火柴合's Profile

今晚唔想食飯，但又好想食熱氣嘢，於是，收工去咗食Burger。地點是打卡聖地南豐紗廠裡面嘅Burger專門店。睇餐牌，有10款Burger 選擇。揀咗招牌嘢 Classic Burger 同埋 Cheese Burger，當然唔少得熱氣嘢，揀咗炸薯寶同埋拉絲芝士條。至於飲品就揀咗飲啤酒，食熱氣嘢嘛，梗係要飲啤飲啦。揀咗日本品牌Asahi 同埋澳洲品牌Pirate。Asahi 飲落比較淡口啲，而 Pirate就入口較strong，甘啲苦啲。薯寶細細粒，好脆口，一口size方便食。芝士條外脆內軟，芝士就係可以拉出來，夠過癮!兩個Burger都大大個，材料豐富，牛肉味濃郁，生菜好清爽。Cheese Burger相對於Classic Burger，是多了一層芝士，雖然睇落比較邪惡，但係更加好味。…Read More

荃灣區酒吧唔算多，開酒吧兼營美味菜式更是少之又少，這間座落於沙咀道就是其中一間。酒吧內的佈置唔錯，還有LiveMusic設備，可惜因為疫情，暫時唔可以開Live。另一方面，這裡有個open kitchen，可以一睹廚師烹調的功架。首先，點了這裡的招牌 cocktail，Dancing Grape，它的成份主要是 Gin 酒、巨峰提子酒和檸檬汁，用中式茶壺、茶杯來載，中西合壁，很有特色。味道方面，可以要求酸啲或甜啲，職員會按你個人喜好調校。我就選擇要甜一些，飲起來，巨峰提子味更突出。另一杯飲品是Mocktail，Happy Ending，它是一杯由菠蘿汁、青檸汁、熱情果汁、梳打水調出來的飲品，味道是酸酸甜甜的，幾醒神。小食一是【沙嗲串燒】，有雞、豬、牛肉，一共八串。用香料醃，好入味，配上自製沙嗲醬來吃，很惹味可口。小食二是【香煎三文魚配芒果莎莎】，細細粒的芒果粒，味道非常清甜。三文魚的魚皮煎得脆卜卜，魚肉又香又滑。主食一是【辣肉腸薄餅配橄欖】，餅底是薄的那種，絕大部份都是軟的，但是餅邊是好脆口的。餅上有好多芝士，每一小件上都有辣肉腸，好食!主食二是【冬蔭功海鮮意粉】，配少豐富，有蝦、魷魚、番茄和露筍等等。個汁有濃郁的冬蔭功湯味，意粉用這個汁來煮是比較少有，但又好好食喎!…Read More

原來今日係今年暫時最熱的一天，天文台都發出了酷熱警告。行到身水身汗，想搵處地方歇息一下，來到這間餐廳，坐在長檯，對著楊屋道街市。首先，點了一杯【冰鮮果茶】，然後才去想吃甚麼。冰鮮果茶是採用時令鮮果而整成，內有西柚、士多啤梨等鮮果，甜、酸味恰當，夠冰凍，很醒廊。吃甚麼好呢? 終於選了【香煎日本刺身帶子配海鮮墨汁意大利飯】。烏卒卒的，看似簡單，其實是實而不華。帶子大粒，經過香煎，又香又爽口。Risotto 個墨汁帶有墨魚鮮味，造到很creamy 的質感。飯內混有墨魚肉粒，飯粒不太硬，嚼勁口感不錯。望向窗外，見那些仍在街市忙碌的人在忙著，感覺自己很幸福。…Read More

隨著荃灣海旁的新屋苑和新商場的落成，這裡的食肆數目也多了起來。今天晚上，我們輕輕鬆鬆在海旁散步完，便到了這間位於西鐵站旁邊的餐廳晚餐。餐廳非常寬敞光猛，座位舒服。食品選擇也多，價錢合理。我們點了一份小食炸雞翼，一份經典鐵板餐和一個喇沙鮮牛肉拼魚片頭湯米粉。凍檸樂的檸底有好多片；奶茶茶味香濃，充滿茶記feel。炸雞翼的炸漿有點懷舊feel，食落更有點像食炸生蠔的感覺。雞翼炸得很透，內裡熱辣辣的，但食落又唔會覺得炸得乾，都幾好食。湯米很多碗，喇沙味道香噴噴，辣度適中，夠香口，牛肉亦很嫩。經典鐵板餐熱氣騰騰喳喳聲的上到，黑椒香氣撲鼻。份量夠大，有雞扒、豬扒、腸仔和火腿，配菜有甘筍、粟米粒、椰菜和薯條。成個餐的靈魂非黑椒汁莫屬，夠香，辣度適中，下次來吃時，一定要配上白飯來吃。…Read More

呢個時勢，唔叫外賣，就多數自己一個人去食晏。行勻成個金鐘廊，靜蠅蠅，見到度度都做特價。今日去食翡翠拉麵。以前呢度係好難搵位，依家都係，因為實施咗限聚令。叫咗個套餐，前菜是鎮江排骨，主食係擔擔麵。話就話係前菜，不過呢個鎮江排骨就好似人哋啲例牌咁大碟，個勢的確有點賤物鬥窮人。論味道，很不錯，尤其係唔使點咬就可以將佢骨肉分離。擔擔個湯好濃郁，有很多花生，好香口。麵質爽口兼彈牙。成個餐有折，依家唔食多啲，驚第時疫情好番無得食…Read More

Home office 悶到放荒，跟家居隔離沒有分別。中午竄了去外，行下街，抖抖氣，順便吃個lunch。餐廳位卡荃灣愉景新城內，是新開的。在這時世，客人量都算多，可能是因為有全單88折，吸引客人吧。點了一個簡單午餐，蟹肉味噌闊條麵，配一杯Latte，原價$96，折實為 $86，可以接受。個餐跟埋餐湯和薯蓉，調味頗不錯。主餐的蟹肉味噌闊條麵有好多汁，好creamie。蟹肉雖然不算多，亦感到蟹肉的鮮味。Latte 一般啦，沒有特別。…Read More

餐廳位於南昌V Walk 內，是新開不久的。因為疫情關係，餐廳都實施防疫措施，進入餐廳之前，職員會為客人量體溫。客人坐低之後，職員會提供大張紙巾，讓客人包著口罩。午市有湯粉餐 $99，可以揀一個湯粉，加一個小食 (軟殼蟹除外)，如加飲品只需半價。今天三個人來吃午餐，點了以下東西:小食: 【蝦肉雞絲米紙卷】、【越南蒸粉包】和【越式扎肉雞絲粉皮】飲品: 【越式滴漏咖啡】x 2食品: 【WTP 火車頭金邊粉】x 2和【冬蔭公海鮮河粉】 三個小食的味道其實是差不多，出得快，好味道的。兩個【WTP 火車頭金邊粉】亦出得快，好大碗，湯底好味，餸又多，包括牛柏業、牛丸、牛肉、牛腩、牛筋等。牛腩和牛筋超腍，好正。【冬蔭公海鮮河粉】就等了很久，足有半小時。追了兩次單，職員回覆這個粉是即造的，所以要花時間。可以，以我的觀察，即使是即造到不需要花半小時吧。基本上，因為太多外賣生意，廚房優先處理外賣單，無暇造冬蔭公海鮮河粉吧。終於，它來了。幸好，味道很不錯，又香又辣，湯底有海鮮味，河粉亦爽滑。通常來越來餐廳都會飲【越式滴漏咖啡】，今次亦不例外，可以這杯咖啡味道略嫌不夠濃。…Read More

公司因為特殊原因 (大家都明係咩一回事)，搞到今年的開年飯都遲咗食，檔次亦低咗很多，只去了香港仔的上海天龍樓吃午飯便算。這店子都幾細，我哋十幾人迫在廚房門口的一張大檯，總算坐得晒。不過衛生方面，絕對有改善空間，你知啦家下咩時勢。我哋點咗個合家歡套餐$798，有【三色拼盤】、【賽螃蟹】、【回鍋肉】、【砂鍋雲吞雞】、【宮保蝦仁】、【麻婆豆腐】、【火腿津白】，都幾抵食。不過，我哋咁多人又點會夠食，所以多點了廿隻小籠包、廿隻餃子、糖醋魚塊、砂鍋雲吞雞等食物，當然啤酒、豆漿、汽水亦唔少得啦。【三色拼盤】海蜇、燻魚、牛展。燻魚比較好味，最快俾人掃清。【回鍋肉】回鍋肉爆炒得好香。【砂鍋雲吞雞】兩鍋雲吞雞，一鍋明顯地淡味，即是烹調水準好唔穩定。【糖醋魚塊】魚塊有腥味，又多骨。【小籠包】皮厚、肉汁少。【餃子】皮厚，食咗會好飽。個個都食到飽晒，埋單前，店子老闆仲專登整10隻高力豆沙俾我哋去分。水準一般，勉強合格。…Read More

近日很多餐廳、食肆為了生存，都紛紛推出救市優惠。今天來到荃灣享和街呢間餐廳亦唔例外，推出第二個午餐可享半價的優惠。餐廳裝修簡潔，非常乾淨，每張餐檯上更提供韓國的酒精搓手液，令食客更具信心。Set Lunch 有6款可選，今日沒有提供豬仔肶，轉為提供豬柳，一於點一份來吃，另外，點了一份澳洲西冷，一齊share。【Starter】擺得好四正，有大大 “杯” 的濃郁洋蔥湯。真係好大杯，飲晒都肥咗5成。另外，仲有熱辣辣的麵包和新鮮沙律。好鍾意佢哋加咗檸檬汁入去沙律內，好醒胃。【燒澳洲10安士西冷配薯仔角、炒菜】$118份量足，擺碟不錯。要了7成熟，吃落有點韌。配菜用了烤南瓜、薯角和蘆筍，這個配搭很不錯。【豬柳配芥末子，香草牛油飯】$108望落去覺得比較乾，白飯旁邊只有少許油，所以吃起來，都幾dry。豬柳是厚切，幾入味，都幾腍。如果呢個餐有多啲汁會更好。【咖啡】非常好飲好正，單係呢杯咖啡都值三、四十蚊啦，而成個餐 (未計半價) 都只是百一二蚊，所以覺得好今餐好抵食。…Read More

周日，想hea下，去了荃灣海濱逛下吹吹風，之後去了海之戀的新商場內的 brotzeit坐低hea。今日其實好大風，所以無選擇坐室外。好彩無選錯，因為坐咗咁耐，望向外邊，經常見到啲餐椅、餐牌被吹到冧晒，好搞笑!呢間餐廳標榜係德國餐廳，德國啤酒當然是唔飲唔得，所以叫咗支白啤Schneider Kristall Weissbier，這個冷天氣飲凍啤酒，真是一番風味。點咗份【炸蘑菇】，因為未吃過。啲蘑菇好大粒，加了炸漿去炸，熱辣辣。出奇地，切開佢，發覺唔係炸到乾晒嗰種，食落口感都唔錯。另外叫了一客【Ham and Pineapple Pizza】。餅底是較乾較硬的一種，吃起來似餅乾，一般客人未必吃得慣。上面的配料主要是菠蘿和火腿，烤過的菠蘿明顯地增加了甜度。慢慢吃，慢慢吃，一個中午很快便過去了。…Read More

和朋友來了一個簡單的慶生飯，地點是位於荃灣的中染大廈內的龍門一番。餐廳出名是燉湯，但朋友對湯無喜好，所以今晚沒有機會一試。三個人總共點了5款嘢，埋單四百幾，都OK呀!(1) 麻醬腐皮卷這是一個小食，上碟時跟了一小杯乾冰，營造一點仙氣，不過，可能那杯乾冰實在太小了，不到30秒，所有仙氣已消逝。這個腐皮卷的重點是麻醬取勝，超級香濃。(2) 厚切川汁醬蹄厚切是它的特色，吃起來啖啖肉，但比較 “漏”。(3) 京式烤羊腩好香，又腍，唔膻。跟咗有三個醬汁。個人較喜歡點薄荷醬來吃。(4) 小龍蝦湯包今次慶生沒有壽包和蛋糕，取而代之是小龍蝦湯包，脹卜卜，湯料足，以此作為壽包，夠晒特別。(5) 龍門海鮮炒飯朋友是無飯不歡的，所以點都要叫一個飯來滿足下佢，今晚點了【龍門海鮮炒飯】。此飯色澤很靚，材料也豐富，品道亦不錯。…Read More

新一年開始，一家人去了南昌 V Walk 的和平飯店吃了半席饗歡聚全包宴，水準麻麻啦，但勝在經濟實惠，$1588，環境亦不錯。【六小碟】: 【五香牛展】、【手拍黃瓜】、【雞絲粉皮】、【南京鹽水鴨】、【黑醋涼拌木耳】、【和味燻魚】。六款小食之中，只有燻魚的味兗較為滿意。【不等你小籠包】雖是6人餐，卻有8隻小籠包。味道不差，但湯汁比較少。【花膠海皇羹】材料簡單，主要是有魚肉粒，味道調得很不錯，有兒時常吃街邊的碗仔翅的味道。【酒釀南瓜蝦球】有8大顆炸蝦球。用南瓜汁來燴，有新意。【豆瓣桂花魚】用豆瓣醬來做真係第一次食。不過，唔好食，因為條魚好腥。雖然用了重口味的豆瓣醬來做這個菜都辟唔到魚腥味。【瑤柱扒雙花】用料又係好簡單，出色之處係個瑤柱茨汁，好味，撈飯食一流。【茶燻皇子鴿】鴿子肉嫩，但嫌茶燻味不夠濃。【和平炒飯】飯粒炒得粒粒分明，味道亦不錯。【豆沙窩餅】皮餡比例適中，有外脆內嫩之感。…Read More

如心的 L Hotel 做特價，連早餐聖誕夜一晚房價只是 $506，平到咁無理由唔住番一晚。晚上，去了附近的荃新天地搵嘢食，見有間羅麥記主打懷舊茶記風味，一於試下。叫咗個【闊佬炒飯】即鴛鴦炒飯，同埋一個焗豬扒飯。飲品因為是日假期，無跟餐優惠，要俾正價，所以只叫了一杯 熱【生薑蜂蜜水】。兩個飯的份量都OK，味道也不錯。焗豬飯的飯底係有蛋絲炒過的，所以會香啲，之不過焗豬飯個汁就 “漏” 咗啲，好在杯生薑蜂蜜水幫到手，夠薑之餘，仲可以解下滯。…Read More

敏華冰廳越開越多，最近，在荃灣荃錦中心都開了一間。周末午市，客人超多，要排隊輪候才有座位。即使有位，亦只是搭檯。到底咩解究吸引到咁多客人嚟食嘢呢? 原來係呢個招牌黯然銷魂飯，同埋呢個超級雜扒飯。首先講賣相，兩個飯都係非常吸引。然後，論份量，絕對是大份。普通一個人，絕對夠飽。黯然銷魂飯的靈魂除了厚切叉燒和半生熟煎蛋之外，還有甜豉油。叉燒又腍又有口感，蛋黃流出，跟豉油撈在白飯上，非常享受。雜扒飯有雞扒、豬扒、腸仔和午餐肉，真係餸仲多過白飯。更特別的是，它不是配蒜蓉汁、茄汁或黑椒汁，而是配上薑油蔥，吃起來有另一番滋味。不過，如果要決選一個做冠軍，我會投黯然銷魂飯。另外，奶茶是較咖啡好喝。…Read More

最近，鴨脷洲大街開咗間新嘢，既是冰室又是小廚。地方細細，招呼卻很周到。中午時分，來到此處，簡簡單單，叫了個是日午餐A $47，即係乾炒海鮮烏冬，配香濃熱咖啡。餐廳比較細，於午飯時間，客人比較多，故此，廚房出餐都比較慢。慢功出細貨，烏冬是即炒的，上到來時，是熱氣騰騰的，在這個氣溫剛轉冷的日子，吃這個炒烏冬，的確是很合時。雖然，配料不多，只是些急凍海鮮，但是整體來說，這個烏冬的味道蠻不多。咖啡亦很香濃，絕對是冰室風味那種，美式咖啡店出品的是比不上的。…Read More