榛子熊's Profile

早已聽聞元朗大舊壽司刺身， 即係壽司上件刺身大過件壽司飯兩倍嗰種， 其實好多年前朋友曾請過我食， 當時第一次見已嚇一跳， 因為唔只大， 仲好好味， 今次到我帶女友黎， 亦希望嚇佢一跳😏， 佢開頭一直問點解突然要入元朗， 我求其諗藉口， 其實因為我唔知邊度仲有咁嘅壽司刺身😅， 我但18：00點到， 佢未開門，但已要排隊， 等一陣就有人俾定點餐紙我但點定食物， 同埋講明用餐時間限唔記得四十五分鐘定一個鐘， 入到去， 其實環境冇甚特別， 木枱木櫈， 我地點咗最愛的三文魚， 油甘魚， 甜蝦， 凡立貝， 仲有鰻魚壽司， 咁啱我同女友都唔好吞拿魚😁， 當食品上枱， 女友真的嘩一聲(目標達成😀)， 當然味道都好緊要， 我唔敢講係超級好味， 但材料都很新鮮甜美， 件件都份量十足， 滿足味覺之餘滿足埋視覺， 重要係價錢絕對相宜， 只係地點較遠， 好在有車😎， 一句講晒， 絕對會再幫襯…Read More

長洲要搵西式餐廳似乎選擇不太多，而且不肯定一個出名食海鮮的小島，食西餐個味道會如何。最靠近大街較當眼位置就是該餐廳。見舖面有心思，企企理理，即管試下，普遍長洲的食肆都好少令人失望，除非太過火啦…。店員哥哥非常親切地向我和女友介紹餐牌，話實，好耐沒有被招待過這種服務態度，受寵若驚但印象良好！食肆最緊要講求食物質素，但是服務態度都一樣重要，趕客定留客，關鍵就是如何招待客人！點了一客雜扒餐和一客日式咖哩炸蝦卷飯和女友分享食。都等了好一會，餐廳感覺似家庭式經營？不太肯定。可能用平常心對待，反而出現驚喜。上菜看到料理並不是只有外表及隨便堆砌，廚房應該有位認真學過西式料理的隱世師傅？！食材，調味，汁料，伴碟，賣相，味道，絕對不會輸俾中環、金鐘的西餐廳！我點的炸蝦到現在都令我回味無窮，一口咬碎的脆，入味的蝦肉，而且好大隻，配上飯汁，其實我可以再食多一客！似乎晚餐餐牌經常轉變，再光顧都已經找不回了。豬扒肉質夠嫩不酥，不會太厚，過厚會容易變韌，黑椒牛扒都是較薄，這樣反而食落有種香脆口感，好味道！肉腸都不失禮，感覺貨源嚴選過，並不是超市買到的普通雜肉香腸，外脆內軟，有德國餐廳的香腸美味。驚喜位來了，女友點了「全餐廳」最貴的飲品：朱古力沙冰，想不到現在反轉變成我於此餐廳的最愛飲品！看名字以為普通不過的一杯沙冰飲品，怎料味道竟然可以有如此高質素！沙冰和朱古力比例完美，不會變朱古力冰水，每一啖都有濃濃的朱古力香，而且賣相非常吸引，連隔離枱的客人的眼光都吸引過來了！餐後來一杯甜品似的飲品，真是大滿足！味道令人齒頰留香，回憶都是美味的，後來光顧了好多次，食物都沒有令人失望！當然會回頭再去啦！大力推介！…Read More

為慶祝紀念日，特登揸車出西貢，女友揀來揀去，卒之揀了此家意大利餐廳，因我倆都好喜歡意式食品。早已訂座，餐廳雖然略暗，這叫做有情調吧。未到7點但不太看見人影，我指其他客人。女友看到餐牌價錢嚇窒了，但只是一次半次，不要緊啦。嚴選了兩個湯，一個pizza，和一客牛柳，食物來得都算快。先飲湯，海鮮湯的足料程度的確好有驚喜，濃濃的湯似乎淆了好多時間，我最欣賞餐廳會肯自家製的湯，因為一定有廚師的個人特式，用料十足，普遍說得出的海鮮都有登場！每一啖香濃海鮮氣味都停留於口腔，我一滴不剩飲完！女友的忌廉菜湯，味道不要誤會及不上海鮮濃湯，濃烈味道之餘比海鮮湯更清新，兩款湯都令人非常開胃！到薄餅了，自家製的餅皮，皮脆不厚，有好多芝士，我不肯定是否運用了多種芝士，實在太香了，每啖薄餅都好似拍廣告一樣，芝士可以拉到好長！一件接一件，巴馬火腿、烤得完美的芝士、可能有秘製香料，這個意式薄餅實在太好味了，我倆非常欣賞！最後到牛柳，肉質上盛，要7成熟果然剛剛好，好淋好入味，但老實驚喜不大，驚喜的反而是旁邊的伴碟，平時我都不會理會伴碟，瓜瓜菜菜我並沒有喜好，但女友叫我試，一試之下，原來配菜有經過烹調，甜甜的，而且一併有燒過，此伴碟並不是光放著為好看，平時視如廢物的配菜今次我吃光了。因為足料原固，三客料理都已經食到飽飽。此餐廳的客人多是附近居民，更可以帶寵物入店，原本以為只是充滿氣派的意大利餐廳，原來是充滿西貢地道人情味的餐廳，感覺幾特別。…Read More

第一次幫襯係喺近尖東方向的分店，現已結業變咗第二間日本嘢。好彩，i-Square店還在。一年多間已經幫襯了接近10次，第一次食到跟對上一次用餐食到的味道都冇變。雖然好行，但都要講：真係好好味，因為每一次點的嘢食都真係好味道，老實講，熱食不及壽司刺身好，但絕對不差，好似我上載的圖中，鰻魚連骨都好入味好淋但不爛，豬扒脆滑多汁！就連定食餐中的開胃小食，都係津津有味。刺身、魚子、玉子同飯都有種莫明的甜甜味道，雖然刺身理應食鮮不食製，但呢個味道令人印象深刻，沒有違和感。刺身厚切又好，薄切都好，依然保留肉嫩質感和味道，新鮮度好高，但沒有雪藏凍氣，比起甚麼築地直送的連鎖店食到嘅高好多班。加上店長、經理、侍應生都有好好的服務態度，例如，落單時係即時回應及處理；對答態度良好又醒目；不會夠鐘趕客收嘢；甚至坐得耐都依然一直為你斟熱茶。擁有如此食物質素及服務，好自然一而再、再而三地繼續幫襯！請保持及繼續向好，就算地點再隔涉，都會留得住客人！…Read More

未去過日本都唔知其實日本的刺身都唔係特別好過香港好多，要同築地相比當然冇得比啦，但其實香港都能夠食到日本味道！聽聞呢間食店好耐，卒之攜同女友一齊去試。看餐牌，其實價錢已經算非常合理，只要食過知道有此質素就不是問題。我和女友食過lunch，亦食過dinner，相對當然午餐的價錢食到晚餐質素已經無話可說。點餐後都等咗好一段時間，好肚餓亦好期待食品質素如何。午市更有烏冬加丼飯嘅定食餐，實在太豐富。最期待嘅刺身果然冇令人失望，之餘，味道非常鮮甜，沒有特別的冰鎮口感，這個好重要，討厭充滿雪氣嘅雪藏刺身，食冰鮮肉一樣的口感其實非常之差。出名的吞拿魚果然實至名歸，食店用的都是上等食材，唔覺得有胡亂將魚的較下等部份亂切俾你。睇我上載的圖都見到，件件厚切，每啖口感都鮮、香、嫩！跟定食的玉子和小食都好好味！個人非常鍾意食三文魚和油甘魚，吞拿魚其實麻麻，因為大部份地方都食到差的質素(擦紙膠一樣的口感都試過！)，所以對此食物較有陰影，海膽亦相同處境。但此店材料非常新鮮，令我對以上兩種食物改觀了。原來食刺身的確要靠新鮮程度評上中下等！此店令我對刺身有了新標準。弊喇，食尖咗條脷添！如果店員的服務可以體貼啲，對客人態度親切啲，連服務都有日本級，必定更受歡迎。…Read More

繼上次試完佐敦榛子雞蛋仔， 今次要試埋網民極度推介的榛子格仔夾餅了， 但揾來揾去， 竟然港九都冇分店， 得大埔......， 冇辦法， 郊遊都要了！(其實只喺係大埔超級廣場附近)， 同女友中午入去， 諗住當埋午餐， 去到大埔超級廣場再揾昌榮中心， 諗住有指示唔會好難揾， 但慘了， 經過客戶資詢姐姐， 兩個途人及兩個保安的指示， 我跟女友只是不停在大埔超級廣場ABCD區不斷兜圈， 但都冇辦法揾到， 攪到好似尋找隱世美食咁...........結果， 都係信科技， 用菇高map導航， 結果揾到了， 揾咗半小時......去到， 好多人圍住， 好多人等緊， 我即刻二話不說order, 三件金莎醬格仔餅， 要朱古力皮， 老實， 都要等幾耐， 因為太多人， 好在喺係商場裡面唔係街邊等， 係等緊途中， 我雙眼發光見到寫住醬料都多少可要求， 我即刻話唔該三件都多多多多醬吖， 我跟他們說我兜來兜去先揾到舖頭， 要盡試😁， 到我拿上面手， 嘩！ 榛子味香到呢， 又極多醬超足料， 個皮又脆， 但當咬第一口仲驚喜， 原以為只是某N牌榛子醬， 但估錯了， 個一啖隨了榛子醬外， 但又好多碎榛子粒， 真如食金莎朱古力一樣， 所以佢唔叫榛子醬叫金莎醬， 老闆見我一個人食兩件話我好食得， 老闆同員工都好好傾， 我食兩件， 女友食一件， 食完後本身想走， 女友問， 需要加碼嗎？ 我就諗都唔諗order多兩件， 老闆同啲員工姐姐都勁笑我， 女友話見到我面紅😳， 食多兩件， 好滿足地走了！ 毫毛疑問， 味道99分， 扣1分係因為凡事唔好咁盡😂， 其實佢就有其他口味的， 但我根本唔會亦唔駛試其他， 一款味已奪走我的心！！ 食品好味， 員工態度友善， 激烈推介！…Read More

裝修前後都有光顧過，多數食意粉類午餐。食過一般lunch set，普通極了，質素只是地道普通茶室一樣。唯獨意式飯/粉麵類與眾不同！廚師一定在用汁調配方面有下功夫，絕對不會淡而無味，亦不會過於重手過咸，而且烹製時已經把意粉跟汁弄得非常均勻，每一啖飯香或每一啖意粉香，都充滿濃濃的忌廉汁及香料調味。食到最後一羮都依然會發現有三文魚肉或煙肉，還有汁可送最後一羮飯/意粉。食店不會吝嗇食材，每次都以普通價錢，食到高級質素，令客人食得滿足又飽暖，非常值得！會繼續光顧他們的意粉，希望能夠一直令味道及質素保持下去！…Read More

早前於某遊戲中認識到名古屋的山哥，行經尖沙咀時，發現到熟悉的大大招牌！決定揾一日去試，或者不用刻意飛去日本就可以食到名古屋的味道。午餐時段去到，周圍都找不到門口在那，卒之問到一位好心保安叔叔告知，原來山哥到下午5點才開舖.......心裡只想著，今天要試今天要試！所以去行陣街再回來食晚餐，總算食到了！是正牌的海外分店！日藉的店員服務亦好好，放心，店裡有說廣東話的店員。點了招牌菜：幻之手羽先(即是雞中翼至雞翼尖的部分)，還有其他平時少食的日本菜。等候上菜時間都算長，等到好肚餓，期間閱讀日文的「如何吃雞翼」分散注意力。餸菜到了，等都值得的，味道果然不同凡響。本人身為雞翼狂暴者，5隻、10隻點會夠喉，希望食夠50隻！老實說，雞翼的味道平凡中帶點特別，調味很濃烈，雞翼較乾身，唔係多肉汁那種，但食了會有停不了口的感覺，若有些朋友不太喜歡味道太濃的食物可能會覺鹹，但我呢啲重口味人，啱啱好，雖然最後沒有order 50隻，但都食了15隻，臨走埋單時，店長跟我們說日文，而女友又懂一點點便跟店長交流了幾句，他說我們是對beautiful couple, 額外每人送了我們一個日本酒樽作紀念。好多時，去一間食店，食品味道固然重要，但那種給招待被照顧的感覺同樣重要的，有機會一定再幫襯！喜歡食雞翼的朋友們更加不可能不試！ 誠意推介！！…Read More

我幫襯時已一年多前了， 但今天才醒起要寫這食評， 好的食店一定要介紹大家， 這家是長洲中其中一食店， 有正常茶餐廳的食品也有新鮮海鮮的餸菜， 晚餐時間， 本人同女友本只是隨便選一間食店， 門口已聞到香味所以決定一試， 我叫咗咖哩豬扒飯我女友叫葡國雞飯， 食店那不知是老闆娘定伙記， 黑著面跟我們說， 叫呢啲要等耐架喎， 咁我問什麼會快？ 她說海鮮嗰啲， 我心諗， 妳餐牌有我就叫得架啦， 又唔係夾硬叫午餐款式， 問佢幾耐， 佢話要一個鐘， 我有少少鬥氣， 話照落單， 咁同女友一路傾計一路等， 好了， 四十五分鐘後， 見那女人望住我地諗嘢跟住寫單， 真的一個鐘後食物上枱了， 好明顯佢就係等四十五分鐘先落單， 整呢啲飯駛乜咁耐！！！！ 實在太過份的服務， 好了， 到評食物， 老實， 真的是不錯， 咖嘢好香， 拍得住印度餐廳嘅咖哩， 豬扒好“淋”好入味， 女友的那份葡汁好香， 椰味很濃， 飯都軟熟香口，本應會再幫襯的， 但這樣不知所謂的服務， 怎能留客， 廚房有大師傅也浪費， 我明白， 其他客人叫海鮮幾百蚊一千蚊先係客， 我兩人一百蚊埋單就要這樣對待， 幾好食都冇用， 想受氣， 就幫襯吧！…Read More

只是光顧了一次，就整間小店消失了！好想知道還有沒有總店，或者定點舖位，太可惜了！有一次去鑽石山睇戲，等待間終於按捺不住，過去欣賞甜品，一問之下，竟然有榛子朱古力蛋糕，身為榛子熊，一定要試。一試之下，濃濃的榛子味非常特出！加上甜品有精緻的製法，內有乾坤，朱古力包圍榛子的層次感，令舌頭精神一振！懷念此店的味道，希望可以再食一次就好了...！…Read More

餐廳位置絕對極為隔涉，不刻意搜尋是好難會有發現。連餐廳的中/英名字都差天共地，相信是老闆的有趣意思。不過自從發現後，就一去再去。幾次都是食lunch。我喜歡他們整的意式風味，如意粉或意式飯，都用料十足，絕不吝嗇食材！濃濃的香氣，由第一啖食到最後一啖的味道都一樣。份量剛剛好不會太少，每次我一粒飯都不吃剩！由湯到主菜到飲品都好滿足，餐廳環境亦十分優雅，座位坐得非常舒服。唯獨餐廳侍應生的服務麻麻，好像故意行開不願接觸客人一樣，要大叫「唔該」才有一位員工會應你，究竟怎樣一回事？希望可以改改「侍應生不望客人」的服務態度，才能給你滿分。…Read More

齋看舖頭名的確有少少驚食完會蛀牙，不過身為甜品狂，怎可能會驚如廝小事！事實上光顧了不只一次，試過飲品、招牌格仔餅、出名的pancake，竟然全部都不外如是！形式大於內容！飲品款式通通沒有特別，應該最濃味的朱古力冰都竟然只是普通沙冰而已(冰水的味道大於本身的味道)；格仔餅跟配搭伴碟都格格不入，只是將好味的都放在一起給你吃；pancake最差，有夾心都可以淡而無味...卒之，在多次嘗試之下，終於發現了沙漠中的小綠洲！除了Bailey布甸好味之外，木槺布甸系列最令人回味無窮！少有地食到多款口味的木槺布甸，之餘，此店的木槺布甸的確「層出不窮」，每一啖的味道都非常特出，令我和女友，七番八次回頭品嚐。請下心機吧，把其他甜品也做好，只有味道才能真正留得住客人。…Read More

兩年間光顧了近10次，還記得第一天的味道！好驚喜，真感動，招牌魚蛋和墨魚丸跟港九新界的味道果然有分別，山長水遠入長洲都值得！我當然不是所謂皇帝脷，純粹憑個人感覺：覺得魚蛋的確足料用魚肉去整，那種彈牙入味的口感，實在深刻。墨魚丸亦似乎沒有加入其他肉類，亦能夠食到有粒粒黑魚肉。就連魚皮，都食到內裡有經過特別製法。其他例如、牛筋、牛腩、牛丸 等，老土都要說句「其他地方吃不到」，自此就經常光顧。可惜，踏入2015年，發覺問題出現，而問題都非常之大，只光顧了兩次，受夠了。今年3月去食，跟女友二人各叫一碗雙併粉和一碟魚皮。滿心期待之下一食…嘩！究竟是甚麼味道？！魚蛋不彈牙，冇味；墨魚丸不見墨魚，冇味兼似食粉團；湯已加腩汁，但依然淡的；河粉冇味，似求其淥熱過數下就上碗；魚皮，應該不會出事吧，怎料味道腥而不香，不脆而且未浸湯已變淋。埋單竟然發覺加了價，如此一吃盛為HKD$83。（$25+$25+$28）老一輩說的「食完背脊骨落」就是這個感覺。給它最後一次機會，5月去食，真的，肯定不是錯覺，一食就知道已經完全「今時不同往日」！湯底、麵質、招牌魚蛋、出名的墨魚丸，全部失敗！以前好味到感動的味道 - 完.全.消.失！多年招牌一朝喪！請都不會再去了！如此價錢，如此質素，我去旺角先達附近求其食一間魚蛋粉，都發覺比張記好得多，何必要入長洲？…Read More

心血來潮上網search下有乜榛子甜品， 見好多人煮都推介乜嘜， 又見個地址近我上yoga堂， 就同女友講落堂去試下， 那天早上落堂後去到十一點左右， 竟然未開門，中午十二點先開， 本身諗住下次吧， 但唔心息， 決定附近餐廳食少少嘢再返去， 到十二點了， 未到舖頭街中間已聞到奶香味， 仲有唔少人排緊隊， 到我order, 雖然有好多口味， 但我當然要榛子朱古力味啦， 俾完錢都仲要等差不多十分鐘， 到攞上手， 超熱， 因為係即整， 當食第一口， 嘩！！ 我是再食薯片嗎？ 那脆的程度嚇了我一跳， 每粒雞蛋仔裡面都充滿榛子朱古力醬， 唔怪得要整咁耐， 香，脆， 味都好高分， 女朋友本身陪我試變成同我爭食， 如果親身試過， 就會知我形容得絕不誇張， 如果我只可以幫襯一檔雞蛋仔，我會毫不猶豫揀乜嘜，其實我知有不少雞蛋仔檔的都好味香脆， 但乜嘜的吸引係好多特別口味， 當然我大力推介係榛子朱古力味啦！ 一定會再再再再再返黎幫襯！…Read More

女友曾經去過說不錯，本人是個無甜品不歡的人，於是抱住不仿一試的心態進店。試新店首選當然一定會試朱古力的甜品，最好有榛子味，因為可以降低出事的機會率。見門口冷凍櫃放著朱古力蛋糕當然不會錯過，就要一件。驚喜位來了，店員問多次確認是否那件榛子朱古力，本人聽到後眼前一亮，因為正正問著一個榛子狂魔！好，當然好！好老實，件蛋糕的外表普通都不得了， 但一試之後，就會明白什麼是不能只睇表面，一放入口，已品嚐到濃郁的榛子味，因為蛋糕中間有一層厚厚的榛子醬，蛋糕部分也十分嫩滑，我珍而重之地細口細口咁食，食到最後一啖也充滿濃濃榛子味，自此愛上師妹甜品的榛子朱古力蛋糕！這蛋糕已無容置異地奪得我心目中榛子甜品第一位！ 普通坊間的所謂蛋糕很多都是虛有其表，由最簡單的朱古力甜品開始，我試過，真的，都可以令人可以倒胃口！師妹的甜品只要食過都知道有其獨特做法，到今天已經持續光顧了幾年，跟老闆娘「師妹」及店內員工都變得熟絡。期間試過其他甜品，一樣有高水準之味道。事實上，本人嚐過好多榛子朱古力蛋糕，師妹的絕對不一樣，不論此蛋糕，其他所有甜品你絕對可以食到其「心思」及「手藝」。充滿人情味的地方，吃到充滿人情味的甜品，跟喜歡的人一齊分享，更加是一種美麗回憶。會繼續支持師妹甜品！…Read More