JPIII's Profile

咁啱去開荔枝角，諗嚟諗去都係得幾間舖頭啱食。突然之間就醒起阿木喺D2 Place two開咗，諗都唔諗就去咗食！中午1:30到達舖頭門口，見到門口有唔少人喺度等緊位，我就立即去撳飛。唔知係咪新開張嘅關係，老闆娘都喺度坐鎮。見到員工執枱都幾快手，而且都好注重衛生。大約等咗10分鐘就有枱。新舖頭係用QR code落單，都有少少客制化選項可以揀。落單後大概5分鐘左右就出齊。影咗一兩張相之後，就立即開始食我呢碗牛肉麵啦！而家冇乜機會去到台灣，但係喺呢度可以食到一碗比起喺台灣食更好食嘅牛肉麵，心滿意足！味道 5/5紅燒牛肉麵，唔單只係個碗大，牛肉嘅大小同數量都好誇張，食晒啲麵都仲有幾塊牛肉喺個碗度未食到。叫紅燒牛肉麵而唔叫麻辣牛肉麵係因為咁樣可以試到原味嘅湯底之外，加上呢度個辣椒油就等於轉左麻辣口味，總之就一句講晒，正！環境 4/5大熱天時最緊要係個冷氣，呢度個冷氣夠晒涼爽。佈置都幾好，唯獨是係大家都高談闊論，環境有啲嘈吵。服務 5/5雖然轉左QR code落單，但係員工們仍然係有警惕，一旦同你有眼神接觸，就會上前問你有咩需要幫手。送餐到你面前亦都會同你confirm一下係咪點咗呢個餐，避免咗送錯餐嘅情況。衛生 5/5見到老闆娘同埋夥計都好落力咁樣去執枱搞衛生，冇啊好挑剔！抵食 4/5老實說， 港幣$75一碗牛肉麵一定比起喺台灣買嘅貴。但係香港同台灣嘅舖租、人工、食物成本等等都差好遠，只能說越平越抵食！…Read More

今日食飯時間係三點三，食完野之後，同事話去買甜品，咁我就跟埋一齊去喇。原來佢地講緊既係嘉多娜餅店，雖然我已經食過無數次，但係反正都黎到又唔洗排隊，咁梗係買埋喇。照舊都係買晒最signature戈四樣野，原味布甸泡芙即刻食，其他留返係屋企之後再食。布甸泡芙 $20呢個布甸泡芙過分爆餡，大口如我都流到一手都係。太過分喇！一定要食到唔漏落隻手為止！法式布甸包 $15雖然呢個原味泡芙唔係我心目中覺得最好食既香港布甸包，但係咁近公司可以隨時食，所以頂住先。布甸滑溜，唔會太甜，給過！比利時黑朱古力布甸包 $20呢個包其實係原味布甸包上面再加一層朱古力漿。大家可以睇到個朱古力漿佔咗一半既厚度，好似唔使錢咁。雖然係黑朱古力，但係成個食晒都會有少少膩。開心果脆脆泡芙 $25純粹想試下個開心果蛋漿。唔是開心果控既我表示，唔會特登再買。唔是因為唔好食，只係因為唔好開心果姐。…Read More

為左慶祝外母大人登陸，老婆大人約埋成家人，齊齊去米芝蓮一星中菜廳——逸東軒食晚飯慶祝。由於我地訂左位，所以即使去到既時候人頭湧湧，我地都好快有位置坐低。揀好心水食物之後，野食都好快上齊。大家都好滿意，一定有下次！味道 5/5花膠鮮杏汁燉白肺 $180本身我就好鍾意飲杏汁豬肺湯，所以毫無懸念咁樣叫咗。個湯好濃郁，但係就係爭咁少少行汁味。推薦！👍🏼金粟生拆蟹肉羹 $180我老婆就飲呢個金寶粟米湯加蟹肉既羹。可能就係因為加左粟米，所以成件事就覺得係金寶粟米湯加蟹肉。馳名燒味雙輝 - 蜜汁叉燒、脆皮燒腩仔 $380蜜汁叉燒係呢度嘅招牌，半肥瘦好好食，又冧又入味，大推！👍🏼👍🏼👍🏼脆皮燒腩仔，可以再鹹少少，塊皮好脆，正！鴻運脆皮雞（半隻） $298碟雞上枱嘅時候，我哋以為淨係嗌咗範例。雖然份量好似少咗啲，但係隻雞好脆、肉好嫩，唔會太肥，正！蜜餞脆鱔 $218真係冇諗到呢碟係蜜餞脆鱔。呢碟餸亦都顛覆咗你對鱔嘅感覺，好脆又好好味，推薦！野菌魚湯浸時蔬 $218呢味菜係用魚湯煮莧菜，好好食。我忍唔住飲晒d魚湯添！砂鍋薑蔥爆乳香銀鱈魚 $288呢味銀鱈魚個樣好似咕嚕肉，連小朋友都好鍾意食！銀鱈魚炸得好脆，炸粉亦都唔厚，恰到好處。推薦！👍🏼👍🏼👍🏼脆皮逸東烤鴨（拼傳統春餅，青瓜，青蔥及海鮮醬）+ 鴨崧炒飯 $780做好烤鴨之後，會原隻烤鴨去到你面前俾你過目。之後再去返分送菜嘅位置片皮，最後就可以上枱食喇。之後會用剩返既肉去炒飯，成為一鴨兩食喇！上湯焗開邊乳龍蝦（伊麵底） $528呢個伊麵唔同平時戈d，呢個比較幼細、比較掛湯，所以食落好入味！對於好鍾意食上湯伊麵嘅我，好滿意！如果可以連龍蝦都唔要，變晒做伊麵，咁就大飽口福喇！👍🏼👍🏼👍🏼👍🏼👍🏼香芒糯米卷 $58最後以甜品作結，呢個香芒糯米卷皮薄肉厚，而且果肉好甜！正！👍🏼👍🏼👍🏼👍🏼環境 4/5中菜廳比人感覺好優雅，有令人放鬆、舒適既感覺。唯獨係燈光有d暗，所以影相既時候要就角度。而且冷氣唔太夠，感覺有點侷促。服務 4/5侍應反應快，積極正面， 十分好！唯獨係上菜方面有少少甩漏，但戈日咁忙，可以接受。衛生 5/5乾淨、企理，冇乜好挑剔！抵食 4/5話晒都係米芝蓮一星餐廳，所以價錢都有返咁上下。但係就住食物質素來講，值回票價。當然消費者角度黎講，一定係想平d既。…Read More

同兩個有前世今生既巴打食生日飯，一個想食雞煲，一個想打邊爐，我就想食海鮮。爭咩呀爭，溝埋一齊喇笨！最黎我就帶大家黎有公司飯堂之稱既倫哥喇！一開波就上左個雞煲，跟手再比埋刺身拼盤。雞煲食到咁上下再加雞，個蒜蓉蒸海鮮就上檯喇！食雞煲都食到飽咁濟，咁就轉打邊爐喇。揀好湯底好快就到喇！跟手又有個打邊爐既海鮮拼盤上埋檯。咁多野真係好難唔飽！最後last order後再上個movenpick 雪糕作結！完美！味道 5/51、刺身得一round，正常發揮，份量隨人數而有增減。2、蒸海鮮都係得一round，沒有到好驚艷，但好食！3、雞煲可揀大中小辣同無辣，無限次添加是個重點！雞煲上桌後要炒3-4次以確保煮熟。雞件入味嫩滑，無咩挑剔。4、最後就係邊爐，食到呢part大家都飽咁濟，淥下海鮮同菜就結了！環境 4/5地方夠大，有格局，有裝飾，座位都舒適，冷氣夠。服務 5/5侍應唔多，但要搵人一定搵到。有侍應見我地開初唔太識炒雞，主動教同幫手炒！衛生 4/5沒什麼特別好說！抵食 5/5本身就$348加一，但撞正端午節要加$20。但係乜都有咁濟，還求什麼？！…Read More

是日係小弟生日，老婆大人帶埋仔仔同我去附近慶祝生日。睇左menu之後，揀左幾樣想食既野。普遍黎講西班牙食物都有兩個共通點，都會見到蛋黃醬同埋味道係淡口少少。味道 3/51、Iberian Ham Croquetas $68簡單黎講就係芝士薯波入面有d ham，好好味！推薦！👍🏼👍🏼👍🏼2、Crispy Pork Belly with Quince Aioli $88呢個就係西班牙燒腩肉，炸得唔錯，味道唔太濃。3、Grilled Boneless Chicken Leg with Mushroom & Truffle Aioli $98呢個西班牙無骨雞腿肉味道清新，但有部分位置少鞋。4、EL Cerdo Classic Tortilla of Potato, Eggs & Onion $78西班牙奄列都係淡口少少，但係都好味既！Drinks1、Mocktail - De La Passion $60芒果熱情果口味既mocktail，酸酸甜甜，整個胃都開了！推薦！👍🏼👍🏼👍🏼2、Sangria - white(per glass) $65感覺清新，順口，唔甜！推薦！👍🏼👍🏼👍🏼Desserts 1、Churros con Nutella $58西班牙油炸鬼加榛子醬就係西班牙既傳統甜品。好食！唔太甜，又唔膩！份量剛剛好！推薦！👍🏼👍🏼👍🏼環境 4/5眼見室內應該幾舒適（話晒都夏天呀嗎）。帶寵物既朋友就只可以坐室外位置喇，只有兩張檯。但係已經好好咁安排左4部風扇/冷風機都幫助，可見餐廳都有心比帶寵物既客人前來幫襯。服務 4/5侍應生反應好快，一眼關七。兩三個侍應就要睇晒成個場！掂！衛生 5/5地方乾淨企理！無得彈。抵食 3/5雖然我唔清楚西班牙菜係咩價位，但我覺得呢間大部分野都算係合理。…Read More

公司附近好多野食，今日就黎到蛇王．如冰室搵食喇。落低睇下是靚午有咩，但其他都無咩興趣，所以就叫左蔥油雞飯，重口味既我一定叫埋多蔥油。餐飲凍奶茶，少甜少奶。姐姐重問我飲唔飲老火靚湯，咁就唔好客氣喇，黎喇！味道 4/5秘製蔥油夠鹹味、唔油膩、蔥又大大粒增加左口感。淨係蔥油撈飯都一流！雞件無同公司慳，比得好多！大部分雞都嫩滑既，但有些少部位都是鞋，唔多可接受！老火湯應該無添加，落兩粒鹽幾好味！凍奶茶少甜就飲得出，少奶就唔是少左好多喇。環境 3/5檯唔是好多張，但坐落舒適。服務 4/5一叫落單就馬上有人黎，等餐時間都合理。姐姐重會問飲唔飲湯！掂！衛生 3/5可能因為落雨喇，舖頭已經鋪左紙皮係地下，但可能都鋪左一輪，地下始終都少濕。又有d溶溶爛爛既紙皮係通道上，感覺一般。抵食 4/5都係戈句，沒有最抵，只有更抵！…Read More

一年容易又老豆節喇！今年照舊都係想避開正日既人潮，所以選擇左閒日去做節。星期四晚上大約七點左右，去到都重有得選擇室內。落雨絲濕，都係坐室內舒服d既，但室內冷氣好大，即使侍應調細左冷氣都仍然覺得凍。點左菜之後，好快就上齊喇。我地一行六人點左六個餸，本身諗住食左唔夠先再加，但最後差d食唔晒。無諗到每一碟都好大份！老豆都滿意！有下次！食物 4/51、椒鹽九肚魚（例） $138炸得脆，唔油膩，搶口，推薦👍🏼👍🏼👍🏼2、滷水三併 - 墨魚、生腸、豬耳朵 $130墨魚𠝹左花、又爽口；生腸爽脆；豬耳朵夠qq3、潮州煎蠔餅（中） $118色水就略嫌有d深色，亦都唔夠熱。食落味道一流，蚵仔都好多！👍🏼👍🏼4、沙茶韭菜豬紅（中） $78正常發揮，不過不失。5、腐乳炒通菜（例） $88正常發揮，略嫌少貴！6、潮州糖醋麵（例） $98圖文不符，但一樣好食！建議落些少紅醋！推薦喜歡甜食既朋友試下！👍🏼👍🏼前菜 - 花生 $10；咸菜 $10茶位 - 每位 $5環境 4/5地方大，想搵姐姐點餐戈時要行出去搵。問過姐姐，係可以帶狗狗黎食野既，坐室外咁解姐。個人覺得帶狗狗黎都係等天氣涼d先好d，因為室外位置唔見有風扇風機之類既機器。服務 4/5姐姐會捧住新鮮出爐既當日special比大家揀，落單後會覆單，有禮貌！上菜都好快，唔會等極都無野食。衛生 3/5雖然揀左室內，大家都要小心地滑。餐具都有d古舊，洗一洗求個安心喇。抵食 4/5都係戈句！沒有最抵食，只有更抵食！…Read More

屋企樓下就係IKEA美食站真係好正，久唔久想食就可以去落去買。而且番shift既我放工時間人流都未必多，好容易唔洗排咁濟就買到黎食。聽到D24最後一日，就一定要落街買黎食喇！個人覺得一球就點都唔夠，兩球唔過分，重口味既話買三/四球就岩晒喇。D24味濃但唔膩，正！唔知下一期又做咩榴槤呢？期待！味道 5/5榴槤控黎講，佢味濃，夠香，亦夠滑環境 4/5當日係閒日，過左午食時間，人流唔多，不過始終都係得幾張檯喇，打卡都需要就下角度服務 4/5自助機點餐，都有helper在旁，有問題隨時搵到人幫手。出餐同事都盡量令到成個流程smooth，盡量唔會塞死晒係取餐位置👍🏼衛生 4/5垃圾桶就得一兩個，好易就爆。咁岩就有清潔姐姐幫手清空左。但我諗如果好似阿宗麵線咁，大家張d碗呀、盒呀、杯呀咁分別疊高，應該個垃圾桶見洗好多！抵食 4/5永遠都係沒有最抵，只有更抵喇！…Read More