超級大食凹's Profile

越做越差，幫襯咁多年，越嚟越冇禮貌，餸又越嚟越少。打電話落單，男人接聽，覆兩次，兩次都錯，要撈粗，就覆我撈幼，要牛栢葉就覆魷魚。等咗1個鐘，打去問出咗未就話出咗，好快到。再過多半個鐘，又話嚟緊。最後要成2個鐘先到，仲要係送去天耀商場。叫個外賣等2個鐘，打去問幾時到，只係答好快好快，聽電話果個亞姐又冇禮貌，送到嚟個外賣凍晒，搞到好難食，啲油凍咗漿住啲薯粉，餸又少，牛栢葉少到得6條絲，每條5~7mm闊！除咗價錢稍為正常外，搵唔到再幫襯嘅理由！…Read More

試業階段，基於人手不足，可能冇乜經驗，相比同區台式飲品店時間上真係耐好多，同埋物資預算做得未夠好，今日下午兩點幾去買已經因為唔夠珍珠，冇晒飲管而cut單。味道方面真心覺得唔錯，茶香清新有回甘，飲得出係誠意之作，可惜，得一位沖泡調製，杯杯即沖茶底！至於價錢，唔算抵，不過我相信成本亦唔會好平，杯，蓋同集團式嘅有分別，加上珍珠係自製，我自己覺得值嘅。玫瑰花珍珠👍👍👍Baileys珍珠👍👍👍個人認為半糖已經足夠，太甜會遮蓋茶香。另外，飲完第一次，茶包可以翻沖，唔好浪費！希望可以keep到水準，用心，有誠意嘅台式飲品係元朗真係唔多。…Read More

😶😶😶叫外賣，要乜冇乜，身為一間食店竟然係咁，真心有啲失望。之前叫過幾次，其實質素唔差，諗住試下其他野點知……希望有改進，本身款已經唔多，如果加埋要乜冇乜嘅話，真係好難留客。支裝奶茶可以唔洗試，茶太濃，有苦澀味。…Read More

其實想試好耐，不過經常遇唔啱時間，終於的起心肝去試下抹茶脆豬同茶冰珍珠奶茶。果然好味!特別係茶冰珍珠奶茶，加埋半糖，茶味突出，就算溶晒啲冰都唔會淡（梗係啦～茶冰嘛！😂😂），好喇~~到抹茶脆豬，真係又脆又香，不過抹茶啲味……應該係添加人造香料，但係算啦！li個價錢點可能用全抹茶丫~~~一分錢一分貨，過口癮唔錯~~其實我另外仲叫咗個奶醬脆豬，味道一般! 一個包加一杯飲品，平3蚊!算係咁啦～😆😆自從試完杯茶冰珍珠奶茶，我成日都好想再去飲，可惜，唔太就腳，如果開係又新街或者西菁街就好喇!…Read More

新開一段時間服務唔錯，refill算快，環境夠闊夠大，冷氣大咗啲，不過用pad落單就……估唔到部pad有問題，不停自己 restart, 最後要搵職員落單！雪糕，乳酪嘅配料較少，希望將來增加多啲啦～同埋乳酪機好快冇晒，仲係黃金時間喎！li點有啲唔開心。去牛一前睇咗食評，見足90cm就算未夠3歲都要收錢，唔知係咪比人投訴過定一早有張memo呢？不過張memo唔太顯眼！屯門冇日式葛絲，但li間有，正呀～感覺上li間啲自助食材較少款，可能仲係新啦～其他分店會15分鐘前通知客人last order，比啲客可以有預備，但li間就夠鐘即cut即熄爐, 要枱客出去埋單，li方面真係要改善。…Read More

買之前已經問咗個店員係咪用人造香料或者香精油整，個店員話：「唔係，係用芋蓉同真正焦糖整，我地賣嘅係用天然材料整，唔會用人造香料。」原來信唔過，開盒食果陣一咬就中招，人造香料味，啲味好假，唔天然咪唔天然囉！但唔好呃人啦！咁做生意，我實唔會再幫襯！除咗糯米皮夠薄夠軟滑，其他都係名過於實，非常失望。可能本身店主係好好人，積埋好多熟客，但元朗店都唔好做衰自己聲譽，更加唔應該為咗做成生意就講大話呃啲客，原本我想試其他味，因為li次，我唔會再試。…Read More

成日見有人排隊，見食評好似幾好，於是今日同朋友去試，點知……朋友同我分別叫一份拉斯維加斯軟殼蟹鵝肝漢堡（$158）同吉烈魚柳漢堡（$78），睇樣好似唔錯，以為1分錢1分貨啦！不過希望越大失望更大，麵包係好味嘅，但真係未食過鵝肝係又乾又粉又散，完全冇juicy冇軟滑嘅口感，又細塊，隻軟殼蟹細到😢😢，元氣果啲仲大隻過佢。吉烈魚柳勁大塊，不過得個大字，醃得有點過咸，啲炸油唔知用咗幾耐，塊魚柳係深色過茶餐廳奶茶，好硬囉！收li個價錢，真心覺得中咗伏，唔會有下次。…Read More

唔好以為1分錢1分貨，絕對係1分錢5分貨，先唔講份量，味道真係比好多所謂貴價西餐廳好味，意粉唔會好林，亦唔會好硬，醬汁唔會太多，唔會好似飲汁多過食意粉，似炒意粉比例係啱啱好。而意大利飯亦唔會生米，唔會太咸，平時食半碗飯都嫌多嘅我，竟然一碟唔夠仲要加底先滿足。好喇!到份量喇!就算唔加底都真係算幾多下，仲要有埋餐湯同蒜蓉多士，加埋杯巨大飲品（等如其他餐廳1.5至2倍），唔洗50蚊都落到樓，li個價邊到搵呀？不過，如果飲慣味精湯/重味湯，可能會覺得餐湯難飲，因為都幾清淡，飲到食材原味，但我反而欣賞咁嘅餐湯，因為太濃味會影響食主菜。至於杯巨大飲品，實話實說奶茶太甜，飲落冇乜茶味，li點有一丁點失望啦！但如果對飲品冇太大要求嘅，其實真係算抵食抵飲喇，唔洗50蚊，午餐都易搵到，晚餐就……（當晚樓面有啲甩轆，始終得一個，但好好禮貌，加油!）會再去食，希望可以加返長通粉同保持水準啦！…Read More

第2次幫襯，鋪頭細細，尚算坐得舒服，價錢同質素成正比！待客有禮，用心小店。天氣凍凍地，坐低先叫一碗豬雜肉丸枸杞湯米，米粉唔似米粉，似粉絲多，不過米粉定粉絲我一樣喜歡，湯味清甜，不過疑似加有味精；食完覺得未飽，再叫多碗豬雜枸杞湯米，今次湯味較上一碗清淡，可見係每碗即滾。而朋友就叫咗碗豬雜肉丸枸杞湯，味道比起我果兩碗更清，豬雜同樣洗得好乾淨，朋友第一次試都話唔錯，坐咗1個鐘左右，客來客往，一直冇停過。如果可以多啲款就更好，我一定會繼續幫襯，希望小店可以保持水準啦～…Read More

第一次幫襯，叫左酸辣湯水餃，水餃好大隻，一碗5隻！唔算辣（有辣椒油自己加辣），但好開胃，酸辣湯料唔算好多，有豬肚絲，筍絲，甘筍絲，豬紅絲，豆腐絲，小雲耳?，蛋花，份量可接受啦～外賣$31 e個價錢算係咁啦~好多地方一碗酸辣湯都$2x以上。…Read More

麥田緣既麵包雖然貴，但真係好好味，麵包好夠份量，非一般麵包店可比，質感煙韌。店內每款麵包均有牌仔介紹成份，又可以試食，唔洗驚唔好味。下次一定要買其他款試下~~今次買蜂巢同藍莓卡門，唔會好甜，亦唔會搶走麵粉，而且仲淡淡天然酵母味，一食就忍唔住想食晒成個。…Read More

幫襯過幾次，服務同食物都唔錯，咖喱唔辣，偏甜，清湯腩其實真係好清，但唔會覺得難食，食到幾香牛味，而且湯底唔覺有味精。我見店員對帶住小朋友既顧客都幾細心，會提醒e樣熱，要小心，果樣要擺入啲。值得再食…Read More

叫個外賣，落單要等15分鐘先有人落單，等左30分鐘，問職員個外賣呢？竟然話已經拎左，將我個外賣比埋人，一句唔好意思都冇。又要再等過多20分鐘，樓面夠人，但啲人做野冇系統，比外賣唔睇清楚啲號碼，～幾好味都冇用啦～…Read More

早前有雜誌介紹，已經好想試，不過每次都唔經，今日終於比我試到，買左35蚊既套餐，豬雜肉丸湯+撈麵，味道真心覺得唔錯，湯我飲唔到有味精，湯鮮甜，可惜肉丸有味精，如果可以用手打肉丸更好，至於麵，因為我買外賣，返到屋企已經凍左成麵餅，味道還可以，菜莆豬肉碎加蔥撈麵，總括泥講，35蚊，ok啦～企係到等外賣見客人不絕，可能鋪面太細，但係見老闆娘同客人有傾有講，有人情味，仲聽到老闆娘話會搵間大啲既鋪，將會搬遷，不過係搬遷之前老闆娘會放下假休息下。希望，稍後會再見到呢間鋪啦～食品價錢以元朗泥講唔算貴，不過食物種類真係唔多。…Read More

羔羊肉餃擔擔麵 ， 特別，唔會太so，係個麵底差啲，但值得一試。醉雞，比起好多名店好味，啲雞有咬口，唔錯口水雞，始終都係四川口水雞惹味，不過不失啦！菜肉餃，鮮肉餃，小籠包，涼拌青瓜，全部都唔錯。特別係個小籠包，我係上海婆婆到食，一夾就穿，e間皮薄得黎唔易穿，肉汁好味，唔會太咸。老闆服務好認真，又好好人，下次會再去試其他食品…Read More