solwin's Profile

上年來過二三次，湯底夠濃味，花膠筒仔有十隻，質素唔差。但今日再來，已由淋滑的花膠筒仔，轉咗爽口的鱈魚膠，問了店員，說花膠早於幾個月前轉了。當然知道在商言商道理，但已經唔係我想食的。依家又少一家想會再來食的店舖。…Read More

兩公婆去食晚餐，點了一份牛柳，一份T骨扒，另外再加羅宋湯，及蔬菜沙律。這是我有生之年食過最難食的牛扒。先講羅宋湯，套餐要加$18，係一碗茄汁水加一片西芹及一片椰菜，完全冇味。再講牛扒。點餐時收銀冇問你幾成熟，又乾又嚡，仲要鐵板上，似足食牛肉乾，但係要知道塊鐵板係唔熱的，淋汁落去完全冇咋一聲。成個餐最好味就係個汁，都叫做有少許黑椒味，係少許。價錢都唔平，雖然係food Court，兩份夾埋都要3百多元，如果你哋想食超級牛肉乾嘅牛扒，飲無味嘅羅宋湯，即管去試吓，我就一定冇下次。完….…Read More

今日情人節，邊度食飯都多人，老婆話想食韓國菜，當然第一時間諗起尖沙咀韓食街，點知間間都好多人，有幾間只能排隊，亦有攞飛排隊，好不容易排到呢間，店內非常細小，幾乎背貼背，冇計，香港租金貴，原諒佢。點了海鮮餅，牛肋骨飯，人參雞湯飯，先來海鮮餅，食落完全是粉餅，有少少䓤及大過蝦米少少的蝦，餅又非常油，還好的有個醬汁。再來牛肋骨飯，完全不得了，好似食牛肉乾，咬到牙較軟，還好有個醬汁。最後來了人參雞汁飯，從來未食過好似飲白開水的參雞湯，沒有人參或雞味，超市買即食的一定好過佢。埋單$344.3,總括來講，呢間店請我都唔會再來，唯一可取的，就只有該店醬汁。…Read More

上次同屋企人食完之後番尋味，原本諗住同朋友去太子分店，約咗八點左右，點知去到無位要等，話最快要等到九點幾先至有位。原來呢間鷄煲已經响佐敦開多咗間分店，反正有車，即時打去問有無位，剛好仲有枱，於是叫佢留番張枱比我，於是一行六個人飛車過去。又咁好彩，去到門口有車位，另一部就泊對面。坐低梗係要飲杯啤酒啦，大Hoegaarden、大Asahi走唔甩。再叫D小食，皮旦酸薑、炸魚片頭、素鵝、炸釀油條當然唔少得。小店做的小食果然出色，每樣都好食。今次班朋友有幾個唔食辣，所以叫咗花雕醉鷄煲。等咗五分鐘，從遠遠已經聞到好香葯材味，先試吓件鷄，都係咁滑，新鮮鷄即係新鮮鷄，不枉我再次幫襯，比起其它店用冰鮮鷄完全無得比。配料就一定要叫手打蝦丸、再加手切肥牛、醉鷄子、黑牛柏葉、墨魚滑、魚皮餃、鵝腸、魚頭、鱔片同埋生劏田鷄等，另外再加些蔬菜。嚟過呢間店一定知道蝦丸係非常彈牙，超好食，難怪餐單上寫必食。另外碟手切肥牛非常多油花，灼一灼幾秒就食得，一個字形容，正。醉鷄子食落仲有酒香味。生劏田鷄上枱仲識郁，好新鮮。鵝腸帶肥膏好甘香。黑牛柏葉記住唔好灼咁耐，如果唔係就好韌。其它配料都好好食。估唔到我哋五個人可以食到咁多嘢，埋單每人180元。…Read More

今日大除夕，同老婆去完太子汗蒸，晚餐又無人約，飲酒倒數又未夠鐘。咁我倆就由太子坐車去佐敦諗住食粥，經過亞龍咖哩門口，就被門口店員推薦，話我哋係正宗亞龍咖哩，隔離個間唔係，食咖喱就要入來(我相信好多食客都會有上述情況)。門口見真係好多人食(隔離鋪就小貓三數隻)，我都係第一次去呢間食咖哩(之前食過都係重慶大廈食)，先坐低，坐位好迫，問佢有乜好介紹，佢推介食咖喱蟹，我話OK，另外再叫一份咖喱牛根腩及咖喱牛脷，一個跟飯，一個跟咸餅。牛根腩及牛脷都好快上，咖喱香味已令我流哂口水，先用餅沾些汁來試，發覺其咖喱味與別不同，很重洋蔥及蕃茄味，好好食。再試牛根腩及牛脷，牛根腩好冧OK，但牛脷就麻麻，再用咖喱汁沾上白飯，發覺比咸餅更好味，不足五分鐘，整碟白飯掃清，但牛根腩及牛脷重未食哂。到咖喱蟹上枱，先試試咖哩汁，好重海鮮味，再試試隻蟹，都好食，但我還是喜歡泰國式咖哩炒蟹。唔知呢度有無剩係咖哩汁加白飯賣呢，問心講，佢的咖哩汁先係主角，其它都係配角。而這裡亦坐得不太舒服:(，二個人好似係飛機上食飛機餐，唔可以隨便郁:(，由其是食蟹時，更加論盡。埋單$383元，細問下原來隻蟹要$280元，食完就行去尖咀等倒數。…Read More

今日攞咗部手提電腦去整，職員話要等最少一個鐘。咁啱肚餓，見到劉森記都幾多人排隊，我咪襯吓熱鬧排吓，唔排由始可，一排就等咗15分鐘。坐低先食了些酸蘿蔔，都幾開胃。接下來叫了碟蝦子牛根腩撈。上枱時先聞一聞，只有少許蝦子味，完全唔夠香及唔夠多(如果食過澳門六記就完全認同)。再試吓碗湯，好重蝦殼及大地魚味，但係好咸:(,牛根腩，炆得好淋都OK。再試麵條，煮得太淋，沒有爽口感覺:(。(可能今日師傅心情麻麻)麵條比麥文記差幾班。埋單$33元…Read More

太太成日話想試芝士火鍋，而我又未食過，咁啱今日無朋友約，可以同太太撐枱腳。坐低後即叫唔知什麼名堂的芝士火鍋，乜都有D。餐牌上有教點食先後次序。上枱時芝士都幾香，先食煙三文魚:(，大路貨色沒什麼特別。再食麵包沾上芝士，都幾好食，很快一份麵包已食完。接下來食雞肉，雞肉碎濕濕:(，除了芝士味外根本食唔出食物本身味道。蝦係急凍，又係無味:(。接下來的牛肉比較好一些。蜆肉比手指甲還要小，肉丸極之難食。薯條凍的。食到一半我已感到很灟，滿口芝士味，但唔係飽。我諗成餐最好食都係得麵包及磨菇。埋單連加一接近$400，返到屋企仲要煮包公仔麵食。…Read More

今日一行6人去行花園街及金魚街，阿妹提議打邊爐，我話不如去百利，點知要等位，見到隔離新開咗間叫”寶寶雞煲’，阿哥話旺角嗰邊都有間，食物都唔錯，反正都係打邊爐，咪走入去試下囉。行到攰坐低梗係飲番杯啤酒，咦.有Hoegaarden喎:)，大大杯都係三十幾蚊，去酒吧飲都唔只啦。睇下張餐牌，主打雞煲，招牌係香辣雞煲，唔知同來來又或者一品邊個好食呢？我哋幾個都唔係幾食辣，叫咗個小辣。伙記服務很好，告知雞煲是即做，要等10分鐘左右，推介一些餐前小食比我哋，皮旦酸薑、炸釀油條、炸魚角以及素鵝。皮旦酸薑同中環鏞記一樣咁好食，炸釀油條係用蝦膠釀落去油炸鬼度，口感非常好，送啤酒一流。炸魚角夠香，另外素鵝亦非常出色，一食就知係深水埗”樹記”貨。輪到主角雞煲出場，上枱時已香噴噴，伙記建議先煲10-15分鐘，等香辣味完全滲入雞肉度。(據講佢哋用新鮮雞做，但寫食評時已沒有新鮮雞賣:(。)等了15分鐘，口腔分泌大量口水，先喝一口湯，雖然無來來及一品的麻辣香味，但都很香濃及惹味。試一件雞，味道出奇地鮮，食得出係用新鮮雞做。十分鐘後，我哋幾個人已將成煲雞食哂。意猶未盡再叫些配料食，牛肉當然唔小得，餐牌上有M9和牛、新鮮牛頸脊。我哋幾個都係牛魔王，叫了M9和牛及牛頸脊各一碟。M9肥廋均勻，食得出係上等貨。牛頸脊肉味香濃，牛痴最愛。伙記見我哋食得咁開心，再介紹一些特色嘢比我哋試，手打蝦丸、豬腳根、豬天梯。手打蝦丸食落非常彈牙，好好好食。豬腳根要煮20分鐘，據講一隻豬只有兩條，非常罕有。豬天梯稍灼1分鐘，食落爽脆，非常特別。已經食到七成飽，再叫些响鈴、馬尾粉絲、薯仔麵及蔬菜等。今餐食到非常飽，食物新鮮,，整體來講樣樣都好好食。埋單一仟元多些，仲唔收加一，計落每人都唔駛$200，個人覺得用呢個價錢食到咁高質素之食物，非常合理。下次我想食雞煲或打邊爐，呢間會係我首選。…Read More