雅顛's Profile

今日同老公在佐敦周圍搵食, 途經上海街見呢間餐廳裝修唔錯, 價錢又經濟又免加一諗住去食啦, 點了二人小菜套餐, 好快就有兩碗中湯送來, 今日係木瓜雪耳湯, 喝第一啖就FEEL到好鹹味精好重, 但個心都希望我們點的小菜唔好咁鹹, 但往往都事與願遺......先來一道紅燒豆腐班腩煲, 其實佢地D料係足的, D魚炸過都食唔到腥味, 但真係好鹹, 我唔明點解要咁重手, 浪費了大好的一碟餸....到第二道菜上桌, 是蝦醬通菜炒鮮魷, 菜嫩魷魚鮮都算大碟, 點知一食還比先前的一道菜更鹹, 真係食唔落要倒了些汁, 再沖兩次水才可以入口, 我老公都算食得鹹的人都話頂唔順, 可想而知他們對調味係幾重手, 我寫呢篇食物唔係想唱衰呢間餐館, 只係希望管理層看到能夠改善一下, 因為我都見到佢老細有在場都好緊張地打點一切, 經營餐館實在不易, 看得出佢地在食材與餐具甚至裝修都有心思, 如果因為廚房時常太重手弄得D菜太鹹而做壞招牌就唔抵啦...............如果唔係太鹹都值得再幫襯..........希望真係會改善啦........…Read More

經ubuyibuy用288元買左個所謂原價五佰幾元的二人鐵板燒餐, 食完真係覺得超搵笨, 好心佢俾得優惠做得宣傳就唔好咁寒酸啦, 上到黎食仲茶水都沒杯, 佢地仲特設左個memu係for ubuyibuy coupon的顧客, 買杯水或綠茶要15元(可refill), 其他果汁汽水20元! 至於有些唔係用coupon的顧客, 我見佢地都主動有綠茶提供囉~講番野食先, 佢地個餐話有十道菜, 聽到或齋睇相好似好吸引, 但份量真係少之又少, 食完包你地要出去補飛, 不過佢d野食係幾好味, 尤其是個牛肉卷, 可能係少食多滋味掛~?頭兩道菜係一杯有幾粒日式螺肉的頭盤, 和一杯沙律, 呢兩個沒拍照~埋單仲俾左兩張惠顧滿$500元可作$100元的現金券, 貴公司咁樣對d顧客, 你估我下次仲會唔會幫襯?!最後順帶一提, 佢放在檯面的碟上竟然有一條長長的頭髮, 等我夾了食物上碟時才看到, 仲差點食埋, 呢度一定要扣分~是次消費係用COUPON ($288) + 飲品連加一 ($44), 呢個價錢我出面食都大把選擇啦, 肯定會飽過呢餐!…Read More

緊法式甜品, 本身我們都嗜甜, 樣樣都有試, 不過就食完都唔記得佢d甜品係乜名, 只係覺得好好味, 食到好飽好滿足咁走人, 連晚餐都唔駛食慳番呢~值得一提佢個tiramisu, 真係正到痺~ 仲有燕窩燉蛋, 雖然燕窩係少d, 但d蛋好滑又唔係太甜, 正~ new york cheese cake都唔錯, 最衰個胃容量有限唔可以食多幾件! 佢有咸點只得腸仔同雞翼, 建議食到一半時吃點咸點中和番, 唔係就會甜到漏! 呢兩款咸點佢都整得幾好味架! 佢有好多cakes都係用朱古力做, 食食下你會混淆晒邊款打邊款, 只會覺得樣樣都差唔多....食食下個廚師哥哥會走左出黎即席整d唔知乜cream, 然後由侍應羅d好精緻既芒果pancake出黎俾廚師加d cream落去, 然後就每人派一客, 我反而覺得個pancake好味過d cream, d cream有少少酒味麻麻地, 只係加左會覺得靚d啦~隔左一陣個廚師哥哥又走出黎啦, 呢次佢整火燄雪榚, 今次就要自己出去羅, 我們都食到好飽, 只係羅左一客雪榚三份食啦, 可能我唔鐘意有酒味, 所以覺得面頭d cream好苦仲有浸酒味~整體上我們都好滿意, 吃完仲有餐茶送, 加上我有free一位既餐券, 每人都係106蚊, 抵到爛~…Read More

昨晚為同2位死黨賀壽, 所以就食豪d, 都係第一次去櫻田食日本野我們未到6:30pm就已經入座, 地方唔算大同埋只坐了一檯客, 侍應要我們等到6:30pm才入單, 咪唯有慢慢揀野食啦...佢食物選擇比起出面的日式任點任食唔算好多款, 但勝在用料真係夠晒新鮮, 我們4個人都儘量叫多d款但少d份量, 可以share食, 佢仲每人送一客海膽刺身, 但恕我唔識欣賞, 食左一啖冇食俾左朋友食...任點任食餐單有以下幾大類:刺身(每客2件):有三文魚, 吞拿魚, 油甘魚, 立魚, 劍魚腩, 帶子, 甘蝦, 北寄貝, 白鳥貝, 魷魚.(三文魚尤其新鮮好味, 每人食左四件已覺甜到漏, 帶子夠鮮甜, 甘蝦又夠爽, 正到爆, 但係劍魚腩個口感唔係咁好, 覺得唔好食)卷物(每客2件)/手卷(每客1件):有海膽, 鰻魚, 辣味魚生, 加州卷, 蟹柳, 軟殼蟹卷, 青瓜卷, 青瓜卷, 三文魚, 太卷, 吉列豬扒卷.(以上乜卷物卷我地都沒點, 避免食得太飽食唔落其他野)飯麵(每客1碗):有鰻魚飯, 牛肉烏冬, 豬骨湯素麵, 冷綠茶麵, 雜茹湯喬麥麵.(上述飯麵我們一樣都沒叫呀, 事關個肚真係食唔落!)燒物(每客1件或1串):有汁燒羊鞍, 七味三文魚頭腩, 串燒雞軟骨, 燒豬頸串, 串燒冬茹, 燒秋刀, 燒鯖魚, 串燒帶子貝, 燒多春魚, 汁燒魷魚筒.(我們只食左三文魚頭腩, 好脆不過就好多油, 好肥, 但都好好味! 串燒冬茹就麻麻地! 燒秋刀好正, 串燒帶子貝同埋魷魚筒就ok啦)炸物(每客2件):有軟殼蟹天婦羅, 鮮蝦天婦羅, 吉列炸蠔, 炸墨魚咀, 南瓜天婦羅, 蕃薯天婦羅, 炸豆腐, 炸里芋.(除左炸墨魚咀同埋炸里芋冇食過, 我們全部炸物都食過, 炸天婦羅好好味, 尤其是軟殼蟹, 但係吉列炸蠔就唔好食, 好腥)煮物(每客1窩):有辣酒煮翡翠螺, 牛肉鍋燒, 地獄雞鍋燒, 雜錦海鮮鍋, 味噌豚肉鍋, 雜菜豆腐鍋, 辣味煮雞翼, 日式蠔仔粥.(我們只點了翡翠螺, 牛肉鍋同埋雜菜豆腐鍋各1窩, 個螺得兩件, 味道就幾清甜沒乜酒味不過就有少少腥, 但好食海鮮的人一定喜歡! 牛肉鍋就好細鍋牛肉得兩片, 湯底甜左d都算過得去啦! 至於雜菜豆腐鍋我就比較喜歡, 不過d菜又真係少左d, 但佢始終都係一窩份量只預1個人食, 呢樣我唔怪佢!)鐵板:有牛柳, 牛肉薄燒, 鴨胸, 香草龍月利柳, 軟骨餃子, 中蝦, 露芛野菌, 鰻魚炒飯, 煙雞胸炒麵, 黃金海鮮炒飯.(我們只點了龍月利柳味道一般啦! 軟骨餃子就因為太飽食唔晒! 露芛野菌我就幾鍾意! 一碗鰻魚炒飯4個人食, 純綷都係試下, 但真係好好味, 鰻魚夠鮮甜, d飯炒得好香, 值得食!)沙律(每客1份):有蟹籽沙律, 蕃茄沙律, 有機雜菜沙律, 薯仔雜果沙律.(我們一開始就一人食一客蟹籽沙律熱身先, 不過我就覺得佢沙律醬唔夠, 蟹籽份量少左d)甜品(每客1份):有黑芝麻雪榚, 綠茶雪榚, 日式草餅, 日式豆腐花, 生鮮生果(甜品我們樣樣都有食, 日式草餅雪到有少少硬同埋甜左d, 豆腐花我就覺得唔夠滑, 黑芝雪榚就最正~)總結我們都係唔算食左好多款, 但個個都食到捧住個肚走, 雖然呢餐係貴但就食得又開心又滿足, 我們都坐到十點至走, 侍應招呼又好好, 呢餐真係唔錯~唔錯~…Read More

星期六同朋友逛街, 諗住搵間茶樓飲下午茶, 見有個哥哥仔派傳單下午茶$38蚊任點任食, 見傳單上d點心都o岩我們吃, 便上去試試....其實我們2點5 上到去, 個經理好有禮貌介紹佢呢d任點任食詳情, 講好晒收費, 話免茶介但要收$8蚊餐前小吃同埋有加一, 仲叫我們入座等夠鐘就可以入單點菜, 上到去唔算好多人食, 一去到就有位, 裝修好靚坐得都算舒服, 但美中不足就係個地台好污穢....一般酒樓點心佢都有, 但水準參差, 人多去食就抵, 可以食多d款, 但我同朋友兩個人唔係食左好多, 只係叫左...酸辣湯- d湯酸多過辣, 但我朋友都飲左三碗.碗仔翅- 過得去啦, 不過就水左d, 冇乜料.涼伴青瓜- 餐前小食, 幾開胃.燒賣- 細細粒容易食, 味道都ok.蝦餃- 唔好食, d皮好濕好厚, d蝦唔爽.小龍包- 細細粒, 皮唔算薄但都肉多汁多, 食左兩籠呢.蝦腸- 最難食, 一條腸粉得一隻蝦, 腸粉又凍又厚皮.北京水餃- 細細粒但好好味, 都食左兩客呢.菜肉雲吞- 都係細細粒但幾好味.素菜餃子- 麻麻地.煎南瓜餅- 好甜同埋好油.狗不理- 可能飽得濟, 食龍肉都冇味...眼見隔離檯叫了排骨菜飯, 本來好想食但真係飽到食唔落, 唯有下次先啦, 以$38蚊這個價錢佢都算多食物選擇(lunch 時段都只係$48蚊), 真係人多食就抵, 仲有佢d點心好耐至黎, 第一輪等了廿分鐘才有得吃, 我們總共叫了三輪, 佢都有漏單情況, 我們叫了油菜同埋春卷都冇來, 但我們太飽了所以沒追...…Read More

朋友介紹去呢間飲野, 話呢度坐得舒服d, 又的而且確係播~ 大部份座位都是梳化, 但美中不足就是有幾張梳化擺得太密...同埋咁o岩下午茶時段有班學生響度玩嘈喧巴閉, 破壞晒睇書的氣氛....上星期早左收工, 五點幾上左去等朋友, 點了一個tea set, 廿幾蚊有個炸蝦多士, 加5蚊有杯榛子咖啡, 多士唔係好大件, 不過係即整熱辣辣幾好味, 而咖啡就榛子味太重蓋過咖啡味, 飲唔慣咁濃的杏仁榛子味就唔好點, 坐了個幾鐘看完本書朋友才到, 再點2個set dinner, 朋友食白汁吞拿魚長通粉, 嫌佢唔夠味兼白汁唔夠! 佢飲熱咖啡冇評語...再夜d我都點左個炭燒雞串白汁意粉, 雞串唔熱, d汁甜左d, 今次我醒叫佢俾多d 白汁我, 味道一般啦! 我又點了一杯士多啤梨朱古力, 又係太甜.....但都過得去啦......我前後坐左五個幾鐘至走, 埋單都係120蚊, 抵到爛...…Read More

尋日同朋友一齊去呢間野食lunch, 一點幾都有咁多位唔駛等, 以為係星期日會冇咁旺啦, 殊不知原來係呢間野一早就俾人唱衰晒.....唔怪之得會冇乜人幫襯...我們一行三人一坐低要叫好耐至有人黎落單, 點完食物隔左一陣就黎餐湯同埋餐包, 餐包我冇食呀, 見佢都唔慌好味, 我飲忌廉湯都冇乜特別, 只係唔夠熱! 之後就食物送上檯, 我點了咖喱雞飯, d飯凍既, 咖喱汁都ok, 但係d雞就斬得好大舊, 咬落好"孩"又有陣雪味, 最離譜就係連雞腳同埋雞頸都俾埋我, 完全唔掂!我朋友就點了黑椒牛仔柳配薯菜, d牛仔柳d根好肥, 好難至切得開, 佢話唔好味, 至於另一朋友就點了魚柳配薯菜, 佢就沒乜評語, 但總括來講我們一致認為都唔會再幫襯第二次啦....…Read More

尋日去食下午茶, 都諗唔到食乜, 隔離小雨天又食到厭, 諗住去呢間試下d米線, 入去坐低點左個酸菜沙嗲牛肉米線, 侍應就即刻收錢話要買飛先....咪唯有俾錢先囉....等左成十分鐘先有得食, 一望個賣相已經麻麻, 牛肉未食就覺得好硬, 食落就更加o趙唔落, 好似咬柴咁! 而佢所謂既酸菜都唔知似乜味, 形容唔到, 本來以為會和我食開長沙灣果間d雲南米線的酸菜一樣, 但完全兩回事, 外形雖一樣但味道就怪怪地, 總之就唔好味! 呢碗野可以堪稱我近年度食過最難食既米線, 早知食番小雨天的小鍋米線好過.....…Read More

成日經過佢總店都要排隊, 好奇之下都想試試但又沒耐性等位, 咪去左分店試, 分店大間少少但都坐得唔舒服, d位好逼, 但又好彩次次都唔駛等位!佢d粉同埋材料其實真係好普通, 冇話特別好味定唔好味, 但勝在夠晒熱, 湯底腩汁好味濃, 加點辣椒油勁正~ 佢地舖頭推介既魚腐都係一時時好味, 要撞手神, 值得一讚佢d腩汁油菜, 真係好好味.....…Read More

記得以前初初食小鍋米線, 真的愈食愈上癮,d湯底正, 配菜又正, 鍾意食佢d酸菜同埋肉碎,但現在唔知係咪佢d客多到唔休做呢, d質素真係差左, 食米線除左湯底緊要, 米線本身都好緊要, 但係佢現在d米線好林, 沒有以前的口感, 咁仲未算, 試過有兩次佢遞鍋米線上檯時,d米線仲唔夠熱, 要我叫廚房再整過, 希望佢地能夠做番以前的質素咁就好, 最好就注意下衛生情況啦......唔係佢就加價加得唔合理啦! 過年後佢地已經每款食物加了$2蚊呢~…Read More

上星期二和朋友去戲院睇7:30pm, 經過呢間餐廳就入去試下, 可能時間尚早大把位, 點了咖喱海鮮炒飯, 香橙雞翼, 炒通菜同埋一碟乜乜肉碎炸豆腐, d野食好快就黎到, 唔知係咪整定, 但都幾夠熱, 碟香橙雞翼都唔錯, 但碟豆腐就麻麻, 炒通菜雖然唔係好油, 但就唔夠味囉, 炒飯就細碗左d, 兩個人食唔係好夠, 但整體上食物都唔錯, 只係貴了一點點同埋d野食細碟左d.順帶一提我唔係好滿意佢張檯, 咁鬼細張, 係咪叫人唔好點咁多食物呢? 佢又唔肯俾四人位我們坐, 但其實到我們走的時候都仲有大把位啦, 孤寒到死.....埋單侍應仲送左張甜品贈券(佢話係價值$32蚊既香芒小脆盒-熱情果雪榚), 但我諗我短期內未必會再去...…Read More

星期日同兩個fd上去食下午茶, 上到佢得幾檯客,諗住坐入面圓型獨立檯, 但即刻俾d侍應截住話要最低消費$150才可以坐, 我地3個人其實容乜易食夠$150,但我討厭佢地懶高檔咁, 好巴閉咩? d位又唔係坐得舒服,事後回想好彩冇坐果個位, d位又窄張檯又細, 如果有人食煙仲死, 實焗死都似!佢d下午茶餐價錢由$38~$45, 包普通咖啡奶茶, 如果要飲餐牌特飲就按餐牌價半價, 計落都要$60一個tea set, 又唔係特別好味, 我飲左杯泡沫荳奶咖啡都尚算ok, 但係我朋友點左一杯糖槳青檸水及薄荷葉梳打就一d都唔好飲, 仲要係個侍應推介, 搵笨架! 咁既價錢飲d咁既質素既野, 不如去茶餐廳好過~ …Read More

昨晚和3個朋友第一次上去食, 入面格局好普通,坐得不算舒服, 有點空間壓逼感, 只得一個女仔招呼, 餐牌飲品選擇算多, 價錢亦不算貴, 但食品選擇就不算多, 我們吃晚飯套餐只是HK$48包一杯HK$32以下的熱飲, 凍飲另加HK$5, 可能價錢太便宜的原故, 食物水準只是一般, 食物不夠熱, 感覺似食飛機餐, 而且我們一路估計食物不是由這裡製造,好像是我們落ORDER後, 個女仔打電話去叫外賣上來,然後再由微波爐叮熱佢咁, 或者可能是廚房不在此層啦...我們也不敢肯定! 我們吃了日式咖喱豬扒飯和燴海鮮飯, 朋友覺得燴海鮮飯都OK, 材料多和汁多, 但我們吃的日式咖喱豬扒飯就略嫌唔夠咖喱汁, 而且豬扒唔夠軟, 還有凍凍地的感覺, 但哪裡的薰衣草泡沫咖啡和薰衣草鮮奶咖啡都幾好飲, 不太濃也不太甜, 合我們口味, 但朋友點了藍莓果茶, 就略嫌沒有果味和茶味...…Read More