波兒22的個人專頁

日本餐廳香港真係好多, 想搵間坐得舒服又好味, 朋友就介紹黎呢間新開既日本餐廳, 多特式又高質, 油麻地位置又好方便.最吸睛既係呢個香草和牛扒, 師傅先將和牛燒至半熟, 之後上枱響客人面前再淋酒點火燒, 個火燒過程好震撼, 睇到嘩嘩聲.和牛扒既牛味好濃, 肉汁豐富, 而且肉質嫩滑.跟住有師傅推介既燒魚鮫, 呢樣真係好少食, 原來呢個位無咩骨, 仲好多肉, 魚肉好嫩, 又有膠質.朋友唔係好食海鮮,所以輕輕要左燒帶子併魚籽,賣相好精緻,帶子夠彈牙, 配上魚籽既鮮味, 兩者配搭好鮮甜.煎餃子又係日本菜必食, 呢個皮夠薄, 餡料豐滿,一咬肉汁即刻流出黎.仲有叫左幾款串燒,有豬肋條,肉質好軟腍,肉汁夠juicy.雞頸,起初以為硬既,但原來好爽口.雞腎都係燒到爽口,送酒一流.唔經唔覺一邊食一邊傾左成晚,呢間日本餐廳雖然新開,但人流好多,所以最好訂定位先.…查看更多

響朗豪坊睇完戲搵地方食野, 但係商場好多餐廳都差唔多LAST CALL, 所以都係出出面睇下有咩食. 行後一條街見到呢間為食坊開到成十二點, 啱晒心水.扶手梯一上到去, 環境幾大, 好多卡位但唔迫, 而且地下好乾淨.兩個人諗住隨意食少少, 所以要個沙鍋雲吞雞. 一上枱好大個鍋, 數一數雲吞有八粒, 細大約係細雞既半隻, 仲有少少菜, 份量非常十足.先飲啖湯, 熱辣辣飲左個胃暖粒粒, 好濃既雞香味, 唔油膩, 好順口.食粒雲吞, 皮夠薄, 皮無煮到爛晒. 餡料好足, 夠彈牙. 如果唔夠雲吞仲可以追加八蚊隻.雞肉唔老, 皮滑肉嫩, 好容易撕出黎食.跟住叫左牛肉餅, 有分大細, 細都係十六蚊, 個皮煎到好香口又夠薄, 一分開啲肉汁係咁湧出黎, 啖啖牛肉餡, 真係好味.原本食完呢兩樣都飽飽地, 但係見到呢度原來仲有甜品, 中西式都有, 又忍唔住要個芝麻糊, 仲可以另加湯丸.芝麻糊入口好滑, 侍應話係佢地餐廳生磨, 唔怪得好味啲, 而且甜度剛剛好, 食完好滿足.另外呢度好多侍應, 幾乎未舉起手就已經行左過黎問你要咩, 反應快又禮貌.…查看更多

平時返工好忙, 放左工梗係想同朋友一邊傾偈一邊食野放鬆下.知道呢間居酒屋開到好夜, 一於落黎飲返杯.志在黎飲sake, 所以串燒都係好隨意叫左少少黎送酒.燒翆肉瓜, 燒秋葵表面唔會燒到好乾, 仲keep到蔬菜入面既水份.日本青椒仔微微帶辛辣, 能夠刺激味蕾, 夠醒胃.去到邊都鍾意食燒粟米, 外層帶上牛油, 粟米又夠甜.汁燒雞肉蔥串, 雞肉夠嫩滑, 京蔥燒完好香, 夾埋一齊食減少油膩感.雞軟骨呢個非常推介, 因為其他地方既雞軟骨會好硬, 但係呢度既軟硬度剛剛好, 軟骨食落有咬口, 但又唔會令人覺得咬崩牙, 恰到好處.雞頸肉外表金黃, 但入面又軟腍, 就算無醬汁調味都已經好味道.雞心比較少食, 但原來出奇地好味, 外香內軟, 無奇怪感覺.今晚好彩朋友預先訂枱, 唔係walk-in好易無位. …查看更多

雖然天氣熱左, 但無損幾個人打邊爐既興趣, 最佳地方當然係靚煲皇, 因為食物夠新鮮.要個靚煲皇招牌煲, 剩係呢個湯底既材料已經好多, 有豬手骨豬筒骨同豬軟骨, 咁多骨滾起黎令到個湯豬骨香味非常濃郁, 再配上粟米，蝦乾片, 令到個湯更加鮮甜, 而且飲落一啲唔肥膩.手切本地肥牛呢度好出名, 切得紋里分明, 所以肥牛特別彈牙. 另外仲有極上肥牛, 同樣肉嫩, 牛肉鮮味濃郁.手打牛丸同蟹籽墨魚丸又係好彈牙爽口.花膠件大大片, 豐厚飽滿, 食左補充晒D骨膠原.鮮炸響鈴就咁食都非常脆口, 淥三秒吸收晒D豬骨湯精華更加好味.台灣鴨血王口感夠晒滑溜, 但質感唔會好易散開, 非常讚.…查看更多

響附近做完野, 係時候嘆個午餐. 呢條街都好多餐廳, 睇落呢間感覺舒服D, 而且價錢唔算太貴, 就試下啦.午餐選擇除左有幾款意粉, 全日早餐, 同埋兩款輕食, 因為唔係太肚餓, 所以要左個黑松露煙三文魚Egg Benedict牛油果鬆餅.顏色好吸引, 賣相好啱打卡.兩隻大大既Egg Benedict, 一切開D蛋漿即時流出, 做到流心效果, 好澎湃.下一層係煙三文魚, 口感軟嫩, 味道唔會太咸, 配埋蛋漿食好夾.最下層係牛油果鬆餅, 即焗鬆餅夠晒鬆軟.配料仲有薯條同沙律菜, 薯條新鮮即炸夠脆口.跟餐有飲品, 加錢要杯Cappuccino, 餐廳好有心思拉左個日出陽光拉花, 好有朝氣. 響呢間咁舒服既餐廳, 慢慢咁享受呢杯咖啡, 成個人都輕鬆晒.…查看更多

要到中央圖書館睇書做資料搜集, 精神跌到低點, 係時候要補充體力.唔想行返去銅鑼灣果邊, 就隨意響附近搵食. 呢間cafe望落唔錯, 一於試下. 好彩未到食飯繁忙時間, 所以唔洗排隊直入.味噌蟹膏甲羅燒日本燴飯呢度既燴飯係用100%日本產米, 飯既味道帶微辣, 如果加埋味噌蟹膏一齊食, 蟹膏既鮮飯既辣, 又達至另一層次, 食落更加開胃.食完個開胃飯更加想食野, 所以要多個甜品獎勵下自己.棉花糖山配朱古力OREO加意大利雪糕滿滿既棉花糖鋪滿整塊麵包, 再加上OREO餅碎, 邪惡感十足. 雖然好邪惡, 但係幾樣配料加埋一齊食, 又唔係想像中咁甜, 可能呢款意大利雪糕味道較清新, 可以中和一下.就係咁我享受左寧靜既一餐, 嘆下咖啡, 聽下餐廳入面既日文歌, 成個人又有返動力繼續衝.…查看更多

一鍋堂響葵芳開左旗艦店, 一直未有機會試, 網上訂位要晚餐時段係無可能訂到, 所以訂左午餐. 雖然話午餐時段, 但係食物絕對唔會比晚餐少.因為朋友鍾意食辣, 所以要鴛鴦銅, 一邊係麻辣, 另一邊係養生藥膳鍋.要左228蚊高級澳洲和牛放題, 剩係牛類都已經可以選五款, M5和牛板肉, 安格斯牛肉, 封門柳, 牛板腱, 牛脷心托. M5和牛油花分佈分明, 入口非常軟嫩. 牛脷食落好爽口, 唔會太韌.而其他幾款牛肉入口都好彈牙, 而且牛味濃郁.豬肉同羊肉肉質亦夠軟嫩, 夠肉鮮味.仲有呢度出名既係手作陳皮鯪魚滑, 手打蟹子蝦滑. 因為係手打, 口感特別爽口彈牙, 同普通既丸類係唔同D.同埋自家手作豬肉餃同鮮蝦雲吞, 個皮唔會太厚實, 餡料夠晒滿足.除左要點既配料之外, 出面仲有好多生熟料任意拎.飲品類別亦非常之多.…查看更多

秋風起, 當然又係打邊爐既季節, 網上見到有一間好粉紅既火鍋店, 已經想去好耐, 終於訂到平日晚上.黎到門口有隻好大既粉紅bearbear, 啱晒打咭. 餐廳地方大, 兩邊都係卡位, 坐得好舒服, 唔焗促.點餐用平板電腦, 慢慢睇好方便, 而且呢度最好既係好多食物都可以叫半份, 細食既人可以樣樣試下.火鍋湯底有十多款, 而且可以單鍋, 鴛鴦, 或四格鍋都得, 可以配合唔同人口味.最後我要左蕃茄單鍋, 里面有蕃茄仔同粟米配料, 蕃茄味夠濃, 甜甜地, 夠晒健康.火鍋一定要食牛, 呢個美國牛板鍵, 入口彈牙, 濃厚肉香.安格斯封門柳, 肉質厚彈, 脂肪平均, 唔會太肥膩.另外又試下豬頸肉, 每片切得唔會太厚, 較易熟透, 入口好軟嫩.除左生料之外, 呢度仲有幾款熟食, 黃金炸魚皮係即炸熱辣辣, 脆卜卜, 黃金味都幾出.仲有呢度好特別既炸響鈴, 非常大條, 所以半份4條已經滿足晒口癮, 索晒D蕃茄湯, 好正呀.另外, 有三款飲品加廿幾蚊可以任飲, 我要左熱既水果紅茶, 因為任飲所以成壺上, 啱晒我唔太飲凍野既人. 朋友要竹蔗茅根, 我試左一啖, 甜甜地幾解渴. 如果唔想飲呢D, 仲有單點既汽水.成個環境都好舒服, 啱晒女仔邊食邊傾.…查看更多

荃灣開左楚撚記, 一直都聽到好多朋友講好好味, 但每次經過都好多人排隊無奈放棄.為左同朋友慶祝生日, 所以預早訂位頭場入坐.個場好大, 可以坐到好多人, 不過而家係4人一枱, 所以感覺寬闊D.小菜款式花多眼亂, 樣樣都想食, 仲有荃灣限定菜式.先要個香煎黑松露手打蓮藕墨魚餅, 餅面煎到金黃色, 唔會過燶, 又唔會太油, 帶點脆香. 入面有一粒粒既墨魚粒, 蓮藕粒, 食落特別爽口. 仲有淡淡既黑松露香味, 齒頰留香. 係一個好野味既頭盤.仲有係朋友必點既金沙黃金白飯魚, 每條白飯魚都充滿咸蛋黃既金沙, 咸蛋黃味夠晒濃, 外面微脆唔油膩, 愛好咸蛋黃必選.最後要多個菠蘿拔絲咕嚕肉, 雖然呢個餸係好普通既野, 但就唔係度度整得好食. 呢度既咕嚕肉唔會炸得太硬, 帶點脆口. 個汁唔酸帶甜, 所以好易入口. 因為係用梅頭肉, 所以無骨啖啖都係肉感, 大人細路都啱食.甜品要左荃灣限定既黑金流沙奶黃壽桃, 係即蒸出爐, 所以個皮好鬆軟, 入面既奶黃非常流沙, 唔會太甜, 好滿足.…查看更多

食過振興牛丸真係食唔返普通既丸, 所以一經過佢既鋪頭就要買番D補倉.款式多就一定, 五花八門, 花多眼亂都唔知點揀好. 但一次唔可以買太多, 因為冰格無位擺, 因為買其中四款可以送一個環保保鮮袋, 所以我決定是但揀四款, 就算唔係即刻返屋企都唔怕.有時遲左收工, 會用呢D振興牛丸做餸, 煎香佢就最惹味. 今次我用牛骨濃汁牛丸, 豬骨濃汁貢丸, 芥末沙律球, 炙燒芝心丸同菜一齊炒.佢地既牛丸, 貢丸保持水準夠晒彈牙, 每一粒都咁大粒.牛丸有好濃郁既牛味, 入面仲有細細粒既軟骨夠晒口感. 貢丸咬落亦夠質感, 口感實在, 有肉鮮味.沙律球都係我喜愛, 因為入面既芥末甜甜酸酸, 好開胃野味.芝心丸既芝士唔算好濃味, 無咁覺漏.永遠都能保持最初既原味道, 雖然價錢可能比一般既街市丸貴少少, 但我覺得絕對值得.…查看更多

荃灣cafe越來越多, 每間都各有特色. 之前經過已發現呢間外觀好吸睛既新café, 網上睇除左有飲品之外, 仲有主食, 甜品之類, 所以放工一於試下.要左個煙三文魚配原粒牛油果蛋沙律, 配搭顏色好靚, 令人食指大動. 牛角包係即焗, 外面好香脆,  入面好軟熟, 好好味. 牛油果份量十足, 手工蛋沙律好清新.主食要本菇雞肉意粉配溫泉蛋, 雞肉一粒粒易入口, 本菇都幾多, 意粉夠彈牙, 唔會太腍或太硬. 就算唔撈溫泉蛋汁, 就咁食都味道都剛剛好.黎到café當然都要叫咖啡, 友人要Cappuccino, 我要左Mocha,熱Mocha無其他地方咁甜, 咖啡同朱古力比例得宜, 香味撲鼻, 好易入口.雖然鋪面比較細, 但環境比人有放鬆既感覺, 好舒服.…查看更多

從網上得知Burger Joys響荃灣開左新副店, 放工特別過黎支持下.鋪頭響正享和街中間, 紅色既門面一眼就見到, 小店主要做外賣, 所以無坐位.選擇唔算好多, 共三款漢堡, 都係手打牛堡, 可以單買或者套餐.要個中價既芝士牛肉漢堡, 配薯條汽水.即整既牛堡充滿熱力, 芝士溶化響牛肉上面, 入晒味.手打牛肉肉質軟嫩, 唔韌, 有牛味, 而且充滿肉汁, 除左芝士之外, 仲有蕃茄, 生菜, 配上酸酸甜甜既醬汁, 夾埋一齊無飽濟感.個包焗過夠軟熟, 一啖入口好滿足.即炸幼薯條, 份量十足.…查看更多

因為而家多數都買外賣, 所以四出搜尋邊度有好味又抵食既食物.潮州滷味就係必選之一, 因為滷味凍食熱食都得, 唔驚拎到返屋企變左質.同事介紹呢間洪記滷味, 佢話每日都好多人排隊, 而且款式多, 價錢唔算好貴, 份量又足.一眼望埋去已經有成廿款滷味, 樣樣都想食, 所以貪心D就要滷水大併盤啦.豬脷夠厚切, 所以咬落有口感, 質地腍中帶嫩.豬腸係近期至愛, 以前怕有怪味, 但而家越食越上癮, 呢個豬腸清得夠乾淨, 無怪味, 口感唔會嚼極唔爛.鵝肉皮脂適中, 肉質厚, 兩者配合得宜, 味道夠入味.豬耳一D都唔硬, 爽口入味.鵝腎之前好似無食過, 因為多數食雞腎, 鴨腎, 但原來鵝腎都係好爽口, 唔韌.個底仲有雞全翼, 炆得夠晒腍, 入晒味, 肉質軟嫩, 唔會滷到D肉實晒.同埋有豆腐, 個豆腐好滑, 唔似硬豆腐咁乾淨淨, 一咬已經滑入口.整體味道唔會好咸, 食完無口乾, 而且樣樣都滷得夠腍, 好易食.…查看更多

今年無得去日本, 時時刻刻都想食日本野, 朋友知道我思鄉又病發, 所以帶我黎呢間日式拉麵店, 佢食過話有日本風味, 等我又試下先.日本正宗拉麵店既款式選擇其實唔會多, 賣點最緊要係湯底同麵, 所以呢度跟日本類似, 主打四款口味, 加入不同既油或配料, 間中亦會有期間限定款式.呢個係限定款式豬軟骨拉麵, 先試下個湯底, 濃濃既豬骨味, 唔會好油, 飲落好漿口, 夠晒真材實料, D湯緊緊同麵條粘在一起, 特別好味.而麵條粗度適中, 夠彈牙, 食落好爽口, 食完無太飽濟既感覺.豬軟骨炆得夠腍, 軟骨一咬就開, 好入味.而個流心蛋都唔錯, 蛋黃夠漿口.餃子外面炸到金黃色, 食落脆卜卜, 夠香口. 餡料飽滿有肉汁.食完呢餐真係可以暫時止到我既思鄉病.…查看更多

好友生日約佢食餐好野, 佢想食日式鐵板燒, 為免晚市人多, 所以選擇左午市.午市以套餐為主, 有主菜, 沙律, 飯, 麵豉湯等等. 我地揀左商務午市套餐, 主菜有鮑魚, 和牛, 好豐富.先來個南非活鮑魚, 鮑魚好新鮮又大隻, 廚師燒得剛好, 不過火所以食落好爽口, 有海水既鮮甜味.最愛既銀鱈魚, 煎到兩邊微焦, 特別香口. 魚脂豐富, 魚肉肥美滑溜, 一食已經滑入口.食完兩款好味既海鮮前菜, 就有個清酒煮蜆黎清清個口, 好香清酒味, 唔算好濃烈易入口. 蜆肉都幾肥美, 漲卜卜既.重頭主菜有和牛厚燒, 真的夠厚, 入口特別有質感. 廚師將和牛放上鐵板, 由生變熟, 肉香味一直由鐵板轉到我既鼻, 唔洗好耐, 和牛已經燒到剛熟, 外軟內嫩. 有肉鮮味, 齒頰留香, 真係好想一食再食.之後仲有炒飯, 炒什菜同甜品作尾, 呢餐十分滿足.…查看更多