samwoo18's Profile

仲記得大半年前同女朋友嚟食，pizza個餅底勁鬆軟，黑松露薯條炸得又香又脆，但今次嚟食真係大失所望！嚟到見到份menu轉曬，有啲舊嘅菜式都冇咗，估緊係咪已經轉咗手。叫咗set menu，四百幾蚊有兩份頭盤同兩個主菜，仲有甜品同野飲，份量好夠但食物質素唔得。1. Buffalo wings炸到好乾，硬到咬得好辛苦2. 煙肉薯條面頭一舊舊啲煙肉直頭硬到咬唔開，啲薯條又係overcooked，炸到好硬🤡3. 個pizza一黎到我地都呆左，個樣好似跌過落地咁，又係焗到好乾好硬，好彩面頭有啲burrata cheese，如果唔係真係食唔到4. 牛扒叫做成餐飯唯一比較好食嘅，可能因為唔係炸嘢，所以冇overcook🙃特登由港島區搭車過嚟試，但應該唔會再有下次了😤…Read More

1pm去到佢啱啱開鋪，見個紋身女人喺入面hea緊，叫咗好多聲唔該先肯出嚟🙄Order咗個三文魚反卷， 全程對答塊面勁燶，語氣又差！大佬啊，我唔係要你畀酒店級服務態度我，但依家搞到好似我係淋你紅油殺你全家咁😡😠😡😠畀完錢之後塊牌係掉畀我哋！！！我同朋友喺側邊等，望住佢整完攞咗出嚟，完全冇叫過number就咁放低就死返入廚房，個感覺似係鬧緊「食屎啦你」其實葵廣好多舖都食物同服務態度兼高質，食爭鮮都無咁嬲~…Read More

六點半左右嚟到，佢話限時食兩個鐘一開波出去salad bar攞咗啲沙律同熱食（有凍蝦、煙三文魚、豬頸肉、燒茄子等），之後上main course（ 叫咗牛扒、羊架、蟹肉意粉）質素尚可，但去到七點半再出去望下，salad bar已經清咗九成嘢食，等好耐都唔見佢有refill；甜品還好，出咗兩三轉如果係七點幾八點先嚟食dinner，即係佢哋畀四百幾蚊淨係食一碟main course🙁（偽semi-buffet)…Read More

今日出葵芳睇戲，就順道過葵廣掃街啦！經過哩間野，剛剛想食D甜野，就叫咗個鯛魚燒配雪糕($26)。佢話等6-8分鐘，點知一等就等咗20分鐘，真係等到無哂胃口兼面燶！！！算，諗住等咁耐又咁貴，質素應該唔差啦，點知……雪糕無奶味，口感好削，好明顯係為咗慳成本溝稀咗，牛奶公司都好食過佢；個鯛魚燒雖然係即整，熱就夠熱喇，但一D都唔脆，最大鑊係……食到個「魚尾」位係唔熟架！！！！一pat pat又濕又粉，真係食到想嘔！好後悔啊，早知食其他雪糕店好過啦！…Read More

無甜不歡既我，格仔餅係我其中一樣至愛，仲要多花生醬+煉奶先夠滿足，而鴻記既格仔餅就係少有地做得質素高而穩定。厚厚既格仔餅，即叫即整，咬落好鬆脆，蛋味夠香；入面既花生醬同煉奶多到漏出黎（睇圖都見到），入面仲加左d糖同花生粒，香甜得黎又有口感，真係勁正！！！真係要彈既就係價錢，都幾貴吓，$17一底，所以幾鐘意食都唔可以成日食，不過……少食多滋味嘛:)…Read More

同屋企人遊長洲，行到夜晚就入左哩間小菜館食dinner。叫左個$198四個小菜既餐，有肉有海鮮有菜。蒜蓉白菜仔：無乜特別，所以無影相。西檸雞：個西檸汁做得幾好，酸酸甜甜，又唔會太稀，份量又夠多，令每件雞都掛到D汁上去；炸雞都唔錯，夠juicy，略嫌炸粉厚左D。豉椒炒蟶子：肉唔算肥美，但夠多，最重要係無乜沙，食得放心D。蒜蓉粉絲蒸蝦：哩個就麻麻地，蒜蓉略帶苦味，D蝦肉好梅，唔太新鮮。每人大約$100就有咁多野食，都無乜投訴lu~~…Read More

同朋友食完lunch，行過Apita，就順路去Italian Tomato買件cake做tea。數數手指都有超過5年無食佢D cake喇，記得以前佢D cheesecake係超級好食，芝士味勁濃，所以都滿心期待咁買番屋企，點知……（左）朱古力芝士蛋糕：面頭既係好濃既朱古力，類似mousse，但就dense好多，幾香滑，又唔會甜到膩。底層既就係new york cheesecake，做得好差，一D芝士味都無，仲要起粒粒，完全唔滑，感覺似係食緊舊起粒粒又雪到瓊埋一舊既忌廉！（右）New York Cheesecake：即係左邊件cake既下半部份，不過係成件都係cheesecake，亦即係成件都係起粒粒又雪到瓊埋一舊既忌廉，sosad =-=咁既野都要成三十蚊件，非常失望，無下次！！！…Read More

大年初二，唔想又食D乜糕物糕，所以落左東大街搵野食。見哩間開張無耐既西餐廳，D lunch set都係$6x~7x，仲要免加一，所以就黎試試喇！佢有4個lunch set，包一個main course同是日餐湯，野飲就再另加錢。今日既餐湯係羅宋湯（無影相），湯底好濃，酸度偏高，D茄膏應該落得幾重手，幸好尚算足料。火腿煙肉卡邦尼意粉($60)：個白汁好杰身，芝士味好濃，但又唔會太肥膩；意粉就較港式，比較淋身；成碟野既份量比一般西餐廳較多，都幾飽肚！豬排配薯菜($72)：豬排好淋，但就比較多肥膏；反而個薯菜做得好出色，薯條炸到好脆身，又唔會好油，份量又夠多，唔錯！可能係新開張，加上新年，所以唔算多客，服務幾周到，又會講解下D菜式，又會不停幫客人加水，不過杯水都幾酸，真係似餐茶杯熱檸水咁！同埋佢鋪面寫住D野食無加味精，所以D食物的確係偏淡，但就健康D~~…Read More

襯爸爸放假，又陪佢黎浪漫一番~~刺身：非常新鮮，聽店員講佢地D貨係由對面間批發店直接提供，咁唔怪之D質素咁高啦！生蠔：店員細心介紹每款蠔既出處同特色，爸爸話雖然唔算肥美，但都係好鮮甜！餐湯：係磨菇湯，好多菇菇碎，口感好rich，湯底就略嫌唔夠creamy~沙律：上面係parma ham，下面係凱撒沙律；會跟個油醋醬同凱撒沙律汁，D菜好爽脆，parma ham亦唔會太咸，配埋個醬汁，酸酸地幾開胃！卡邦尼意粉：汁唔算多，但夠濃；意粉無overcook，唔會太淋；D煙肉就肥得濟，如果煎走部份肥膏先加落個意粉度會無咁heavy！ 羊排：肉質好嫩滑，叫左medium就真係煮到剛好5成熟，唔會太生或者太熟，good!!!食物質素高，環境唔錯，服務都唔差，值得再黎過！…Read More

爸爸一向都好鐘意食雞煲，對面間「長今」係佢至愛，差唔多個個星期都會同同事食；但佢話想試試哩間，所以今晚就同佢試吓啦！雞煲（半隻雞+中辣）：唔算太辣，但個汁非常香，應該落左好多香料去煮；D雞好滑，爸爸話仲嫩過長今雞煲D雞！響鈴：即炸的，非常脆，但就油膩左D，少食多滋味，兩個人KO就有D吃力了！墨汁墨魚丸：店員極力推介，話好重墨汁味，但個人就唔太覺，可能個雞煲D汁搶哂D味。田雞：好鮮甜，肉質彈牙，正！豬天梯：即係豬既上顎，又係店員推介，但超級唔掂！！！好硬，無論烚兩秒定廿秒都係咁硬，硬到咬唔開。結果叫左店員換左第碟野，好彩都比換，唔係就徙左了！豬頸肉：哩個就係放棄豬天梯換番黎既，終於咬得開，不過上檯時見到D肉係浸住油，應該係想令到D肉入口滑D，所以加左勁多油；但同時間應該都落左好多鬆肉粉去醃，搞到D味好怪，濃濃既雞汁都遮蓋唔到~~肥牛：唔太肥，兼肉質鬆化，唔錯！芝心丸：街市雪藏貨，no comment~總結哩餐，個雞煲就唔錯，但打邊爐D配料就一般啦！不過眼見都爆哂場，D客甚至排到過對面長今間鋪，睇黎長今有對手lu~~…Read More

知道哩間野最出名係burger，但差唔多$20個，本身對burger又唔太感興趣，所以就揀左我最愛既焗豬喇！$40唔包野飲，其實都唔平架，所以都對佢有幾高期望。講真，我就覺得麻麻地。首先面頭係無芝士，哩個真係幾失望；其次就係個汁，少得黎又得個甜字，好似落左好多糖去煮咁，完全無茄味，似係「白糖+紅色色素」煮出黎咁；豬排都算淋，但超薄身，完全無果種「啖啖肉」既滿足感！如果$30連野飲都OK既，但哩個價錢……應該無下次lu~~…Read More

爸爸過兩日生日，所以同佢黎哩度食生日飯。頭盤食左三文魚刺身（好新鮮，好肥美）、煙三文魚（唔會過咸）、芝士配cracker（有5款芝士揀）、雜果沙律（生果以蜜桃為主）、鵝肝醬拼多士（無咩味，可以唔試）。熱盤就食左芝士香橙焗豬柳（完全食唔出有橙味，但塊豬柳好淋）、紅酒燴牛尾（非常淋，肉中又有D筋，好味）、焗羊肉（羊肉夠騷，但個汁好咸）、青咖咖雞（分少辣同大辣，我試左大辣，不過都唔算好辣；個汁好香，但雞肉就偏un）、白汁蝦肉釀魚柳卷（哩個好難食，好大陣「簡」水味，落重白汁都遮唔住）、焦糖焗肉排（D肉好un，個汁好甜，隻味好怪）、海南雞飯（雞其實係白切雞，都算有D雞味，但例牌用雪藏雞，所以預左唔會話好好食；反而個油飯就好得，好香雞油味，又唔會煲到D飯淋哂，用黎送雞一流）、酥炸魚塊（勁多骨，又咸到痴線，食左啖都忍唔住吐番出黎）。甜品就試左bread pudding（個雲尼拿汁好甜，麵包就用左牛角包果隻包，幾好食）、blueberry cheesecake（好濃芝士味，質感夠dense）、伯爵紅菜moouse cake（紅茶味濃，甘甘地，幾好食）、綠菜紅豆cheesecake（完全無芝士味，似普通綠茶紅豆海綿蛋糕）、chocolate brownie（同blueberry cheesecake一樣夠濃味，甜度十足，味道似Mrs. Field果隻brownie）、夾餅配花生醬&白糖（佢係一早整定，所以我攞左去隔離既麵包爐焗番熱，加埋任落花生醬同糖，正）、雪糕（有H字頭同M字頭兩款名牌子）、楊支甘露（夠杰身，都有少量唔甜既芒果肉同西柚肉，好重花奶味，略嫌唔夠甜）。用openrice coupon加埋cash dollar，每人二百幾啦！…Read More

一直都唔鐘意食中餐既我，因為覺得中菜好油，貴價又唔飽，所以都好少食。但今日因為喺長沙灣開工，同事話附近有間無味精既中菜館，見佢咁落力推介就黎試吓係咪真係咁正啦！佢既午市套餐大約$50，包例湯、一碟油菜、一款小菜同白飯，我地三個同事就叫左三碟share~~例湯：每碗都有兩、三舊青紅蘿蔔；加上飲得出真係無味精，只係用左好少鹽去吊味，清清地，唔錯！沙爹牛肉炒西芹：唔算太重沙爹味，所以唔會過咸或者過油；牛肉夠淋，最好係佢無勁落鬆肉粉，所以D肉唔會被"la"到梅哂；西芹好爽口，無揸！梅菜蒸肉餅：坦白講，完全食唔到有梅菜（好彩我本身都唔鐘意食梅菜je）；肉餅偏薄，口感欠奉，但勝在唔多肥膏，而且夠鬆化，已經好過坊間好多茶樓D肉餅架喇！沙薑雞：唔會太咸，雞都幾嫩滑！食物質素係唔錯，比出面D中菜館少油少鹽，份量就偏少喇（對我而言），不過偶然想清清腸胃，哩度係個唔錯既選擇:)仲有一樣抵讚既，就係佢地方好闊落，環境好寧靜舒服（可能地點比較隔涉，人流較少），我地幾個坐喺度吹水吹足幾粒鐘，D侍應不單止無黑面，仲不斷幫我地加水，環境同服務真係加哂分！！！…Read More

同爸爸行完花園街，搵吓邊度可以食dinner，就比哩間野門口D串燒吸引左入去。入面分兩層，樓上就大D同靜D，但因為唔想上樓梯，就揀左坐樓下。叫野食先~~~馬拉盞炒芥蘭：一上檯就聞到好香，芥蘭炒得好爽脆，不過就略嫌重手左，咸左少少。紅咖哩牛肉：雖然叫紅咖哩，但完全唔辣；咖哩汁好重椰奶味，D汁都好多同夠杰，所以叫左個白飯撈黎食；但D牛肉就超唔得，明顯係用勁多鬆肉粉「喇」過，搞到完全無哂牛肉既質感同味道，難聽D講：真係似腐肉！串燒沙爹豬肉+雞肉：哩個就係吸左我地入餐廳既串燒，個沙爹粒好香口，又夠多花生粒，好有口感；但D肉就燒到嚴重overcook，又老又鞋，全無肉汁，真係徙左個沙爹汁！泰式生蝦：食滿$200可以用$1買既，咁平都無咩要求架喇！唔算新鮮，但個汁就酸酸辣辣，幾惹味。泰式炒金邊粉：超唔得！！！！完全無味，真係同白灼差唔多，加埋青檸汁同辣粉都唔掂！失敗！！其實野食唔好食都唔係最差，最致命係有個大大隻既男侍應係咁用粗口同廚房D人高談闊論，咁啱我地就坐喺個open kitchen隔離，所以全餐飯都要用粗口送飯，真係勁滋擾:(…Read More

今日又放半晝，又同同事黎左哩間醫肚。今次唔想食烏冬，望望menu，set lunch話叉燒炒蛋飯係皇牌，就試吓有幾好食先~~個樣望落真係幾得，不過食落就有D失望喇！炒蛋係幾多，不過就炒到過左火，唔夠滑，亦無咩蛋味；叉燒係切成粒狀，都算多，但就好多肥膏，如果用半肥瘦叉燒會好好多！面頭有丁咁多豉油，只係夠幫D炒蛋吊味，墊底D白飯係完全無豉油撈，所以好乾。雖然話係皇牌，但黎哩度都係食佢D手打烏冬穩陣D喇！…Read More