Morefoodies's Profile

深水埗一直都係美食集中地。今日試咗一間食扁肉嘅小店。上網查下先知扁肉原來係一種廣東特色美食，餡料通常由豬肉和蝦製成，包裹在薄薄嘅餃子皮。它可以用清湯煮熟或炒製，口感滑嫩，味道鮮美，係一種小食。舖頭細細，大約十零個位。見佢有套餐叫咗個腸粉+扁肉。扁肉份量都唔算少，大約10隻左右。佢嘅皮係比較滑捋捋同埋唔太厚，細細個一啖一隻。食下食下都好快食到見底😆😆蛋腸粉個人覺得都好薄，個豉油份量啱啱好，佢加嘅係甜口豉油。加埋杯豆漿，份量都就啱啱好，食得飽😎😎…Read More

芋圓控係每日自家新鮮製造。之前都有食過幾次，質素都仲keep到。呢天氣咁熱，食返個靚甜品，心情都靚啲。佢最好就係好似車仔麵咁可以自己揀所有嘢。如果有選擇困難症嘅話佢都有一啲set好嘅甜品俾你揀。今次叫咗個桂花涷加埋芋泥球，蜜紅豆，蜜薏米，小丸子配4.3牛乳。桂花涷有陣陣桂花香，淡淡的，唔太搶味配埋牛乳都幾夾。芋泥球綿密有芋頭香味。蜜紅豆唔死甜又够沙，好正。薏米好煙韌，我好鐘意呢隻口感。呢度環境都幾好開揚又光猛，坐得都幾舒服仲可以睇到少少海景，又冇時限。不過注意返堂食嘅話都有最低消費。嚟觀塘呢間甜品真係推介…Read More

放工後約咗朋友去tea下。朋友推介咗屋子。於是就試下啦。嚟到之後發現環境好好呀，枱同枱之間好闊落，最緊要係冷氣够涷，啱曬啲啲咁熱嘅天氣嚟避暑😝。佢主要都係類似日式嘅鋪頭。因為食tea，我哋都係諗住食啲light啲。我哋決定一人一件蛋糕再加杯茶。草莓純白卷蛋草莓焙茶戚風白桃烏龍茶粉紅玫瑰紅茶兩件蛋糕都好啱我口味喎。草莓純白卷蛋嘅cream好滑溜又唔會膩，再加埋酸甜酸甜嘅士多啤梨同埋藍莓乳酪，真食多件都冇問題。草莓焙茶戚風面頭有類似奶蓋，佢嘅質地唔太濃稠，好輕盈嘅感覺，佢嘅味唔太濃可以食出蛋糕淡淡嘅焙茶味。如果仲鐘茶味濃嘅話可能覺得茶味淡咗啲。呢度冇限時，可以同朋友食下tea,嘆下茶同蛋糕🍰真係唔錯👍🏻行開嚟南澳呢邊可以試下…Read More

放工後臨時同朋友約出去tea下。朋友推薦屋子。之前未嚟過，嚟到之後發現個環境好chill,冷氣好够涷，啱曬咁熱嘅天氣嚟避暑。諗住tea都係食下輕食。每人叫咗一件蛋糕加杯嘢飲。我哋叫咗草莓焙茶戚風蛋糕，草莓純白蛋卷。嘢飲方面就叫咗白桃烏龍茶，粉紅玫瑰紅茶。兩件蛋糕都深得我心，好鍾意草莓純白蛋卷佢中間嘅cream好滑又唔令人覺得好膩，加埋少少草莓好fresh。焙茶戚風蛋糕面頭嘅cream類似奶蓋嘅質地，但係佢好light,完全零負擔嘅感覺，好食😋如果茶味重少少就更加啱我口味。一啖蛋糕一啖茶，咁就過個下午，好正😊…Read More

放假同屋企人出去食晚飯。一行5人去咗觀塘海港。我哋6點鐘到，可能早唔使等位。今日由阿妹話事，叫咗個長腳蟹同燒鵝孖寶，杏汁豬肺湯，半隻白切雞，，麻辣鍋，仲有個焗芝士龍蝦伊麵。燒鵝最快上枱，今日嘅燒鵝好得呀，皮脆肉嫩，脂肪唔多又够入味，個個都話好食，加埋伴碟嘅蜜豆，好正呀。個湯都好料，但個杏汁味就欠缺咗，個豬骨味就好重。白切雞冇味兼柴，下次唔使叫呢味啦。麻辣鍋够麻够辣，色香味齊。焗芝士龍蝦伊麵，依家少見到，多數都係上湯龍蝦伊麵。今日呢個都係食唔返以前酒樓嘅味。焗得唔够見唔到芝士微燶。長腳蟹都够鮮味嘅，話就話2斤半左右，但係睇落都幾大隻。蟹肉都算飽滿，冇縮水得好犀利。今日呢餐都算唔錯👍🏻…Read More

朋友話有間鋪好夢幻，好靚，好啱打卡喎。約好咗時間之後上網book咗枱,驚walk in 冇位😂。估唔到係土瓜灣舊區度有呢類型嘅新building。去到嗰陣有員工係門口安排入座。入鋪頭之前要經過一條萬花筒嘅隧道。嘩，好有儀式感喎。入到去周圍都勁colour,啲裝飾又好夢幻。真係用嚟打卡一流啦😝😝我哋嗰日係下午茶時間左右。去到都全場爆滿。啲人都周圍影相📸️，不停打卡🤣😂🤣。原本一心諗住食佢嘅潘朵拉的盒子。點知售罄。估唔到咁快就賣曬🥲最後點咗自家製酥皮黑魚籽牛油果煙三文魚水牛芝士波波他他，芝士千層麵，香煎日本帶子黑松露忌廉意粉，OMG 5C, 5 層朱古力國度。他他係呢度好受歡迎嘅前菜，有個圓形酥皮包住所有材料，係最頂嗰度有黑魚籽同金箔點綴下成件事出嚟好靚呀😍😍食嘅時候就將酥皮整碎再撈埋啲材一齊食，味道豐富得來又香脆，多重口感。估唔到睇得又食得呀千層麵都好重芝士味，啱晒鐘意食芝士嘅人，再加埋個酸微微嘅肉醬，味道啱啱好。黑松露意粉，個帶子略略煎香下，出面有少少脆内裡仲好軟熟，好味🤤。個黑松露味都好濃郁。呢個都好正。再試埋佢嘅5C,係唔同嘅果汁溝埋，味道都唔伏。可以一試。朱古力都OK。呢度唔止打卡一流，嘢食都可以兼顧到，好值得再嚟呢度。…Read More

同朋友們放工，約咗係青衣城食晚餐。朋友話想食下上海野，上網睇下個食評。好似有啲伏。但係又見都唔少人食。都膽粗粗去試下。咁入到去都點咗幾樣嘢。我個人覺得最好食係個年糕好煙韌，食耐咗都仲軟熟。小籠包都多汁。個手撕包菜，我就覺得酸咗啲啲。個四小拼嘅糖醋骨同烤麩入味好食😋老重慶擔擔麵微辣唔食得辣嘅人都應該接受到。蘿蔔酥都够酥脆但係蘿蔔餡少咗啲，冇咩蘿蔔味。至於服務方面，啲店員嘅態度都唔錯。我哋提出要熱水，牙籤都好快幫到手。試完之後，覺得呢一間食物同埋服務都係正常範圍之內。…Read More

呢間鋪頭嘅菠蘿包好出名。之前咁啱經過太子，見到啱啱出爐。為食嘅我梗係試下啦😌。個包一攞上手因為啱啱出爐仲熱辣辣，聞到陣陣麵粉香味，面頭嘅菠蘿皮睇落好鬆脆。佢都我個手掌咁大個，都有啲重量，唔係空氣包。咬一啖試下，佢嘅菠蘿皮，果然冇令我失望，好鬆脆唔太甜。麵包都好鬆軟。成個食晒覺得好滿足呀。只係幾蚊雞就食到呢個滿足感，真係覺得唔錯啦。依家好少茶餐廳仲會自己生產麵包。呢間真係好值得嚟試下。如果下次一定要試下堂食，要試下佢嘅菠蘿油先得。…Read More

我屋企如果話食漢堡包🍔，一定只係食M記。好少話食有其他鋪頭。今日居然屋企人外賣咗個mos burger返嚟。睇個樣佢似乎係靚仔好多，起碼個包都挺身，冇話好似俾人壓扁咗。個包裝都好乾淨企理。打開佢，都見到層層分明，啲汁醬冇滿到瀉出嚟。見到啲菜同埋蕃茄都仲好新鮮。個樣都真係唔錯👍🏻我試咗個和牛漢堡包🍔。個份量好大呀，一啖咬唔晒，但係感覺到啲生菜索索聲，蕃茄好juice,反而個牛肉漢堡扒味道唔係好出。係最後先食到，牛肉嘅味道。佢嘅牛味唔太濃，有少少柴，但係30蚊左右食到，都算係唔差啦。下次都可以再試下其他。…Read More

晚餐之後嘅甜品真係一定要食。係旺角食咗飯之後，揾咗呢間甜品鋪。據說佢係米芝蓮級別。咁一定要試下啦。其中芒果拿破侖係招牌甜品。咁佢係必嗌之一。見到有我鐘意嘅心太軟，都唔放過啦。佢嘅擺盤好靚呀，睇得出係有心思嘅。試咗芒果拿破侖先。芒果見到個色澤都知够甜。果然真係唔錯，甜度够又冇渣。個拿破侖好鬆脆加埋香滑吉士醬同鮮甜嘅芒果，多重口感。好正呀。拿破侖係好食嘅，但食襯都搞到好混亂咁嘅款😜😜。個心太軟就相對濕咗少少，外表唔够脆，但流心效果都明顯，唔太甜，配埋雪糕食真係好夾。呢間鋪都係可以有下次嘅。…Read More

之前試過佢嘅蛋糕同埋食嘢印象中係幾好。嗰日臨時約咗同朋友一齊試下佢嘅tea set。點知太多人，冇得堂食。咁唯有外賣拎走。外賣嘅tea set係唔包嘢飲。不過我朋友真係好想食tea咁都照外賣啦。睇個樣係唔錯嘅，每件一式兩份。但係點知食咗之後覺得好失望😞。每一款嘅味道冇咩特別同埋令人冇驚喜嘅感覺。真係好普通。食完之後對呢個tea set係冇咩記憶點。真係食咗個空虛🥲🥲。所以如果想食tea，堂食可能感覺好啲嘅，外賣就真係唔建議。…Read More

呢間係油麻地同旺角巷仔嘅鋪頭成日都排長龍。仲成日見到佢做大割引。之前試咗佢嘅牛角窝夫。好食嘅，但未够脆，可能太多人。今日再試下佢嘅招牌炎燒布丁疏乎厘加日本3.6牛乳雪糕🍦。都等咗大約20分鐘左右。佢係open kitchen可以見到佢嘅製作過程。疏乎厘拿到手，陣陣蛋香加少少焦糖味。試一啖，有啲梳乎厘比較紮實但佢呢隻係空氣感比較重嘅，如果仲鐘意呢個口感嘅就好啱食啦。我都係偏好空氣感嘅，所以佢好得我心呀🥰🥰加埋面頭嘅焦糖又唔會太甜搶咗佢嘅蛋香味。唔錯呀👍🏻而雪糕都好够滑同有牛奶味，一熱一涷咁食好過癮呀🤤佢嘅份量都多，有兩塊疏乎厘，都好够食。…Read More

終於揾到機會試下呢間鋪啦😁😁呢個餐廳嘅特色就係石燒。一入去到間鋪頭同佢嘅名一樣，都係咁秘呀，佢嘅燈光都好昏暗，好似好神秘咁樣。我係lunch時間去食，叫咗個吉列牛定食。如果夜晚嚟仲可以加埋碗櫻花金魚湯。可惜我lunch嚟冇得加呢樣嘢。佢嘅吉列牛定食包一碗飯素，一碟吉列牛，一個糖心蛋加汽水。佢嘅服務都貼心，食物一上枱都有提下我哋小心焫親。都有講解下用牛脂肪搽下個石板面先再燒牛肉食。因為第一次食，唔識得搽完之得要將牛脂肪遠離個石板，個店員睇到都提醒我哋。個吉利牛都有成十幾塊，但係就比較薄身咗少少。輕輕燒下就食得，都有牛肉味但就瘦左少少。脂肪多啲應該更正。個糖心蛋唔錯，入味，有流心。如果想自己享受下自己燒嘢食，一試都無妨😃…Read More

朋友話雲壽司好食😋。終於約到出嚟一齊去試下佢啦。大約5點幾左右去食，可能比較早，個場唔係好多人。我哋叫咗人氣之選特上壽司拼盤。佢有壽司師傅係現場手握壽司。等咗一陣壽司就出場啦。個拼盤有10件壽司。件件睇落去都好新鮮。佢仲配埋姜俾你清下口腔，呢個位幾細心仲要分量都唔少。個拼盤都算係合格有餘。件件都係中上水準，冇話邊件係令人留低差嘅印象。我個人偏好赤貝，貪佢够爽口，鮮甜。仲有飽滿嘅三文魚子都好唔錯。見佢都有提供日本蠔，好似叫令和怪物。都試咗一個，嘩，佢都好爽甜喎。冇試錯到🤣🤣最後都有追加芥末八爪魚同埋三文魚籽壽司。整體嚟講，呢一間嘅壽司都係有水準，下次嚟要再試下其嘢。…Read More

朋友介紹呢間隱世餐廳。一試之下真係令人好掛住🥰呀個雞翼好得呀。一入口會試到佢嘅蜜汁，咬落去好多肉汁，煮得啱啱好，啲肉好滑溜唔老。粉絲蒸蟶子，好味嘅關鍵就係新鮮。佢嘅鮮甜係令人好難忘，粉絲索埋啲汁好正。最欣賞嘅係佢嘅鼓汁蒸白蟮，好新鮮。食得出肉地彈牙，有鮮味，啲汁撈飯食一流。再加埋勁索汁嘅豆卜，呢個配搭真係食多碗飯都得呀。估唔到呢間鋪頭咁貼心，飯後仲有甜品食，真係令到成餐飯好完整呀。成餐飯食得好開心自在，好有屋企食飯嘅感覺。…Read More