uouo3626's Profile

今日風和日麗，有冇乜嘢做，於是就約咗好耐冇見嘅隔離鄰居（即係住附近嘅朋友）食飯。作為牧羊少年咖啡館嘅常客，真係每一間屋樣都去過曬。呢一間除咗個地點夠晒近之外，仲唔洗等好耐位，今次一去到仲即刻有位tim!另外欣賞呢一間咖啡館嘅原因系因為樓底好高，空間感好大，坐得好舒服。而且佢嘅牆身用咗白色瓷磚，配有落地大玻璃窗，感覺非常光猛之餘，仲可以望住出面個湖仔食野。望望餐牌，都係一如以往地咁多嘢食。今次就決定試吓竹炭三色漢堡，芝士薯條，同埋卡邦尼長通粉。竹炭三色漢堡個餡分別有炸蝦，Parma ham, 同煙三文魚三種材料。雖然個包竹炭味唔濃，但上枱嘅時候仲係脆，配上三種材料嘅咸香味，非常滋味。芝士薯條選用咗粗身嘅黎炸，粗得黎又唔會太腍，keep到嗰種脆扑扑嘅狀態。即使係淋上厚厚嘅芝士，依然風味無比。卡邦尼長通粉粒粒都掛到汁，有d忌廉同芝士嘅香味，但又唔會太重，食幾多都唔覺得膩。雖然長通粉粒粒都充滿醬汁，但仍然做到al Dante 嘅效果。最後仲嗌咗一杯士多啤梨朱古力，濃濃嘅朱古力味，配上士多啤梨味，感覺就好似飲緊一粒明治士多啤梨朱古力咁！雖然牧羊不停開分店，但依然keep到個水準。相信我會係lee間餐廳嘅常客！…Read More

最近坑口東港城開咗唔少新舖，全部野食都好似好靚好精緻咁，真係超想試！尤其係呢間拉麵舖，但鑒於次次經過都見到勁多人排隊，先無奈要放棄。次見到咁少人，決定一於試吓。餐廳環境比較窄，唔係太夠位，連個袋都擺唔到。睇一睇個Menu，選擇都算幾多選擇。今次決定試吓鹽味拉麵同黑蒜油拉麵，再嗌多個流心蛋，大阪燒餃子同埋炸雞。雖然價錢比較平，但係拉麵都仍然可以選擇硬度。黑蒜油拉麵味道非常濃郁，拉麵夠彈牙，蒜蓉味十足，每一啖都好似食緊半瓣蒜頭咁。不過食咗幾啖之後，就開始覺得有啲油膩。相反鹽味拉麵個湯好清，個味都唔會話太濃亦唔會太啖，除咗鹹味之外仲有淡淡嘅柚子香，去除咗嗰個油膩嘅感覺，好好食！流心蛋醬油味唔係太重，顯得有d啖，較為失色。大阪燒餃子就比較特別，配上酸酸甜甜嘅沙律醬我，味道中規中矩。而炸雞雖然都係好似一般炸雞店嘅味道，但係上到黎非常大份，十分抵食。咁抵玩嘅拉麵店，下次一定會再幫襯！…Read More

是日返工真係勁攰，勁忙，真係要俾啲人激死咁滯。唯有係食一大堆好嘢，先可以發洩我心頭之恨。所以就約埋個同事，決定去附近食好西！附近間和民執咗，唯有去遠少少，新太陽嗰邊，食饗和民。之前試過禮拜日幫襯，完全冇set lunch，啲飯都要講緊百幾蚊一碗，實在幫襯唔落。今日係閑日，終於都有set lunch可以嗌啦。Lunch set都唔錯，有18個定食可以揀。除咗都有嘅set lunch之外，仲有日替，非常多選擇。我就叫咗個北海道蕎麥面迷你鮭魚魚子丼定食，價值$86 ，其實個蕎麥面同埋個飯都算係大份，非常夠飽，幾抵食。不過味道就一般，中規中矩，三文魚都唔係特別肥美。啲同事就叫咗個石鍋鮭魚帆立貝蒜蓉牛油飯。個飯團一嚟到，就已經香氣撲鼻。價錢仲只係$68，非常抵玩！下次都要試下！每一個set lunch都會麵豉湯同一杯飲品，喺尖沙咀來講，算係抵食。…Read More

是日星期六，天氣又非常炎熱，根本就完全唔想周圍去！ 一於喺屋企hea下，睇下電視就算。睇睇下發現，又夠鐘食飯。為免行太遠，最後都係揀返喺附近商場食就算。見時間尚早，門口冇咩人，啊媽又話食唔厭，於是就黎咗lee間漁樂！一入黎就俾幾杯水，水冇水喉味，反而有淡淡檸檬清香，加分！餐牌都算幾多選擇，有小食，沙律， 湯，雞類，海鮮類， 亦有炒飯麵，冬陰功類， 最欣賞係有埋粉面，可以俾你一個人幫襯又得，成家人散叫叫餸亦得，得咗！今日我地決定每人一個main course。 分別係火車頭雜錦金邊粉， 海南雞飯。火車頭金邊粉湯底偏鹹，比較濃味。 裡面有豬肉丸，札肉，肥牛。 材料算幾足，最欣賞係個豬肉丸，居然有淡淡蝦醬味，好食！金邊粉尚算彈牙，我俾4分！至於啊媽個海南雞飯都唔錯。雞油飯充滿油香，雞肉幼嫩，配上濃濃甜甜ge醬油，好食！唔算太貴，又近近地，食物質素唔差， 我地應該會成為 常客！…Read More

最近新都城都開緊好多新餐廳，呢一個鋪位一向以來都比我譽為係風水唔好嘅位置，因為每一間餐廳係呢一度開咗幾個月就會執笠，所以今次見到開咗間上海餐廳，鍾意食上海野嘅我，當然要來試吓佢嘅命運會唔會都係一樣。同朋友下午一點幾嚟到呢度，都幾full，要同人搭台，不過就唔使等位，客人普遍都係年紀比較大嘅人，我哋應該係全場最後生兩位。我哋點左兩個午餐，價錢都OK平民唔太貴，好多款式揀，仲可以自己選擇拼唔同小食同飲品，我點左獅子頭同凍豆漿再另外加＄12加左份小籠包同朋友share。有啲餐廳嘅獅子頭會冇乜味或者肉質奇怪，但係呢一間煮得好正宗，冇呢啲問題，小唐菜都幾多，不過個汁就鹹咗少少。凍豆漿味道正常，OK濃郁。至於小籠包就值得稱讚，雖然小籠包係我夾起身嘅時候都係唔小心整穿咗，不過就算穿咗都仍然有好多湯汁留喺入邊，入口嘅時候暖暖地唔太熱，唔會辣親口，不過得兩粒真係有啲唔夠喉。不過店員態度就唔特別好，而且位置都係有啲迫。最後人均消費＄63。以食物質素來講都係會再幫襯！…Read More

前兩日行過見到呢一間餐廳嘅裝修已經覺得顏色好吸引，裝修亦都好靚，黎到呢度打算食返個toast當係晚餐，佢d toast有好多唔同味道，所有味道都令人望住Menu都覺得流晒口水，大多數都係40幾50蚊，唔算太貴，份量好足夠。本來係想黎試龍蝦toast，雖然價格貴其他一倍，但係每日限量，好想試吓有幾特別，點知佢話冇，唔知道係未開始serve定係已經賣晒。結果我哋揀咗千島醬墨魚餅味同埋牛肉味，等待時間唔係好耐，一打開份toast，見到外面金黃色嘅外皮，已經超級吸引，而且仲搽咗一層蜜糖令到佢脆卜卜得黎甜甜地，好有咬感。牛肉味都煮得恰到好處，竟然同麵包嘅味道出乎意料地match，麵包入邊嘅蛋同埋牛肉都係好貼心咁樣鋪得好均勻，令到每一啖咬落去都可以食得到牛肉。至於千島醬墨魚餅味嘅墨魚餅因為炸過，所以有啲熱氣，不過味道啱啱好，唔太咸，千島醬亦都配合得唔錯，2份toast都係即叫即做嘅，又熱又好味。至於服務員嘅態度都值得一讚，我哋見到隔離位離開嘅時候漏咗件衫，職員仲好好心咁樣即刻衝出去畀返客人，態度好好，我哋點餐嘅時候都已經感覺到。…Read More

捱咗咁耐，日做夜做，朝思暮想，終於等到出糧大日子!!!!仲要係出bonus!緊係要壽司慶祝慶祝！諗咗又諗究竟食乜好，食黎食去都係食嗰d連鎖式餐廳，都真係有d悶，女友提議不如試下新野啦!於是喺openrice好random地揀，就揀中咗lee間家賀屋。位於灣仔道嘅佢，一d都唔起眼，只見大廈外豎立嘅一個門牌。我地大概六點幾上到去，唔算太多人。侍應生問一句：「有冇book位ga?」頓時嚇一嚇， 心諗死喇係咪唔book冇得食？！但最後好在侍應生都俾我地入去。一入到去，環境黑漆漆，高貴中有點格調，門口有一個火爐作裝飾。食物種類算多，除左一般喺連鎖壽司店會見到嘅壽司外，亦有唔同嘅小食，刺身，烏冬，魚生飯，同甜品。由於係慶祝出糧關係， 所以冇望餐牌，想食咩就食咩。於是，叫咗個海鹽輕燒中吞拿魚腩，蔥吞拿魚腩軍艦，安格斯牛軍艦，特大赤海蝦， 三文魚，極上花之戀，七味鯖魚，火炙鰻魚，黑松露特大帆立貝，海膽魷魚軍艦同明太子雞翼。一食便知龍與鳳， 吞拿魚赤海蝦三文魚都非常新鮮，食得出鮮甜味。 平時嘅花之戀夾嘅時候會散，但lee舊居然可以牢牢地包到實一實，證明料夠足，三文魚夠厚身！鯖魚同燒鰻魚入口微暖，雖然我平時唔係太食魚類，但都覺得lee兩款都好好食，只因入口一腥味都冇！再黎就係明太子雞翼，雞翼拆雞再釀入明太子，食落脆卜卜。明太子辣辣地，食落去同雞翼都幾夾。最好的當然就係留返喺最後，就係海膽魷魚軍艦同黑松露特大帆立貝!平時d海膽，食落去係苦嘅，一食就知道佢唔新鮮!但lee個完全唔會，海膽魷魚鮮甜，正!黑松露帆立貝仲正! 平日食嘅帆立貝會食完有好滯嘅感覺，但Lee個完全唔會!帆立貝好厚身，口感豐富，配合埋芝士同黑松露，簡直一絕!最後叫埋個甜品，叫咗個柚子雪糕同豆腐雪糕。豆腐雪糕似維他奶，豆味都算濃，可以接受。 柚子雪糕有香濃柚子味，唔會太甜，味道亦唔會太假，好食！由於叫野食時候冇睇價錢，正諗緊會唔會成千蚊之制(以質素黎緊) ，埋單竟然只要＄500蚊! 真係超抵玩！下次一定會再黎食!!!!!…Read More

今日返工返到勁攰，又俾人鬧! 於是個心不禁想食好西黎平衡返自己嘅心情! 對於有d人黎講， 好西可能係要d好貴好grand好華麗嘅野，但對於我黎講，好食就乜都得啦!於是今日把心一橫，決定放工去食撈面!原先明明要返屋企食飯，都專登遲好幾個站落車，去慧安園覓食！轉幾個路口， 終於黎到螢火蟲。 對於我黎講，營火蟲就好似童年回憶咁， 記得以前放學都成日會食一去到， 見到個姐姐， 個樣完全冇變過～而螢火蟲嘅撈麵亦依舊都係有大細揀。鑒於就食飯嘅關係， 叫咗個細撈，承惠$6~雖然話就話叫細撈，但份量一d都唔少， 絕對夠飽肚。望落去，醬汁比平時喺第二度食到嘅多，麵質亦俾平時硬身。絕對唔會淋bat bat一pat咁。醬油味甜甜鹹鹹，加上炸蒜，簡直入口香噴噴！由衷地覺得，香港仍然有lee d 平民小食店，真係好正!平靚正仲醫飽埋個肚！最適合我地lee d 上班族，上車族，慳得一蚊得一蚊呀!…Read More