～…Read More

呢晚喺北角搵食，意外地發現小巷入面嘅呢間西式/fusion 餐廳，食物出乎意料中好味，且創新，有啲食私房菜嘅風味。店舖細但好舒適，木具俾人和諧嘅感覺，係談天嘅好地方。呢個一上菜真係嘩出聲！冇估到呢間小店嘅前菜都咁靚，好有心機。用乾冰營造出煙霧瀰漫嘅感覺，煙霧之後係一陣金光，原來豆腐上加咗金箔，仲有啲黑魚籽，材料夠哂高級。有口感之餘，材料配搭又富新鮮感，豆腐加溫泉蛋嘅味道同質感都好正～小食仲嗌咗烤洋蔥圈，份量好大又炸得卜卜脆～意粉落足明太子，食落卜卜噉好有口感，仲擺咗舊大啡菇加啲生菜喺上面，唔會咁齋。Cocktail 唔好預期太多，叫咗一杯 popping tequila 同 screwdriver，可能本身嘅酒品質唔係咁好，所以酒精味好強甚至嗆，調酒嘅份量亦未能控制得好。雖然呢度嘅飲品麻麻，但食物絕對可以搭夠，論食物味道、質素都維持得好，有實力！…Read More

呢晚同家人嚟食片皮鴨，依家滙豐信用卡做緊優惠，$878（加一）就有個四人餐。唔知係咪餐廳比較細，所以好似趕著要我地交枱噉，一坐底就問我地要唔要落單，因為未齊人所以叫佢等等，點知冇幾耐又有另一個嚟問我地。到食嘢嗰陣，啲店員做嘢真係快手喇，夾緊最後一啖佢已經行埋嚟準備收碟，食咗一個鐘就走埋嚟話 last order。其實店員態度又未至於無禮嘅，但成餐飯真係食得好趕...有兩款小碟嘅前菜，海皇羹同蝦球，海皇羹又真係俾我食到舊燕窩喎～我地另外叫咗個韮菜撈蛋煎餅，韮菜多但就冇咩蛋香味，都幾大舊再加上皮厚，所以食落覺得好飽。見到旁邊嘅職員成晚都喺度切鴨，大大隻烤鴨馬不停蹄噉上。主角出場了！呢個喺入座時就要叫定，因為需要45分鐘預備。五個人每人都夾到3-4塊，仲有啲鴨剩底可以直接食。味道就一般般啦，又唔算好多肥嘅。之後仲有幾樣小菜同蔥油拌麵，個人就略嫌麵條有啲乾。最後仲送兩個芒果冰皮，可以選擇帶走或即場食。總結成餐飯感覺食得好趕，雖然訂位時有講明 1.5小時內還枱，但自一坐底就已經俾人催嘅感覺，食物都唔錯嘅，但亦算不上特別出色。…Read More

平日都好少嚟東涌，今日做完嘢經過呢度想搵地方食飯，發現唔少餐廳都要排隊等位，但呢間泰國嘢反而冇咁多人，雖然都等咗 5-10分鐘先有位。Lunch set 約 $50-60，但野飲就要另加錢。正值午飯時間，加上店舖唔大，所以搭枱係必須㗎喇，可惜張枱比較細，兩個人坐埋一邊覺得有啲迫。嘩，呢個冬陰公金邊粉紅到，一上枱就知出事了。飲一啖湯超辣，辣在佢嘅酸味好重，而且好多油，要食哂成碗麵實在少啲功力都唔得，好在配料都唔少嘅。最後都忍唔住嗌多杯凍檸茶解辣。好彩炒金邊粉都唔差嘅，配料同冬陰公嘅大同小異。…Read More

呢日去到大圍想搵間少人啲靜啲嘅餐廳食晚飯，行到積存街見到呢間酒吧，環境唔錯，望吓個餐牌，有二人餐 — 頭盤、湯、主菜、甜品都包，都唔算太貴喎~鍾意呢度夠寧靜，入面唔大煙味，又唔會好嘈，好適合嚟傾計～上菜前店員俾咗盤西班牙蕃茄包，比一般嘅西餐餐包好好多。套餐嘅係粟米忌廉湯同 caesar salad。龍蝦夠哂大隻，意粉唔係用啲咩出色醬料或用好多材料，反而能襯托出龍蝦嘅味道。肉眼扒都唔錯，有啲脆邊，特別之處係配咗焦糖菠蘿，估唔到又幾夾喎。最後仲有甜品，係熱情果芝士蛋糕，味道都幾甜，但好彩佢嘅份量唔大，唔會食到滯。…Read More

自從銅鑼灣嘅 v point 起咗之後多咗好多餐廳選擇，呢日嚟搵朋友食午飯就跟佢嚟食著名嘅烤雞～一嚟到就俾呢度開揚嘅景色吸引住，仲要咁啱有窗口位坐，一路食一路俯瞰成個香港島，真係以為自己食緊高級high tea~雖然只係用最簡單嘅材料都好好味，而且勁多芝士，用嘅 mozarella cheese 較淡味，同時平衡返午餐肉同泡菜味道，只是好快凍咗，同埋食落就較乾。烤雞可以揀 half&half，一次過試兩種味道～比起炸雞，我更加欣賞呢度烤雞嘅做法，較健康之餘又不失脆感。呢度更是貼心噉提供咗手套同夾子，好讓我地可以盡情食雞～即使係 half half 但份量絕對唔少，果味蒜香味嘅味道清香，有陣陣檸檬/橙香；而黑椒都唔錯，但可以再辣啲就會更惹味～我仲叫咗杯柚子沙冰，清甜又涼透，係解暑嘅好飲品～…Read More

喺門外見到呢間餐廳可能會以為佢係日本餐廳，但其實呢度係專做台灣地道菜嘅！一身木色打扮同傢俬都滲透出一陣台灣古早味～店內可以見到師傅嘅煮食過程，見師傅好認真仔細，每次都會量過麵條重量再煮。牆壁上嘅毛筆字寫咗師傅嘅宗旨 — 唔用味精！見到呢句都食得放心啲喇。果然係主打牛肉湯底，牛肉麵有好幾款嘅選擇，另有啲台式小食。皮蛋豆腐冰涼清爽，上面加咗整半個皮蛋，再撈埋啲木魚絲同豉油膏，啱哂夏天熱辣辣食又開胃～百頁豆腐同我想像中有啲唔同，但質感都唔錯，清清哋配甜醬又幾好喎。湯底應該熬咗好耐，散發出清甜嘅牛肉味，但又唔會太濃而遮蓋牛肉味。牛肉同牛筋都唔少，牛筋比較軟熟，反而少咗啲彈牙感，牛肉嘅質感幾好，幾入味～蔥油麵嘅油份量控制得好，唔會食到好膩但麵條又唔會好乾，惟肉碎比較少。…Read More

第一次食和氣食堂已經覺得唔錯，係值得再嚟嘅餐廳。難得今日又嚟黃大仙食晚飯，仲唔畀我揾到機會再食？店入面差唔多坐滿曬，好彩去到啱啱好有位～朋友拍版嗌咗呢個沖繩風沙律。一嚟到見到啲綠色 一條條唔知乜嚟覺得好奇怪，朋友介紹之下先知道原來係沖繩特產海葡萄～係好有益嘅食物，真係恕小妹無知啦。咬落脆卜卜噉又鹹鹹地幾易入口，真係長知識了。呢個黑松露鵝肝卷係幾特別，但口感就唔算太好，唔知係煎得太熟定點。白咖喱烏冬係呢度必試嘅食物！好大份又creamy ，忌廉同薯仔一齊打到起泡，翻開佢原來入面仲有好多咖喱！雖然冇乜配菜，但豐富嘅口感都搭夠。呢個泡飯都幾過癮，魚湯好鮮甜，但啲配料就有啲乾。如果可以落多少少油去煮啲料會更好。食飽唔夠候要填飽埋個甜品胃，所以嗌咗個抹茶雪糕。不過唔係一般嘅雪糕，而係阿法奇朵 (affogato) 雪糕。本身係意式甜品嘅阿法奇朵係用熱咖啡淋上雪糕，但呢個竟然用咗抹茶!! 抹茶淋上抹茶雪糕簡直就係雙重享受，實在夠晒創新又好食。試過兩次呢度嘅嘢食都冇令我失望，希望嚟緊有機會再試埋其他～…Read More

食上海菜嘅癮間唔中就返嚟，所以今日拉埋朋友陪我食呢間 《上海姥姥》。感覺呢餐飯嘅食物平平，而服務態度亦唔稱得上好好，成餐飯有啲覺得俾人催住交枱咁，食得好趕。簡簡單單點兩個麵食 — 擔擔麵同蔥油拌麵，另加一籠小籠包，食上海菜必食！麵條雖然係用心機手打，但技術麻麻，麵條嘅粗幼唔太平均，湯又唔覺好惹味，有少少鹼水味同頗多油。蔥油拌麵嘅麵條粗幼問題如同擔擔麵，用蔥油撈固然會比較油，香蔥味亦唔太出，整體嘅味道淡，可能加返個排骨（$23）會好啲～小籠包總算令我哋冇咁失望，皮嘅厚度適中，入面都唔少湯汁，入口微暖，幾好。雖然呢餐食物唔算好差，但亦都唔算出色，服務態度亦麻麻，試過一次就夠了。…Read More