今日中學同聚會，於是就㨂咗去金牌火足九龍區所以一直都無機會去試試。原來灣仔係舊年開咗間分店，真係開正我嗰範😁真係估唔到依家啲邊爐真係越做越好。我哋有成十個人咁梗係訂房好啲啦，一世遲到嘅我今日竟然第一個到，咁梗係要影吓間咁寬敞設備又齊全嘅房比班老友睇吓啦。人齊！開食嚕！我哋呢班人呢真係牛魔王🐮 。可能太忙嘅原因，總經理都出嚟幫手落單，係佢推介嘅金牌牛骨鍋湯底。。。頂吖！食過呢個鍋真係無得返轉頭，以後點叫我去第二間食呀！個湯底堅夠濃，一啲都唔覺油淋淋，墊湯嘅牛骨大部份都係骨骹位、牛筋、牛腩、牛膀、腸都有齊，舊舊骨有小小肉痴住，重點係骹位啲軟骨、骨膠原煲得啱啱好，只係飲咗啖湯食咗件骨膠原落肚就知應該好戲在後頭。今晚我哋點咗勁多嘢食，不得不提而且要必食嘅本人會推介，牛肩脊、（？咩魚？）、蟶子、魚腐、墨丸、魚蛋，當然仲有名不虛傳嘅三秒響鈴啦。我平時個人口味超勁重口味，去親邊爐都勁落所有醬汁配料，今次當然都一樣死唔蝕底啦，應有儘有嘅醬料都落啦，之不過我發現今次我竟然係渾咗一大碗醬之後係無乜點過，事關樣樣新鮮，鮮味十足。牛肩脊肉脂均勻牛味香濃，師傅刀工嘅又切得厚薄適中，有𡁻頭之餘又軟滑綿綿，真係無得彈。海鮮方面，有蟶子又有（？魚），蟶子爽脆彈牙又鮮甜十足；條魚嘅皮嘅膠質豐富直頭完全感覺自己係度食物膠原蛋白嘅感覺，加上肉質新鮮嫩滑根本無需再點任何醬汁都巳經夠晒可口更是原汁原味！最後，食埋佢哋個貼心服務又甜又多汁嘅橙，起好晒啲肉方便啖啖肉入口。下次再有聚會都會再嚟🤗…Read More
