Bo Bo the Clown的個人專頁

五一假期，留係屋企好似浪費咗，所與同行友人一起前往中環吃好西。上網見到一間越南餐廳有冇決定一試。為免去到摸門釘，最好預先打電話看修路因為地方唔大，食嘢同飲野喺埋一齊容易迫爆。六點多鐘打電話去話兩個位，店員告知只剩返bar枱，反正我哋冇乜所謂，決定前往。位於史丹頓街酒吧林立嘅位置，基本上裏面裝修都係酒吧嘅裝修，廚房亦都唔大，非常驚訝佢哋做到咁多嘢食出嚟。Cocktail “Pine mule” 有驚喜！好refreshing, 成份有 gin lemon juice prosecco 等等, 夏天飲好爽！而且酒味清淡好啱女士Wok fried vegetables menu上無講明係咩菜, description 話係”market vegetables” 即係「時菜」咁解啦！當晚我地食嘅係芥蘭, 鬼佬炒菜竟然好有鑊氣喎！炒得又嫰，配牛肉送飯一流！Crispy Spring Roll就係比較普通嘅越南春卷，反而覺得炸得有少少過咗龍，但係整體都係可以嘅，不過建議專登過嚟試嘅朋友，可以選擇其他比較有特色嘅餸，春卷呢樣係其他越南餐廳都可以食到。Shaking Beef牛肉啱啱熟，保持到肉汁亦一啲都唔會靭，個白飯加上類似蔥油咁嘅配料，一啖飯一啖牛肉，係正嘅！今晚食咁多個餸之中最滿意呢個。唔算話特別到冇人有，但係係蘇豪區搵到夠鑊氣嘅泰國菜，呢間不可少，可以一試！…查看更多

星期日諗起第二日要返工就抑鬱，所以要對自己好啲食好嘢！山長水遠今次來到大學火車站旁邊嘅凱悅酒店沙田18中菜廳。網上評價不錯，主要讚嘅係片皮鴨，作為新界人嘅我哋一定要來試一試:)。餐廳位於凱悅酒店4樓，佈置典雅，唔算豪華得太浮誇。部分廚房係開放式，食客可以係外面睇到入邊師傅烤鴨、蒸餸、整甜品，中菜餐廳比較少咁做，都算特別。因為兩個人食飯嘅緣故，片皮鴨淨係叫得半隻一食。「一食」就係傳統包住餅皮你食，首先片皮鴨皮加砂糖食，入口即溶，嗰陣油香係不簡單，比好多出名食片皮鴨嘅餐廳更好。除左鴨皮之外，餐廳仲好貼心地片了一碟鴨胸肉、一碟鴨脾肉，鴨胸肉可沾甜麵醬，但因為鴨脾部份比較羶，餐廳建議係加上蒜泥一起吃，之前未試過夾蒜泥，一試之下不得了，的確非常好味，必試！人多可以叫一鴨二食或三食，分別係鴨鬆生菜包同鴨湯，但同行友人非常渴望飲湯，一問之下，原來餐廳好 flexible ，可以skip 鴨鬆部分，直接order 湯，而每位收費$62，同行友人當然興奮啦！季豆松子仁炒豆乾清清地唔肥膩，「季豆」即係四季豆，切粒炒好有口感好爽脆，而豆腐乾嘅鹹香加上松子仁嘅濃郁，呢道素菜送飯簡直一流，所以同行友人亦都唔執輸叫咗一碗白飯。厚街臘味煎魚餅落單嘅時候餐廳經理仲好貼心咁樣問我地因為有片皮鴨怕唔怕食唔晒，建議我哋落半份，即係4件（本身全份係8件）。魚餅煎得啱啱好，金黃鬆化、完全冇燶，咬落鬆軟亦都有臘肉嘅鹹香味，又係送飯一流！飯後甜品叫咗個酒店自家製五糧液朱古力雪糕同埋一個白芝麻雪糕，前者酒香味濃但又唔過份、朱古力嘅甜香依然出色；後者芝麻味濃、又有粒粒芝麻口感豐富，比市面常見嘅黑芝麻雪糕更香滑濃郁，非常出色！自家製雪糕果然係沙田18另一「招牌菜」，嚟食飯嘅朋友一定不能錯過！總結呢一餐味道的確唔錯，如果要雞蛋裏挑骨頭就係上菜速度比較慢，畢竟酒店sell嘅係服務，職員睇住客人嘅進食速度嚟上菜，所以都無所謂啦。而另外餐廳會定期更新 menu，我地之前上網見有田雞脾煲，本身今晚想食，但原來餐廳已經無再做:(，所以菜式都係以餐廳提供嘅餐牌為準啦！…查看更多

就快過年，趁星期六放假拿拿聲出去拎年糕。去開九龍塘就不如去埋九龍城食晚飯。喺南角道搵好嘢食，遇上「老爺」！一試之下，驚喜不斷，開心喺九龍城搵到飯堂啦！地方雖然唔大，但係裝修好精美，皮座椅加木枱，牆上放滿左食譜好有住家feel，俾人一種好舒服嘅感覺！我同同行友人叫左兩個main : 咖哩牛煲仔飯同金華老爺蟹肉麵，再加一個小食千層茄子，份量足夠兩個人食飽飽！而兩個main可以加$30轉餐，跟每日餐湯（真係日日唔同㗎！我就試過西蘭花湯、南瓜湯）同跟兩樣餐前小吃 — 天婦羅腸粉同黑松露蒜蓉包。天婦羅腸粉內包菜脯再拎去炸，口感外脆內煙勒又爽脆，再點埋餐廳提供嘅三種醬汁（甜醬、芝麻醬、辣醬），簡直係人間美味，我強烈建議餐廳將呢道餐前小吃正式轉為一道on menu 嘅小食！而黑松露蒜蓉包餐廳選用切件長法包，再喺頂層擦滿黑松露蒜蓉醬，咬落又香又脆，每一啖都係大滿足！咖喱牛腩煲仔飯係好特別嘅菜式，將咖喱牛腩飯同煲仔飯兩種做法結合，相當新穎。咖喱汁唔辣反而甜甜地味道啱啱好，牛腩可以再諗少少，但亮點係炆到入口即溶嘅蘿蔔，好味！我地每人食左兩大碗，食到lam lam 脷！金華老爺蟹肉麵蟹肉好多，面亦都唔係普通嘅意大利粉而係有啲似中式面嘅意大利麵，口感非常好，又係一道有心思有創意嘅主食！不過美中不足嘅就係咸咗少少，食完有啲口渴喔！千層茄子適合素食人士，一層茄子上面再鋪一層番茄，一層一層好似千層麵咁樣叠上去，最後加多一層芝士。焗完出嚟好多番茄味，啖啖入口即溶，份量亦都唔細，素食嘅朋友啱晒！最後仲有炸湯圓做甜品，外脆內軟，爽歪歪不過餐廳暫時仲申請緊酒牌，要飲酒嘅朋友歡迎自攜酒水，餐廳有冰桶、有酒杯提供，照樣可以不醉無歸！…查看更多

星期六晚上，近近地懶得出街就留返喺粉嶺食飯。我話想食西餐，同行友人就提議不如食我地食過好幾次嘅聯和墟西餐啦！呢間西餐廳環境優雅、服務細心、價錢大眾化、食物質素非常好，可以話係性價比超高㗎！如果唔係我地都唔會食過返尋味一次又一次啦！餐廳細細，但明顯經過悉心裝潢，環境優美，配樂亦好好聽，適合情侶、夫婦、甚至朋友同家庭聚會㗎！我地兩個都叫set dinner，好足料㗎，有齊餐湯、甜品、餐飲，都係$178 （同行友人嘅鴨肉闊條麵）、$268 （我叫嘅安格斯肉眼扒)！Set dinner 今晚serve 南瓜忌廉湯，湯夠熱（連個碗都係熱過先用嚟裝湯，好細心！），南瓜味香濃，湯嘅質地又夠滑，唔會太奶太cream，因為同行友人好怕奶味重嘅湯，但佢都覺得好好飲！另外全晚亮點係一個廚師推介嘅紐西蘭托托蜆，餐廳職員話係用牛油加白酒煮，同行友人係「蜆怪」，一聽職員介紹就心動即order！一上菜，見到8大隻托托蜆先$138，真係覺得抵食到彈起！香草牛油白酒味煮嘅托托蜆，每隻半隻手掌咁大隻，新鮮又彈牙，好味到連汁都撈埋！同行友人更不停用餐廳贈送嘅餐前麵包點汁！（sorry 唔記得影麵包，都好食㗎！仲俾足牛油、橄欖油、意大利醋）同行友人嘅鴨肉闊條麵製作精美，一睇就令人嘩一聲！鴨肉唔會靭、唔會柴皮，但蕃茄汁做到酸甜剛剛好，粉量亦好大份，同行友人食唔晒，結果share 左1/3俾我！如果個闊條麵可以係自家handmade，咁成個dish 就更加不得了喇！不過$178 一個set 有呢個水準，已經可以媲美好多大酒店！牛扒炭燒味十足，七成熟剛剛好，唔會太熟而且又keep到有啲紅肉，仲有其他餐廳少見嘅蒜頭蓉做伴，兩樣加埋簡直係絶配，比傳統嘅芥辣更好。分量十足，唔會太飽啱啱好。配菜有grill過嘅甜椒、蒜蓉、薯仔、秋葵，每樣都好好食，誠意十足！甜品係芒果mousse cake，呢間餐廳嘅甜品每次都唔會令人失望，今次就算我地兩個都唔係芒果嘅粉絲都覺得好食，芒果酸甜適中，件cake 嘅甜度剛剛好，食落仲有陣清甜嘅奶油味，配埋即磨咖啡又係一個享受！如果你想試其他甜品，可以選擇upgrade 上 tiramisu、焦糖燉蛋或紅莓汁雲呢拿雪糕，有足夠option俾你慢慢揀！即磨咖啡看似普通，但用心製作的確不一樣，就連簡單如咖啡奶好多餐廳都唔會放心思，但這裏會記得把奶加熱，這樣加到咖啡裏咖啡才不會變冷，喝起來更好味，最後享受這一口咖啡晚飯變得完美。今天晚飯很完美，在粉嶺這種看似美食沙漠的地方，能找到一間有水準的餐廳的確不易，更難得的是一直以來吃過幾次，都能保持水平，餐廳經營者的堅持與心思的確值得嘉許及支持。最後都想稱讚一下服務，雖然看得出年輕的服務員弟弟是新人，但也看得出餐廳有特別train過，動作雖然生疏，但看得出是訓練過後的安排。希望繼續努力為粉嶺地區食客提供一個高水平的用膳地方…查看更多

又到星期六覓食日！今次試沙田石門小店，一間由90後開嘅燉湯、點心餐廳。同行友人係湯怪，適逢今晚天氣轉涼，正好係嘆靚湯嘅好時機。因為呢間人氣小店先排飲食男女有介紹，同行友人擔心人多要排好耐隊。所以晏晝已經打定電話問餐廳是否接受電話訂位。接電話嘅係餐廳老闆，好有禮貌、態度好好，雖然餐廳無得訂位，老闆回覆得好客氣「唔好意思呀！餐廳暫時未可以電話訂位，麻煩你過嚟walk in啦！」雖然我最怕排隊，但同行友人聽到老闆咁誠懇，為左嘆啖靚湯都決定早啲出門口去排隊。小店地方不大，去到都真係要排，等5張檯大概20分鐘，都算快。而有禮貌嘅老闆不停同客人講「唔好意思！今晚比較忙，要等耐少少。」、「真係唔好意思！要你地等咁耐！」聽到佢咁講，就算等到忟但都真係嬲唔落嘅。同行友人飲天麻川弓白芷魚頭湯，話驅頭風、醫頭痛，對女性最好。啖湯好清甜，藥材味濃，飲得出好足料！份量亦啱啱好一人份，飲完碗湯成身暖晒，但又唔會飽到食唔落其他嘢。猴頭菇螺片燉廋肉湯清清地，冬天飲就成身都暖晒。同出面飲嘅有少少唔同，甜甜地因為加左蜜棗。蝦籽榨菜肉餅飯新鮮整起，肉餅冇乜肥肉，榨菜亦有味，裏面配嘅菜心亦都好新鮮，食起嚟感覺好健康。我與同行友人由於叫了其他點心，所以只叫了一個蒸飯，但也很滿足！各位如果想試多啲其他點心，就两人分吃一個蒸飯好了，別眼闊肚窄。魚肚冬菇雞扎睇落同出邊食嘅差唔多，同內裏有驚喜！大大舊嘅雞扎入面有三塊雞肉、一塊芋頭、一塊魚肚、一塊香菇，蒸得又夠熱，食完好滿足！而且另一個優點都係無！乜！油！感覺比起傳統酒樓飲菜健康好多！蟲草花鮮竹卷啲湯好清，唔咸亦一啲都唔油，直頭可以飲，裏面啲料都好豐富，同酒樓好唔同。一碗有三條，食完好飽飽！豆沙煎飲餅煙勒彈牙又唔太甜，整體嚟講係一個不錯嘅甜品，只係因為好飽肚，而我又已經食到飽飽地，所以只係食得一塊，同行友人食兩塊。美中不足嘅地方就係我哋叫咗一個鮮蝦豆苗餃，食到最後等極都等唔到上菜，問老闆先至知道原來已經賣晒但係冇人通知，失策！呢間由90後新一代開嘅小店誠意、用料、味道、服務、價錢、CP值都值高分，只係想食就真係唔好慢，要早啲到，最穩陣係7:30pm前入座，如果唔係啲湯會賣晒㗎！最後如果食店老闆睇到呢篇，希望佢繼續努力、好好keep住做得好嘅地方，唔好生意上左軌道就愈做愈求其呀！始終做食肆同煲湯一樣，用心做的話係會飲！得！出！㗎！努力…查看更多

上星期日冒名而來，6:40pm到已經話「今日啲湯賣晒」，唯有今個星期日再碰運氣。今次醒目，5:30pm到，點知又話6pm先入座，唯有再等。老實講，我對呢間嘢已經無咩好感，一肚氣；但同行友人堅持一試，只好勉強食一次。知道連呢度嘅茶都係由5星級酒店嘅茶師操刀，我同同行友人都要試一試，叫咗個冷泡凍頂烏龍，望落去好似好淡，但茶香四溢，值得一試！手工豆腐係滑嘅，但豆味不足，加分的係自家製xo醬，少少麻辣，味道剛剛好，不嗜辣的朋友應該也會喜歡。自家製xo醬店家並無免費額外提供，需要encore或想加入麵食嘅朋友要另外order，每份$10！:)我就試咗個好頭好尾，主要配料係牛面頰肉、牛尾、牛骨湯。一上桌先試個湯，無一般牛肉麵湯的油，清清地但夠味，牛肉煮得好稔，係有心嘅。同行友人食全場最貴嘅西班牙火腿麵，$158 一碗！貴嘅雖然係48個月西班牙火腿，但其實更好味嘅係碗湯！湯頭為高湯，清甜有火腿鮮味，一啖落肚成個人即刻暖晒；配上扁身陽春麵，誰也不搶誰的風頭。見同行友人一啖麵加一片火腿再配一啖湯食得津津有味，我都忍唔住叫佢俾兩啖湯我飲！但同行友人話呢款麵佢只會試一次，因為俾嘅錢只係俾個火腿但個湯只係屬於比較普通嘅高湯覺得唔值，下次會試魚湯底嘅濃蝦餃，咁先試到店家煲湯嘅真材實料！整體而言，呢間專門sell 靚湯嘅麵店其實值得再次光臨，想試勻其他湯底。咁嘅價錢食到酒店水準嘅湯麵係值得嘅，但係始終供應有限，想食嘅朋友就要把握時間，因為無得book，湯嘅供應亦有限。麵店嘅安排有待改善，例如湯嘅份量，如果晚市高峰前已經賣晒啲湯、客人7pm前都已經摸門釘的話，真係非常唔合理。另外，店員的服務亦希望有所改進，話晒餐廳嘅主理人及管理人員都話有五星級酒店嘅背景，自然食客會有expectation，如果啲店員連邊檯埋單問左三張檯都攪錯實在有點傻！一家餐廳嘅好與壞，往往不只看你食物水準，再好食嘅餐廳如果服務水平及態度不能令客人賓至如歸，客人都不會再光顧的喔！要係香港呢啲咁奇怪嘅地方生存到，就要食物、服務、環境等等所有方面都要堅持到最後先得，千萬唔可以因爲剛開店時人山人海而自滿覺得一定掂，希望店家努力:)…查看更多

星期日，晨咁早跑完馬拉松有啲攰，好肚餓，決定去附近搵間好嘢食同行友人早前發去太和有一間隱蔽西班牙菜，網上評語不錯，決定一試。為免白行，當日打電話留定枱，所以去到都唔使點等就有位。同其他太和大埔餐廳一樣，間餐廳唔算大，裝修亦唔算太華麗，但係街坊地區唔會要求太多。但同行友人覺得餐廳用摺檯有點cheap的感覺，而且有陣舊舊的up味。另外餐廳到處可見德國國旗，令人懷疑餐廳並不是純西班牙餐廳⋯八爪魚前菜味道唔錯，但係唔凍唔熱有少少怪，作為前菜一係全部熱一係就全部凍，暖暖地有少少唔知點咁。由於同行友人唔食生洋蔥，所以對我來講八爪魚大部份洋蔥係我食晒。蜆係預期之作，清甜大大隻，不過好多沙。同行友人食親都有，覺得唔開心。個意粉好creamy但係有少少唔夠料個人覺得個ham 係最好味的炒蛋嫰滑蛋味濃，但薯絲炸得略嫌油膩，係好飽肚嘅一道 tapas。餐廳整體嚟講都算中等，只係職員方面好喜歡大聲喧嘩、嬉戲、又話自己急尿、甚至品評客人當中是否靚女，雖然對客人有禮客氣，但令人覺得餐廳的定位及印象都比較local 和街坊，與餐牌收的價錢不符。…查看更多

星期六與同行友人外出吃飯，在網上找到一間健康菜館，決定前往太子一試。見係米之蓮推介人氣餐廳，雖然沒有星，但係為咗確保唔會白行，晏晝12點已經打電話來定位。同行友人先問今晚有冇得定位，接聽電話男職員話你哋幾多位，友人表明兩位之後確定可以訂位。然後友人就先訂了今晚七點。黃昏六點的時候，同行友人因為有另一個約會怕晚餐會遲到，所以決定打電話去晚飯時間由晚上七點改為七點半，接聽電話的男職員確定改時間冇問題，對方亦聲稱認得同行友人之前打過來訂位。門口有個安排座位兼收銀嘅眼鏡哥正在忙，而同時亦有其他食客等候「派位」，而當同行友人表明已訂位，眼鏡哥就問幾時訂，同行友人話「今日晏晝」，眼鏡哥哥竟然爆出一句「今日晏晝訂嘅就唔算訂位啦！」然後一副好厭煩嘅樣。不得了，本人即刻着火，今日晏晝訂位唔算訂位，那麼晏晝聽電話話可以安排的是人還是鬼？ ！覺得要幫我地安排座位好勉強佢咁！因為地點是油尖旺，同行友人貴免招致殺身之禍，唯有安靜坐下。投訴完畢，繼續食評....外面招牌典雅，入面的裝修也很仔細下單後已經提供更慘的禮堂，番茄薯仔魚湯，非常入味，應該冇味精。白鱔同白切雞已經沽清， 十分失望，唯有令作選擇。欖角蒸肉片豆腐味道恰到好處，呢度係以蒸嘅食物比較出名。跟餐嘅油菜係灼菜心，由於呢度唔做炒野，連菜都係灼菜，就食得健康一點豉油雞分量唔算多，但係都幾大件。可惜豉油味夠但係雞味唔夠，有點失望。最後叫多咗個豉汁蒸排骨，有點咸。蛋白杏仁茶質感好濃，多蛋白，但好似杏仁味不太夠，亦食唔出是否真的手磨，或者係因為過甜的緣故。同行友人因此只吃了半碗，並評論為不值$42。支持小店是本人一向的立場，但如果因為有米之蓮推介，食物尚算可以，有人幫襯，而覺得可以置服務態度於不顧的話，就太天真了。附近食肆林立，他們的食物亦非世界頂級，假如服務態度仍然維持這樣的話，相信很快就會沒有人光顧。簡單來說，食物下肚了，氣也下肚了，我和同行友人應該不會再來了…查看更多

同行友人從報道上得知有家兩夫婦開設的烏冬麵店:)，由筲箕灣開業不被看好到努力不懈成功在上環開設分店的故事。 星期六由於需要港島區辦事，特別過來試一試。餐廳在上環新紀元廣場一樓，坦白說如果從新紀元廣場德輔道一邊進入厦，幾乎無法通往，所以記得皇后大道中那邊過去。餐廳很細，大概有十幾張枱，周末中午時段過去不用等位，但相信平日返工日子午飯時間應該人會很多。牆上畫滿日本風味彩繪。同行友人很喜歡柴犬黑松露忌廉海鮮烏冬有黑松露、魚、帶子。個人認為海鮮嘅餸可以多少少種類，忌廉湯係夠味嘅，但係有少少滯。廣島蠔肉碎烏冬入面好驚喜，有4隻新鮮肥美嘅廣島蠔，湯底好鮮甜，清清地可以飲晒成碗，但係幾樣野放埋一齊成個配搭又好似冇乜特別，叫做不過不失。結論係小店努力值得嘉許，但係山長水遠特別過來的朋友，就未必會第二次過嚟了。…查看更多

星期六晚想搵返啲好嘢食，記起上次經過大埔有幾間日本菜好多人喺門口等，同行友人建議搵其中一間試一試水準如何。太和地鐵站步行約5分鐘來到德美壽司，位置處於街角，門外裝修華麗，掛滿日本特色燈籠。晚上八時半，門外等位的人不多，因為一早已訂好枱，但都等左10分鐘先有得坐低，好在餐廳安排左我地兩人坐四人檯，同行友人先覺得條氣順啲。餐廳入面裝修精緻，地方都算spacious，座位排得唔算太密，都ok舒適嘅:)。雖然第一印象唔錯，但坐落就覺得服務麻麻，上至經理、下至junior員工都少少遲緩，招呼客人嘅敏感度唔夠。我地坐喺屏風後面15分鐘都叫唔到人落單、餐廳方面亦無人過嚟問我地ready落單未；到我地終於叫到人，個同事又話叫第二個過嚟幫我地落，自己要執檯；跟住我地又再等，而經理當時好似游魂咁行過都唔知自己要做啲咩，要個執檯同事再提醒佢幫客落單！記得問職員攞Drink Menu，因為問係唔會主動俾你嘅。鐵板牛舌熱辣辣登場，口感爽脆，牛油味同牛脷配搭突出。本身睇圖以為好薄，但是都夠厚身，不過如果怕油嘅朋友就諗諗，始終牛油會比較肥。同行友人係腐皮粉絲，見到menu有自家製腐皮餃子好開心，即叫！點知嚟到先知係炸，都唔緊要，但係火喉控制唔好，炸到啲腐皮燶左！圖中腐皮黑色位並唔係豉油，係燶！土佐豆腐好味道！外脆內軟，豆腐味濃，個汁少少辣，成件事好夾！好食！海膽炒飯大大碗，分量足夠亦好足料，但略嫌濕咗少少，如果乾身少少就perfect。不過作為餐牌第二貴嘅炒飯$128，海膽嘅份量就少咗啲喇。日本青椒仔上枱唔夠熱，豚肉串燒用嘅係五花腩，略嫌鹹咗少少。雞腎串燒好勒，有少少太熟太乾。整體嚟講，串燒唔係佢地強項。壽司可以話係德美嘅拿手菜式，鱆紅魚壽司好新鮮，蔥吞拿魚腩軍艦簡直係超抵食，吞拿魚肉非常多，好似食漢堡包咁要三啖先食得晒！芥末八爪魚軍艦亦都相當之啲巨型，係好足料，八爪魚爽脆，但整體來講太咸。甜品方面得三款，選擇太少又唔吸引，令人失望！最後總結，呢間餐廳食物選擇夠多，當中以魚生壽司最出色。但食物整體嚟講都好濃味、太鹹，我地食食下都要叫嘢飲 — 而餐廳職員由頭到尾都無俾過drink menu 我地睇，要我地問先拎過嚟，服務真係麻麻。啲後生嘅上菜求其放，食完嘅碗碟又唔識收，連餐廳經理都做做下嘢出去食煙再入返嚟成身煙味咁繼續serve客，咁嘅服務真係唔夠專業，喺周圍都有食肆嘅太和區真係被扣晒分，唔夠競爭力，我諗我地都唔會再幫襯喇，寧願去試其他:(！…查看更多

星期六都要返工，星期日晚為咗迎接繁忙的新一周，又係出去覓食嘅時候。聽聞大埔有一間韓國餐廳炸雞唔錯，決定一試。上次經過見到好多人排隊，所以同行友人建議5:30出動，到達太和已經係6:30，已經差唔多full house!好彩兩位枱仲有最後一張， 唔使等！樓面一個女仔、三個男仔，男仔一律係韓國人，但唔係sell 靚仔㗎喎，係sell彬彬有禮、英文唔錯，溝通完全無問題。餐廳環境設計精美，放滿左復仇者聯盟嘅不同角色畫畫同埋手辦公仔。唯一美中不足係環境比較細， 啲枱擺得好密，冇乜私人空間，期待二人世界的朋友要諗諗了。店家好窩心，泡菜可以隨意refill。不過有客人會奇怪一坐低嗰碟得幾片仔、refill 之後就有座山仔，我地估係店家怕浪費，等make sure 客人鐘意食先𢳂大碟啲，呢個做法幾唔錯。泡菜酸、辣度調配得剛剛好，而且好爽脆，一開始食就會停唔到口:)。牛肉紫菜飯卷- 正常，可以話係不過不失，又可以話係無咩驚喜。紫菜卷有牛肉、蘿蔔、青瓜同蛋，牛肉唔係話特別靚，作為紫菜卷主菜，尚可。蛤蜊刀削麵 - 同行友人想食少啲辣嘢，所以叫左個全場得佢一個人叫嘅蛤蜊刀削麵。蛤蜊即係蜆，明明應該係主菜，但就得小蜆4、5隻，麵係炸醬麺嘅麵，無咩特別:(，唔好諗住有啖好味嘅湯飲，啲湯似碌麵水，偏杰身又太鹹。全晚最失望嘅食物，早知食炸醬麵好過。半分原味炸雞，即叫即炸熱辣辣。雞肉嫩滑，炸粉唔厚，值得一讚，再加埋個蜜糖芥辣醬簡直一流。遺憾嘅係冇啤酒配埋炸雞，否則簡直係完美。餐廳環境雖然細，但坐得ok，唔太嘈，只係太熱，一路食一路出汗，見其他檯嘅食客都要一路食一路撥涼。有少少名過其實，雖然係韓國人開，但係食物又唔見得非常出色，只屬不過不失。如果同區有其他韓國餐廳選擇，未必會再返嚟。但係作為支持小店嘅小丑寶寶🤡，希望你地繼續努力啦:)…查看更多

星期日晚，同行友人剛從北京出差回來。辛苦了一星期，吃了很多中菜，不想去太遠，決定在偏遠的粉嶺找好吃的東東。粉嶺沒有太多好吃的西餐，這一間位於粉嶺工業區工業大廈中的小西餐廳。之前已經來過一次吃午飯，覺得不錯，再來試一試晚飯。提一提各位，工業中心地址比較難行難揾，如果沒有開車，建議在粉嶺地鐵站坐的士。餐廳裝修算有心思，有牆上的繪畫和食物照片，很多都寫了WTF不過由於係開放式廚房，本身地方又唔大，所以比較長，如果想二人世界嘅朋友就諗諗先喇。本身以為星期日夜晚冇咩人會特登入工廠區食飯，但門口竟然不斷有人排隊，全場爆滿，所以都要等一陣。如果夜晚過嚟食，建議都係訂枱比較穩陣。🚶🏻🚶🏻🚶🏻🚶🏻🚶🏻Signature的威靈頓牛扒沒有了，有點失望:(羅宋湯每一個人都有，好濃好入味，有好多餸有牛腩、薯仔、蕃茄，夠熱，同行友人飲完好開心。紐西蘭肉眼個牛扒煎得啱啱好，點餐時叫7成生熟適中，肉質都OK ,但因為黑椒汁味道太重，搶了牛肉本身的鮮味:(。反而係個意粉水平幾高，乾身之餘唔會有太多忌廉汁將住。香煎帶子黑松露燉飯- 同行友人想食呢個係全場最貴嘅飯，因為有黑松露，但好可惜，完全冇黑松露嘅香味或者味道:(。不過，帶子好厚好肥美，煎得啱啱好、外脆內軟，加上個燉飯味道好豐富，同行友人本身驚個飯會有芝士或者太creamy ,但竟然唔係嗰回事，所以同行友人都可以清晒。雖然冇黑松露味，但係都原諒佢啦！芋圓奶茶—同行友人話呢個可以唔飲，雖然係新產品，而且係自家製，但係芋圓冇芋頭味、奶茶味都好淡，今次都算中伏。買到教訓，下次去呢種cafe，都應該只係飲咖啡。今次第二次食，覺得食物水準都維持到，只係職員歡容啲會更好！佢哋唔係冇禮貌，不過係面無表情囉⋯⋯笑多啲啦！…查看更多

星期六晚，放鬆少少食貴啲。嚟到銅鑼灣，由於同行友人需要修眉，所以book呢間日本大阪燒七點鐘啱啱好。地方細細，裝修精美:)，坐到大概2-30人到，比我想像中少。星期六日放鬆心情，食飯飲番支清酒係必須的。我同同行友人習慣凍飲，而今次叫左支月山，入口清純，味道唔算好重，男女皆宜。芥辣八爪魚芥辣夠味，八爪魚亦都爽口算係好新鮮。芝士蛋奄列，同行友人唔食芝士嘅都覺得OK ,因為芝士味唔太濃。不過整體來講就咸咗啲，味道清啲會更好、突出返啲芝士味。牛舌爽口，不過略嫌鹹咗少少同埋熟咗少少，可以生少少就perfect! 不過，點牛舌嘅芥辣先係亮點！關東煮出奇地好食, 得到同行友人歡心。叫左蘿蔔、豆腐、牛筋，蘿蔔豆腐煮得入味好食唔難，但竟然牛筋都做到肉嫰筋爽，值得一讚！個蝦燒得啱啱好，唔會太熟乾晒，留有肉汁。重點係佢連個蝦頭都燒得非常好，唔需要自己剝殼都可以食到個蝦頭嘅膏。豬肉大阪燒加左年糕，同行友人好鍾意年糕，但我就麻麻，因為「漿」住個口。我覺得加左年糕好唔夾，但係同行友人就非常歡喜。雖然整體嚟講都好食，但係豬肉份量唔多，要好細心先搵到。同行有人叫呢個燒甜薯雪糕不得了，牛奶雪糕味道香滑，燒薯竟然同雪糕出奇地夾，而雪糕嘅味道令人覺得係自家製。不過限時兩小時，訂枱嘅時候無講明，嚟到先至知。而餐廳方面真係會認真計時（雖然仲有空檯，而且無人等緊，但就會揸正嚟做 - 好有日本人性格），限時到之前15分鐘有職員提你last order。…查看更多

辛苦工作了一周，又係時間出動去食D好嘢。平時食嘢都比較急，星期六想搵一間唔係鬧市慢慢坐低食。網上見到大圍一間西餐小店所以試一試。餐廳環境比較黑暗，整體都算寬敞，但係油煙味比較重。油煙味隨着人客愈多，都愈來愈濃烈，開始去到一個接受唔到的程度，餐廳嘅抽風系統需要改善！個餐湯好稀，好似水咁，唔ok同行友人叫咗一個蜆肉意粉，賣相唔錯但係蜆肉好似比較少。蜆肉意粉有蒜頭洋蔥但都唔明點解唔香，嚴格來講成個意粉係冇味要靠辣椒仔来吊味！唯一好處係唔太油、份量夠。我叫左個澳洲肉眼扒七成熟。肉眼扒薄薄地都叫夠味，但係筋比較多，個BBQ醬汁調得幾好。同行友人叫咗個玫瑰latte。Rose latte 好飲！咖啡味突出，做到玫瑰味同咖啡味平均，缺點係冇奶泡嘅質感似氣泡，唔夠厚實！:(蜜瓜窩夫冇令人失望，蜜瓜好清甜，popcorn都夠脆，應該係之前有客人評價之後餐廳做左改善功夫！食物還算可以，價錢都還可以唔駛$300兩個人。最大敗筆係油煙味！…查看更多

過了繁忙的一周，又係時候出去搵好嘢食。同行友人尖沙咀剪頭髮，剪完順便過海去中環。同行友人的友人介紹了一間越南餐廳，一直想試，就趁今天晚上好好享受一下。原來呢間餐廳出名在冇加味精，相當有住家feel。有a la carte menu ,但係由於周六晚上冇理由唔飲杯酒，所以就選擇了佢哋嘅tasting menu。Wine tasting就係要慢慢食，佢哋菜單上到去有七八道菜，算唔少，所以仲有人幫你配埋酒，簡直係享受米紙卷嘅餡料係牛肉，好足料再配上自家製酸酸甜甜谢醬汁，夏天食好開胃感覺好清新。北海道元貝menu雖然寫錯左字，但係味道唔錯，大大隻個汁好好味，同行友人仲話要飲埋啲汁。Rice cake原本冇乜味，但係配上豬頸肉同肉鬆，當堂味道變得吸引，同行友人非常喜歡年糕，大喜。鴨胸沙律相比起其他有少少失色，原因係有啲鹹同埋好鴨胸份量比較少。我同同行友人食得太興奮，嘢食食得太快，酒仲未飲晒，已經冇嘢食，要齋隊酒。仲有鱸魚，肉質鮮甜同埋好滑，唯一美中不足就係有魚麟。無骨雞肉質算幾嫩，但係佢嘅餡料先至係精粹所在嚟越南餐廳食飯，好自然會想食一碗pho.... 但見餐牌冇。一問之下先知道原來餐廳跟足越南人傳統，夜晚係唔食pho的黑椒安格斯牛柳，味道夠，唔係好難，雖然配襯左啲泰式沙律，但係冷盤嘅時候已經食得，差不多沒有再碰。同行友人因為終於有飯食而覺得好興奮看似簡單的通菜加上芝麻，另有一番風味，而且煮得比較乾身和傳統的中國通菜有點不一樣。甜品係牛油果撻，唔太甜，味道啱啱好，連唔鍾意食甜品嘅我都試咗好多。總括來講係唔錯嘅，雖然價錢唔平，但係星期六日都要對自己好啲…查看更多