Geran Lee's Profile

一早訂咗房，揀咗個$708豪華海鮮餐，早一日confirm人數，回覆快。食飯當晚去到，環境就一般，一定唔係啲大商場嗰種裝修，但啲錢就係用咗喺食物度。去到上菜： 象拔蚌刺身，一兜花膠翅，龍蝦伊面，椒鹽瀨尿蝦，一盤鮑魚花膠海參冬菇，一條檸檬汁煮魚，蛋白蒸奄仔蟹，瑤柱汁時蔬，炒飯，同甜品木瓜鮮奶燉燕窩（唔記得有無打漏）。唔續樣菜寫了，因為每一樣都煮得好有水準，係個炒飯可以乾身少少啫。量方面亦好足，幾本上食到奄仔蟹嗰時已經有啲飽，最後仲要打包少少。可以咁講，去招呼親友同事，有啲乜嘢升職，聚舊，咁嘅菜色一定唔失禮。佢喺觀塘工業區租個舖位而唔係喺啲大商場，慳咗啲錢就係喺食物度。值得推薦！…Read More

我lunch經常都去哩間食飯，原因係喺鰂魚涌比較少越南嘢，而相比起嚟，哩間價錢算合理。佢有個午餐menu，通常我食生牛河或炭燒豬/雞扒撈檬，因為哩兩樣整得比較好食。生牛肉河送到上枱面都算生，你可以控制浸落熱湯既時間從而控制生熟度，份量亦足夠。生牛河個湯係靈魂，雖然唔能夠同越南比，但都算有七成，湯清亦有香料味。不過如果可以比多啲九層塔仲正!炭燒燒豬/雞扒撈檬既扒係燒得好香口，離遠都聞到陣味，而撈檬就正常水準。千祈唔好配飯，佢啲飯成日落得太多水，食落口無咗飯香同質感。午餐配飲品，凍飲加$5，比起一般茶餐廳既$3貴啲。另外，佢既奶茶整得唔好飲，無咗平時茶仔奶茶既層度，入口茶香唔夠之餘有啲削口。…Read More

因為時不時去北角嗰頭做嘢，所以有時就喺嗰頭食埋lunch，而渣華冰室係會經常幫襯既一間。午餐時間約12點9左右去到經常都會有大概十幾人既隊排住，但好彩條隊尚算去得快，大約10至15分鐘入得。渣華冰室都係一般茶仔咁有大menu，基本茶仔食物都有，而門口亦有當日午餐餐牌，大約有8至10個餐咁。今日餐牌有招牌既沙嗲牛一丁同蛋牛治(有時蛋牛治係由炸脾沙律代替)，都係$55送嘢飲。另外，冬天有枝竹羊腩飯$70，咖喱羊腩飯就貴少少$75。我同同事分別叫咗個沙嗲牛一丁配蛋牛治同枝竹羊腩飯。沙嗲牛丁係俾埋包麻油，沙嗲汁都多，牛肉都夠軟。另外蛋牛治唔係嗰種薄薄一層涵嗰種，係個蛋牛塞滿個包入面嗰種，蛋同牛肉炒得幾嫩，蛋仲有啲蛋汁，生熟控制得啱啱好。個枝竹羊腩飯啲羊就煮得夠冧，而且份量幾多。通常其他餐廳都係俾得三幾粒，而哩度係成碟幾滿咁。除咗羊腩，哩間茶仔啲午餐多數$50至$55，喺北角啲餐廳嚟講都算幾平，而且凍飲唔駛加錢。咁經濟實惠，所以咁多人排隊。…Read More

前排同朋友行經觀塘裕民坊(即係凱滙樓下個商場)試咗哩間西餐廳。平時行過見到個個裝潢充滿歐陸風情咁，又有啲花花草草咁既裝飾，應該都幾適合女仔去打咭，我哩啲麻甩佬去就有啲格格不入。講返食物，我哋試咗兩個菜加個甜品:香煎銀鱈魚柳巴馬火腿蘆筍卷: 鱈魚煎得幾香，外脆內嫰，入口亦都無成口油既感覺，唔係低級貨。蘆筍爽脆清新加上parma ham既軟熟同油香，口感味覺配搭唔錯。食物配上蘆筍忌廉汁，味道層次更升一級，而且攞盤幾精緻，增加食慾。至於份量，我覺得一盤西餐菜式都係偏少，不過女仔嚟講應該足夠。手工黑松露雲吞配野菌黑松露忌廉汁: 黒松露味好重，加落忌廉汁度再配埋小雲吞，雖然睇落唔算大碟，但都有飽肚感。我以前試過去歐洲食一忌廉/乳酪雲吞，一碟已經好濟，而INN哩碟我覺得幾適合亞洲人胃口。另外，我哋點咗個限定口味楊枝甘露梳乎厘 ($108), 價錢小貴，但味道唔錯。楊枝甘露既酸甜同香味，幾本上整乜哩甜品都好食，而個梳乎厘亦做得非常香軟，值得試吓。…Read More

十幾年前有個週圍搵好嘢食既朋友帶我嚟蛇王龐食，試過之後幾乎食親蛇就會嚟哩度。而家個朋友都移咗民，而我亦一直嚟食，間唔時仲介紹朋友嚟。點解我會keep住嚟呢?其實蛇羮既味間間都差唔多，無話邊間特別好食，反而我會睇用料足唔足。蛇王龐既蛇羮係我食過咁多間蛇王入面最多既。有時肉眼望唔同蛇王既蛇羮用料好似都差唔多，但其實當中用既肉唔係全部蛇肉，唔多唔少都會加啲雞肉或豬肉，只不過比例就各有不同。以下係蛇王龐既菜單:套餐A $87有細蛇羮、臘味糯米飯同蛇湯我覺得幾抵，糯米飯算整得唔錯，加花生同蔥花，冬天食一流。哩個餐一般食量既人都應該夠飽。但我今次夜啲仲有其他地方去，唔食太飽只食個大蛇羮:蛇羮加紅醋、楜椒粉同最重要既檸檬葉，舖頭既有薄脆提供。見到個碗其乎見到既肉都係蛇肉嚟，蛇肉個質感比雞肉同豬肉韌同硬，咬爛有一絲一絲既感覺，好易分。食完蛇羮係會有蛇湯送，老闆會攞走你食完蛇羮既碗裝碗蛇湯，湯係幾清甜，但我就覺得藥材味可以再重啲。食完蛇羮蛇湯，成個胃暖哂。舖頭仲有各類蛇酒提供，有興趣唔需要成枝買，可以試一細杯。我試咗個五鞭蛤蚧壯陽酒，飲完好似森美講故所講成個男人返哂嚟!講笑啫，其實就係普通中藥酒既味，一啖飲哂，個胃由暖到熱。…Read More

最近同個朋友試咗哩間位於K11附近既居酒屋，由於留咗位，唔需要等候。餐廳環境氣氛都似日本本地居酒屋既。食物方面我哋兩個人點咗下面菜式:海葡萄油甘魚刺身野菜沙律係第一味上既頭盤，亦係今餐飯最鐘意既菜。海葡萄既咸鮮清新，配油甘魚既油香嫰滑，配搭有對比，唔錯。再加上其他配菜，酸酸甜甜，係幾開胃。跟手我哋點咗個牛肉壽喜燒，冬天食特別好味，份量正常，牛肉鮮嫰，湯底都係一般壽喜燒汁，不過不失。明太子火炙三文魚卷，明太子味道濃郁，配埋三文魚既油香，唔錯。除咗上面三樣，我哋再叫咗些少小食香炸一口芝未($52)同芥辣八爪魚($42)，算正常水準。雖然我去之前都睇過吓哩道食評講過吓服務態度，但今次我係全程無乜特別事情發生，所以無乜差既感受，評論唔到。整體體驗合格，中規中矩。…Read More

今日去開觀塘，又咁啱約到喺嗰頭做嘢既朋友去食lunch，朋友就推薦咗我去一間位於駱駝漆大廈三座一間專賣雞既小店度食。去到大約11點尾仲未肚餓，大家就行吓駱駝漆大廈先，見到有啲以前有既店都執咗，不勝唏噓。平時行街見到有啲店舖執咗都唔會太覺，但喺駱駝漆大廈啲舖頭咁密佈既地方，分別就好明顯。行到大約12點鬆啲返去二撇雞就發現大鑊，成條長龍有幾十人已經排緊隊，好彩係原來佢有兩個舖位，條龍都算去得幾快，排咗大約半個鐘就到。排緊隊嗰時聽朋友講哩間舖係疫情時開，老闆係幾個當時喺酒店做既廚走出嚟開，主打係經濟實惠，賣既係實力。好，要鐘意就係試啲真材實料!門口有簡單餐牌，有幾款招牌菜, 第一次試既朋友可以試吓哩幾味先:我同朋友各自點咗一份黃酒藥膳雞米線同一份重慶口水雞米線:黃酒藥膳雞米線湯底好濃，質地已經煮到有少少黏，再加上黃酒同中藥材冬天食好啱，但較重口味既人會大略嫌中藥味唔夠濃。米線質地綿密煙軔，同某啲連鎖大牌子米線店真係差幾皮。雞既肉質厚實但又滑，有一半以上係雞肶肉。重慶口水雞米線既醬料同出面食既口水雞醬有些少分別，比較少麻辣而偏甜，鐘意邊種睇個人口味。我朋友+$13蚊轉哂雞肶肉，所以總價錢係$67。雞肶肉同我嗰份黃酒藥膳雞既描述一樣，米線湯底同黃酒藥膳雞既一樣，只不過少咗黃酒同中藥味既雞湯底。中午食有套餐，可加幾蚊點埋嘢飲。另外，二撇雞亦有淨點海南雞湯，湯係比米線湯底更加黏稠同濃。今次無試到既間舖既小食，下次必要試埋。咁高質素既食物，我覺得一般市價都起碼要人均$80-100,而哩度只需要大約$60-80，絕對超值!…Read More