食之Dorothy's Profile

好特別嘅傳統印度餐，幾年前第一次嚟試過，久唔久就會想食，經常帶唔同朋友黎試，因為真係好特別。以前嚟嘅時候，基本上就係鶴立雞群，今次嚟，已經見到好多本地人黎食，反而覺得有啲失落，因為冇咗氛圍感，可能非正餐時段過嚟，6點幾，所以比較少人，大概6 、7枱客，不過keep住見到好多人嚟買外賣。餐牌有中文英文，解釋得好詳細，如果唔知食乜好，其實可以問服務員，佢會推介俾你，因為係全素餐廳，所以好放心亂咁篤亂咁叫，每次都叫唔同嘅嘢嚟試吓，各式各樣嘅烤餅，有唔同嘅配料同配搭，雖然真係唔識個名邊樣打邊樣，但係勝在餐牌有圖片，你可以篤俾佢睇。基本上如果有本地人，你會見到大家你眼望我眼，我睇吓你張枱食乜，我又試吓，你又問吓我，有咩好食，大家抱住冒險嘅精神黎試。味道算係偏濃嘅，每一款汁醬嘅味道都好濃烈，但係又好唔同，唔會覺得食來食去差唔多味，每試一個汁，都有驚喜，配烤餅或者白飯，真係一流。佢有三個套餐， $89 ， $109 ，同$119，強烈推介大家試吓，因為一盤就有成五至七款嘅醬料，配白飯同烤餅，烤餅可以改其他款式，我試咗，係可以改嘅，套餐配一碗濃湯，同脆餅，無飲品，男士食都一定夠飽嘅。另外，佢嘅咖喱飯，或者炒飯，都好好食，以前試過好幾款，炒飯好香，好好味，炒得好乾身，咖喱嘅味道，同平時去嘅印度餐廳都唔同，呢度比較香濃，好多香料，所以配埋白飯烤餅食就剛剛好。飲品，就唔建議大家試喇，因為都有啲貴，介乎30幾蚊到50幾蚊一杯，試過5、6款，都偏甜。煎炸小食，炸得比較乾身，比較油膩，除非你真係好想食炸嘢，否則都唔推介。。。…Read More

通常去觀塘，唔知食咩好嘅時候，就會去呢度，因為選擇真係好多好多，樣樣都想食，淨係睇餐牌，都可能睇20分鐘，煎炸小食，各式各樣嘅海鮮，炒小菜，樣樣齊，門口都有游緊水嘅海鮮可以選擇，基本上，你想點樣食點樣煮，問個侍應，佢都答到你有冇，選擇真係好多元化。所以每次嚟，都會盡量試唔同嘅小菜，好食嘅，下一次就再嚟食，呢度好適合同幾個朋友聚會、傾偈、飲酒，有幾部大電視機，睇電視劇、睇波都可以，閒日嚟，會比較清靜，週末就會比較熱鬧比較多人蝦多士、南乳豬手、牛肉海鮮火鍋，都好推介試，因為之前食過，味道夠、分量大、真係算好食。特別係火鍋嘅海鮮同牛肉，非常新鮮。雞煲、羊腩煲，之前試過，冇乜特別。煎炸食品，試咗好多，不過不失，勝在選擇多，不過味道唔算特別，有好多外面未見過嘅小食，呢度都有，鍾意食脆口野嘅朋友，岩晒。炒小菜，鑊氣夠，份量大，好足料。而且我覺得呢度價錢合理，比起出面食過好多類似嘅餐廳，呢度就算食到好飽好飽，都係$200一個人左右。提提大家，呢度只收現金，所有電子付款都無嘅。…Read More

久唔久都會同朋友嚟呢度坐下，大部份嘅嘢都食過，水準都好穩定，唔會出事，要飽肚嘅主食粉麵飯，下午茶嘅小食，甜品，都有齊，選擇都幾多，份量都算大，女仔一定夠飽。小食，有好多種，有啲喺牆上面，是日精選推介個d，價錢會比較貴，都成$98一份，但係我覺得係好食嘅，而且嚟得多，食勻晒，所以都建議試吓餐牌上面冇嘅食物。飲品方面，我覺得選擇唔算多，影相出嚟嘅效果一般，咖啡奶茶一般，唔算好特別， 不過玫瑰咖啡影相都算靚，雖然飲唔到玫瑰味，但係貪呢度坐得舒服，唔會趕你走。…Read More

純粹想搵個地方坐吓，行勻成個商場，見呢度有落地玻璃，望到海景，就嚟咗呢度。電話掃QR code落單，三杯飲品一個小食，埋單260 ，地方清靜，坐得舒服，座位算係闊落。嚟到先知，原來可以帶埋寵物嚟，下次可以試吓，因為平時去附近嘅Cafe係露天，好多蚊，如果落雨又坐唔到，呢度坐得舒服，又睇到海景。食物嘅種類唔算多，又主餐到小食，數埋都係得20零樣左右，但係飲品嘅選擇係好足夠嘅，有酒，有各式各樣嘅茶，咖啡，汽水，如果帶寵物同朋友出街，呢度的確係一個唔錯嘅選擇。…Read More

平價泰國菜，口味正宗，經常都嚟食，各式各樣嘅湯粉麵，炒粉麵飯，小菜，蒸炒炸嘅海鮮，湯羹類，特色飲品，都有齊晒，選擇算係多，所以經常都嚟幫襯，就算過嚟食晚餐，人均消費都係百零蚊左右。如果下午茶時段，或者午餐時間過嚟食，會仲抵份量其實都算大，足料，雖然環境普通一般，但係比起豪華裝修嘅泰國餐廳，我覺得呢度更加好食，而且價錢好合理，每張枱都會有齊所有調味料，如果唔知食邊樣要落乜嘢，可以問服務員，佢哋都好樂意答你。依家有咗地鐵，出去直行一個街口就到，方便左好多。門口比較細，唔覺意行快啲就會路過左，黎咁多次，都係要搵一陣。。…Read More

因為呢度冇咁多人排隊，所以就諗住入去，試吓佢啲燒味，我地叫左一份燒腩仔，兩款點心，兩個冷盤小食，一碗西洋菜陳腎湯，一盅蒸飯，埋單盛為$684。。有d貴。。燉湯的確好味，$68一碗，好濃，值得一試。點心同埋冷盤小食，就算吧啦，求其入一間餐廳嘅味道都差唔多，不過佢貴啲咁解啫，平均都要$48-68一個點心，冷盤前菜$68起跳，味道、質量，一般，大家千祈唔好有期待。蒸飯好大碟，大家可以試吓，食白飯都食飽。雞嘅味道同口感係可以嘅，唔錯。燒腩仔非常之脆，每一件都好似食緊薯片咁。不過，始終有啲後悔入咗嚟，因為呢個價錢，$700三個人，食唔飽，純粹下午茶填下胃就得，早知。。寧願去其他餐廳試吓…Read More

之前去隔離舖頭買便當比較多，覺得食物質素ok，而且份量又夠大，但係上次黎買外賣，等左45分鐘，今次黎買外賣，足足等左70分鐘有多，建議大家好唔趕時間、又唔肚餓，純粹想食韓國嘢，先至好黎呢度買外賣，因為出餐凌亂，毫無秩序可言，你愈叫得多，就愈等得耐，出餐，並唔係根據大家買嘅先後次序去俾你，你叫得愈少野，佢反而煮左先。。當你叫嘅外賣食物未齊，而又咁岩有其他人嗌左同一樣嘅嘢食，員工會喺你嗰袋度，拎出嚟俾佢先，如是者，你叫4樣野，都會等40分鐘。。Food Panda嘅單又會快過你出餐，如果有客人發爛渣，又會拿拿聲俾左佢先，不停見個員工左袋搬右袋，搬出搬入，搬黎搬去就係咁，今次叫左6樣嘢，等左70分鐘，不停見佢放入袋，又拎番出黎，而且，訂單內容錯誤，我地唔食牛嘅，俾左2樣牛肉我地，無附送泡菜，乜都無，以後都唔再食。…Read More

晚市嘅時候，去咗試，不過，好多款小食都賣晒，得返麵可以食，有少少失望，好想試下餃子。拉麵味道ok，湯底濃味，蔥得好少。。份量呢，女仔食應該夠嘅，而且，唔駛排隊，上菜算快，會再黎。…Read More

有時心思思想食，就會特登行過去買，始終，老婆餅，係由細食到大，所以好多次都係買一盒6個裝，因為sales話無散賣，後來我d朋友話我聽，佢地次次都係一個一個咁買，我先知，我傻左。。Sales成日掛住傾偈，要叫幾次先會有人理我，去尖沙咀去九龍灣買，都唔會好似呢間咁樣，想要燶d嘅，又話無得揀餅，態度好差囉。。如果唔係旺角得e一間，其實真係唔想去買，寧願行多幾步路，去榮華買，d 姨姨熱情好多！次次去，都要受氣，今次又係咁！…Read More

今次同朋友，晚市去食粥底海鮮火鍋，今次啲海鮮都好新鮮，都算彈牙，不過啲粥，就咁食，有啲喊，都係當打邊爐湯底好d，咁就唔駛加豉油，剛剛好夠咸。每一台都會有專責服務員，落枱開始，就會幫你計時，啲海鮮蒸夠時間，佢就會幫你開蓋，有骨碟、骨桶用。雪糕係牛奶公司，甜品大概有六至八款蛋糕，百福豆腐花，飲品大概都有十幾款左右可以選擇，外面自助區，有兩款煎炸小食，兩款涼拌前菜，其他，大致上都係丸類，幾款蔬菜，唔算吸引。湯底，如果唔要粥底，有好多款可以揀，上次試咗鴛鴦鍋，所以今次就食粥底，豬肉，牛肉，雞肉，係任食任叫，逐碟上，刺身雖然都係任叫，但係得個幾款，唔算吸引，自助調味料嗰度，都係得七款，唔算多選擇，係d蒸海鮮，算係新鮮，所以先值呢個價錢。每個人都有半隻龍蝦、4隻蜆、1青口、1蠔、2隻扇貝、2隻海蝦、1隻鮑魚。不過鍾意佢坐得舒服，枱同枱之間，隔得夠遠，唔會太貼，唔使坐得咁迫。…Read More

以前，每個星期都嚟食，因為貪佢菜式夠多，選擇多，不論係主食，小菜，麵色，都有好多選擇，牛、鴨、雞、豬、魚、蝦、蟹、田雞，都有，上菜快，味道好，價錢比起同類型嘅餐廳平，新鮮，份量都算大，加上，又有火鍋，所以，以前成日都同朋友過嚟食，水煮魚，水煮田雞，辣子蝦，係最好食，不過冇諗過，今次過嚟食，有啲失望，因為條魚唔夠新鮮。。。😔啲肉好實，而且味道唔夠，煮耐左，好彩，最鍾意食嘅焗蜆，依然冇令我失望，仍然好好食，各式各樣嘅冷盤、小食，都值得推介，味道同份量，仍然同之前一樣。…Read More

餐廳有樓上樓下兩層，樓上嘅冷氣好弱，真係好熱，而且樓上樓底矮，高嘅人，可能會撞頭。。😅每張枱，都有塊佈景板，比客人影相。今次揀咗烏龍麵，同埋粉絲，烏龍麵，其實就係有啲嘅烏冬，反而覺得粉絲比較吸到啲湯汁，比較入味。兩個人，都叫咗10幾款餸，味道一般，覺得煮得唔夠冧，但都入味嘅，真係建議大家要問佢攞辣椒油沾嚟食，因為佢個辣椒油好香。餸嘅份量，我覺得算少，份量唔算大，就算叫咗五個餸，我一個女仔都可以食得晒，蘿蔔清甜，入味，甜不辣、豆腐真係冇味。。其實個汁算係好食嘅，同台灣比，當然冇得比，但係我覺得，如果再煮耐少少，煮得入味少少，其實就冇得頂，可惜有幾款餸，味道都係好淡。珍珠奶茶，本來有期待，但，一般。價錢唔算平，以一碗湯麵黎計，所以，應該唔會特登再嚟食。…Read More

大熱天時，路過呢度，就去咗試，午餐價錢，大概$70有找，最平四十幾麵餐都有，套餐包括主菜，湯，小食，飲品，甜品，不過今次嚟，可能因為疫情關係，所以湯同甜品，係冇嘅，只有主食。羊肉湯麵，真係推介，味道好濃，但係唔會腥，而且好足料，肉嘅份量好多，碗麵都好大，仲有三隻餃子，或者春卷，都算抵食。糖醋魚吃飯，魚的確炸得好脆，粉漿稍為厚咗少少，果汁真係好食，因為食過好多間，啲汁都會偏酸，或者食到味精好重，佢呢個唔會，酸酸甜甜，剛剛好。可惜午市過嚟，而家冇晚市，如果唔係，都好想試吓佢個片皮鴨，係咪真係咁好食。…Read More

今次係好姊妹帶我嚟，話試吓新野，入到去，簡直有種鶴立雞群嘅感覺因為成間餐廳， 30幾人，得我哋兩個亞洲人，全間餐廳坐滿晒，全部都講緊外語，都好嘅，大家都可以放心傾偈，因為反正都聽唔明隔離枱到底講緊咩。。餐牌，有中文、英文、同印度文，食物嘅選擇非常之多，足足有兩版，由主食到咖哩、小食，有好多好多選擇，但係大部份睇上去嘅感覺都差唔多，其實真係斷估亂咁嗌，因為佢嘅翻譯，我睇唔明至於點餐，只可以用英文，因為成間餐廳嘅服務員，都係印度人，我哋兩個盲篤左餐一輪，點左六樣野，有咖哩，有印度烤餅，有小食，仲有佢嘅特色食品基本上，係抱住食辣辣壽司嘅心情，等候食物上枱，因為真係唔知自己叫咗啲乜，最推介最推介，真係佢嗰個乳酪芝士波，超好食，脆口，而且係凍嘅，從來未食過呢種口感嘅食物，好特別，好得意，再叫多咗一碟。至於佢嗰個印度烤餅套餐，會有五款汁醬配埋，一款酸酸甜甜，一款咖喱，一款辣嘅，一款青綠色嘅我唔識得點形容佢係咩味。。心情好複雜。咖喱，比我想像中淡，不過入面勁多唔同香料，入口有好多種唔同層次嘅味道，佢大致上係白咖喱，青咖喱，你可以自由配搭白飯，或者各式各樣嘅烤餅，呢間餐廳嘅芝士，唔係我哋平時食開黃色嗰啲，佢係白色一粒粒嘅，基本上好淡，冇乜味道，食落口好似一舊麵粉咁，口感似係一夠硬豆腐，最主要係要配埋啲質料去食。佢各式各樣嘅食物，價錢都好合理，可能仲平過去茶餐廳，而且選擇多，因為係素食餐廳，所以覺得好新奇，好特別，我諗我都會再去多次，因為仲想試吓佢餐牌上面其他嘢。…Read More

上年偶然一次，朋友帶我過嚟食，之後就覺得愛上左，每隔幾個月，都會嚟一次，餐牌上面嘅煲仔飯，食齊晒，最推介嘅，都係白鱔同埋蝦，因為有粉絲嗰啲煲仔飯，真係食粉絲食到飽，煲仔飯，即叫即做，熱辣辣上枱，真係有飯焦，而且味道好夠，就算唔落豉油，都好好食，主打都係海鮮煲仔飯，另外有和牛煲仔飯，價錢都好抵，大概78至108 ，連埋餐湯，飲品今次試吓小菜，份量都足嘅，不過有啲貴，晚市套餐，大概有10款，88-128不等，一樣有餐湯同飲品。如果鍾意食煲仔飯嘅朋友，真係要來試吓，食過咁多間，呢間真係好食，不過如果你係食小菜，真係有啲貴。。。因為只係茶餐廳，一個小菜晚餐要$100。。今次朋友手痕，等俾錢嘅時候，玩埋門口嗰個抽獎箱，抽左$50現金券，下次可以用，而且問咗老闆，冇期限，滿200就可以用，如果兩個人嚟食，就一定可以用到張$50。突然之間覺得自己蝕咗，之前咁多次，都冇抽過獎。。。…Read More