卡爾諾's Profile

半年前被全新神秘黑色裝修的mira吸引入去，先睇出品好有自己設計風格的coco餅店，我估係主理的小姐叫Nicole，好親切，不斷介紹，因為食飽咗，諗住有機會一定試下。今次有機會，有朋友20號生日，又係尖沙咀食晚飯，於是係一星期前就去訂生日疍糕，招呼我同樣係Nicole，落好Order係個兩磅朱古力芝士疍糕$500元，OK！靜待今天去取疍糕啦，一拎出來，疍糕牌上的祝褔語內容是：第一行寫My Sweety，第二行寫You're so Wonderful，結果係第二行出事，You're寫得太大，越寫越唔夠位，最後Wonderful嘅erful黐埋一起，個u字直頭係變平咗。我同Nicole講妳介紹我食呢個疍糕，而且我一星期前就來訂，有好充足時間去做，個師父寫到咁樣無理由仲放落個疍糕上，寫過唔難吖。最奇係Nicole個反應，佢望住我唔出聲，跟住有另一個同事行埋嚟，Nicole就行去打電話，此時另外嗰位同事話寫過要15分鐘，我話咁梗要寫過，換轉妳係收疍糕睇見咁妳會唔會開心？嗰位同事就去咗揾師父寫過。整個過程Nicole都係唔知處理D乜，當時又無客，又無安撫下，叫我耐心等等。15分鐘後真係寫好，Nicole將個疍糕牌放好比我檢收，全程都無出聲，無表示不好意思，只是例牌淺笑，佢不發一言的態度令我好失望。由於夠鐘食飯，即走。好喇食飽飯切疍糕，味道係唔錯，賣相特別，之前不愉快事已忘了。突然有人大叫芝士內有殘餘膠，當時都九點幾，我無再行返去coco，唯有影抵相紀念。最後我明白不能單看外表，無論人和物，呢堂$500好抵！…Read More

有朋友力薦呢間食府，睇Openrice 呢間分店又係最高分，係隔離唱完K就去試下。心諗又冇訂位實要等，點知唔使等，剛剛有四位，正！一睇四周個個都食相滿足，貴格feel咁。無錯喇呢次嚟呢間，好！叫D標準菜式試下，先叫老火例湯($108)，有花旗參嘅，唱完K最好係飲呢款，湯同湯料上枱，飲啦！望住湯料得豬肉、淮山、肇實、蓮子。我諗緊自己叫唔係呢款喎，應該有花旗參，聞又聞唔到，飲又飲唔出，叫位伙計來問花旗參去咗邊？係咪上錯？伙計話呢款係，花旗參用湯袋裝所以見唔到，OK同意，但真係完全無花旗參味。跟住D餸到，醬油脆皮雞半隻($130)皮係脆，肉鬆無彈力，同時都無雞味，冰鮮雞都唔係咁㗎。 燒味上雙拼($118)叉燒加燒肉，雙拼要燒肉要再加$10，我食過最矜貴的燒肉，20x20x10mm(W/D/H) 有10小件，皮都係脆。淋在叉燒上的汁好似係鰻魚汁，好奇怪配搭，搞到感覺上好似食燒鰻魚有D腥Feel。瑤柱海味什菜煲($78)無特別無乜瑤柱海味、糖心皮蛋一位半隻，二位起($20)食完同隻蛋色一樣、金蒜拍青瓜($22)OK夠凍、咸魚雞粒臘味煲仔飯二位($98)飯本身煮得係好足夠四位，配料就普通、疍白杏仁茶每位($28) 是好味的，杏仁好香，夠濃。係呢間店食飯，真是先苦後甜。$800埋單順便補充，入到此店係完全聞到有食物香氣，我就話飲無花旗參味嘅$108例湯，隔離枱飲二百幾銀兩位用的唔知乜螺湯(見到湯料)，應該係香氣四溢，但係無！…Read More

係 openrice睇到多篇中環Fat Angelo's 食評，提到近期表現都係麻麻，於是決定以Fat Angelo's 作為我第一份食評。一行四人就約定7:00開餐，由於工作纏身，結果7:45先到。個肚已經打鼓，好彩之前叫咗D女朋友點定菜，我一到食物剛好上枱。由於唔係我點，見乜就食乜。首先免費沙律，新鮮蔬菜好味！跟住係雞翼味道合格無話特別出色。接著就係今晚主角出場，自選餡料Pizza ，order時講明要薄、要焗脆D，結果完全符合要求。餡料分佈極度平均，啖啖都有餡食，係食到條Pizza 邊先無餡，Pizza 底又夠脆，好正！再嚟嗰D就麻麻地，意大利海鮮飯，味度適中，海鮮有青口、蜆、魷魚、魚肉都新鮮，唯獨個飯，係合格，食得出符合大眾，咬到唔太硬，但無咗意大利飯應有游離於軟硬之間的獨特口感。再落嚟係Carbonar意粉，其實味度材料都OK，個意粉就做得太過茶餐廳Feel，實在太符合大眾，唔知係咪晚飯時間太多人，D意粉好似茶餐廳預先煮熟咁，定係我以為應該即叫即煮？甜品我地叫咗個Choco Torta 朱古力濃而不太甜，整體好結實、質感好好，好味！最後一款甜品亦是整個愉快晚飯最唔開心的時刻，意大利三球雪糕，待應送上我一手接住諗住比Order雪糕嘅女朋友，盡顯關懷，點知用來承托碗雪糕的碟，溫度應該有懾氏80度，大佬上面係雪糕唔使煮熟吖？唯有叫佢經理過來見下面，佢當然道歉不在話下，話D碗經高溫消毒......，我嗰位女朋友又話OK啦只溶咗小小，係不段道歉下咁就食完。整體係OK有d 口味我明白到係要遷就大眾，我會再去，因為Pizza實在太好味！到時我會同經理Johnny提出我的要求，睇下係咪會好D…Read More