泰利食玩遊's Profile

同朋友約左食午飯，星期五當然要食好少少啦。今日想食海鮮，所以就棟左係澳門逸園地庫既蟹宴。去到好快有侍應姐姐帶位，我地坐係角落頭，方便傾計，成間餐廳好多蟹既擺設，一如其名我地當然要食蟹啦。我地每人都叫左一個蟹御膳，入邊包括天婦羅蟹捧烏冬、蟹肉蒸蛋、蟹膏豆腐、忌廉蟹肉餅以及松葉蟹甲羅。先食個蟹肉蒸蛋，一打開成個面都係蟹肉絲同埋魚子，蛋蒸得好滑，連埋蟹肉絲同埋魚子食落口好幸褔。再來就係松葉蟹甲羅，上邊有滿滿的蟹肉之外，仲有蟹膏、海胆同魚子，海胆一D都唔腥，加埋蟹膏的甜味衝擊左我的味蕾，呢個堅正。跟住再食蟹膏豆腐，呢個都比到好大新鮮感我。估唔到豆腐加蟹膏可以咁夾，食落口係滿滿的蟹膏香味。到主菜就係天婦羅蟹捧烏冬，烏冬好Q好彈，蟹捧非常之粗，店主一D都唔孤寒，有成三條蟹捧咁多，再加埋甜甜香香既忌廉蟹肉餅，配烏冬一流。午餐埋單都係一人268加一，有咁好既野食咁既價錢真係好抵，CP值超高，下次要再來食過。…Read More

朋友話好想食蠔，我就係OP到望下邊到有蠔食。見到牡蠣小屋個名就知佢係主打食蠔，一於訂位去試下。一入門口就見到有幾座蠔山等緊我地，今次我地好好彩可以被安排坐Bar枱，可以望到師傅處理食物，我覺得可以一路欣賞師傅手藝一路食野係一件賞心樂事。去到居酒屋，入鄉隨俗，當然係叫左野酒精先啦。Menu上有啤酒、燒酎同清酒，朋友見到一支叫‘三陸牡蠣のスタウト’既啤酒，咁特別一於要試一試。呢支啤酒本身係來自19世紀在英國誕生的黑啤，再加上岩手縣三陸廣田灣的新鮮蠔身同蠔殼放入鍋中煮滾製成，飲落口唔會有蠔腥味，反而係強烈烘烤麥芽的甜味和苦味，作為頭炮野飲係唔錯既選擇。頭盤當然食D凍食先，我地叫左一隻來自長崎縣既赤貝，侍應哥哥攞上手時隻赤貝有佢隻手咁大，師傅係我地面前即開，新鮮既赤貝自然好食，非常爽口、甜同彈牙，香港好少有咁大咁新鮮既赤貝。之後我地食個凱撒沙律，食得菜多人會健康D，蕃茄好甜，芝士好香，不錯既頭盤。跟住當然要「蠔」一「蠔」佢啦！我地叫左個必叫既鐵盒燒生蠔，呢款來自廣島既燒生蠔有兩個食法，第一個就當然係原汁原味啦，我見到師傅係個鐵盒入面倒入大量清酒，用清酒黎蒸熟D蠔，蠔身每一隻都脹卜卜，見到都食指大動，入口係creamy，有淡淡既清酒味，海水味唔算好重，鐘意既朋友可以加埋枱上既瀨戶內海產既檸檬汁同唐辛子汁。另一個食法就係邪惡食法，就係待應哥哥攞住個車駄形狀既 拉克萊芝士過來，燒溶芝士再加上蠔身上，呢個又係另一種享受，芝士本身唔會太濃味，同埋燒蠔一齊食係出大奇土也大夾，食落係「芝」味無窮！除左鐵盒燒生蠔，我地仲叫左吉烈蠔，炸出來人係外脆內十軟，同埋蠔身入面好多汁。串燒方面我地叫左手羽先餃子蠔串，平日見得比較多係明太子手羽先，師傅係將一隻生蠔釀入去骨雞翼入面再燒，雞翼本身都醃得好入味，加上火燒蠔既香氣配合得天依無縫。另一串係豚肉包生蠔燒，一樣咁出色。食到中途啤酒飲晒，當然要升呢叫其他，我地叫左杯特上檸檬燒酎，一來到時真係好有驚喜，先係叫到一串冰左既檸檬，再來個做法係侍應哥哥開左一包冰左既宮崎縣燒酎，加入冰水後再攪拌，我真係大鄉里，呢個做法對我來講好新奇，燒酎入口唔會好辛口，冰冰涼涼好解膩。最後我地叫多一個燒魚鮫，一般燒魚鮫不外乎係油甘魚或者係三文魚之類，燒吞拿魚鮫真係第一次食。上到枱時見到個魚骨好大，唔講以為係牛骨，吞拿魚係赤身魚關係，燒左之後食落口有少少似牛，鹹鹹香香幾好味，魚油好豐富，配燒酎一流。店內氣氛好好，除左本地客外，亦都有日本人幫襯，店內有個日本人職員，我估應該係老闆，我見到佢會指點一下店員，亦都會同D客傾下計，如果想有少少返鄉下感覺，呢間值得一試。…Read More

平日夜晚食Omakase（お任せ）下下都過千，晏晝食就比較抵，銅鑼灣依家好多選擇，今次就揀左係駱克駅11樓既”豊” (Minori Omakase)。上到去大約有10零個座位，地方好寬闊同感覺好乾淨，我地坐左係中間Bar枱既位置。今次我地叫左12件壽司set(旬のお任せにぎり１２貫セット及び巻物）。首先來的是前菜水雲、蕃茄漬物 - 同埋合桃魚仔，冰冰涼涼好醒胃。薄燒鰹魚片 – 呢個我停唔到口，師父同我地講係佢地買返來自己再燒脆，我覺得好似食薯片咁，鰹魚味好香入正題天草石垣鯛 (天草イシガキダイ)- 本身石垣鯛係貴價魚，日本有夢幻之魚既稱號，魚油豐富得來係比較淡身的魚，作為第一道壽司恰到好處。北海道帆立貝(北海道ホタテ)- 帆立貝好甜美，面上邊的一粒粒係食用竹炭，口感清爽。九洲深海池 / 縞鰺(シマアジ)-  肉質白嫩，油脂感十足。地金目鯛(ジキンメダイ) – 為左唔會影響魚肉既質感，地金目鯛一般係靜岡縣伊豆海域盛產，並且係漁夫逐條釣的。而地金目鯛為金目鯛中頂級的級別，脂肪及魚油感最豐厚。牡丹蝦 (ボタンえび) – 呢個有驚喜，師父用返隻蝦既蝦腦放係隻蝦上面，充滿左甘香味。太刀魚 (タチウオ) - 即係我地食開既牙帶魚，師父用備長碳燒過，而佢地既燒法係有D特別，佢地係燒紅左舊炭再用炭直接烤上魚身，味道焦香之餘亦減低油膩感。中拖羅 (中トロ) - 來自九洲既奄美大島，係7日以上熟成既拖羅，熟成既好處係將鮮味提煉得更濃郁，呢個都好有驚喜赤海胆 (赤うに) - 來自北海道根室赤海胆，係香港食海胆一般都有少少怪味，神奇既係呢間既赤海胆係異常地鮮甜，同係日本食既海胆有得比，紫菜亦十分脆口。Baby Tuna (カツオ)－baby tuna 比正常吞拿的肉質更柔軟，但係甜度不會比正常吞拿遜色。銀雪魚 (ギンダラ) – 來自北海道既銀雪魚，相對baby　tuna冇咁濃味，爽口為主。赤鯥(アカムツ) – 長崎縣的赤鯥，有冬季兩大紅身魚貴族之一的稱呼，入口油脂感十足，入口即融。鯖魚捧 (バッテラ) - 大阪名物的押壽司，師父好細心咁比我地影相先，之後先用手包埋另一邊紫菜，鯖魚係燒過的，酸甜味平衡得剛剛好。碎吞拿魚手卷 (トロロール) – 同一般吞拿魚手卷不同，入邊唔係包左蔥，而係包左米通，芝麻同黃瓜，米通同芝麻增加左整個手卷的香味，黃瓜則減低了油脂感，高平衡之作最後仲有面豉湯、蒸蛋、雪糕同羊羹做結尾。值得一提係呢間壽司米用赤醋做的，赤醋比一般白醋更香，呢個都唔係好多地方見到。食Omakase除左係食物質素外，師父的服務都好重要，今次師父好詳細同我地講解野食之餘，仲同我地有講有笑，最重係lunch set咁多野食都係600幾蚊一個人，性價比好高，呢間下次絕對可以返撻。…Read More

今日去左旺角同朋友會面，早幾日係網上訂左位，去到唔駛等真好，最好彩係安排左個角落頭比我地，坐得舒服得來傾計又可以靜D。整間居酒屋裝潢好日式，刺身可以係壽司Bar度揀，感覺都幾舒服。我地叫左以下既野食﹕味醂雞泡魚乾熱熱地甜甜地作為開胃菜唔錯，燒得少少焦帶到雞泡魚乾香氣，餐前必叫。枝豆正常發揮，值得一讚係枝豆唔會好淋，軟硬度剛剛好。油甘魚腩刺身上枱時好夠凍，個樣好新鮮，一啖食落口係幸福既味道，同埋重點唔係薄依依，每件都係厚切，鐘意食刺身一定要點串燒 (牛舌、雞皮同雞胸軟骨)串燒好值得叫，燒得好食。牛舌個芯好淋，唔會死咸。雞皮係燒得亁身個隻，食落好似薯片一樣，一D都唔油，雞皮叫多幾串都食得落。雞胸軟骨唔係好多地方都有，上邊既黑胡椒辣辣地襯托到雞胸軟骨，3款串燒都好好味，串燒師父有功架。南瓜天婦羅南瓜本身好甜，炸漿脆得黎算薄，熱熱地好味。燒牛小排牛小排燒得好嫩，唔會鞋，重點係柚子胡椒，一齊食增加左牛小排既層次。燒甲羅充滿左蟹膏既甲羅，每一啖都充滿蟹膏既香味，入邊仲有少少一絲絲既蟹肉絲，仲有一D都唔腥。除左食物外，服務都好值得一讚，侍應會經常走過來收野同睇下你有乜需要，呢間居酒屋可以值得再來，下次可以試下佢地D蠔同酒既pairing。…Read More

今次有機會去文華東方25樓既The Aubrey食午飯，心知道今日係食日本野，去到以為自己搞錯地方。裝修有別於一般日本餐廳，主要係走英式風格，內在環境非常高雅，好好彩我地可以安排到坐近窗口位，望住維港個境真係好寫意。枱與枱之間好寬闊，傾計非常一流。今日點了一個午餐set – 和牛丼 (Wagyu Don Buri)日式茶碗蒸茶碗蒸入邊既蛋好滑，亦都充滿日本蛋香，除左蛋外入邊亦有鮮香菇，作為頭盤味道唔會太濃恰到好處。主廚推介3點刺身今日刺身以白身魚為主，雖然侍應未有介紹，相信應該係鯛魚、油甘魚等刺身，食得出係新鮮既味道，白身魚亦充滿魚油既香味。和牛丼日本和牛真心好食，入口即溶，和牛充滿油脂，飯係正宗日本米，配合幼切洋蔥將整個和牛丼減低油膩感，下次可以再點檸檬撻賣相十分精緻，撻皮好鬆化，檸檬撻食得出係用鮮楂檸檬汁整，用普通支裝檸檬汁係唔會有檸檬汁既香味，作為成餐既結尾係一個完尾的句號。…Read More

今日想離開中環下午就同同事一齊去左銅鑼灣食好野, 冬天凍凍地最好食返D辣野,今次就揀左好出名既三希樓。諗住銅鑼灣D餐廳會好易揾位，上到去估唔到有咁多人，我地好好彩等左15分鐘就有預約既人客甩左底我地先可以入到去，下次黎呢度食野一定要訂位。入到去D枱都隔得算開，坐落幾寬敞，黎得三希樓當然要見辣野啦。水煮牛肉 (2星辣)個人覺得係國際標準譚仔既5小辣，入邊有牛肉，冬粉，鴨血同筍。牛肉好滑，辣油好香，冬粉索左D辣汁好香，鴨血食落好實淨，大家想食辣D就D野食浸耐少少先食啦。好欣賞個水煮牛唔會係死辣同埋唔會好油，會食到材料原本既味道。剁椒蒸魚雲 (2星辣)成碟魚雲好足料，一D都唔會腥，入邊有魚頭同魚雲，一次過滿足鐘意食滑捋捋魚雲既朋友。小籠包 (3星辣)估唔到個大佬唔係水煮牛肉，原來最辣個一個係小籠包，個人覺得係國際標準小辣。食落口充滿辣汁，肉既量都好足夠，食完有後勁，呢個好值得一叫。辣雜錦 (3星辣)入邊有魚蛋，魷魚鬚同埋牛柏葉，呢個睇落以為唔會好辣，原來呢個都係隱藏大佬，魷魚鬚同埋牛柏葉好有咬口，唔係浸到好淋，加埋D辣汁將成碟野升華左。招牌雪影叉燒包 成餐最唔辣既一碟，叉燒汁較得洽到好處，唔會太甜又唔會太鹹，最驚喜係個皮做得好脆，果然係招牌。成餐飯食完流左好多汗，下次要帶多2包紙巾去抺汗。希望下次食下個酸菜魚。…Read More

女朋友聽朋友講話 CafeREVOL既卡邦尼意粉好正，我會鐘意食，今日就同我去左Café Revol 食個Lunch。去到見到係工業風裝修，地方唔算好大但係好乾淨整潔，好在我地早去唔駛等位就入到去。世一Revol 卡邦尼煙肉意粉叫佢世一真係一D都唔誇張，首先黎到見到個賣相已經流晒口水，蛋方面應該都係用”曉”蛋，出邊一盒曉蛋成50幾蚊一盒，呢度用曉真係誠意十足。芝士味好夠，煙肉唔會好鹹，味道平衡啱啱好，份量都好足夠，誠意推介。煙肉蛋酸種面包Brunch有菜有肉，平衝返只係得肉既油膩感，薯仔上有鹽，帶出薯仔香味。煙肉唔係平日薄薄既煙肉，好有口感，好鐘意食呢款煙肉。Latte手沖咖啡，奶同咖啡中和左個苦味，冇酸味，好飲。Tonic Fresh Lemon Ade女友好鐘意飲酸野，呢個飲完個人好清新，成杯野好有檸檬香味，又唔會太多冰，賣相好有夏日感覺。希望下次可以再去試下個全日早餐。…Read More

今日去左土瓜灣參加工作坊，要填左個肚先出發。 咖哩牛腩撈意粉 - 薯仔有少少生，林d會更好。咖哩意粉味正常。牛腩夠林，如果有少少牛筋就好啦。 雞蛋鹹牛肉三文治 - 全熟蛋，啱啱好熟，不過應該唔係日本蛋。趁熱食好食，包焗得夠脆，鹹牛肉略嫌唔夠多，推介鐘意食齋蛋治既朋友。不過一個人食晒就有點heavy，同埋個咀冇咁大既朋友都要諗下計點樣成個放落口。 煎豬扒 - 少少鬆肉粉味，腌得入味，唔會好鹹，個皮都脆，堅厚。 鹹檸7 - 鹹檸比較硬，唔係咁易篤，鹹檸唔算好夠味。正常。 中上級茶記，2個2埋單146蚊值得一讚係門口可以同狗狗一齊食， pet friendly餐廳。…Read More

今晚大人話想食下d snack food，諗下諗下就去左雞翼山買雞翼食。  係到去係全自助點餐，我地係買外賣，有成9款雞翼口味可以揀。我地叫左個套餐，入邊包2款口味既雞各8隻。一款係大人推介既港式避風塘蒜味雞翼，另一款係我揀既宮崎南蠻他他雞翼，跟餐有兩友維他菊花茶比大家清下熱氣，個概念諗得幾周到。返到屋企立刻試下先。 港式避風塘蒜味雞翼雞翼炸得幾多汁，唔會好乾身，塘風塘唔會好辣，蒜味好夠，唔怪之得大人以前成日食，呢個推介。 宮崎南蠻他他雞翼同我預期有啲出人，我以為個味會同日本既南蠻炸雞一樣，但係食落去個味唔多似，個醬都係沙律醬加酸青瓜。個人覺得正常味度，下次可以再試下其他味。…Read More

來到2022年最後一日，同大人飲個茶先。今日去左利苑飲茶，去到啱啱好1點，唔算多人，等左5分鐘就好快有位。我地叫左呢d點心： 魚蓉粥：入邊落左果皮，d魚係拆左骨之後整做魚蓉，我估計應該係用鯇魚做。大人本身唔多食魚，但佢話黎利苑一定要食呢個粥，就知呢個粥有料到。個粥幾綿，魚有薑味唔腥，呢個推介 炸魷魚： 個粉漿有少少厚，面有椒鹽粉，魷魚算甜，但唔係最新鮮 （我比較咀刁，食開新鮮生猛魷魚所以街食一般都唔會最新鮮） 燒排骨：叉燒汁味，叉燒會滑同淋d，但燒排骨另有風味，軟骨好食 燒賣：賣想一般，唔算好成形，味道搭夠，香菇味重，一啖一件 凰爪:正常水準，唔會蒸到一patpat 棗皇糕：每年新年必買返屋企，以前用籠上，依家用碟上，夠熱，細左，中間椰汁糕，面係紅棗糕，唔會死甜，推介 。但係我唔記得影相total 327…Read More

2022年最後一晚，當然要同中人食餐好。去到餐廳，唔算好多人，去得藍馬大廈就預左唔會好闊落，坐得叫聽食，點知豬喉軟骨賣晒，最後一碟比隔離枱攞左。唯有叫其他： 凍蕃茄 - 唔駛錢送， 凍凍地，正常偏好食，個人鐘意食硬少少 黑豚頸肉串 - 較豬腩乾身，本身唔算太吸引，加左檸檬汁同胡椒鹽加強層次，齋食會較單調 煙燻豬腩 （店舖推介） - 似煙肉，唔係死鹹，偏甜，似日本厚切煙肉，點蜜糖芥蘭好好食，呢個值得再食。 厚切金星豚肉 - 推介，雖然有肥肉，唔膩同好有油香，熱食唔會有油膩感，有蒜香味，加胡椒鹽食增加層次，呢個都推介。 牛舌厚切 - 多汁，肉質好少少韌，可以多少少鹽 雞皮 - 脆，乾身，有一d係偏林，加埋好食。encore叫多兩串 雞翼 - 調味正常，雞翼皮可以乾身少少 抱子甘藍 - 小椰菜bb，少少苦味，有少少燒汁 小甜薯 - 個面搽左牛油，好香。甜薯好甜，牛油嘅鹹味更加帶出甜薯既甜味。 燒白鱔 - 大人唔食白鱔，問侍應可唔可以只係燒一串（因為最低消費係2串），侍應姐姐立刻應承，真係抵讚。白鱔魚油味重，最重要係冇乜骨，如果白鱔皮可以燒得脆少少就perfect啦。 燒年糕 - 呢個有甜燒汁係面，唔係度度都有，突顯年糕甜味，芝士燒得啱啱好，好流心。推介之選。 焦糖菠蘿 - 面有焦糖，脆面包住個菠蘿，熱熱地甜甜地作為甜品唔錯。 清酒作 - 純米原酒 ，偏向甘口， 碳酸感強，有米香，入口有少少酒精感，唔算太順，可能唔太啱女仔飲。 不過半價一支抵飲。除夕夜全場爆滿，叫野落單都唔駛等好耐，辛苦左3個師傅，最抵讚係咁忙都冇時限，有好野食都真係要多謝咁多個料理職人。祝大家新年快樂。2023年要繼續食好野。總數$1404…Read More

大人同我講渣哥d炸牛筋丸好好食🤤，今日咁啱經過九龍灣德褔，終於可以試下個炸牛筋丸。 12點去到，唔算好多人，我地叫左兩串炸牛筋丸（一串3粒），老闆同我講得返5粒🥴，所以我再搭多粒墨魚丸。野食係即叫即炸，所以要少少耐性，5分鐘後就食得啦。 炸牛筋丸：👍👍👍即叫出來真係好熱辣辣，小心熱親條脷。個面炸得好脆，上邊再加上椒鹽粉，好香口，牛筋丸真係有牛筋，加埋少少黑椒，好惹味，唔怪得大人話成日要食。 炸墨魚丸：墨魚丸好鮮甜，有椒鹽粉加埋都好好食。如果入邊有少少墨魚粒就更好啦！ 炸牛筋丸真心好食🤤🤤🤤，推介之選。👍👍👍渣哥下次應該預備多d…Read More

星期六同未來老婆去太古坊行下聖誕市集，行之前當然要醫下肚先啦。未來老婆話想食下意大利菜，所以我地就訂左係濠豐大廈既La Favorita。入到餐廳好有意大利西西利島歌劇院風情，可能星期六既關係，餐廳叫做冇乜人，個環境夠晒Chill。食飯其間仲好多外國人係度飲野，有少少去左個旅行既感覺。可能太肚餓關係，2個人瘋狂叫野，我地叫左火腿拼盤、Burrata芝士蕃茄、海鮮沙律、燒豬腩、Heese Wheel Al Tartufo、青檸雪葩同果盤。點知個頭盤原來係變態地大份，最後有D野我地都係攞走。頭盤酸種麵包正常味道，配埋意大利醋同埋橄欖油食都算幾平衡火腿拼盤及Burrata芝士蕃茄未來老婆最愛食火腿，基本上有一半佢都食左，一共有4種火腿，個水泡形麵包有少少硬，可能我食唔慣意大利野唔係好識欣賞。海鮮沙律個沙律幾夠凍，D蝦都幾彈牙，但唔算好有蝦味，不過鬼佬菜都預左係咁。主菜1﹕燒豬腩燒豬腩好林，個汁都配合得唔錯，但係個皮有少少硬同埋有少少油，不過我覺得最好食係個小甘筍，甜度夠晒。主菜2﹕Heese Wheel Al Tartufo呢個相信係好多人為左打卡而黎既菜，待應會車個大車輪芝士，入邊再加D好短既通心粉，用芝士撈埋一齊，重點係上邊加上無限既珍貴黑松露，淨下睇都幾得好奢華。味道上食落口充滿黑松露香味，不過加左芝士關係食多幾啖有少少膩。甜品﹕青檸雪葩同果盤青檸雪葩同果盤清返之前既油膩感，青檸雪葩有少少偏酸，果盤就正常。總結呢餐都食得好滿足，體驗都算幾特別，不過2人份量真係有少少多。…Read More

今日經過銅鑼灣，同事話一齊去呢間餐廳食，見個價錢正常銅鑼灣價，就一齊入去食。入到去見到似入左個小森林，感覺唔錯。但一去到個位就見到張椅有少少污糟，就自己換左一張好D既。我自己就叫左個express lunch set，叫左個生牛肉河粉，餐跟一個南瓜湯同野飲，我就點左熱咖啡。同事話星期五想食得開心D，再叫左個黑松露薯條、蜜糖單骨雞翼。南瓜湯味道正常，我覺得有少少渣，可以的話過濾得清D會好少少。生牛肉河粉牛肉粉整得唔錯，牛肉唔會好鞋，牛肉我估應該係美國雪花牛，牛味唔算好重。黑松露薯條薯條有少少林，係厚肉薯條，奇怪既係我同事跟餐個薯條係脆既。蜜糖單骨雞翼碟雞翼賣相一般般，可以的話炸得脆少少會好食D。整體上算中規中矩，食物唔算好驚喜，不過個環境算係幾舒服。…Read More

一直對我地愛護有加既老闆生日，冇理由唔請佢食好少少啦!  我地一行6個人去左呢度食鐡板燒午餐。訂位時我特登安排坐卡位，可以一路同師傅吹水一路睇住師傅煮野食，鐵板燒既精髓就係呢度！我點左個虎鐵特選D餐 (HKD688) 入邊有沙律、黑魚子鵝肝蒸蛋、 豆腐魚湯白鱈魚、 匈牙利鵝肝、 日本熊本A5和牛厚燒 、 香煎野菜、 味噌湯、 和牛炒飯、 甜品/咖啡，正常既人一定夠晒食。先食個蒸蛋，一般茶碗蒸都係個用個碗裝住D蛋，呢個就係用個蛋殼裝住，淨係賣相都加晒分，入邊既鵝肝唔會太膩，加埋黑魚子個感覺好高級，個蛋都蒸到好滑!之後再飲個豆腐魚湯白鱈魚，鱈魚係係鐵板香煎左先，再插上煎香既魚皮，再加落個湯面度，加埋豆腐湯整體配合得幾好。再來就係香煎匈牙利鵝肝，鵝肝好大塊，唔似出邊得豆潤咁細，加埋黑醋淋上面減低油膩感，平衡得唔錯。之後就係主菜，日本熊本A5和牛厚燒，碟邊係放岩鹽，蒜片煎得香脆，連埋和牛一齊增加香氣。生熟度控制得啱啱好，又唔會太油膩。呢個都係誠意之作。我訂位時Openrice有9折優惠，所以埋單基本上唔駛比加一，老闆好滿意呢餐。…Read More