Kaiser27's Profile

今晚朋友帶咗我食呢間餐廳嘅fusion日式料理，確實有驚喜，食物質素高之餘煮法又有創意。前菜五天昆布熟成北海道帶子係全晚我最鍾意嘅菜式之一，有清香嘅柚子胡椒牛油汁，三文魚子爆汁嘅口感同炭燒白昆布嘅脆口，配上帶子溏心嘅質地恰到好處。底層嘅海葡萄同日本玄米增加層次感，一啖食落去多重感官交織，幾有心思。三文魚他他用細細嘅雪糕筒呈現，上面加咗魚子醬，份外精緻。香煎松阪豬，肉質軟腍到好似豬頸肉咁，而且調味平衡得好有心思，先用味噌醬搽勻豬肉令到佢有濃郁嘅鹹香味，配上魚子醬同青蘋果purée，形成先甜後咸嘅層次，點埋黑松露醬食更加香。主菜慢煮鴨髀鴛鴦腸焗飯，非常新穎嘅嘗試，餐廳用咗清新嘅青檸油，減少油膩感。焗飯仲加入咗藍莓乾，佢嘅酸甜同潤腸辣肉腸嘅鹹香成強烈對比，整體鹹味同酸甜嘅碰撞配合得好好，清爽嘅雜菌亦加強咗咬口。第二主菜14天雞油熟成牛舌芯，用雞油包住牛舌再做熟成，呢個處理手法幾特別，令牛舌保持嫩滑，而且慢煮令到牛舌唔會太韌，入口即溶。最後加上紅酒汁，減輕油膩感，難怪係餐廳嘅signature菜式。21天乾式熟成澳洲M7和牛扒，經過21日熟成嘅牛扒，肉質竟然可以保持鮮嫩，同時保留牛肉濃郁嘅風味，加埋紅酒汁，簡單而出色。甜品 Tiramisu，由朱古力、杏仁脆片到 Tiramisu 都係餐廳自家製，非常用心。朱古力用咗真空處理，比平日食到嘅更加脆口，而 Tiramisu 則好輕身，作為飯後甜品又滿足到第二個胃. 又唔會覺得太飽。…Read More

最近去咗川婆婆試佢哋嘅雲南銅鍋米線，整體感覺幾好，食得出餐廳嘅用心。雲南牛三寶銅鍋炸醬小鍋米線，啱晒牛魔王，入面有鮮牛肉、牛爽腩同牛丸，全部都煮得好入味，而且牛味濃郁。湯底帶少少蕃茄味，但唔會太突出，整體味道平衡得幾好。朋友嗌咗雲南雜錦銅鍋炸醬小鍋米線，用咗藥膳湯底，清清哋又健康，配料有肥牛、雞肉、腩肉同萵筍。兩款米線都會有肉碎、芽菜、韭菜同木耳，加上我哋轉咗細薯粉，好味之餘又覺得冇咁heavy，食完唔覺滯。甜品就叫咗爆漿糍粑，外面炸到好香口，咬落煙韌爆漿，而且甜度啱啱好，食埋我朋友嗰份。晚餐食到飽飽都唔使200蚊，性價比夠曬高…Read More

朋友約我嚟中環呢間 sake bar chill下。見有tasting set，我就揀咗嚟慢慢品嚐不同風味嘅「樂器正宗」。樂器正宗由大木第二代承傳，味道淡雅，甜酸平衡得恰到好處。我試咗三款清酒：一款有清新菠蘿汁果香，小小甜同時帶微辛口感；第二款係有氣清酒，酸度較高，但飲落順滑舒服；最後一款似波子汽水，甜度最高，而且超順口。朋友揀咗「日日 秋津山田錦」。由秋津西戶村產山田錦釀造，有少許香蕉同蜜瓜甜味，但同時非常爽口，平衡得好好。飲酒當然要配小食，我哋叫咗吉烈炸蠔，香酥嘅外層，咬落去非常juicy，鮮味十足。清酒煮蜆，甜美鮮嫩，而且份量夠多。酒吧環境輕幽靜，絕對係同朋友傾計談心嘅好選擇。…Read More

最近我去咗灣仔盛記酒家慶祝父親節，雖然外表比較平實，但係真係幾好食，食得好滿足。首先係金牌炸子雞，雞肉滑溜，雞皮好有光澤，炸得好脆口。紅酒燴牛尾煲，牛尾煮到好入味，肉身夠曬腍。紅酒醬汁香濃，撈飯食好過癮。欖角冰梅骨，酸酸甜甜，開胃又肥美，食到停唔到口。蝦乾魚肚浸時蔬，非常足料，好多蝦乾，仲有魚肚同蘑菇，口感味道都好豐富。椒鹽百福豆腐，外脆內軟，椒鹽好惹味，值得一試。餐後糖水叫咗芋頭蓮子紅豆沙，煮到起哂沙，好好味。…Read More

最近我同朋友去咗A Lux，試佢哋嘅tasting menu，整體感覺非常好。每道菜都有佢自己嘅特色，讓人感受到主廚嘅用心，同時餐廳嘅佈置亦都非常有心思，令人滿意。首先係餐前麵包，有酸種麵包、香草麵包同西西里麵包，每款都有自己嘅風味，點少少橄欖油同黑醋，真係一流。開胃菜 Ham & Melon，味道清新，火腿同蜜瓜嘅搭配夠曬classic，為隨後嘅晚餐揭開序幕。餐湯 Lobster Bisque, Lobster Ravioli 好有水準，餐廳加入咗白蘭地，令到香氣更加濃鬱。Ravioli入曬龍蝦湯嘅味，味道好有層次感。前菜 Burrata Cheese, Tomato, Fig, Walnut Vinegar 非常吸引，用咗綠色嘅意大利蕃茄，味道清新爽口，帶小小酸味，配搭無花果嘅甜味，既開胃又唔膩。Pasta 我哋揀咗 Spaghetti, 24 Months Parmesan Cheese, Black Truffle，絕對唔可以錯過！餐廳用咗24個月火腿加上新鮮刨嘅黑松露，並會即場喺你面前燒溶芝士，將spaghetti放上去攪拌，令到意粉吸收曬熱辣辣嘅芝士，觀賞性高之餘，食落去真係好享受，感覺好奢華。Fusilli Lunghi Bucati, Pork Sausage, Asps. Aglio Olio，就用咗豬肉腸同蘆筍嘅搭配，少少辣非常惹味，意粉質地非常彈牙，亦係一個不錯嘅選擇。主菜 Toothfish, Cuttlefish, Fava Beans Bouillabaisse，佢嘅海鮮汁好濃郁，魚肉厚實，仲有啲彈牙嘅墨魚，兩隻口感成鮮明嘅對比。USDA Ribeye, Vegetables, Shallots Jus，medium rare嘅熟度令到肉質得以保持鮮嫩，同時做到外面焦香，餐廳加咗紅蒜頭汁，令到整道菜更加滋味。主菜之後更加高潮跌起，首先有 Cheese Platter，有各種唔同的芝士，連藍芝士都有，芝士控食完超開心。Petit Four，同時有幾款精緻小甜品，包括macaron同栗子蛋糕，食得好滿足又唔會覺得太多。朋友叫咗餐廳自家製嘅 Tiramisu，creamy嘅質地，口感綿密，甜而不膩，完美結束今晚嘅晚餐。…Read More

最近同朋友去咗尖沙咀嘅Room 3預先慶祝農曆新年，餐廳環境舒適，適合大家聚埋一齊吹水。而且除咗飲品好靚之外，食物都意外地出色。核桃小甜魚，甜甜地嘅開胃前菜，啱曬一路食一路睇menu。無花果蟹子沙律，無花果增添咗微微嘅甜酸味，感覺清新。迷你蟹王蟹肉窩夫撻，蟹肉又多又鮮甜，食到好滿足。黑豚玉子燒，略帶鹹味嘅黑豚肉，配合甜甜嘅玉子燒，味道層次分明，非常吸引。日本豆腐，豆腐炸到酥香，同時保持彈牙，木魚亦好香。雞中翼，燒得啱啱好，帶有焦香。雞翼釀鮑魚，賣相特别，鮑魚仲好大隻。北海道辣味魷魚肝汁松葉蟹肉意大利麵，有好輕微嘅辣味調味，餐廳用咗煙韌嘅魷魚同好肉地嘅蟹肉，帶出唔同感覺嘅鮮味。天使麵吸哂啲汁，夠曬入味但又唔會太heavy。蔥拖羅三色紫菜TACO壽司手卷，炸過嘅紫菜加上鮮味吞拿魚蓉同軟熟嘅白飯，口感豐富，配合得天衣無縫。甜品菠蘿焦糖燒，燒過嘅菠蘿配上焦糖醬，甜而不膩，直情想一個人食哂。自家製紅豆布丁，香濃嘅紅豆味同滑流嘅布甸，簡簡單單但係做得非常出色。飲品方面，Empress雞尾酒放係一個發光嘅木盒入面，非常華麗，聞落去有少少煙燻味嘅感覺，原來係用咗紫蘇葉，調酒師仲用咗酸蘋果、青檸、同Jasmine，淨係感覺好特別好清新。Kissaten就有香濃咖啡味，飲落就滿滿焦糖嘅甜味，適合我個位酒量淺嘅朋友。…Read More

最近帶朋友去咗銅鑼灣一間樓上的Omakase，鍾意佢哋菜式多元，套餐包含25道菜，仲有湯同甜品，食到好滿足。首先，沖繩水雲，配蟹肉撈埋食，滑溜口感加上醬油酸酸地，夠哂開胃。北海道鮟鱇魚肝，味道結實，魚肝香口。鱈魚白子配柚子酸汁，魚子味道濃郁，同時酸汁中和膩感，配合得好好。勘八魚海膽豆腐卷，口感特別，豆腐滑得來仲有海膽香。粒貝魚刺身爽口；北寄貝配海苔醬，香氣獨特，真係好味。沖繩小龍蝦，超級新鮮，上菜嘅時候隻龍蝦仲識郁㗎。龍蝦肉質鮮味彈牙，就咁食又或者點醬油食都好出色。石鯛魚，魚肉口感比較黏，上面加埋海藻鹽一齊食就啱啱好。赤貝爽滑有咬口；縞鯵鮮味十足，加生芥辣漬刺激味蕾。蟹膏豆腐，上面仲有蟹肉同德國黑魚子，建議一啖食哂，同時感受蟹嘅不同口感同鮮味。蟹嘅香氣撲鼻，真係好享受。北海牡丹蝦，肉質鮮甜，上面係原隻蝦頭嘅蝦膏，令刺身菜更加香。岩手縣嘅大船渡灣令和怪物蠔，用咗醋味啫哩同葱調味，海水味濃，安排係個set中段非常合適，為味蕾帶嚟新鮮感。鰤魚醬油漬，上面放柚子鹽，魚肉油脂感十足，非常香滑。白見貝，相對厚身，肉質偏爽。黑鯥加洋蔥漬，有吊味效果。車海老，蝦頭炸過後成個都食得，夠曬脆口，而且蝦肉鮮味十足。赤身醬油漬海膽卷，用金箔裝飾，赤身同海膽兩者鮮明嘅味道同口感配合得好好。紫海膽天婦羅，海膽好creamy，加上脆得嚟帶有鹹味嘅紫菜非常合適。慢煮磯煮鮑魚，口感煙韌又咬口，加咗蟹膏令度菜更加香。甘鯛立鱗燒配生紫菜同高湯餚汁，特別嘅煮法令到鱗片企直，薄脆的魚鱗加上滑嫩魚肉，雙重口感夠哂過癮，而且仲帶有淡淡紫菜香氣。松葉蟹壽司配紫蘇葉同蟹醋啫哩，多肉又好味。大拖羅用紫菜包住，上面有炸過嘅葱調味，肥美到入口即溶。白海膽搭配鱈魚乾，並用淡船鹽調味，味道清新，白海膽肉質顆粒感鮮明，同時水份較重，相對嫩滑。食到尾聲就到熱食，有玉子布甸，清清甜甜，令整個餐廳體驗好完滿。餐廳仲用咗龍蝦刺身嘅蝦頭煲湯，加入松茸，令到碗湯非常清甜。甜品方面，有北海道雷電蜜瓜同開心果雪糕，雷電蜜瓜果肉軟滑，果汁夠多，雪糕淡淡嘅開心果味同紅豆出奇夾，令人食過返尋味。…Read More

最近去咗佐敦一間海鮮火鍋專門店，整體感覺幾唔錯仲幾抵食，四個人食，叫咗一個$1080二人套餐再追加啲配菜，食到頂住個肚走。揀嘢食之前首先叫咗開胃清涼酸梅湯，酸酸甜甜，非常好飲。湯底揀咗冬瓜瑤柱鍋，清清地又健康，又唔驚搶曬海鮮啲味。先嚟刺身魚生拼盤，有十件三文魚、章魚同希靈魚，幾高質，新鮮美味。然後就係海鮮火鍋配料，我哋揀咗澳洲帶子片，輕輕擺落火鍋淥一淥就食得，好鮮甜。生猛海中蝦，超新鮮，上菜嘅時候隻蝦仲識郁㗎！頂級雪花肥牛，油脂分佈得幾均勻，夠哂肥美食落去好滿足。金菇肥牛卷，第一次用邊爐方法煮熟，幾平日煎嘅煮法清新健康。汕頭牛丸，牛味夠重。手打蝦滑，鮮味十足，份量都好足夠。我哋追加咗美國桶蠔，好多粒仲好大隻，全部都好好肉地。鎮店水餃皇，係一大亮點，真係好足料，啖啖蝦肉，包到脹卜卜。我哋仲叫咗娃娃菜、爽口嘅萵筍片、翠綠嘅油麥菜，減輕下罪惡感。最後仲有甜品椰子糕同埋杞子糕。…Read More

今日去咗之前試過嘅一間樓上餐廳，整體感覺幾好幾抵食，值得再次分享。首先係前菜，有沙律同埋湯。凱撒沙律夠健康，配上芝士碎同香脆嘅麵包糠，口味唔會太淡。蕃茄湯，用新鮮蕃茄煮成，味道清新，夠曬開胃。當然唔少得餐包，外面少少烘過，脆脆地，裡面又夠軟熟。主菜我哋揀咗牛扒同埋黑松露意粉，配菜就揀咗薯條同薯蓉，呢度最正係可以無限refill 配菜，唔怕唔夠食。薯蓉非常creamy。230 gram安格斯平鐵牛扒，我叫咗五成熟，廚師嘅手勢非常好，做到外面焦香，同時入面仲係好幼嫩。點埋阿根廷青醬，別有一番風味。意大利黑松露蘑菇意粉，蘑菇嘅份量夠多，黑松露同橄欖油香氣濃郁，食完都令人回味，最後仲用黑松露醬嚟沾薯條，非常惹味，係一個意外驚喜。飲品方面叫咗凍檸茶同凍檸水，一路飲一路食追加嘅薯條。…Read More

今次同屋企去灣仔食晚餐，粵菜嚟講真係唔錯。前菜有青瓜同木耳，清爽開胃。我哋先叫咗蜜汁厚切叉燒皇，個樣好吸引，食落果然冇令人失望。叉燒肥瘦分佈均勻，脂肪入口即溶。加埋蜜汁，每一啖都係享受，令人回味無窮。再嚟係香芒大蝦球，蝦球大大粒，搭配蘆筍同青瓜，口感好好，清新又唔膩。蒜蓉炒豆苗，翠綠又爽口，健康又好食，適合老人家。雜菌炆伊麵，伊麵吸收哂所有精華，食落去雜菌味香氣四溢。甜品有紅豆沙湯丸，餐廳用咗我至愛嘅芝麻湯圓，紅豆沙亦有好重陳皮味，仲加咗白果，誠意十足，我哋食到好滿意。仲有木糖醇水蜜桃，清甜可口，食完令人好滿足，適合收尾。…Read More

最近去咗灣仔樓上試咗個印度午餐自助餐，星期一至五只要158蚊，飲品任叫，真係幾抵，唔怪得知樓上餐廳都咁多人。自助餐有好豐富嘅選擇，首先有poppadum配各種醬料。仲有新鮮嘅沙律同埋熱食。當然唔少得甜品。同水果西瓜。一坐低我同朋友就叫咗 Mango lassi，有別於好多印度餐廳，唔會好甜膩，而且造型幾靚。Samosa同Bhaji配薄荷汁都幾開胃。熱食方面，炸魚魚肉外脆內軟，食落好有口感。雞肉唔乾，仲有少少辣，啱晒我胃口。羊肉好軟稔，食到停唔到。自助餐仲可以叫個Naan，酥軟香口，我哋揀咗蒜味更加香。而家先知原來Naan 可以加芝心，食完真係好滿足。甜品Phirni 嘅奶油好香，食完好滿足。臨走之前，我又叫咗杯 Masala tea，有豆蔻、薑同肉桂，配牛奶同糖，對印度人嚟講，呢杯茶又暖身又解壓，有益又好飲。…Read More

最近去咗天后甜姨姨食tea，估唔到港式甜品都可以有驚喜。首先係佢哋嘅即撞木桶豆腐花，真係即叫即整，香滑到不得了，豆香味好濃，唔需要加糖已經好好食。六小寶懷舊小食盤，有三色啫哩，味道唔錯，仲有醬油溏心蛋，健康又好食，幾值得一試。髒髒朱古力迷你牛角窩夫用咗大量朱古力粉，滿足朱古力控。炸燒賣都幾特別，之前未食過。椒鹽雞粒同司華力腸都好惹味，搭配埋一齊食好開心。餐飲芝麻豆腐杯，味道似芝麻糊豆腐花，口感就似smoothie 夠哂厚實，消暑又好飲。最後叫咗芒果大合奏，有芒果肉、芒果乾、芒果汁、芒果布甸同埋芒果雪糕，每一啖都可以試到唔同芒果甜品嘅combo。有咁多芒果產品，簡直完全滿足我對芒果嘅慾望。…Read More

最近去咗上環呢間好出名嘅上海菜，食物質素同服務都好好，唔怪得keep住有好多遊客。首先，佢哋自家製嘅低糖凍豆漿真係好高質，豆味濃厚，仲有少少起沙，最正係可以無限添飲，飲到停唔到。跟住當然唔少得佢哋嘅鎮店生煎包，包底煎到好香脆，咬落去仲會爆汁，真係好滿足。餐廳仲寫到明如果包唔夠熱，食客可以要求更換，可見佢哋對自己嘅要求幾高。上海排骨同樣出色，酥炸得香脆，肥美又多汁，非常邪惡。我揀咗配菜飯，菜分佈得幾均勻。朋友就試咗上海拉麵，話味道都唔錯。我哋另外嗌咗小籠包，好多湯汁，皮薄得啱啱好。…Read More

前排同屋企去咗佐敦食飯，餐廳食物質素唔錯，佢哋會提供免費嘅前菜花生同埋甜品紅豆沙，食到好滿足。而且係正地鐵站隔離，位置夠方便，值得推介。一坐低即刻叫咗脆皮南乳吊燒雞，餐廳做緊優惠，半隻都只係38蚊！雞皮好脆，而肉質肥美嫩滑，高質又抵食。脆皮燒鵝拼化皮乳豬，呢個組合真係太正，可以一次過食曬我最鍾意嘅兩款燒味。燒鵝皮烤得夠香口，咬落油脂感十足，乳豬皮則非常香脆，肥而不膩。紅酒燴牛尾煲，牛尾同蘿蔔都煮到好入味。而且夠哂足料，牛尾多到差啲食唔哂。日式海皇什菜煲，海鮮種類好多，有魷魚、蝦、蚌，加埋唔同嘅蔬菜同粉絲，味道清清地又好健康。海洋極品海鮮粒炒飯，炒得好出色，粒粒分明。種類又夠多，配合埋菜粒，口感好豐富。翠塘香滑豆腐，豆腐好滑，食落去甜甜哋有啲似豆腐花，幾啱送飯食。除咗紅豆沙，我哋仲叫咗飲茶時候最鍾意嘅養顏紅棗糕同埋杞子桂花糕。清清地又唔會太甜，仲可以養顏。…Read More

之前喺中環返工，最鐘意去R&R Bagel食早餐，佢哋款式夠多又好味，真係我嗰陣返工嘅動力。見到佢哋鰂魚湧新開分店，即刻約人去happy hour，再食Bagel 當晚餐，估唔到咁有驚喜。食客可以自訂bagel或者揀佢menu嘅選項，仲可以揀唔同嘅包底。我同朋友叫咗Roast Beef 同Avocado Feta share食，兩個bagel底都揀咗罌粟籽，鐘意佢好有口感。Roast Beef 又多又大塊，加埋厚厚嘅cream cheese更係加分，咬落啖啖肉，食到好滿足。Avocado Feta 嘅牛油果醬多到爆哂出嚟，我哋加咗好肥美嘅三文魚，餐廳亦落足料，成個包好creamy味道好豐富，味道非常之夾。小食方面，我哋加咗雞翼同埋Mozzarella sticks。芝士條炸到啱啱好，拉絲效果好過癮，涼返啲之後質地變得煙韌，更適合佐酒啱。雞翼炸到好香口，細細地一隻仲要係單邊，方便進食。我同朋友趕得切係七點之前用happy hour價叫咗一杯啤酒同一杯白酒，真係好適合放工後relax下。…Read More