kitying0215's Profile

朝早想買咖啡嘅時候，排到前去店員處理緊單據 ，期間無理會過客人，以為等一陣完成咗就可以落單，點知當我忍唔住出聲，佢先話壞咗一部機接唔到單。佢地一早知落唔到單又唔早啲同客人講，唔好意思都冇句，服務好差！…Read More

雲在線一向都係我既食堂，豬頸肉酸辣同魚湯米線係至愛。但最近佢既環境衛生差左好多，短短半個鐘已經有3-4隻蒼蠅停留係張枱，有啲過份。而且入去一陣已經有蚊咬，明白餐廳有好多外賣出，人手唔夠，但都唔可以忽略衛生，以免食到客人肚痾！希望可以盡快改善！…Read More

行完山去鰂魚涌搵嘢食，見到呢間小店好似好chill咁，見佢好特別有得配果昔就試下🤣叫左千島風情熱狗+大薯條+藍莓果昔，大薯條比我想像中少，唔知細薯係咪少好多。熱狗係用排包整，比較少見，味道不過不失。果昔好好飲，好似似緊藍莓乳酪咁，呢個值得一試。不過價錢有啲貴，呢個餐要$91，但勝在環境靜，唔多人，可以坐下。…Read More

疫情尾聲終於可以出街抖下氣搵下野食，是日去左荃灣食吉列牛，下午2點去到都等左差唔多半個鐘，果然食好野係要等待🤣入座之前店員已經叫我哋揀定嘢食，我地簡左板燒吉列牛（$118）+$20轉套餐（午餐），有飯有糖心蛋。個飯有飯素，好好食，差啲唔夠食😂吉列牛都好好食，份量都唔少，有十幾塊，將啲吉列牛煎到好脆，好香口，性價比高過日本既京都勝牛😂不過鐵板好快就燒完，要叫店員加火。呢間舖頭而家好似都開咗幾間分店，下次會再去試吓其他款式既牛😄…Read More

之前無意中見到網上有人推介呢間餐廳，朋友生日就決定去試一試，仲可以預先安排定甜品寫生日字句，好好服務👍🏻叫左個3-course lunch menu，頭盤有沙律，麵包同湯，全部都好好食。主菜係炭燒肉眼扒，價錢係$198，初頭以為好細舊，原來都食到好飽，仲好香嘅炭燒味。呢個午餐嘅性價比都幾高，不過睇返dinner既話都唔平，有機會都會再去試下！加$45仲可以order甜品同寫字，餐廳安排得好好唔使再講佢就拎出嚟，俾到朋友驚喜😀仲好好食，好流心！…Read More

行過銅鑼灣，諗唔到食咩，即興入咗Outback食晚飯。因為疫情關係都比較少人，所以唔使訂位都可以直接入去食。兩個人都唔食得太多野，淨係嗌左兩款食物，加埋每次都會提供既黑糖包，兩個人夠晒食。第一款係每次去Outback都必食的芝士白汁燒蝦寬麵，食落辣辣地，都有唔少蝦。望落好似好細碟，其實分量都唔少。第二款係燒雞肉芝士夾餅，第一次試，食落又唔錯，不過可能兩個菜都係芝士為主，感覺上好快飽左，薯條炸得都好香脆，整體不錯。…Read More

朋友生日，想搵一間餐廳，有甜品可以寫字當做生日。咁岩撞到限聚令，餐廳好好咁用圍板分隔開好似一個包廂咁，令客人食得安心。兩個人嗌左4樣野，食到好飽，樣樣都好好食。淨係影左下面兩款食物：本身唔太好牛油果，但依個食落冇牛油果嘅味道，食落好清新，作為前菜來講唔錯。仲有依個肉眼扒，非常推介，啱啱五成熟，好冧，而且切左先上菜，食落好方便。雖然依間餐廳貴左少少，但一分錢一分貨，服務都好好。可以預先用wtsapp訂甜品，食晒主菜就會上菜，服務亦很好。…Read More

友人生日本來想食心夜來潮，見到好多人食緊海鮮鍋都覺得好吸引，所以就轉軚食呢個。原來麻辣派同心夜來潮是同一個集團，前者係食海鮮鍋，後者食小菜。好彩臨時都有得點海鮮，侍應話平時要book的。依個係5人份量，併出黎幾靚，打卡一流，海鮮都幾新鮮，有6款唔同海鮮，仲有啲菜墊底，最欣賞既係扇貝有粉絲 好好食😆中間既麻辣都幾好，不過我地唔太食得辣，所以點下就算🤣 加$68可以任食火鍋配料，雖然款式唔多，但可以食到3個鐘都幾好～略嫌座位唔太舒服，係窄而長既木椅。…Read More

放工去新都會廣場食飯，間間都好多人等位，見到依間餐廳冇乜人排隊，又唔想等就走左入去，點知咁就中咗伏🤬🤬🤬。點餐嘅時候以為冇乜問題，見侍應已經落左單，點知隔離枱遲過我地入都有嘢食。原來係佢冇落到單！！即刻搵第二個侍應出嚟，但無人理我地，叫左好耐先有人應。而且態度很差，浪費咗我哋好多時間😡而且食物方面又唔係特別好食，杯凍朱古力好似溝水咁，雖然佢都唔係貴，係$70-80左右，但係都唔會再去，無乜值得去既地方😟…Read More

見依間小食店新開無耐都幾多人排隊，個menu都幾多野食簡，有腸粉、撈面依啲大路野食簡。我叫左個脆薯猴頭菇，之前未見過炸既猴頭菇，通常都係要黎煲湯，就買一個黎試下😅等左4-5分鐘就炸好，比想像中快。25蚊一個，都算公道。賣相都幾靚，唔會話炸到好黑，分量亦唔少，有脆薯角同炸猴頭菇，今次簡左椒鹽味，都幾惹味🤤個猴頭菇食落似雞肉，唔覺得食得齋，值得一試👍🏻 見佢可以簡陳皮粉/咸蛋黃醬，都幾得意，下次行過會試試佢😛…Read More

上星期親友舉行婚宴，上菜非常快，但收碟亦非常快，好像趕住收碟咁，食到食唔切，好似將食物倒落口咁。明明已經8:30已經開位。員工態度非常差，差不多上完菜之後，幾位員工在後面大聲說「好野，收得工！」，態度奇差。而且從不主動幫客人添飲品，只顧收碟。雖然可能只係炒散，但會令婚宴客人非常不開心，希望不會再有依啲事發生。因為主人家買了橙，但員工漏左派，以致一桌客人沒有橙，最後有淨被另一桌客人取了，員工以極惡劣態度鬧人😡😡真係唔知咩人黎！…Read More

Lunch time去食都幾多人，4個人叫左4個餐，味道不過不失。辣子雞，好多辣椒，真係幾辣，啲雞都嫩滑，但炸果陣應該落好多粉，好多空心無雞肉。酸菜魚，幾好味，都有好多魚，但略嫌太多油。上面係香茅豬扒，我覺得咁多個餸入面，呢個係最正路，同平時出面既差唔多，而且分量都唔少。下面既係麻婆豆腐，睇落好似好辣，但食落唔算好辣，但都係好多油。每個餐都配飯或擔擔麵，我叫左菜飯，清清地，有少少味道，唔似白飯咁齋，分量都唔少。總括黎講，大部分既餸都好多油，不太健康。…Read More

大學同學一直介紹依間好時，所以開返之後就去試試。裝修之後間舖都幾大，有好多位，星期日7點去到都唔駛等位。坐低睇個餐牌，發現入面好多野都好平，加上大家都好肚餓，所以叫左好多野食。最印象深刻既係以下3樣：第一係加多加多，本身唔知係咩，抱住咩都試下既心態黎試，幾有驚喜。佢似係沙律，但啲醬係暖暖地，似沙嗲汁，入面有好多唔同既菜，有梨子同蝦片，幾特別。不過佢啲醬會令人好快飽，多人share會好啲。第二係海南雞，我地點左半隻，都唔錯，好滑，雞皮好薄，可惜無叫到油飯，海南雞加油飯應該係絕配。第三係叻沙，點果陣以為好細碗，點知黎到都幾大碗，個湯好重椰漿，所以食少少都好快飽。但入面都幾多配料，如肉魚蛋豆卜等，幾足料，味道辣辣地，但如果唔加咁多椰漿會更好。略帶一提，入面飲品都幾貴，而且款式好少，唔抵飲。但野食係抵既，叫到擺滿張枱都係每人一百蚊左右😆…Read More

如果唔係同事介紹都唔知工廈入面有間西餐廳，入面環境好舒服，仲有free wifi~點菜時侍應會行埋你身邊落order,幾特別～先黎一個洋蔥湯，認真嘛嘛，有啲腥腥地既味道。餐前包都有幾種，都幾鬆軟。4個人分一小籃既麵包，但入面唔係每種都有一樣數目，以致未能嘗試到全部口味,依個有啲扣分！前菜我點左泰式烤雞木瓜沙律，食落感覺好fresh，少少辣，幾岩香港人口味，而且好開胃。賣相都唔錯，好colourful，幾吸引的！主菜點左個肉眼扒，叫七成熟都係岩岩好，幾有驚喜，因為出面好多都係會過熟。依個牛扒好冧，唔會話好多筋咬唔開。旁邊有啲關東煮既白蘿蔔，幾特別，好少見咁既配搭😝…Read More

朋友推介我地食印度餐廳，未去之前已經打電話去book，唔識去仲可以叫埋餐廳老闆去東涌地鐵站接我地，真係好有人情味既小店。舖頭唔算好大，入面2張枱出面有4、5張。老闆係印度人但識少少廣東話，所以唔驚溝通唔到，而且仲好好人。7個人嗌左2個二人餐，再加啲小食。推介以下其中三樣。叫左個咖哩羊，好香好濃，但唔太辣，好岩香港人口味。仲配埋烤餅，味道好夾，如果有飯就更加好！仲叫左胡椒烤餅，顏色好靚，幾吸引！食落好香脆，好香胡椒味但唔會辣。用黎做餐前小食就一流！如果佢唔係咁多莞茜，我會更中意！最推介係芝士薯條，好香脆，好濃芝士，仲可拉絲，佢係幾種芝士混合而成，好少食綠色既芝士呢！食完好想叫多個，不過太飽喇，下次要再叫！最後食左7百幾，都唔算貴啦！…Read More