cookiegeorge's Profile

剛巧經過，店員派咗張傳單畀我哋，覺得幾吸引，又唔算貴，所以就叫咗嚟試試。我哋兩個人，分別叫咗吉列豬扒太陽蛋飯配黑椒汁，同生炸雞髀熟蛋薯條配黑椒汁。(兩樣都有飲品送)一嚟到個賣相已經好吸引，冇諗過上面會有一條矮瓜，係期望之外的。首先講吉列豬扒太陽蛋飯，個豬扒好入味，好鬆軟，咬落去一啲筋都冇。而生炸雞髀亦都好入味，冇唔熟或過熟嘅情況，肉質仲好juicy，唔乾唔柴，雞皮亦炸到好脆，整體十分高質！店員仲送咗辣醬同他他醬畀我哋點嘢食，兩個醬都好好味，我點唔晒唔想嘥，帶咗返屋企。😀呢間嘢食好好味，非常滿意，一定會encore！P.S. 冇影到相，只影咗ig story，張相係喺ig story度cap返出嚟，所以有啲矇…Read More

之前有網友推介大埔大方食家嘅墨魚丸，我就上網搜尋一下相關資料，都標榜手打墨魚丸係冇加豬肉冇加粉，網上嘅評價都非常高。所以今日趁放假專登揸車去食，點知食落去有粉有肥豬油(好明顯)，只係一粒街市買到嘅墨魚丸，好失望。再上網search一下，對比下發覺粒墨魚丸嘅外型都好似唔同。及後先得知原來係師傅唔得閒整墨魚丸，所以d墨魚丸係攞貨返嚟😨。乜咁都得架咩？我專登花咗幾十蚊車錢同半日時間(之前仲成晚上網search)，滿心期望去搵佢，換嚟五粒肥豬肉街市墨丸，仲要同樣收我$38。講真，如果師傅真係唔得閒整墨魚丸，又想做生意，係咪都應該有誠意d買返d手打墨魚丸俾客人？又或者通知一下客人？我唔會再去了，因為我唔會知師傅幾時有mood整，幾時冇mood整。好失望！奉勸大家落單前問一聲"今日係咪師傅手打墨魚丸……"唯一值得讚，係杯紅棗豆漿幾好飲。…Read More

最近初初搬嚟大圍附近居住，聽網上好多人講話呢間車仔麵好好味，所以就買咗外賣試下。我哋叫咗兩碗，一碗酸辣湯底，一碗清湯底，湯底非常好味，夠濃。其實最欣賞嘅係啲餸，兩碗共叫咗六個餸，每個餸都好高水準。先講咖哩魚蛋有魚味，咖哩夠入味，豬皮夠爽口夠入味，水魷分量多夠晒爽口，韭菜夠新鮮，鹵水雞翼夠入味 ，唔會太硬又唔會太淋，剛剛好。當中我最欣賞嘅係白蘿蔔，真係超級好味，完全冇渣，非常清甜，質感好好軟綿綿，又唔會淋到冇咬口。最後佢仲畀好多蔥同芫茜，成碗好大碗，好夠味，好豐富！我哋仲叫咗十粒燒賣，好食呀，入貨有質素！ 整體來說非常滿意，感覺每樣食物都有誠意，可以encore無限次！…Read More

我本身在觀塘返工，好喜歡食魚肉燒賣，去呢間買過幾次覺得ok，加上貪佢有好多醬汁可以自己選擇，得閒放工就會去買小食。點知越做越差，越收越早。首先，說好了的醬汁已經消失，淨返d劣質辣椒油。另外有一次，我放工放7點，見佢個爐好似冇燒賣了(之前佢收夜d)，就問佢仲有冇，佢話有，然後就唔知喺後面邊度俾咗一碗我(已經"筆"好的)。我食落去，好明顯已經放咗好耐，唔太熱，有d色仲變咗。為咗賺多12蚊，俾本身係垃圾嘅嘢客人，過唔過意得去？到今日，事隔四五個月，我本身已唔記得咗呢件事，放工又想食燒賣，就打算去買，行到埋去又係見個爐冇乜嘢食了，又多口問句係咪冇燒賣喇？點知收錢嗰位(唔知係老闆定店員啦，似老闆嘅)，用好串好囂張嘅語氣話:"有！聽日呀！"......嗰吓我堅想講粗口，但我為保儀態我冇😂。 洗唔洗咁呀？唔想做可以唔做㗎，冇人逼你做。呢單嘢我嬲到要上嚟寫衰佢，但原來上到嚟發現唔寫都夠衰😆！我希望呢間嘢快點完成使命，俾返個舖位有心人做！希望願望成真~…Read More

見公司對面新開咗間泰國嘢，即刻走去試吓。第一次食lunch但冇影相，叫咗個泰式雞肉炒飯同泰式濕炒海鮮河，份量好足好大碟，味道好好，每個lunch只係$52，仲要包埋冬蔭公湯。一向喺觀塘食泰國菜lunch，一般都要$70-80，所以呢度$50+真心便宜。第二次去食下午茶，叫咗個海南雞船河(我走咗豬紅轉米粉)，又係好好味，d雞肉好肥美好滑(見圖)，湯底好濃，配料好足。加$可以配小食，我點咗魚餅，魚肉好滑身，香料味適中，風味十足。食完第一次後，我介紹咗2個同層朋友叫外賣，佢哋都話好食。老實講，呢個舖位已經轉咗手好多次，希望呢間高質泰國菜可以屹立啦！真心推介！…Read More

下午2點零去到，午餐餐牌選擇非常多，最後叫咗個芝士忌廉汁焗海鮮意粉，同埋香草蒜蓉蜆肉意粉。每個午餐都有跟餐湯同飲品，嗰日嘅餐湯係南瓜忌廉湯，非常creamy，口感好滑，好味。芝士忌廉汁焗海鮮意粉一嚟到，擺位好靚，海鮮算多，賣相幾吸引。味道整體算不錯，不過略嫌淡味一d，我一向重口味，要落鹽同黑椒。而香草蒜蓉蜆肉意粉係更好味，香草味同蒜味都夠濃，蜆肉亦多，夠juicy。除咗食物質素高之外，值得一讚嘅係侍應妹妹嘅服務態度殷勤有禮，十個讚！…Read More

返工前忽然間好想食車仔麵，見呢度嘅評價都幾好，就膽粗粗去同老公試下。我自己叫咗魚蛋、雞翼、腐皮配米粉，魚蛋有魚味有咖哩味，雞翼好淋軟，腐皮非常嫩滑。而老公就叫咗大腸、豬皮、蘿蔔，佢話每樣嘢都好入味，好好食！能夠每味餸都好味，真係唔容易，要俾十個讚！不過唯一美中不足嘅就係，唔知係唔係受疫情影響關係，枱面上一樣調味料都沒有。因為我本身唔食牛，所以走咗腩汁，覺得個湯底有少少淡，所以就問姐姐有冇豉油，佢竟然答冇(有禮貌的)，噢………Read More

今次係我第二次去呢間所謂冰室食嘢，上一次感覺味道ok，但係比較貴，唔係太值，本身冇諗住再去 。今次去，係因為受疫情影響，隔離左右都喺weekend關了，所以冇得選擇之下，唯有食多次。Lunch time叫咗金針雲耳蒸雞飯，等咗一段時間，碟蒸雞嚟到嘅時候，食第一啖完全唔熱，只係室溫，我完全唔明白，究竟個餐出咗幾耐冇人拎嚟，先可以凍到咁？之後我立即問阿姐可唔可以幫我叮一叮翻熱，佢攞咗碟蒸雞返去，結果等多十五分鐘佢先拎返嚟(應該係再蒸過，同埋一定係同一碟，我認得)，嚟到時，我碟飯已經凍晒(15分鐘咩都凍啦)，但我已經冇時間，好驚又要等，結果我只能夠狼吞虎嚥地用熱雞配凍飯，好快地食完，最終遲到返公司。絕對係一個不快嘅經歷，下次就算其他食肆冇開，都不會再去。btw，唔係冰室，就唔應該叫自己做冰室。…Read More

好耐都冇嚟食了，上一次已經好耐之前，記得係幾好味，今次再嚟幫襯。今次嗌咗個麻椒湯底米線，三個餸包括金菇,鮮雞絲,蠔油花膠。我十分欣賞個湯底配埋啲米線，個湯底夠晒濃味，好香好麻，啱晒我呢啲重口味嘅人，至於啲米線非常有咬口，係我喜歡食嗰種。不過奉勸大家揀辣度嘅時候要小心，我揀咗中辣，平時好食得辣嘅我，都食到個嘴腫晒！😂 不過其實老實講，我覺得啲餸係麻麻地，唔算好出色，個蠔油花膠直頭係失望，因為花膠係最貴嘅餸，要加成13蚊，但係份量好少 ，又硬又乾，一啲都唔好味，食一啖已經唔想食，同深水埗任你點車仔麵差天共地。雖然啲餸麻麻哋，但係只計個湯底同米線，都值得我畀好評。…Read More

不嬲都覺得佢d早餐好求其，不過勝在夠平 又就腳，所以都食過幾次。不過自從發生咗一件事後，令我以後冇再去過。件事發生喺大半年前，而家先醒起寫食評。 (所以唔好得罪女人，好記仇😂)話說我叫咗個咖哩雞飯，點知嚟到嗰啲白飯係生嘅，未熟透硬硬哋嗰隻。咁我就叫阿姐幫我換過個白飯啦，阿姐全程黑面，叫廚房換咗個飯，拎到埋嚟然後細細聲拋低一句: 硬啲都食唔到! 最嬲係，我食換咗個飯都仲係生㗎！換咗等於冇換！之後我食曬啲餸就走人。 之後我就冇再去過。雖然去得茶餐廳都唔expect有咩服務，但係都唔係衰到咁呀？…Read More

我叫咗個三餸米粉$45，老公叫咗個三餸油麵加埋嘢飲$55。我哋叫分別叫咗魷魚、牛栢葉、豬皮、雞翼、腐竹同埋墨魚丸，當中只有雞翼幾好味，夠入味，其他d餸都好一般，麻麻地，唔知點形容，唔係話佢唔好味，只係覺得好似喺街市買返嚟咁嘅貨色，份量又少，但講緊每樣餸都$9至$14不等。當中比較好嘅就係個湯底同埋辣椒油夠辣夠香，不過份量真係好少，我個米粉食咗幾啖就冇。食完之後唔夠兩個鐘，我同老公要走去第二度食下午茶。不過想讚一吓，職員姐姐非常耐心，對唔識用手機落單嘅客人態度好好咁教導，十個讚！整體嚟講我覺得唔係算好差嘅，不過咁嘅價錢，試一次就夠，應該冇下次了。…Read More

在fb將軍澳谷街坊推介下，去了這家小店試試。我和老公點了豬扒蛋飯和沙薑雞飯。先說豬扒蛋飯，豬扒正常鬆軟，也香口和入味，老公話係四十幾年人食到最好味嘅豬扒。😂😂😂而沙薑雞飯都超好味，隻雞入味又唔鞋口不在話下，我最欣賞嘅係啲飯淋咗啲雞汁(唔知道係咩，不過唔油的)，超香！其實我之前都試過煲仔飯，但係唔記得影相。煲仔飯又係超掂，係有飯焦嗰隻，不過就要等15-20分鐘，但係都值得嘅！試過之後，真係唔怪得知呢間食店喺將軍澳谷入面100%好評，真係可以無限encore~…Read More

見橫行內開咗間新越南嘢，即刻走去試吓。叫咗個扎肉雞絲湯河轉金邊粉，第一口試啖湯，真係有驚喜！個湯頭真係好重雞味，明顯係熬咗好耐，好清甜。而雞絲亦唔鞋口，配埋一齊食真係超正。食完即刻介紹我家姐食，第二日佢全公司都叫呢間店嘅外賣，佢哋都話除咗粉麵好得之外，其他小食例如串燒、墨魚餅等等都好得！做得出色嘅小店真係要支持吓，尤其係呢間店嘅位置唔太好，好怕佢會好似上一手米線咁好快冇咗。不過暫時見佢生意都幾好，希望佢可以做落去，令我哋keep住有得食咁出色嘅越菜。…Read More

今日同老公慕名而來，終於嚟到肥哥車仔麵品嚐一下。 我自己點咗蘿蔔、鳳爪同響鈴卷，而老公就點咗蘿蔔、魷魚、豬皮同豬手。我同老公都覺得最正係蘿蔔! 蘿蔔一啲渣都冇,醃得好入味,每舊都大大舊,食落口感一流, 超級出色! 其次就係豬手,豬手同樣醃得好入味，好lum身，食豬手就係想食到咁嘅質地，真係極度好味! 而鳳爪都係一樣好味，不過我就略嫌佢鹹咗少少，但可接受。不過響鈴卷味道就一般啦，冇乜驚喜，不過都好少食車仔麵時可以有呢個餸。而最一般嘅係魷魚，冇乜味道。我特別想讚嘅係個湯底!我自己點咗中辣（中辣已好夠辣）。個辣汁配埋個湯底真係一流，好濃味。裏面有好多辣椒碎、薑同蒜頭，如果鍾意濃味嘅朋友一定會好愛呢個湯底!呢個車仔麵係我食咁多車仔麵之中最好食嘅其中一碗， 我一定會encore再encore!by the way，其實本身我想點雞翼，不過下午兩點幾雞翼已經賣曬，應該有d料到，所以下次一定會點。…Read More

點咗個芝士熱狗，一收到真係嚇一跳，因為極多芝士鋪滿熱狗上，多到見唔到條腸。😂😂😂我呢個芝士控最like! 芝士味道淡淡嘅，恰到好處，整體成個配搭都好味! 好正!叫餐可以加$換小食，我換咗杯牛油粟米。粟米好甜，牛油味夠，唔錯!另外亦點咗個芝士薯條，應該係即炸嘅，味道ok，芝士唔算太多，不過不失。食完成餐，感覺好罪過，因為熱量應該相當驚人~😂😂😂不過因為係小店關係，只有要張小圓枱供客人喺店隔離立食，環境只屬一般。但係明白嘅，我本身都唔係太介意。…Read More