Weeeat's Profile

今日經過旺角登打士街，先發現開咗一間叫豆公館嘅鋪頭。餐廳主打豆類製品，有豆腐花、豆漿仲有蛋餅、腸粉、炒麵呢啲港式小食。餐廳裝修走簡約無印風，煮食過程亦都可以比客人望到。今次一場嚟到，無論鹹食定係甜品都各自嗌咗啲。首先嗌咗主食，有老干媽炒麵、麻婆腐皮蛋餅、芝士鹹牛肉刈包、同埋滷水豆腐。老乾媽炒麵，份量十足，炒麵炒得乾身之餘唔會過分油膩同埋好有香氣。老乾媽嘅調味適中，令到炒麵辣得來好惹味、又唔會有食到成口辣油食到好膩嘅感覺。滷水豆腐好特別，可以食得到有八角桂皮等香氣，絕對唔係得死鹹。如果豆腐嘅豆味亦都好出，而個質感同平時食開嘅唔一樣係偏似硬豆腐，最抵讚佢同滷水係攞到個平衡，唔會話邊個搶咗邊個風頭。刈包就正正常常，鹹牛肉同芝士係預計到嘅味道，不過份量就好大，我就稍為覺得有少少重口味。至於個麻婆腐皮蛋餅入邊要係一啲蘿蔔絲，有啲似鮮竹卷版嘅蛋餅。以免頭淋咗少少麻辣醬，都幾惹味。至於甜食方面，我哋試咗個開心果豆腐花，豆味好濃郁，而且質地好滑溜。而開心果嘅味道亦都好夠，面頭有一層開心果醬加開心果粒，有咬口之餘亦都唔會係死甜真係食到開心果嘅香味。而飲品方面就叫咗原味豆漿同埋薑汁豆漿，兩隻豆味都好出，而薑汁豆漿比較為我鍾意嘅原因就因為佢唔會好似坊間咁落咗薑汁糖水，搞到個豆漿好甜，而係佢嘅薑味好濃郁之餘亦都保留到好重嘅豆味，亦都唔會過甜。整體嚟講我覺得呢間店舖嘅性價比好高，食物嘅質素亦都好唔錯，下次再嚟我會試吓去其他嘅主食。…Read More

今日係荃灣行街比我見到荃新天地開咗間新麵包舖，我呢啲對包冇抵抗力嘅即刻忍唔住大掃一推同朋友當lunch食。一望就望到佢啲牛角包好靚仔，於是就揀左開心果醬、士多啤梨忌廉、海鹽焦糖同埋芝士火腿四款。其中開心果可頌最得我心開心果夠味，個醬就杰身啲，好濃郁。可頌就始終我返到屋企先食，過左咁耐仍然仲有鬆脆感。士多啤梨就正常，個忌廉唔會好甜。海鹽焦糖就甜度適中，我幾中意，而個焦糖醬都偏杰身。芝士火腿個款我就略覺得個芝士可以再多啲，而家個味有啲比火腿冚過。除咗可頌之外，我都有叫其他麵包試下。芝士箭豬包個樣就好得意，有兩隻朱古力整成嘅眼仔。本身以為係得外邊嗰層有芝士，原來入邊亦都係有忌廉芝士嘅，食落去好滿足。蒜香多士就同平時麵包舖嗰啲多類似味道，不過不失。日式芝士條份量十足，係平時嘅兩倍。除左正常面有烘過嘅芝士，佢仲有層海苔粉，幾特別。黑糖麻薯包入邊有好煙靭嘅黑糖麻糬，麻糬做得好出色甜味啱啱好，如果包外面就咁樣朱古力粉就中和返黑糖味，都幾唔錯。開心果流心菠蘿包亦都係見到舖頭推薦嘅，菠蘿包外面嘅脆脆係有少少開心果香，入邊的確係有留心嘅，整體感覺好特別，開心果味都有，但係未至於好濃郁，可以一試。開心果扭紋包係店舖其中一個熱門產品，佢係用咗天然自家開心果醬整嘅，份量好大都只係$20 ，本身個包就好軟熟，中間亦都夾雜着開心果醬，同埋一啲開心果粒，食落香口之餘亦都有陣陣開心果味，攞嚟做早餐就好滿足。…Read More

今日同朋友係尖沙咀行街，口痕想食韓國菜，於是就試左呢間頗有名氣嘅餐廳outdark。佢係樓上鋪，一開lift已經被佢嘅裝潢驚艷，係掛滿哂愛情鎖嘅牆。同時間，招呼我地嘅係貨真假實嘅oppa。未食已經覺得有種正宗嘅感覺。入邊環境幾大，裝修好有心思，天花板掛滿星星，燈光亦都校暗咗，好有情調。睇佢個Menu有好多選擇，而佢嘅餐單係主打全部都係自家製同埋係韓國師傅親自整。海今次我哋就叫咗海鮮炒年糕同埋泡菜煎餅。嘢飲就叫咗個原味馬格利米酒。海鮮炒年糕一上枱，好誇張，真係同menu張相一模一樣。有一隻好大嘅炸魷魚喺中間，然後窩邊亦都有粟米芝士，泡菜、腸仔同埋紫菜飯團，好豐盛。個醬汁係玫瑰汁，係帶辣嘅卡邦尼汁，惹味得來一啲都唔會好膩。店員亦都好熱心，為咗方便我哋進食，會用鉸剪喺我哋打完卡之後幫我哋剪開炸魷魚。除咗炸魷魚之外，亦都有其他海鮮，例如蝦同帶子，全部都好彈牙。而年糕質地亦都做得啱啱好，軟腍腍適中，亦都配上一啲蔬菜，帶有口感同埋清爽。夾埋路邊嘅粟米芝士，真係好好食。而紫菜飯團配埋玫瑰醬汁，亦都令我食過唔停。而泡菜煎餅份量相當大，佢煎得來外邊好脆入邊亦都有煎餅嗰種煙靭口感，材料亦都覺得相當足，每一口都咬到爽口嘅泡菜，調味亦都唔會過鹹係辣辣地。飲品我哋嗌嘅係傳統嘅韓國米酒，佢上枱嘅方式係用咗一個大盤去裝住，另外俾兩隻小碗我哋分離飲，相當之傳統同韓國飲嘢方法一模一樣，別具風味。淨係講，我覺得食物質素相當之高，絕對係正宗嘅韓國味。除此之外店員嘅服務都相當熱情，呢排應魷魚遊戲嘅熱潮，喺我哋食完之後亦都送咗一個玩具俾我哋玩，亦都送咗兩粒糖俾我哋清一清口氣，令我哋覺得好滿意成個體驗。…Read More

呢間位於d2 place嘅餐廳好特別，除咗有嘢食仲有得打golf，好新奇。我今次淨係食嘢，下次可以試吓玩下。我今次嗌左個main 加配菜，仲加左錢叫埋嘢飲同沙律吧。沙律菜好新鮮，有生菜、洋蔥同車厘茄。 調味方便有黑醋、橄欖油同沙律醬選擇。同時亦有蒜蓉牛油法包提供。餐湯係忌廉蘑菇湯，菇味十足同好香。香煎南澳野生大虎蝦配明太子意粉首先份量十足，男仔食都夠哂。兩隻虎蝦好大隻，好搶眼。香煎過後香氣十足，蝦肉都保持彈牙有蝦味。蝦頭仲有滿滿嘅蝦膏，好滋味。意粉正常水準，有明太子味之餘好creamy。加埋啲蕃茄粒同洋蔥粒，增加咬口之餘又令味道昇華。忌廉菠菜正常發揮，好creamy ，加埋巴馬臣芝士，好食。嘢飲我叫左凍啡，幾好飲。Overall，食物唔錯而服務態度都好好，我下次會再想黎試下。…Read More

今日食嘅一間餐廳相信大家都有機會食過，佢就係金鳳大餐廳。今次去嘅係位於D2 Place嘅分店。同其他分店一樣，餐廳主色以紅色為主，而家因為做緊聖誕，所以都有少少聖誕嘅裝飾，幾有心思。位置空間不過不失，坐得都算舒服。因為咩都想食吓，所以今次嚟到就嗌咗佢嘅美式雜扒餐。同其他扒餐一樣跟紅白湯。自己就揀咗白湯。自己都幾鍾意依度嘅白湯，偏濃同埋Creamy，有少少奶油香味，而且非常之熱辣辣。當然都仲有餐包食，味道就正正常常咁。然後終於到主角。一嚟到已經聞到好香，鐵板渣渣聲，熱度合格有餘。倒汁之前店員會提醒你用餐巾遮擋，都算貼心。叫得雜扒餐就係貪佢乜都有份量夠多，而金鳳呢度嘅集扒餐分量更加係十分驚人。佢有牛、豬、雞、火腿、腸仔、雜菜同埋薯條，認真成座山咁。另外我仲加咗蒜蓉配埋蒜蓉汁。豬扒超大塊，配埋蒜蓉食非常嘢未。牛扒相對純粹大少少，但味道都唔錯。雞翼都烤得唔錯。腸仔火腿就普普通通。反而雜菜同薯條配埋啲汁食又幾好食喎。最後嗰餐係有跟埋餐飲嘅，凍咖啡走甜，咖啡幾濃，好飲過出面茶記。同埋都算幾大杯。總括嚟講，一路都覺得金鳳算係一間幾抵食港式扒房，如果想食肉，又想平平哋嘅話，金鳳真心係一個唔錯嘅選擇。…Read More

近排開始天氣凍，就想食返啲川菜暖吓個身。行過D2 Place就比我發現呢間十二味。之前喺其他地區都有見過呢一間嘅分店，但係一直都遲遲未有入去試。今次見天氣凍就一於試吓佢。今次我就因為方便關係就買咗外賣帶返屋企食。我就嗌咗水煮牛肉、嵊州老面小籠包同埋花生宮保雞丁。先講水煮牛肉，份量好大，味道辣得來，帶有少少麻、仲有少少後勁。聞落去都好香，帶點花椒味。牛肉份量都多，牛肉質地有咬口，唔會過分軟腍腍。除咗牛肉之外入邊仲有其他配菜，例如青瓜、生菜同埋寬粉。寬粉好煙靭，值得一讚。撈麵小籠包就有啲驚喜，佢同我哋平時食開嘅小籠包係唔一樣嘅，唔會係皮薄嗰種，而係佢哋係好似包咁樣，有少少似生煎包，包睇做得好好，好煙靭，亦都帶有麵粉香，而內餡係豬肉，但係仍然充滿着肉汁好Juicy，唔會食落好乾。而最後就係花生宮保雞丁，炒得好有鑊氣雞肉唔會好乾柴保持到口感，加埋花生同埋腰果，食落好香口好惹味。呢一碟餸攞嚟配酒一流。整體嚟講，我覺得食物質素好好，絕對帶出川美嗰種香、麻、辣嘅感覺。有機會一定會試吓堂食，試多啲佢其他川菜款式。…Read More

今日去到深水埗同太子交界嘅一間泰國餐廳，呢間個位置好隱世，但係味道絕對唔馬虎，仲好好食添。舖頭鋪面尚算大，有得坐室外添。室內就可以一睹廚師煮飯嘅風貌，用餐體驗有埋視覺享受。今次就叫咗菠蘿海鮮炒飯、泰式蠔仔煎蛋、青檸盲鰽同埋一份小食春卷。炒飯嘅飯粒粒粒分明，乾濕適中，加埋配料菠蘿同肉鬆，鹹香得來又有菠蘿嘅酸甜，食落零舍開胃。同事份量都頗大，足夠兩個人食。泰式蠔仔煎蛋呢個好出色，一上到碟就熱辣辣，蠔仔一啲都唔腥仲粒粒飽滿，份量仲好多而加埋蛋嘅配搭，真係食唔停。而本身蛋亦都夾雜一啲銀芽同菜，食落增加口感。而店家都入去有自己條配嘅辣汁，加埋辣味，更加惹味。而另一個亮點就係青檸盲槽，魚肉新鮮，好滑彈牙。同時魚肉一啲都冇腥味，好好食。成個青檸汁好明顯就一啲都唔係啲化學味，係新鮮青檸炸出嚟嘅，所以食落去嘅清新同埋酸甜係好自然同埋開胃。與加埋個青檸湯底一齊食，真係食到唔停。而最後一個小食就係春卷，新鮮滾熱辣炸出黎，好脆口而入邊有木耳蘿蔔等配料，有咬口，加埋自己調配嘅一個汁，好夾。飲品方便我哋叫咗一個一式色同埋泰式菊花茶，那些菊花茶好特別就係會加埋花奶，令到成個口感好滑。而家食冰就係椰汁加咗粿條，好有咬口。整體而言，我好欣賞呢間小店，雖然佢哋嘅位置唔算得上係好方便，但係佢哋嘅心思同埋對食物嘅熱誠加埋食物嘅質素都好值得大家去試一試。…Read More

踏進那扇酒吧的大門，適當昏暗的燈光將銅鑼灣的熱鬧隔開。三面開放的吧檯能夠將調酒師的調酒過程展現給客人。食物的選擇很多，有泰式和日式，比較少見的組合，不過日式就以串燒爲主。今天因爲已經吃過了晚飯，所以只叫了一道泰式辣鳳爪，以開胃菜來説分量都足夠，味道不錯。下次有機會要試試串燒。除了食物，酒吧的服務也是相當不錯的。服務員們笑容迎人，專業周到，讓用餐體驗更加完美。這間酒吧有不少熟客，令到餐廳的整個氣氛更爲愉悅和輕鬆。我點了兩杯cocktail（Negroni和New York Sour），一杯白酒和一杯紅酒。兩杯cocktail的賣相都不錯，可以打卡，Negroni的基酒味道頗爲特出，New York Sour則比較順滑容易入口，剛開始喝酒的朋友可以嘗試這一杯。當天還有駐場歌手和live鋼琴伴奏，氣氛相當不錯！…Read More

今次試咗位於荔枝角嘅一間連鎖燒肉店。佢位於荔枝角AEON，店舖都幾大，座位位置都好闊下。依度主打嘅係燒肉套餐，一份肉再配飯，湯，同埋小菜。今次同朋友就每人嗌咗個套餐，分別嗌咗店舖人氣嘅宮崎和牛套餐同美國牛五花加牛小排套餐。凹晒橋空中列車，點完餐之後會由一㗎列車仔送成個套餐俾你，幾得意。舖頭嘅醬汁都非常充足，除咗普通嘅燒肉醬，鹽，黑椒，仲有香草蒜蓉燒肉汁同韓式辣椒醬，任君選擇。先講宮崎牛餐。個餐除咗宮崎和牛，其實都仲有另外兩款牛，韓牛同埋A4和牛件。真係估唔到咁肥美，食落真係媲美日本食嘅和牛咁。每個人前面都有個爐仔，逐塊即燒即食，真係勁滿足！而美國牛五花同牛小排套餐就勝在份量極多，啱晒鍾意食肉嘅人，但當然肉味都好足亦都非常肥美。最後再加咗點牛舌，感覺上有少少重口味，醬汁味比較濃。餐廳外面亦都免費提供檸檬水俾大家任飲，方便大家油膩嘅時候解一解，值得一讚。總結嚟講，對於一間相對平民嘅燒肉店呢度嘅肉質量非常之高，屬於性價比相當之唔錯嘅選擇。幾推薦鍾意食肉嘅人試吓。…Read More

今日同朋友去銅鑼灣行街，見到呢間應該係開咗冇耐嘅台式甜品舖，於是就入去食個下午茶。舖頭鋪面都大，都可以容納到唔少客人，而枱同枱之間亦都唔會好逼夾。舖頭入邊有部大電視播住歌，令到成個環境都好chill好放鬆。一望餐牌，佢同其他台式連鎖甜品舖都類似，有芋圓、仙草、湯圓同埋飲品嘅選擇。而我見到佢嘅主打係芋頭，於是就叫咗雙芋冰嫩仙草凍同埋芋頭鮮奶露。先講仙草凍，仙草好Q彈滑嫩，味道亦都唔會過甜係清甜為主，食落好舒服。佢都附送咗奶油，如果想Creamy啲可以加埋。配料方面有紅豆、芋圓、地瓜圓同埋芋泥球。紅豆質感啱啱好仍然有咬口又唔會太硬，味道亦都唔會甜到太漏。芋圓同地花園嘅質地好煙靭，仍然食得出芋頭同地瓜嘅味道，而唔係純粹一舊煙靭嘅粉團，好加分。而我最鍾意嘅配料就係芋泥球，芋泥好綿密，亦食到芋頭嘅香味。整體成個配搭都好夾，係一碗解暑嘅甜品。而飲品方面，我哋嗌咗嘅芋頭鮮奶露就係由芋泥牛奶加西米露所造成。芋頭牛奶融和得好好，唔會芋泥同牛奶各自分開，而西米嘅加入令到口感昇華。飲品嘅甜度亦適中。至於小食我哋叫咗個紫薯麻糬丸子，紫薯味都出，而丸子好煙靭而佢上面嘅一層奶蓋醬好出色，好想再食多啲。整體嚟講呢間甜品舖都認為好唔錯，而店員亦都好殷勤親切，如果下次再嚟我會想試吓佢嘅冰品…Read More

無意中發現咗間幾好食嘅韓國炸雞想同大家分享吓。間舖位於北角新都城隔離小巷kfc隔離，咁啱夜晚行過見到冇乜人唔使排隊，所以入咗去試吓（其實都有啲人喺度等緊外賣）。入面都算新新淨淨，幾闊落。嘢食方面裏面都唔係剩係得炸雞嘅，咁我哋就嗌咗兩款炸雞，一個辣年糕，一個紫菜包飯同埋泡菜煎餅。炸雞都有幾多款口味，我哋嗌咗推薦嘅洋蔥忌廉炸雞同埋火辣炸雞。兩款都好食，外皮脆但入面雞肉都幾鮮嫩，尤其係洋蔥忌廉炸雞，醬汁調得好好食，而火辣炸雞就幾辣下，唔食辣嘅人可能未必會食到。兩款都有配沙律菜，連埋炸雞一齊食啱啱好。同埋想讚嘅係佢除咗Regular size仲有得揀baby size，咁就可試多幾款口味。不過baby size其實都唔算細，都有6 /7 舊。年糕方面，嗌咗carbonara味辣年糕，個汁夠濃，忌廉味幾出，加埋少少辣味，唔錯。裏面仲配咗啲韓式粉絲，連埋汁食非常之好食。紫菜包飯份量超好足料，又大條勁抵食。最後泡菜燒餅就正正常常，覺得冇乜特別。嘢飲就嗌咗兩杯梳打，都係正正常常，不過都算幾大杯。總結下，覺得而家韓式小店味道同埋份量方面可以話係高於平均，但佢價錢方面真心唔貴，所以真係幾抵食。我自己就應該會再覆桌，試埋其他炸雞口味。…Read More

今次食咗間位於鰂魚涌嘅台式料理小店。呢個小店嘅位置相對比較偏僻，嗰日去店裏面唔算好多人，去到啱啱好有下午茶，一望覺得幾抵就入咗去試吓。裏面嘅裝修都有少少文青Cafe feel，幾舒服。同朋友每人嗌咗一個set，嗌咗滷肉飯同花枝丸配地瓜薯條。雖然係下午茶，但份量其實一啲都唔細。味道方面唔差，滷肉飯更加係用珍珠米，幾有誠意。地瓜條同花枝丸食落熱辣辣，應該係即叫即炸。另外有個沙律仔，幾加分。見幾平所以都嗌咗兩份小食，生煎包同台灣腸。台灣腸就普普通通，同食開嘅台灣腸差唔多，不過都算幾大條；生煎包真係幾特別，扁扁地有少少似煎餅咁，但食落都會爆汁。而下午茶set係跟嘢飲嘅，我哋就嗌咗杯冬瓜茶同埋凍咖啡。冬瓜茶唔會太甜，唔錯；凍咖啡都可以飲到咖啡豆嘅酸味，幾好。總括嚟講，個下午茶真係幾抵食，而且靜靜地慢慢食冇人趕，如果喺鰂魚涌想靜靜地食個tea，依度都算係個唔錯嘅選擇。…Read More

見好多朋友都試過，今次專登去咗柯士甸食呢一間泰式小店。未行到小店已經見到外面有條人龍排緊，勁誇張，好彩都keep住有人出入，大概排咗廿分鐘左右就有得入。入到去唔係好大，坐得有少少迫，但係裝修就幾有風味。呢度出名係佢嘅班底全部都係泰國人，其中大廚仲係Samsen過嚟。仲要佢哋標榜咗食材都係由泰國直接運送過嚟，絕對可以令我哋體驗到道地嘅泰國風味。前菜嗌咗個木瓜沙律，份量大到嚇親我哋。木瓜幾爽脆，但要提吓大家個辣汁都幾辣下。佢呢個辣汁係加咗鯷魚汁，係有少少似魚露嘅味道，層次好豐富。主菜我哋嗌咗呢度推介嘅和牛船麵同埋醉貓炒河。船麵味道唔錯，牛肉都食得出比一般外面食嘅更重牛香味，但更想讚嘅係炒河，炒得好有鑊氣同惹味之餘，河粉煙煙韌韌有少少似Mochi咁嘅口感，好特別！而虎蝦都好新鮮，好爽口。飲品嗌咗泰式奶茶同埋椰青水，泰奶大大杯，甜度適中啱啱好；椰青水就幾清新，食完啲泰式重口味嘅嘢飲就啱啱好。最後見到個雪糕幾靚，所以嗌咗個嚟試吓。我哋嗌咗嘅係哥椰汁雪糕，椰味都幾出，配埋花生、椰果同埋少少椰子絲多少少，口感增添左啲層次。整體嚟講依家泰式小店相當唔錯，仲要見到店主都係泰國人！但想食就可能要與排隊。…Read More

呢間位於銅鑼灣利舞臺嘅韓國菜，出奇地都幾有驚喜。今日同朋友行完街，想食吓韓國嘢，於是就搵到呢一間韓國菜。呢間韓國菜見佢個名，都知佢主打炸雞，可惜今日朋友身體抱恙，我哋都係決定咗嗌一啲冇咁炸嘅菜式。一入到餐廳，餐廳都寬敞，有卡位，裝修亦都好韓風，亦都有電視keep住播住一啲K-Pop嘅歌曲同埋MV。我同朋友就安排坐咗喺一個卡位，座位寬敞，坐得都舒服。我哋總共嗌咗兩個主菜同埋一支米酒。主菜方便，我哋嗌咗個韓式牛肉炒粉絲同埋海鮮拉麵。先講個韓式牛肉炒粉絲，粉絲質地好煙靭Q彈，食落好有咬口，一啲都唔會過腍斷晒。而粉絲嘅味道，主要都係平時食開嘅韓式牛肉醬汁，啲粉絲都入晒味同掛到汁，食落好香口亦都夠味。而牛肉嘅份量都唔少，食每一啖粉絲都夾雜到一啲牛肉，成份食落好滿足。另一份主菜係海鮮拉麵，海鮮份量極多，有蝦仔蜆魷魚等等，一啲都唔hea。面嘅質地亦都啱啱好，煮得好彈牙，唔會淋晒，而上枱嘅時候亦都俾個韓式煮麵用嘅鐵兜上菜，熱辣辣。而飲品我哋就嗌咗馬格利米酒，好大支，兩個人一齊飲就啱啱好，米酒有少少乳酸味道，飲落去好一啲都唔似飲酒，好啱女仔好容易入口。整體嚟講，呢間餐廳嘅韓國菜選擇都好多，今次就試咗好少，之後都可以再嚟試吓佢出名嘅炸雞。…Read More

泰國菜就食得多，泰式主題嘅bar類餐廳又真係少見啲，今次試過又真係幾唔錯。呢間係尖沙咀嘅泰國菜，裝修係泰國渡假風。 環境黎講店舖都唔算細，位同位之間唔會好逼夾， 都坐得舒服。而今次我同朋友就坐bar台位，可以望到廚師烹調。個menu有好多選擇，絕對有一款啱你食。我地叫左個主菜嘅菠蘿海蝦炒飯。個飯底炒得好好，有鑊氣，米飯粒粒分明，炒到乾身。同埋炒飯都落咗泰式嘅香料去炒，食落好香口。而炒飯上面嘅配料絕對唔馬虎，菠蘿都有4 大件，全部都經過燒呢個工序，所以令到菠蘿嘅甜度增加，好Juicy。而海蝦都有四五隻，除左件件都好大隻之外，蝦肉都新鮮，仍然保持到彈牙同埋蝦味。我哋都嗌咗小食，燒豬頸肉好推介，食落好香口唔會好乾，仲係有肉汁，加埋個酸辣汁就好惹味。泰式生蝦爽彈新鮮，個泰式辣汁酸辣味好夠，食好開胃。芒果糯米飯配椰子雪芭唔止打卡靚，仲要份量十足。糯米飯煙韌有咬口，椰汁甜度啱啱好，食落又香又甜。而個芒果係原隻上，好大方。芒果新鮮夠甜，加埋椰子雪芭，冰冰涼涼，食落好滿足。飲品方面個drink menu好豐富，有酒類同非酒類嘅飲品。我幾鐘意個泰奶，平時有啲係會好甜，今次呢個好明顯仲有茶味同帶好香甜嘅奶味。除此之外仲叫左杯特別嘅cocktails Whiskey thai tea，泰奶嘅背後有whiskey嘅後勁，好得意，冇諗過係出奇地夾到。之後都叫左gin tonic，正常水準。啲飲品全部都大大杯，睇得出店舖好大方。總括嚟講，呢度定價親民又好食，啲staff都helpful同友善，值得推介。…Read More